BTV NEWS

សម្ដេចធិបតី ហ៊ុន ម៉ាណែត៖ អាទិភាពរបស់រាជរដ្ឋាភិបាល គឺ ប្រទេសជាតិ,ប្រជាជន, ទឹកដី និង ឯករាជ្យភាពជាតិ

សម្ដេចធិបតី៖ យុទ្ធនាការកម្ចាត់ Online Scams ប៉ុន្មានខែចុងក្រោយនេះ បានស្ដារមុខមាត់កម្ពុជាមកវិញ

សម្ដេចធិបតី៖ កម្ពុជាជាសមាជិក WTO មិនអាចហាមឃាត់ការនាំចូលទំនិញពីប្រទេសដទៃបានទេ

សម្ដេចធិបតី៖ ឆ្នាំ២០២៩ កម្ពុជានឹងចាកចេញពីប្រទេសអភិវឌ្ឍន៍តិចតួចបន្តដំណើរទៅកាន់ប្រទេសអភិវឌ្ឍន៍

ព័ត៌មានសំខាន់ៗ

កូរ៉េខាងជើងបាញ់មីស៊ីលបាលីស្ទីក ៣គ្រាប់ ខណៈបញ្ជាក់ករណីស្លាប់លើកដំបូងដោយសារវីរុស COVID-19

កូរ៉េខាងជើង៖ កូរ៉េខាងត្បូងនិយាយថា កូរ៉េខាងជើងបានបាញ់មីស៊ីលបាលីស្ទីករយៈចម្ងាយខ្លីចំនួន ៣គ្រាប់ចូលសមុទ្រកាលពីថ្ងៃព្រហស្បតិ៍ ក្នុងការសាកល្បងជាបន្តបន្ទាប់ចុងក្រោយបំផុតនៃការសំញែងអាវុធនៅឆ្នាំនេះ ដែលបានធ្វើឡើងត្រឹមតែប៉ុន្មានម៉ោងប៉ុណ្ណោះ បន្ទាប់ពីប្រទេសនេះបានបញ្ជាក់ពីករណីឆ្លងលើកដំបូងនៃវីរុសកូរ៉ូណា ចាប់តាំងពីជំងឺរាតត្បាតសកលនេះបានផ្ទុះឡើង។ ការបាញ់នេះអាចបញ្ជាក់ពីការប្តេជ្ញាចិត្តរបស់កូរ៉េខាងជើង ដើម្បីបន្តដាក់សម្ពាធជាមួយនឹងកិច្ចខិតខំប្រឹងប្រែងរបស់ខ្លួនក្នុងការពង្រីកឃ្លាំងអាវុធរបស់ខ្លួន បើទោះបីជាមានការផ្ទុះឡើងនៃវីរុស ដើម្បីប្រមូលផ្តុំការគាំទ្រនៅពីក្រោយមេដឹកនាំ Kim Jong Un និងរក្សាសម្ពាធលើគូប្រជែងរបស់ខ្លួន ស្របពេលមានការទូតនុយក្លេអ៊ែរបានស្ងប់ស្ងាត់ជាយូរមកហើយ។ កូរ៉េខាងជើងបាននិយាយថា មនុស្ស ៦នាក់បានស្លាប់ ស្របពេលមានការផ្ទុះរាលដាលនៃជំងឺគ្រុនក្ដៅ មួយថ្ងៃបន្ទាប់ពីទទួលស្គាល់ថាមានការផ្ទុះរាលដាលនៃវីរុស COVID-19។កូរ៉េខាងជើងបាននិយាយនៅថ្ងៃសុក្រនេះថា មនុស្សចំនួន ១៨៧,០០០នាក់កំពុងត្រូវបានដាក់ឲ្យនៅដាច់ដោយឡែកនិងព្យាបាលអាការៈក្ដៅខ្លួន។ ទីភ្នាក់ងារសារព័ត៌មានកណ្ដាលកូរ៉េខាងជើងបាននិយាយថា ជំងឺគ្រុនក្ដៅដែលមិនទាន់អាចកំណត់ពីមូលហេតុដឹងនៅឡើយ បានឆ្លងរាលដាលទូទាំងប្រទេសចាប់ពីចុងខែមេសាមក។ ប្រភពដដែលនេះបានបង្ហាញថា មនុស្ស ៦នាក់បានស្លាប់ ម្នាក់ក្នុងចំណោមនោះត្រូវបានធ្វើតេស្តវិជ្ជមានវីរុស COVID-19 សាខាវីរុសបម្លែងខ្លួនថ្មី Omicron ប្រភេទ BA.2៕អត្ថបទ៖ សុខមាន

ទីប្រឹក្សាជាន់ខ្ពស់របស់លោក Putin ប្រាប់សម្ព័ន្ធណាតូឲ្យដកខ្លួន បើមិនចង់ជួបប្រទះសង្គ្រាមនុយក្លេអ៊ែរពេញបន្ទុក

រុស្ស៊ី៖ មន្ត្រីជាន់ខ្ពស់របស់រុស្ស៊ី និងជាទីប្រឹក្សាជិតស្និទ្ធរបស់លោកប្រធានាធិបតី Vladimir Putin បានព្រមានអំពី "សង្គ្រាមនុយក្លេអ៊ែរពេញបន្ទុក" ប្រសិនបើសម្ព័ន្ធណាតូបន្តសម្រុកបញ្ជូនអាវុធចូលអ៊ុយក្រែន។ លោក Dmitry Medvedev អនុប្រធានក្រុមប្រឹក្សាសន្តិសុខជាតិរុស្ស៊ីបានគំរាមភ្លាមៗ បន្ទាប់ពីហ្វាំងឡង់បានបោះជំហានមួយទៀតខិតទៅកាន់តែជិត ក្នុងការដាក់ពាក្យស្នើសុំចូលជាសមាជិកសម្ព័ន្ធភាពលោកខាងលិច។ អតីតប្រធានាធិបតីរុស្ស៊ីបាននិយាយនៅក្នុងសារ Telegram ថា “បណ្តាប្រទេសជាសមាជិកណាតូដែលសម្រុកដឹកអាវុធចូលអ៊ុយក្រែន ការបណ្ដុះបណ្ដាលកងទ័ពឲ្យចេះប្រើឧបករណ៍របស់លោកខាងលិច ការបញ្ជូនទាហានស៊ីឈ្នួល និងសមយុទ្ធនៃបណ្ដាប្រទេសសម្ព័ន្ធមិត្តនៅជិតព្រំដែនរបស់យើង បង្កើនលទ្ធភាពនៃជម្លោះដោយផ្ទាល់ និងបើកចំហរវាងណាតូ និងប្រទេសរុស្ស៊ី។ លោក Medvedev បានបន្ថែមថា ជម្លោះបែបនេះតែងតែមានហានិភ័យនៃការប្រែក្លាយទៅជាសង្គ្រាមនុយក្លេអ៊ែរពេញបន្ទុក។ ភាពតានតឹងនេះនឹងជាសេណារីយ៉ូដ៏មហន្តរាយសម្រាប់មនុស្សគ្រប់គ្នា៕អត្ថបទ៖ សុខមាន

