BTV NEWS

កម្ពុជាមានឆន្ទៈបង្រ្កាប Online scams និងបង្ហាញទៅអន្តរជាតិដឹងកាន់តែច្បាស់តាមរយៈសន្និសីទអន្តរ ជាតិICCOS

បណ្តេញជនជាតិថៃ ១១នាក់ ចេញពីកម្ពុជាពាក់ព័ន្ធករណីលួចស្នាក់នៅ ធ្វើការងារខុសច្បាប់ និងបទល្មើសផ្សេងៗទៀត

ជនបរទេសជាង ៧ម៉ឺននាក់ពាក់ព័ន្ធ Online Scams និងបទល្មើសផ្សេងៗត្រូវបានបណ្តេញចេញពីកម្ពុជា

អ្នកនាំពាក្យក្រសួងមហាផ្ទៃ ៖ រយៈពេល៣ឆ្នាំអគ្គនាយកដ្ឋានអន្តោប្រវេសន៍បណ្តេញជនបរទេសខុសច្បាប់ចេញពីកម្ពុជាមានជាង ៧ម៉ឺននាក់

សន្តិសុខ និង សង្គម

ក្រុមអ្នកសង្រ្គោះតៃវ៉ាន់ កំពុងតាមស្វែងរកអ្នកបាត់ខ្លួន១៨នាក់ ក្រោយរញ្ជួយដីសម្លាប់មនុស្ស១០នាក់

ក្រុមអ្នកសង្រ្គោះកោះតៃវ៉ាន់ កំពុងព្យាយាមតាមស្វែងរកមនុស្ស១៨នាក់ទៀតកំពុងបាត់ខ្លួននៅថ្ងៃសុក្រសប្ដាហ៍នេះ ក្រោយគ្រោះរញ្ជួយដីកម្រិត៧,២ រ៉ិចទ័រ វាយប្រហារតំបន់ភ្នំនិង ឆ្នេរសមុទ្រភាគខាងកើតរបស់កោះនេះ ខណៈរលករញ្ជួយរាប់សិបលើកបានអង្រួនតំបន់រងគ្រោះមហន្តរាយនេះ ហើយអ្នកជាប់ខ្លួនក្រោមគំនរកម្ទេចថ្ម ត្រូវបានរំដោះចេញប្រកបដោយសុវត្ថិភាព។ ក្រុមអាជ្ញារក្នុងតំបន់បាននិយាយថាអ្នករបួសបានកើនឡើងដល់ប្រមាណ១.១០០នាក់ ។ ការរញ្ជួយដីកាលពីថ្ងៃពុធទី៣មេសា នៅក្នុងតំបន់ហ័រលៀន(Hualien)ដែលមានប្រជាពលរដ្ឋរស់នៅតិចតួច នៅភាគខាងកើតរបស់កោះនេះ បានសម្លាប់មនុស្ស១០នាក់ និងបណ្ដាលឲ្យមនុស្សរាប់រយនាក់ជាប់ខ្លួននៅក្នុងឧស្យានជាតិ ខណៈផ្ទាំងថ្មធំៗ បានរបេះធ្លាក់ពីលើភ្នំកាត់ផ្ដាច់ផ្លូវធ្វើដំណើរ។ នាយករដ្ឋានពន្លត់អគ្គិភ័យដែនកោះរបស់ចិនមួយនេះ បានដាក់ចំនួនមនុស្សនៅតែបាត់ខ្លួនចំនួន១៨នាក់ រួមទាំងជនបរទេស៤នាក់ ដោយបានបញ្ជាក់ថាជាជនជាតិឥណ្ឌា កាណាដា និងអូស្ត្រាលី និងនិយាយថា គេពុំអាចដឹងទីតាំងជាក់លាក់ថាពួកគេនៅទីណានោះទេ។ ប្រភពដដែលនេះ បានបន្ថែមថា មនុស្សចំនួន៦នាក់ ផ្សេងទៀតបាត់ខ្លួននៅពេលឡើងភ្នំ ហើយក្រុមសង្រ្គោះមានគ្នា៤៥នាក់ កំពុងព្យាយាមទៅឲ្យដល់ទីតាំងរបស់ពួកគេ។ ក្រុមអ្នកសង្រ្គោះបានបញ្ជាក់ថា មនុស្សប្រហែល៤០០នាក់ ត្រូវបាននាំចេញពីសណ្ឋាគារប្រណិតនៅក្នុងតំបន់ឧស្យានជាតិ តារ៉ូកូ ចច (Taroko Gorge)ប្រកបដោយសុវត្ថិភាព និងត្រូវបានផ្គត់ផ្គង់ជំនួយតាមឧទ្ធម្ភាគចក្រ ហើយក៏បានដឹកជញ្ជូនអ្នករងរបួសចេញពីតំបន់គ្រោះរួចរាល់ដែរ។ គួររម្លឹកថាមនុស្សជាង១០០នាក់បានស្លាប់នៅក្នុងគ្រោះរញ្ជួយដីក្នុងភាគខាងត្បូងរបស់កោះនេះកាលពីឆ្នាំ២០១៦ ខណៈរញ្ជួយដីកម្រិត៧,៣រ៉ិចទ័រ បានអង្រួនកោះនេះផងដែរ ដែលបានឆក់យកជីវិតមនុស្សជាង២.០០០នាក់ កាលពីឆ្នាំ១៩៩៩៕