រុស្ស៊ីព្រមានចាត់វិធានការសងសឹកតាមដំណាក់កាល បើហ្វាំងឡង់ចូលជាសមាជិកណាតូ

រុស្ស៊ី៖ រុស្ស៊ីបានរិះគន់ផែនការរបស់ប្រទេសហ្វាំងឡង់ ក្នុងការចូលជាសមាជិកភាពរបស់សម្ព័ន្ធយោធាណាតូដោយអះអាងថា ខ្លួននឹងត្រូវគេបង្ខំឲ្យចាត់វិធានការសងសឹក ប្រសិនបើប្រទេសអព្យាក្រឹត្យជាយូរមកហើយមួយនេះចូលជាសមាជិកសម្ព័ន្ធយោធានេះ។ ក្រសួងការបរទេសរុស្ស៊ីបាននិយាយក្នុងសេចក្ដីថ្លែងការណ៍កាលពីថ្ងៃព្រហស្បតិ៍ថា ការចូលជាសមាជិករបស់ប្រទេសហ្វាំងឡង់ជាមួយសម្ព័ន្ធណាតូ គឺជាការផ្លាស់ប្ដូរដ៏ឆាប់រហ័សក្នុងគោលនយោបាយការបរទេស របស់ប្រទេសនេះ។ រុស្ស៊ីនឹងត្រូវបង្ខំចាត់វិធានការសងសឹកជាដំណាក់កាល ទាំងបច្ចេកទេសយោធា និងសកម្មភាពផ្សេងទៀត ដើម្បីបញ្ឈប់ការគំរាមដល់សន្តិសុខជាតិរបស់ខ្លួនដែលចេះតែកើនឡើង។ សេចក្ដីថ្លែងការណ៍នេះមានឡើងភ្លាមៗបន្ទាប់ពីប្រធានាធិបតីហ្វាំងឡង់លោក Sauli Niinisto និងលោកស្រីនាយករដ្ឋមន្ត្រី Sanna Marin បាននិយាយថា ប្រទេសនេះមិនគួរពន្យារពេលក្នុងការដាក់ពាក្យស្នើសុំចូល ជាសមាជិករបស់សម្ព័ន្ធណាតូទៀតឡើយ។ ចំណែកសេតវិមានវិញនិយាយថា ក្រុង Washington នឹងគាំទ្ររាល់បណ្ដាប្រទេសនៅតំបន់អឺរ៉ុប ដែលចង់ចូលជាសមាជិករបស់សម្ព័ន្ធយោធាដឹកនាំដោយសហរដ្ឋអាមេរិក។ វិមានក្រឹមឡាំងពុំបានបញ្ជាក់ច្បាស់ទេថា វិធានការជាក់លាក់អ្វីដែលខ្លួនកំពុងពិចារណា ទោះជាក្រុមមន្ត្រីធ្លាប់លើកឡើងថា ក្រុង Moscow នឹងពង្រឹងវត្តមានរបស់ខ្លួននៅក្នុងតំបន់សមុទ្របាល់ទិក រួមទាំងត្រៀមក្បាលគ្រាប់នុយក្លេអ៊ែរផង។ ប្រទេសហ្វាំងឡង់ដែលកំណត់ព្រំដែនប្រវែង ១,៣៤០គីឡូម៉ែត្រជាប់ជាមួយប្រទេសរុស្ស៊ី មិនព្រមចូលជាសមាជិកអង្គការណាតូជាយូរមកហើយ ហើយបានរក្សាជំហរមិនចូលបក្សសម្ព័ន្ធយោធារបស់ខ្លួនចាប់តាំងពីបញ្ចប់សង្គ្រាមលោកលើកទីពីរ។ ប៉ុន្តែក្រោយការវាយប្រហាររបស់រុស្ស៊ីលើអ៊ុយក្រែនកាលពីខែកុម្ភៈ ការគាំទ្រសម្រាប់សមាជិកភាពណាតូក្នុងប្រទេសហ្វាំងឡង់ ក៏ដូចជានៅស៊ុយអែតបានកើនឡើងយ៉ាងខ្លាំង៕អត្ថបទ៖ សុខមាន