មនុស្សរាប់រយនាក់ តវ៉ានៅជិតស្ថានទូតអ៊ីស្រាអែល ក្នុងទីក្រុង Amman ប្រទេសហ៊្សកដានី

ប្រជាជនហ្ស៊កដានី និងប៉ាឡេស្ទីន រាប់រយនាក់បានបន្តមកប្រមូលផ្តុំគ្នានៅជិតស្ថានទូតអ៊ីស្រាអែលនៅក្នុងទីក្រុង Amman ប្រទេសហ៊្សកដានី សម្រាប់សប្តាហ៍ទីពីរកាលពីថ្ងៃព្រហស្បតិ៍ ទី ៤ ខែមេសា ដើម្បីគាំទ្រលរដ្ឋប៉ាឡេស្ទីន នៅតំបន់ហ្កាហ្សា។ ក្រុមអ្នកតវ៉ា បានស្រែកពាក្យផ្សេងៗ មានកាន់ផ្ទាំងបដា និងគ្រវីទង់ជាតិប៉ាឡេស្ទីន។សន្ធិសញ្ញាសន្តិភាពរបស់ប្រទេសហ្ស៊កដានី ជាមួយអ៊ីស្រាអែល គឺពុំមានការគាំទ្រខ្លាំងនោះទេក្នុងចំណោមពលរដ្ឋជាច្រើនដែលមើលឃើញថា ការធ្វើឱ្យមានលក្ខណៈប្រក្រតីភាពជាការក្បត់ទៅនឹងសិទ្ធិរបស់ជនរួមជាតិប៉ាឡេស្ទីនរបស់ពួកគេ។ អ្នកតវ៉ា ឈ្មោះ Imad al Malhi បាននិយាយថា យើងកំពុងស្នើឱ្យរដ្ឋាភិបាលហ៊្សកដានី លុបចោលសន្ធិសញ្ញា Wadi Araba ដោយលោកបាននិយាយបន្ថែមថាសន្ធិសញ្ញានេះ បានធ្វើឱ្យប៉ះពាល់ដល់ផលប្រយោជន៍ជាតិ របស់ប្រទេសហ្ស៊កដានី។ស្ថានទូតអ៊ីស្រាអែល ជាទីដែលក្រុមបាតុករមកប្រមូលផ្តុំគ្នាជារៀងរាល់ថ្ងៃ បានក្លាយជាចំណុចក្តៅនៃការតវ៉ាប្រឆាំងអ៊ីស្រាអែលជាយូរណាស់មកហើយ នៅពេលមានភាពចលាចលនៅក្នុងតំបន់ហ្កាហ្សា និងដែនដីកាន់កាប់ប៉ាឡេស្ទីន។យោងតាមអាជ្ញាធរសុខាភិបាលនៃតំបន់ហ៊ុព័ទ្ធហ្កាហ្សា បានឲ្យដឹងថា ជម្លោះដ៏អាក្រក់បំផុតរវាងអ៊ីស្រាអែល និងក្រុមហាម៉ាស ជាក្រុមអ៊ីស្លាមនិយមគ្រប់គ្រងដែនដីនេះ អ៊ីស្រាអែលបានបើកការវាយប្រហារ និងបានបាញ់ផ្លោងទៅលើតំបន់ហ្កាហ្សា ដែលបានសម្លាប់ប្រជាជនប៉ាឡេស្ទីនជាង ៣៣.០០០នាក់។ ការវាយប្រហាររបស់អ៊ីស្រាអែល ត្រូវបានធ្វើឡើងដើម្បីឆ្លើយតបទៅនឹងការវាយប្រហាររបស់ក្រុមហាម៉ាស ទៅលើអ៊ីស្រាអែល ដែលអ៊ីស្រាអែលបាននិយាយថាមនុស្ស ២.២០០នាក់ ត្រូវបានសម្លាប់។