ក្រសួងការបរទេសកម្ពុជា-អាមេរិក ឯកភាពរក្សាឱ្យមានទំនាក់ទំនងល្អជាមួយគ្នាលើគ្រប់វិស័យ

ភ្នំពេញ៖ នៅថ្ងៃទី ១១ ខែឧសភា ឆ្នាំ ២០២២ ឯកឧត្តម ប្រាក់ សុខុន ឧបនាយករដ្ឋមន្ត្រី និងរដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា ជួបពិភាក្សាការងារទ្វេភាគីជាមួយលោកជំទាវ Wendy Sherman អនុរដ្ឋមន្ត្រី ការបរទេស នៃសហរដ្ឋអាមេរិក នៅក្រសួងការបរទេសអាមេរិក រដ្ឋធានីវ៉ាស៊ីនតោន នៅអំឡុងពេលមុនកិច្ចប្រជុំកំពូលពិសេសអាស៊ាន-អាមេរិក។ឯកឧត្តមឧបនាយករដ្ឋមន្ត្រី បានទទួលស្គាល់ថា ក្នុងរយៈពេលជាង៧០ឆ្នាំនៃទំនាក់ទំនង ទោះបីជាមាន ទស្សនៈខុសគ្នាខ្លះក៏ដោយ ក៏មានការខិតខំប្រឹងប្រែងយ៉ាងពិតប្រាកដ និងជាប់លាប់ក្នុងការពង្រឹងមិត្តភាព និងកិច្ចសហប្រតិបត្តិការរវាងប្រទេសទាំងពីរឱ្យកាន់តែស៊ីជម្រៅ។ ពាណិជ្ជកម្ម គឺជាគំរូដ៏ល្អបំផុតនៃកិច្ចសហប្រតិបត្តិការដ៏ល្អដែលផ្តល់ផលប្រយោជន៍ដល់ភាគីទាំងពីរ ជាពិសេសកម្មករស្ត្រីដ៏ច្រើនលើសលុប នៅក្នុងវិស័យវាយនភណ្ឌ ស្បែកជើង និងទំនិញធ្វើដំណើរ។ វិស័យសំខាន់ៗផ្សេងទៀតរួមមានការប្រយុទ្ធប្រឆាំងនឹងជំងឺរាតត្បាតកូវីដ-១៩, ការស្វែងរក អដ្ឋិធាតុទាហានអាមេរិក, ការប្រឆាំងភេរវកម្ម, ការធ្វើមាតុភូមិនិវត្តន៍ពលរដ្ឋខ្មែរ , ប្រតិបត្តិការរក្សាសន្តិភាព, កិច្ចសហប្រតិបត្តិការវប្បធម៌ ជាពិសេសការអភិរក្ស និងការពារបេតិកភណ្ឌវប្បធម៌ ជាដើម ។លោកជំទាវអនុរដ្ឋមន្ត្រី បានគោរពកោតសរសើរ កម្ពុជាចំពោះយុទ្ធនាការចាក់វ៉ាក់សាំងដែល ទទួលបានជោគជ័យយ៉ាងត្រចះត្រចង់ និងបានសម្តែងអំណរគុណ ចំពោះសកម្មភាពឈរលើ គោលការណ៍របស់កម្ពុជា ក្នុងការគាំទ្រសេចក្តីសម្រេចរបស់មហាសន្និបាតអង្គការសហប្រជាជាតិស្តីពីអ៊ុយក្រែន ដោយគិតគូរពីគោលការណ៍នៃការគោរពបូរណភាពទឹកដី និងការជៀសវាងការប្រើកម្លាំងប្រឆាំងនឹងរដ្ឋសមាជិកទាំងអស់ នៃ អង្គការសហប្រជាជាតិ។ លោកជំទាវ បានសម្តែងការគាំទ្ររបស់សហរដ្ឋអាមេរិកសម្រាប់ភាពជាប្រធាន អាស៊ាន របស់កម្ពុជាក្នុងឆ្នាំនេះ និងបានថ្លែងអំណរគុណកម្ពុជាសម្រាប់ការគាំទ្រដល់ការសម្របសម្រួលកិច្ចប្រជុំកំពូលពិសេសអាស៊ាន-សហរដ្ឋអាមេរិកនាពេលខាងមុខ។ លោកជំទាវក៏បានថ្លែងអំណរគុណចំពោះ ឯកឧត្តមឧបនាយករដ្ឋមន្ត្រី ដែលបានបំពេញតួនាទីជាប្រេសិត ពិសេសនៃប្រធានអាស៊ានលើបញ្ហាមីយ៉ាន់ម៉ា និងបានជំរុញឱ្យមានការប្រាស្រ័យទាក់ទង ជាមួយគ្រប់ភាគីពាក់ព័ន្ធទាំងអស់ ។ លោកជំទាវ ក៏បានលើកឡើងពីកង្វល់មួយចំនួនទាក់ទងនឹងការអភិវឌ្ឍមូលដ្ឋានទ័ពជើងទឹករាម និងស្ថានភាព លទ្ធិប្រជាធិបតេយ្យរបស់កម្ពុជា។ជាការឆ្លើយតប ឯកឧត្តមឧបនាយករដ្ឋមន្ត្រី បានលើកឡើងថា តាមរយៈបទពិសោធន៍ដ៏ឈឺចាប់ពីជម្លោះ និងអំពើប្រល័យពូជសាសន៍អស់រយៈកាល ៣០ឆ្នាំកន្លងមក កម្ពុជាតែងតែ ប្រកាន់យកនូវវិធីសាស្រ្តប្រកប ដោយសង្គតិភាព ក្នុងការ ការពារសន្តិភាព និង គោរពច្បាប់អន្តរជាតិ និងធម្មនុញ្ញអង្គការសហប្រជាជាតិ នៅក្នុងការអនុវត្ត នយោបាយការបរទេសរបស់ខ្លួន ជាពិសេសនៅក្នុងបរិបទនៃបញ្ហាមីយ៉ាន់ម៉ា និង ជម្លោះនៅអ៊ុយក្រែន។ចំពោះ ការអភិវឌ្ឍមូលដ្ឋានទ័ពជើងទឹករាម ឯកឧត្តមឧបនាយករដ្ឋមន្ត្រី បានអះអាង សាជាថ្មី អំពីការប្រកាន់ខ្ជាប់របស់កម្ពុជាចំពោះគោលការណ៍ រដ្ឋធម្មនុញ្ញរបស់ខ្លួន ដែល ហាមឃាត់វត្តមានយោធាបរទេស។ កាយវិការដែលកម្ពុជាបាន ធ្វើឡើង ក្នុងការអនុញ្ញាតឱ្យមានដំណើរទស្សនកិច្ចនានា ទៅកាន់មូលដ្ឋាននេះជាច្រើនលើកច្រើនសា រ គឺជាកាយវិការ ដែល មិនធ្លាប់មានសម្រាប់ ប្រទេសនានា បើពិនិត្យ មើល ពី ទិដ្ឋភាព ក្នុង វិស័យយោធា។អំពីស្ថានភាពលទ្ធិប្រជាធិបតេយ្យ ឯកឧត្តមឧបនាយករដ្ឋមន្ត្រី បានពន្យល់ថា ទោះបីលទ្ធិប្រជាធិប-តេយ្យ នៅកម្ពុជាមាន ភាពក្មេងខ្ចី ក៏ប្រទេសកម្ពុជាបានរៀបចំ ការ បោះឆ្នោតយ៉ាង ទៀងទាត់ចាប់ តាំងពីឆ្នាំ១៩៩៣ ហើយការបោះឆ្នោតទាំងនោះត្រូវបានអ្នកសង្កេតការណ៍ជាតិ និងអន្តរជាតិ ទទួលស្គាល់ថា មាន ភាព សេរី យុត្តិធម៌ តម្លាភាព សន្តិភាព និងសណ្តាប់ធ្នាប់ល្អ។ លទ្ធិប្រជាធិបតេយ្យសេរីពហុបក្សតែងតែត្រូវបានរំលេច នៅក្នុងការបោះឆ្នោតទាំងនោះ ហើយការបោះឆ្នោតឃុំសង្កាត់នាពេលខាងមុខនឹង ផ្តល់វេទិកាសម្រាប់គណបក្សចំនួន ១៧ ចូលរួមប្រកួតប្រជែង។ ស្ថាប័នសារព័ត៌មាន ក្នុងទម្រង់ បោះពុម្ព និងឌីជីថល មានជាង២០០០, អង្គការក្រៅរដ្ឋាភិបាលជាង ៦០០០, សហជីពជាង ៦០០០ មានន័យថា រោងចក្រខ្លះមាន សហជីព៥ ក្នុងរោងចក្រតែមួយ គឺជាតថភាព ជាក់ស្តែងនៃលំហសេរីភាព និងវប្បធម៌ប្រជាធិបតេយ្យរបស់កម្ពុជា។ យ៉ាង ណា ក៏ ដោយ ឯកឧត្តមឧបនាយករដ្ឋមន្ត្រី បាន លើក ឡើង ថា សិទ្ធិ និង សេរីភាព មិន មែនជាការគេចវេសពី កាតព្វកិច្ច គោរព ច្បាប់ នោះ ទេ។ឯកឧត្តមឧបនាយករដ្ឋមន្ត្រី ក៏បានថ្លែងអំណរគុណចំពោះការគាំទ្ររបស់សហរដ្ឋអាមេរិកចំពោះការងាររបស់ប្រេសិត ពិសេសស្តីពី បញ្ហា មីយ៉ាន់ម៉ា ហើយបានរំលឹកឡើងវិញនូវការប្តេជ្ញាចិត្តរបស់កម្ពុជា ក្នុងការស្នើសុំឱ្យមានកិច្ចប្រជុំជាមួយគ្រប់ភាគីពាក់ព័ន្ធទាំងអស់ ជាពិសេសតួអង្គ ដែលកំពុងស្ថិតនៅក្នុង ប្រទេសមីយ៉ាន់ម៉ា ដូចជា លោកស្រី អោង សាន់ស៊ូជី និង លោក អតីតប្រធានាធិបតី វីន មីន ដើម្បីជំរុញ វឌ្ឍនភាពនៃ អាទិភាពក្នុង ការបញ្ឈប់អំពើហឹង្សា ការផ្តល់ជំនួយមនុស្សធម៌ និងកិច្ចសន្ទនានយោបាយប្រកបដោយបរិយាប័ន្ន ។ កម្ពុជានឹងបន្តការប្ដេជ្ញាចិត្តរបស់ខ្លួន ចំពោះវិធីសាស្រ្តដែលដើរ មួយជំហានម្តងៗ និងការ ផ្តោតលើសកម្ម ភាពជាក់ស្តែង តាមរយៈការអនុវត្តយន្តការ កសាងទំនុកចិត្ត និងភាពជឿជាក់ ក្នុងចំណោមភាគីពាក់ព័ន្ធផ្សេងៗ៕

ទីភ្នាក់ងារជនភៀសខ្លួនរបស់ UN និយាយថា ជនភៀសខ្លួនជាង ៦លាននាក់បានរត់ចេញពីសង្គ្រាមនៅអ៊ុយក្រែន

អ៊ុយក្រែន៖ យោងតាមទិន្នន័យពីទីភ្នាក់ងារទទួលបន្ទុកជនភៀសខ្លួន របស់អង្គការសហប្រជាជាតិឲ្យដឹងថា ជនភៀសខ្លួនជាង ៦លាននាក់បានរត់គេចចេញពីសង្គ្រាមក្នុងប្រទេសអ៊ុយក្រែន គិតចាប់ពីការវាយប្រហាររបស់រុស្ស៊ីបានចាប់ផ្ដើមកាលពីថ្ងៃទី២៤ ខែកុម្ភៈ។ អង្គការសហប្រជាជាតិបានបង្ហាញកាលពីថ្ងៃព្រហស្បតិ៍ថា មនុស្សសរុបចំនួន ៦,០២៩,៧០៥នាក់បានរត់គេចចេញពីប្រទេសអ៊ុយក្រែនគិតត្រឹមថ្ងៃទី១១ ខែឧសភាសប្ដាហ៍នេះ។ យោងតាមគេហទំព័ររបស់ទីភ្នាក់ងារទទួលបន្ទុកជនភៀសខ្លួនអង្គការសហប្រជាជាតិឲ្យដឹងថា ជនភៀសខ្លួនភាគច្រើនបានធ្វើដំណើរទៅកាន់បណ្ដាប្រទេសជិតខាងអ៊ុយក្រែន មុនពេលបន្តដំណើរទៅមុខ ខណៈប្រទេសប៉ូឡូញកំពុងទទួលចំនួនជនភៀសខ្លួនអ៊ុយក្រែនច្រើនជាងគេបំផុត។ស្ត្រី និងកុមារមានប្រមាណ 90% នៃជនភៀសខ្លួនទាំងអស់ដោយសារបុរសអ៊ុយក្រែនមានអាយុចន្លោះពី ១៨ ដល់ ៦០ឆ្នាំមិនអាចឲ្យចាកចេញពីប្រទេសបាន ព្រោះតែត្រូវចូលបម្រើកងទ័ព។ នៅក្នុងរយៈពេលពេញមួយខែមីនា ជនជាតិអ៊ុយក្រែនជិត ៣.៤លាននាក់បានរត់ចេញពីប្រទេសនេះ។ ទិន្នន័យនោះបានធ្លាក់ចុះប្រមាណ ១.៥លាននាក់កាលពីខែមេសា៕អត្ថបទ៖ សុខមាន

ប្រធានាធិបតីអាមេរិក និងឥស្សរជនជាន់ខ្ពស់អាស៊ាន-អាមេរិក សុទ្ធតែសម្តែងសមាណទុក្ខជូនសម្តេចតេជោ ហ៊ុន សែន ចំពោះមរណភាពសម្តេចឧត្តមទេពញាណ ហ៊ុន ណេង

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី បានសរសេរលើបណ្តាញសង្គម Facebookផ្លូវការសម្តេចនៅព្រឹកថ្ងៃទី១៣ ខែឧសភា ឆ្នាំ២០២២នេះថា ប្រធានាធិបតីអាមេរិក ចូ បៃដិន និងឥស្សរជនជាន់ខ្ពស់អន្តរជាតិអាស៊ាន-អាមេរិក បានសម្តែងសមាណទុក្ខជូនសម្តេចតេជោ ហ៊ុន សែន ចំពោះមរណភាពសម្តេចឧត្តមទេពញាណ ហ៊ុន ណេង ដែលជាបងប្រុសបង្កើតរបស់សម្តេច។យោងតាមខ្លឹមសារទាំងស្រុងសម្តេចតេជោ ហ៊ុន សែន បានបញ្ជាក់ថា៖ បងប្រុសបន្ទាប់ពីបងចែកឋានដោយមិនបានលា ឬផ្តាំផ្ញើប្រពន្ធកូន ចៅ និងបងប្អូនញាតិមិត្តក៏ដោយចុះ តែមរណភាពរបស់បងត្រូវបានព្រះមហាក្សត្រ និងព្រះមាតាជាតិព្រះប្រទានព្រះរាជសាររំលែកទុក្ខ។ព្រះមហាក្សត្រជាទីសក្ការៈបានប្រោសប្រទានគោរម្យងារជូនបងជាសម្តេចថែមទៀតផង។ ថ្នាក់ដឹកនាំគ្រប់លំដាប់ថ្នាក់ទាំងថ្នាក់ជាតិនិងថ្នាក់ក្រោមជាតិព្រមទាំងកម្លាំងប្រដាប់អាវុធគ្រប់ប្រភេទនិងគ្រប់ជាន់ថ្នាក់បានផ្ញើសាររំលែកទុក្ខនិងចូលរួមគោរពវិញាណក្ខន្ធ ក៏ដូចជាចូលរួមបុណ្យសពបង។ព្រះសង្ឃ និងប្រជាជន ក៏បង្ហាញសមាណចិត្តអាណិតស្រឡាញ់បងនិងក្រុមគ្រួសារ។ពេលប្អូនមកកាន់សហរដ្ឋអាមេរិក ដើម្បីចូលរួមប្រជុំអាស៊ាន-អាមេរិកថ្នាក់ដឹកនាំអាស៊ានចូលរួមមរណទុក្ខជាថ្មីម្តងទៀតបន្ទាប់ពីបញ្ជូនសារលិខិតរំលែទុក្ខលើកមុន។ ពេលជំនួបរវាងថ្នាក់ដឹកនាំអាស៊ាន ជាមួយថ្នាក់ដឹកនាំធុរកិច្ចអាមេរិក អ្នកសម្របសម្រួលកម្មវិធីឆ្លៀតសំដែងនូវមរណទុក្ខក្នុងអង្គប្រជុំផ្លូវការ។ លើសពីនេះ អ្វីដែលខ្ញុំភ្ញាក់ផ្អើលនិងរំភើបនោះប្រធានាធិបតីសហអាមេរិកចូ បៃដិន(Joe Biden)តែម្តង ដែលនិយាយមកកាន់ខ្ញុំថា (សូមចូលរួមរណទុក្ខចំពោះបងប្រុសរបស់ឯកឧត្តម)។នេះជាពាក្សដែលគាត់និយាយមុនគេបន្ទាប់ពីគាត់អានសុន្ទរកថាក្នុងនាមប្រធានាធិបតីអាមេរិក ឯខ្ញុំអានសុន្ទរកថាក្នុងនាមជាប្រធានអាស៊ាន និងប្រធានាធិបតីឥណ្ឌូនេសុីអានសុន្ទរកថា ក្នុងនាមប្រទេសសម្របសម្រួលអាស៊ាន-អាមេរិក។ គាត់ជាមនុស្សពោពេញដោយមនោសញ្ចេតនា គួរឱ្យគោរពដោយសារគាត់ធ្លាប់បាត់បង់កូនប្រពន្ធ និងបងប្អូនដែរ ។ ដូចនេះគាត់យល់ពីអារម្មណ៍សោកសៅរបស់ខ្ញុំនៅពេលនេះ ហើយដែលគាត់បាននិយាយរឿងទាំងនេះមកកាន់ខ្ញុំ។ខាងភាគីសហរដ្ឋអាមេរិកដែលបានបញ្ចេញយោបល់សុទ្ធតែបានវាយតម្លៃខ្ពស់ចំពោះការខិតខំរបស់ខ្ញុំមកសហរដ្ឋអាមេរិក ដើម្បីរួមចំណែកសម្រាប់ការសម្រេចបានលទ្ធផលនៃការប្រជុំកំពូលពិសេសអាស៊ាន-អាមេរិក។ សូមវិញាណក្ខន្ធបងប្រុសទៅឱ្យបានស្ងប់ចុះ៕

សម្តេចតេជោ ហ៊ុន សែន និងប្រមុខដឹកនាំប្រទេសអាស៊ាន ត្រូវបានទទួលគារវកិច្ចស្វាគមន៍យ៉ាងកក់ក្ដៅបំផុតពីលោក Joh Biden

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រី និងជាសហប្រធាននៃកិច្ចប្រជុំកំពូលអាស៊ាន-អាមេរិក រួមនឹងប្រមុខដឹកនាំអាស៊ាន ទាំងអស់ ត្រូវបានទទួលគារវកិច្ចស្វាគមន៍យ៉ាងកក់ក្ដៅបំផុតដោយលោក ប្រធានាធិបតីសហរដ្ឋអាមេរិក Joh Biden នៅសេតវិមាន(White House) នៅរដ្ឋធានីវ៉ាស៊ីនតោនឌីស៉ី សហរដ្ឋអាមេរិក, ថ្ងៃទី១២ ឧសភា ឆ្នាំ២០២២។

ក្រុមហ៊ុនទំនាក់ទំនងសាធារណៈអាមេរិក សន្យាជំរុញដល់ការផ្សព្វផ្សាយឱ្យផ្សាយនូវអ្វីដែលជាការពិតពីកម្ពុជា ជាពិសេសពាក់ព័ន្ធការអភិវឌ្ឍ និងភាពរីកចម្រើននៅកម្ពុជា

ភ្នំពេញ៖ នៅព្រឹកថ្ងៃទី១២ ខែឧសភា ឆ្នាំ២០២២នេះ (ម៉ោងនៅក្រុងវ៉ាស៊ីនតោន សហរដ្ឋអាមេរិក) សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានទទួលជួបពិភាក្សាការងារជាមួយ លោក មីសែល ភីទ្រុសហ្សិលឡូ (Michael Petruzzello)ប្រធាន ក្រុមហ៊ុន ទំនាក់ទំនងសាធារណៈ (PR Firm-Qorvis Communication) ។ នៅក្នុងជំនួបនេះ ប្រធានក្រុមហ៊ុនទំនាក់ទំនងរបស់អាមេរិក បានថ្លែងអំណរគុណសម្តេចតេជោ ហ៊ុន សែន សម្រាប់ការផ្តល់ឱកាសឱ្យរូបលោកបានជួបសម្តែងការគួរសម និងពិភាក្សាការងារមួយចំនួន។ លោក មីសែល ភីទ្រុសហ្សិលឡូ បានចាត់ទុកដំណើរទស្សនកិច្ចរបស់សម្តេចតេជោនៅលើទឹកដីអាមេរិកនាពេលនេះ ជាដំណើរទស្សនកិច្ចដ៏ល្អបំផុត។លោក មីសែល ភីទ្រុសហ្សិលឡូ បានជម្រាបសម្តេចតេជោថា បច្ចុប្បន្នប្រព័ន្ធផ្សព្វផ្សាយមានភាពទូលំទូលាយ ហើយតែមានការចង់ដឹងព័ត៌មាននានាពាក់ព័ន្ធនឹងប្រទេសកម្ពុជា។ លោកបានលើកឡើងថា ក្រុមការងាររបស់លោកធ្លាប់បានមកកាន់កម្ពុជាដោយផ្ទាល់ ហើយបានឃើញពីវឌ្ឍនភាព និងការរីកចម្រើនរបស់កម្ពុជា។ ភាពរីកចម្រើននេះ ក៏ត្រូវបានបង្ហាញតាមរយៈបណ្តាញផ្សព្វផ្សាយផងដែរ។ លោកបានលើកឡើងថា កម្ពុជា គួរបន្តផ្សព្វផ្សាយឱ្យបានកាន់តែច្រើនថែមទៀត នូវការរីកចម្រើនរបស់កម្ពុជា។ លោកក៏ចង់ឃើញកម្ពុជា បង្កើនការបណ្តុះបណ្តាលអ្នកនាំពាក្យ និងតំណាងរបស់កម្ពុជានៅគ្រប់វិស័យទាំងអស់ ដើម្បីបង្កើនសមត្ថភាពក្នុងការបង្ហាញ និងឆ្លើយតបបញ្ហាពាក់ព័ន្ធរបស់កម្ពុជាទៅកាន់ពិភពលោក។ជាការឆ្លើយតប សម្តេចតេជោ ហ៊ុន សែន បានគូសបញ្ជាក់ទៅកាន់ លោក មីសែល ភីទ្រុសហ្សិលឡូ ថា កម្ពុជានាពេលបច្ចុប្បន្ន មានវឌ្ឍនភាព រីកចម្រើន និងទទួលបានជោគជ័យជាច្រើនក្នុងកិច្ចការអភិវឌ្ឍន៍។ សម្តេចតេជោ បានបញ្ជាក់ថា ជារឿងសំខាន់ណាស់ចំពោះការងារផ្សព្វផ្សាយនូវអ្វីដែលជាតថភាពជាក់ស្តែងរបស់កម្ពុជា។សម្តេចតេជោនាយករដ្ឋមន្ត្រី បានលើកឡើងថា ស្ថានភាពរបស់កម្ពុជានាពេលបច្ចុប្បន្ន មិនដូចអ្វីដែលលើកឡើងនៅទំព័រសារព័ត៌មានប្រឆាំងនឹងកម្ពុជានោះទេ។ សម្តេចតេជោ ក៏បានជំរុញឱ្យប្រព័ន្ធផ្សព្វផ្សាយរបស់អាមេរិកទស្សនកិច្ច និងសរសេរការពិតរបស់កម្ពុជា។ ពាក់ព័ន្ធការបណ្តុះបណ្តាលអ្នកនាំពាក្យវិញ សម្តេចតេជោនាយករដ្ឋមន្ត្រី បានលើកឡើងថា កម្ពុជាកំពុងជំរុញការបណ្តុះបណ្តាលមន្ត្រីអ្នកនាំពាក្យឱ្យមានសមត្ថភាពកាន់តែខ្ពស់ ក្នុងការផ្តល់ព័ត៌មានជាក់ស្តែងស្តីពីការរីកចម្រើនរបស់កម្ពុជា។ សម្តេចតេជោនាយករដ្ឋមន្ត្រី បានបញ្ជាក់ថា កម្ពុជាមិនចង់ឱ្យផ្សព្វផ្សាយនូវអ្វីដែលហួសពីការពិតរបស់កម្ពុជានោះដែរ ពោលគឺផ្សាយត្រឹមស្ថានភាពជាក់ស្តែងរបស់កម្ពុជាតែប៉ុណ្ណោះ។ សម្តេចតេជោ បានបញ្ជាក់ថា កម្ពុជាបានរងនូវអយុត្តិធម៌ច្រើនណាស់ កើតចេញពីការផ្សព្វផ្សាយព័ត៌មានមិនពិត ប្រាស់ចាកពីសភាពពិតនៅកម្ពុជា។ សម្តេចតេជោ បានលើកឡើងថា ការបណ្តុះបណ្តាលមន្ត្រីអ្នកនាំពាក្យជារឿងសំខាន់ណាស់សម្រាប់កម្ពុជា ដើម្បីពាំនាំការពិតរបស់កម្ពុជាទៅកាន់ពិភពលោក។ពាក់ព័ន្ធការផ្សព្វផ្សាយនេះ សម្តេចតេជោនាយករដ្ឋមន្ត្រី ក៏បានលើកឡើងដែរថា មានស្ថាប័នអន្តរជាតិមួយចំនួនតែងតែយកការផ្សព្វផ្សាយព័ត៌មានជាមូលដ្ឋានក្នុងការវាយតម្លៃរបស់ខ្លួន ហើយនាំឱ្យការវាយតម្លៃមិនបានត្រឹមត្រូវ ព្រោះព័ត៌មានដែលគេយកជាមូលដ្ឋាន ជាប្រភពផ្សព្វផ្សាយមិនបានឆ្លុះបញ្ចាំងពីការពិតនៅកម្ពុជា។តបនឹងអ្វីដែលសម្តេចតេជោ បានលើកឡើងនេះ លោក មីសែល ភីទ្រុសហ្សិលឡូ បានសន្យាជួយជំរុញដល់ការផ្សព្វផ្សាយឱ្យផ្សាយនូវអ្វីដែលជាការពិតពីកម្ពុជា ជាពិសេសពាក់ព័ន្ធការអភិវឌ្ឍ និងភាពរីកចម្រើននៅកម្ពុជា។លោក បានលើកឡើងថា តាមរយៈដំណើរទស្សនកិច្ចរបស់ក្រុមការងារលោកនៅកម្ពុជា គឺបានមើលឃើញថា កម្ពុជាពិតជាមានសន្តិភាព ហើយមានការរីកចម្រើន។ ចំណុចល្អទាំងនេះ ចាំបាច់ត្រូវឱ្យពិភពលោកបានដឹង។ក្នុងជំនួបសម្តេចតេជោនាយករដ្ឋមន្ត្រី ក៏បានជម្រាបលោក មីសែល ភីទ្រុសហ្សិលឡូ ពីភាពជោគជ័យរបស់កម្ពុជាក្នុងការប្រយុទ្ធប្រឆាំងនឹងជំងឺកូវីដ១៩ ក៏ដូចជាការងារចាក់វ៉ាក់សាំងបង្ការជំងឺកូវីដ១៩ជូនប្រជាពលរដ្ឋ។ សម្តេចតេជោ ក៏បានបញ្ជាក់នូវគោលជំហររបស់កម្ពុជា ពាក់ព័ន្ធដំណើរការប្រជាធិបតេយ្យ និងការងារបោះឆ្នោតនៅកម្ពុជា, គោលជំហរពាក់ព័ន្ធសង្គ្រាមរុស្ស៉ី និងអ៊ុយក្រែន ក៏ដូចជាជំហរក្នុងការធ្វើជាប្រធានអាស៊ាន និងការប្រឹងប្រែងដោះស្រាយបញ្ហារបស់មីយ៉ាន់ម៉ា ផងដែរ៕

សម្តេចតេជោ ហ៊ុន សែន ទទួលជួបពិភាក្សាការងារជាមួយក្រុមហ៊ុនប្រឹក្សាយោបល់ និងបញ្ចុះបញ្ចូលផ្នែកច្បាប់

ភ្នំពេញ៖ នៅព្រឹកថ្ងៃទី១២ ខែ ឧសភា ឆ្នាំ២០២២(នៅរដ្ឋធានី វ៉ាស៊ីនតោនសហរដ្ឋអាមេរិក) សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានទទួលជួបពិភាក្សាការងារជាមួយលោក ស្កុត ដេវីដ ផាវិន (Scott David Parven) តំណាងក្រុមហ៊ុនប្រឹក្សាយោបល់ និងបញ្ចុះបញ្ចូលផ្នែកច្បាប់របស់អាមេរិក ។ នៅក្នុងជំនួបនេះ លោក ស្កុត ដេវីដ ផាវិន បានជម្រាបសម្តេចតេជោនាយករដ្ឋមន្ត្រីថា កន្លងមកក្រុមការងាររបស់លោកបានធ្វើការងារជាច្រើនជាមួយស្ថានទូតកម្ពុជាប្រចាំនៅអាមេរិក ដើម្បីជំរុញឱ្យទំនាក់ទំនងរវាងកម្ពុជា និងអាមេរិក មានភាពល្អប្រសើរ។ បន្ថែមពីលើនោះ ក្រុមហ៊ុនរបស់លោក បានទាក់ទងជាមួយថ្នាក់ដឹកនាំរបស់អាមេរិក នៅស្ថាប័នសភា ក៏ដូចជារដ្ឋាភិបាល ធ្វើយ៉ាងណាឱ្យអាមេរិកយល់ពីជំហររបស់កម្ពុជាទាំងទំនាក់ទំនងទ្វេភាគី ការងារអាស៊ាន ការងារអន្តរជាតិ។ ជាពិសេសគោលជំហររបស់កម្ពុជាពាក់ព័ន្ធការឈ្លានពានរបស់រុស្ស៉ី លើអ៊ុយក្រែន ការបម្រែបម្រួលអាកាសធាតុ ពាណិជ្ជកម្ម និងការខិតខំរបស់កម្ពុជាខាងផ្នែកមនុស្សធម៌។ លោក ស្កុត បានឲ្យដឹងទៀតថា តាមរយៈជំនួបជាមួយថ្នាក់ដឹកនាំស្ថាប័នសភា និងរដ្ឋាភិបាលអាមេរិកនោះ លោកបានគូសរំលេចថា អ្វីដែលកម្ពុជាបានធ្វើនាពេលកន្លងមកនេះ ជារឿងដ៏ល្អ ដែលគួរតែអបអរសាទរ និងផ្តល់តម្លៃសម្រាប់កម្ពុជា។នៅចំពោះថ្នាក់ដឹកនាំ និងសហការីក្រុមហ៊ុនបញ្ចុះបញ្ចូលរបស់អាមេរិកនេះ សម្តេចតេជោ ហ៊ុន សែន បានគូសរំលេចថា ទំនាក់ទំនងរវាងកម្ពុជា និងអាមេរិក នាពេលបច្ចុប្បន្ន បានឈានដល់កម្រិតល្អប្រសើរមួយមិនធ្លាប់មានក្នុងប្រវត្តិសាស្ត្រនៃទំនាក់ទំនងរវាងប្រទេសទាំងពីរ។ សម្តេចតេជោ បានបញ្ជាក់ថា អ្វីដែលអាមេរិកមិនធ្លាប់មានពីមុនមកក្នុងទំនាក់ទំនងជាមួយកម្ពុជា គឺបានមានក្នុងពេលធ្វើទំនាក់ទំនងជាមួយរាជរដ្ឋាភិបាលកម្ពុជា ដែលដឹកនាំដោយសម្តេច ដូចជាការជួយឱ្យមានទីតាំងស្ថានទូតជាក់លាក់ ការរីកចម្រើនផ្នែកសេដ្ឋកិច្ច ពាណិជ្ជកម្ម និងការវិនិយោគរវាងប្រទេសទាំងពីរ។ កាន់តែកត់សម្គាល់ទៀតនោះ ក្នុងរយៈពេល ៤ខែឆ្នាំ២០២២ ទំហំ ពាណិជ្ជកម្មរវាងកម្ពុជា និងអាមេរិក មានកំណើនគួរឱ្យសម្គាល់ទោះបីស្ថិតក្នុងវិបត្តិជំងឺកូវីដ១៩។ ក្នុងនោះកម្ពុជា បាននាំទំនិញទៅកាន់សហរដ្ឋអាមេរិក កើនឡើងដល់ទៅ ៤៤ភាគរយ។សម្តេចតេជោ បានណែនាំទៅក្រុមហ៊ុនប្រឹក្សាយោបល់ និងបញ្ចុះបញ្ចូលរបស់អាមេរិកថា មានកិច្ចការមួយចំនួនទៀត ដែលត្រូវធ្វើបន្ត គឺធ្វើយ៉ាងណាកុំឱ្យមានការភ័ន្តច្រឡំលើទំនាក់ទំនងរវាងប្រទេសទាំងពីរ។ ដូចជាកន្លងមកអាមេរិក មានការចោទប្រកាន់លើកំពង់ផែរាមថា មានវត្តមានយោធាចិន ដែលជារឿងមិនត្រឹមត្រូវ និងមិនពិត ព្រោះកម្ពុជាមានគោលជំហរច្បាស់លាស់ ដោយប្រកាន់នយោបាយអព្យាក្រឹតអចិន្ត្រៃយ៍ មានចែងច្បាស់ក្នុងរដ្ឋធម្មនុញ្ញ ហើយកម្ពុជាគ្មាននយោបាយជ្រើសរើសរវាងចិន និងអាមេរិកនោះទេ។ សម្តេចតេជោ ក៏បានគូសបញ្ជាក់ពីគោលជំហរនយោបាយការបរទេសកម្ពុជាផងដែរ។ ឆ្លៀតក្នុងឱកាសនោះ សម្តេចតេជោ ហ៊ុន សែន បានបញ្ជាក់ពីការផ្អាកធ្វើសមយុទ្ធជាមួយអាមេរិកកាលពីឆ្នាំ២០១៧ផងដែរ។ ការផ្អាកនោះ គឺដោយសារកម្ពុជា ត្រូវរៀបចំការបោះឆ្នោតក្រុមប្រឹក្សាឃុំ-សង្កាត់ មិនមានបំណងបង្អាក់ទំនាក់ទំនងផ្នែកយោធាជាមួយអាមេរិកនោះឡើយ។ សម្តេចតេជោ ក៏បានបញ្ជាក់ពីការអនុញ្ញាតឱ្យនាវាប្រទេសនានាចូលចតនៅកំពង់ផែរបស់កម្ពុជា ដែលជាការបង្ហាញឱ្យឃើញនូវការធ្វើទំនាក់ទំនងដោយបើកចំហររបស់កម្ពុជាជាមួយបណ្តាប្រទេសជាមិត្ត។ សម្តេចតេជោ បានលើកឡើងដែរថា សហរដ្ឋអាមេរិក បានជួយការអភិវឌ្ឍជាច្រើននៅកម្ពុជា ដូចជាជំរុញពាណិជ្ជកម្ម វិនិយោគ ការដោះមីន ការបណ្តុះបណ្តាល និងការផ្តល់វ៉ាក់សាំងសម្រាប់ប្រយុទ្ធប្រឆាំងនឹងជំងឺកូដ១៩ជាដើម៕

ការតវ៉ា និងប្រតិកម្មជាច្រើនបានផ្ទុះឡើង បន្ទាប់ពីការស្លាប់អ្នកសារព័ត៌មានម្នាក់នៅតំបន់ West Bank

អ៊ីស្រាអែល៖ មនុស្សរាប់រយនាក់ប្រមូលផ្តុំគ្នានៅក្នុងទីក្រុងជាច្រើនរបស់អ៊ីស្រាអែល ដើម្បីតវ៉ាការស្លាប់អ្នករាយការណ៍ព័ត៌មាន Al Jazeera។ ពលរដ្ឋប៉ាឡេស្ទីន និងប្រជាជនអ៊ីស្រាអែលអារ៉ាប់បានតវ៉ាចំពោះការស្លាប់របស់អ្នកឆ្លើយឆ្លងព័ត៌មាន Al Jazeera លោកស្រី Shireen Abu Akleh កាលពីថ្ងៃពុធ ដែលការប្រមូលផ្តុំគ្នាបានធ្វើឡើងនៅទីក្រុងហ្សេរុយសាឡឹមខាងកើត, Haifa និង Nazareth រួមទាំងការតវ៉ាមួយដែលបានប្រែក្លាយទៅជាអំពើហិង្សានៅក្នុងរដ្ឋធានី។ នៅក្នុងហ្សេរុយសាឡឹមខាងកើត អ្នកកាន់ទុក្ខបានប្រមូលផ្តុំគ្នានៅលំនៅឋានលោកស្រី Abu Akleh ដើម្បីបង្ហាញសេចក្តីគោរព។ នគរបាលអ៊ីស្រាអែលបានមកដល់កន្លែងកើតហេតុ ក្នុងការឆ្លើយតបទៅនឹងរបាយការណ៍នៃការបង្ក ហេតុ ដែលទំនងជាយោងទៅរកទង់ជាតិប៉ាឡេស្ទីនក្រវីដោយអ្នកកាន់ទុក្ខ និងពាក្យផ្សេងៗដែលស្រែកដោយហ្វូងមនុស្ស។ នាយករដ្ឋមន្ត្រីប៉ាឡេស្ទីនលោក Mohammad Shtayyeh បាននិយាយថា លោកឲ្យប្រទេសអ៊ីស្រាអែលទទួលខុសត្រូវទាំងស្រុងចំពោះការសម្លាប់អ្នកសារព័ត៌មាន Al Jazeera ជើងចាស់ម្នាក់លោកស្រី Shireen Abu Akleh ដែលត្រូវបានបាញ់សម្លាប់ ខណៈកំពុងធ្វើសេចក្តីរាយការណ៍លើការវាយឆ្មក់ របស់យោធាអ៊ីស្រាអែលនៅក្នុងក្រុងJenin តំបន់ West Bank កាលពីថ្ងៃពុធ។ លោក Shtayyeh បាននិយាយនៅក្នុងបទសម្ភាសន៍ជាមួយទូរទស្សន៍ប៉ាឡេស្ទីនថា អ៊ីស្រាអែលមានបំណងបិទសេរីភាពនៃការនិយាយស្តី និងចង់បិទសំឡេងសារព័ត៌មាន។ កងទ័ពអ៊ីស្រាអែលដំបូងបានលើកឡើងពីលទ្ធភាពថា លោកស្រី Abu Akleh ទំនងជាត្រូវបានសម្លាប់ដោយការបាញ់ប្រហាររបស់ប៉ាឡេស្ទីនដោយនិយាយថា ក្រុមសកម្មប្រយុទ្ធក៏មានវត្តមាននៅក្នុងតំបន់នេះដែរ។ ទោះជាយ៉ាងណា មេបញ្ជាកាយោធាឧត្តមសេនីយ៍ឯក Aviv Kochavi ក្រោយមកបានដកខ្លួនចេញពីការអះអាងនេះ។លោកស្រី Abu Akleh អាយុ ៥១ឆ្នាំមានទឹកមុខរាក់ទាក់នៅក្នុងតំបន់មជ្ឈិមបូព៌ា ដែលត្រូវបានគេស្គាល់ដោយសារការរាយការណ៍របស់លោកស្រីអំពីការពិតដ៏អាក្រក់ នៃការកាន់កាប់របស់យោធាអ៊ីស្រាអែលអស់រយៈពេល ៣ទសវត្សរ៍កន្លងទៅនេះ។ ការស្លាប់របស់លោកស្រីបានធ្វើឲ្យរំជើបរំជួលពាសពេញតំបន់ និងបង្កឱ្យមានការភ្ញាក់ផ្អើលពេញបណ្តាញសង្គម។ លោកស្រីបានរាយការណ៍ឲ្យប៉ុស្តិ៍ទូរទស្សន៍ Al Jazeera ជាភាសាអារ៉ាប់ហើយក៏ជាពលរដ្ឋអាមេរិក។ ក្រសួងការបរទេសបានចាត់ទុកការស្លាប់របស់លោកស្រីថា ជាការគំរាមកំហែងដល់សេរីភាពសារព័ត៌មាន។ លោកស្រីត្រូវបានគេបាញ់ចំក្បាលស្លាប់កាលពីព្រឹកថ្ងៃពុធ នៅក្បែរជំរំជនភៀសខ្លួន Jenin នៅភាគខាងជើងតំបន់ West Bank។ ផលិតកររបស់នាងគឺជាអ្នកសារព័ត៌មានជនជាតិប៉ាឡេស្ទីន លោក Ali Samoudi ត្រូវបានបញ្ជូនទៅកាន់មន្ទីរពេទ្យក្នុងស្ថានភាពមានស្ថិរភាព បន្ទាប់ពីត្រូវបានបាញ់ចំខ្នង។ សារព័ត៌មាន Al Jazeera បានចោទប្រកាន់អ៊ីស្រាអែលថា មានចេតនាកំណត់គោលដៅ និងសម្លាប់សហសេវិករបស់យើង។ យោធាអ៊ីស្រាអែលបាននិយាយថា កងកម្លាំងរបស់ខ្លួនបានរងការវាយប្រហារដោយការបាញ់កាំភ្លើង និងគ្រឿងផ្ទុះយ៉ាងសន្ធឹកសន្ធាប់ ខណៈធ្វើប្រតិបត្តិការនៅក្រុង Jenin ហើយពួកគេបានបាញ់តបវិញ៕អត្ថបទ៖ ប៊ុនថន

បណ្ដាញសង្គម

ព័ត៌មានថ្មីៗ

សមត្ថកិច្ចចុះត្រួតពិនិត្យពីរទីតាំងនៅក្រុងប៉ោយប៉ែតរកឃើញជនជាតិឥណ្ឌូនេស៊ីចំនូន៨១នាក់រស់នៅប្រមូលផ្តុំ

សម្ដេចព្រះមហាសង្ឃរាជ បួរ គ្រី យាងបើកកម្មវិធីការពារនិក្ខេបបទ និងប្រឡងបញ្ចប់ថ្នាក់បរិញ្ញាបត្រជាន់ខ្ពស់ នៅពុទ្ធិកសាកលវិទ្យាល័យព្រះសីហមុនីរាជា

សម្តេចកិត្តិសង្គហបណ្ឌិត ម៉ែន សំអន អញ្ជើញប្រគេនទៀនព្រះវស្សា និងទេយ្យវត្ថុដល់ព្រះសង្ឃចំនួន ៥វត្ត នៅខេត្តក្រចេះ

សម្ដេចធិបតី អញ្ជើញត្រួតពិនិត្យ និងសួរសុខទុក្ខយោធិនក្នុងអង្គភាពបញ្ជាការដ្ឋានជាតិកម្លាំងពិសេសប្រឆាំងភេរវកម្ម

មូលនិធិគន្ធបុប្ផាកម្ពុជា រៀបចំស្ដង់ទទួលថវិកាបរិច្ចាគ ក្នុងយុទ្ធនាការ “១ម៉ឺនរៀល ១ម៉ឺននាក់” ឆ្នាំ២០២៦ នៅផ្លូវថ្មើរជើងចតុមុខ

ឯកឧត្តមបណ្ឌិត អ៊ាង សុផល្លែត អញ្ជើញជាអធិបតីប្រកាសសមាជិកថ្មី របស់គណបក្សប្រជាជនកម្ពុជាប្រចាំខេត្តត្បូងឃ្មុំចំនួនជាង២ពាន់នាក់

ជនជាតិចិន១៧០នាក់ពាក់ ព័ន្ធករណីឆបោកតាមប្រព័ន្ធបច្ចេកវិទ្យាត្រូវបានបណ្ដេញចេញពីកម្ពុជា

អ្នកទេសចរប្រៀបប្រដូច ទឹកដីជីផាត ខេត្តកោះកុង ជាឋានសួគ៌សម្រាប់អ្នកទេសចរ ចូលចិត្តដើរលេងកម្សាន្តមិនចេះរីងស្ងួត

មេបញ្ជាការកងទ័ពជើងទឹក៖ កងទ័ពជើងទឹកបន្តអនុវត្តជាប់ជានិច្ចនូវការងារហ្វឹកហ្វឺន បំប៉នជំនាញដើម្បីលើក កម្ពស់សមត្ថភាពរបស់យោធិន

អនុប្រធានទី១អាជ្ញាធរមីន អំពាវនាវដល់ប្រទេសទាំងអស់ រើសយកភាពជាដៃគូ និងកិច្ចសហប្រតិបត្តិការជាជាងការប្រឈមមុខដាក់គ្នា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានសំខាន់ៗ

កូរ៉េខាងជើងបាញ់មីស៊ីលបាលីស្ទីក ៣គ្រាប់ ខណៈបញ្ជាក់ករណីស្លាប់លើកដំបូងដោយសារវីរុស COVID-19

រុស្ស៊ីព្រមានចាត់វិធានការសងសឹកតាមដំណាក់កាល បើហ្វាំងឡង់ចូលជាសមាជិកណាតូ

ក្រសួងការបរទេសកម្ពុជា-អាមេរិក ឯកភាពរក្សាឱ្យមានទំនាក់ទំនងល្អជាមួយគ្នាលើគ្រប់វិស័យ

ទីភ្នាក់ងារជនភៀសខ្លួនរបស់ UN និយាយថា ជនភៀសខ្លួនជាង ៦លាននាក់បានរត់ចេញពីសង្គ្រាមនៅអ៊ុយក្រែន

សម្តេចតេជោ ហ៊ុន សែន និងប្រមុខដឹកនាំប្រទេសអាស៊ាន ត្រូវបានទទួលគារវកិច្ចស្វាគមន៍យ៉ាងកក់ក្ដៅបំផុតពីលោក Joh Biden

សម្តេចតេជោ ហ៊ុន សែន ទទួលជួបពិភាក្សាការងារជាមួយក្រុមហ៊ុនប្រឹក្សាយោបល់ និងបញ្ចុះបញ្ចូលផ្នែកច្បាប់

ការតវ៉ា និងប្រតិកម្មជាច្រើនបានផ្ទុះឡើង បន្ទាប់ពីការស្លាប់អ្នកសារព័ត៌មានម្នាក់នៅតំបន់ West Bank

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានសំខាន់ៗ

កូរ៉េខាងជើង​បាញ់​មី​ស៊ី​ល​បាលី​ស្ទីក ​៣​គ្រាប់ ខណៈ​បញ្ជាក់​ករណី​ស្លាប់​លើកដំបូង​ដោយសារ​វីរុស​ COVID-19

រុស្ស៊ី​ព្រមាន​ចាត់វិធានការ​សងសឹក​តាម​ដំណាក់កាល បើ​ហ្វាំ​ង​ឡង់​ចូល​ជា​សមាជិក​ណា​តូ

ក្រសួងការបរទេសកម្ពុជា-អាមេរិក ឯកភាពរក្សាឱ្យមានទំនាក់ទំនងល្អជាមួយគ្នាលើគ្រប់វិស័យ

សម្តេចតេជោ ហ៊ុន សែន និងប្រមុខដឹកនាំប្រទេសអាស៊ាន ត្រូវបានទទួលគារវកិច្ចស្វាគមន៍យ៉ាងកក់ក្ដៅបំផុតពីលោក Joh Biden

សម្តេចតេជោ ហ៊ុន សែន ទទួលជួបពិភាក្សាការងារជាមួយក្រុមហ៊ុនប្រឹក្សាយោបល់ និងបញ្ចុះបញ្ចូលផ្នែកច្បាប់

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

កូរ៉េខាងជើងបាញ់មីស៊ីលបាលីស្ទីក ៣គ្រាប់ ខណៈបញ្ជាក់ករណីស្លាប់លើកដំបូងដោយសារវីរុស COVID-19

រុស្ស៊ីព្រមានចាត់វិធានការសងសឹកតាមដំណាក់កាល បើហ្វាំងឡង់ចូលជាសមាជិកណាតូ