ប្រទេសស៊ីប អំពាវនាវដល់សហភាពអឺរ៉ុប ឱ្យជួយដោះស្រាយវិបត្តិលំហូរជនអន្តោប្រវេសន៍

ប្រទេសស៊ីប បានអំពាវនាវដល់សហភាពអឺរ៉ុប (EU) កាលពីថ្ងៃពុធ ដើម្បីផ្តល់ជំនួយជាក់ស្តែង ខណៈប្រទេសកោះនៅសមុទ្រមេឌីទែរ៉ាណេភាគខាងកើតមួយនេះ កំពុងរកមធ្យោបាយដោះស្រាយលំហូរជនអន្តោប្រវេសន៍ស៊ីរី។ រដ្ឋមន្ត្រីក្រសួងមហាផ្ទៃ លោក ខន់ស្តេនទីណូស អាអូននូ(Constantinos Ioannou) បាននិយាយថា ប្រទេសស៊ីប ស្ទាក់ចាប់បានទូកចំនួន ១៣គ្រឿង ដោយមានជនអន្តោប្រវេសន៍សរុបចំនួន ៧៣៩ នាក់ នៅលើទូក នៅឆ្នេរសមុទ្រភាគអាគ្នេយ៍របស់ខ្លួន ក្នុងរយៈពេលបីថ្ងៃចុងក្រោយនេះ។លោក Ioannou បាននិយាយថា ទូកទាំងអស់ បានចាកចេញពីឆ្នេរសមុទ្រប្រទេសលីបង់ ដែលមានចម្ងាយមិនដល់ ២០០ គីឡូម៉ែត្រនោះទេនៅភាគអាគ្នេយ៍ប្រទេសស៊ីប ដោយអ្នកដំណើរស្ទើរតែទាំងអស់គឺជាជនជាតិស៊ីរី។ លោករដ្ឋមន្ត្រី បានបញ្ជាក់ផងដែរអំពីតម្រូវការសម្រាប់មូលនិធិរបស់សហភាពអឺរ៉ុប ដែលបានបែងចែកទៅឲ្យប្រទេសលីបង់ ដើម្បីផ្សារភ្ជាប់ទៅនឹងការធ្វើឲ្យប្រសើរឡើងការការពារឆ្នេរសមុទ្រ និងដែនទឹករបស់ប្រទេសលីបង់ធ្វើឡើងដោយអាជ្ញាធរតំបន់។ ប្រទេសស៊ីប ក៏កំពុងអំពាវនាវឱ្យមានការបង្កើនការឃ្លាំមើលឆ្នេរសមុទ្រប្រទេសលីបង់ដោយទីភ្នាក់ងារ Frontex ជាទីភ្នាក់ងារសន្តិសុខរបស់សហភាពអឺរ៉ុប។យោងតាមទិន្នន័យផ្លូវការបានឱ្យដឹងថា ចំនួនជនភៀសខ្លួនស៊ីរី សរុបដែលបានធ្វើដំណើរតាមទូកនៅប្រទេសស៊ីប រហូតមកដល់ពេលនេះមានដល់ទៅ ២.៥០០នាក់។ ប្រធានាធិបតី លោកនីកូស គ្រីស្តូដូលីដេស(Nikos Christodoulides) បាននិយាយថា លោកបានសន្ទនាតាមទូរស័ព្ទកាលពីថ្ងៃអង្គារជាមួយប្រធានគណៈកម្មការអឺរ៉ុប លោកស្រី Ursula von der Leyen ដើម្បីស្នើសុំអន្តរាគមន៍ផ្ទាល់ របស់លោកស្រី ដោយនិយាយថាប្រទេសស៊ីប គឺស្ថិតក្នុងស្ថានភាពវិបត្តិ ដោយសារតែលំហូរជនភៀសខ្លួន។ប្រទេសស៊ីប រួមជាមួយរដ្ឋសមាជិកសហភាពអឺរ៉ុបផ្សេងទៀត កំពុងគាំទ្រសម្រាប់ការប្រកាសតំបន់ចំនួនពីរក្នុងប្រទេសស៊ីរីថាមានសុវត្ថិភាព ដែលនឹងអនុញ្ញាតឱ្យមានការវិលត្រឡប់របស់ជនអន្តោប្រវេសន៍ស៊ីរីត្រឡប់ទៅវិញ។ ទោះជាយ៉ាងណា ក្រោមបទប្បញ្ញត្តិរបស់សហភាពអឺរ៉ុបបច្ចុប្បន្ន ជនអន្តោប្រវេសន៍ មកពីប្រទេសស៊ីរីមានសិទ្ធិទទួលបានការការពារជាជនភៀសខ្លួន។

UN សន្យាគាំទ្រ បន្ទាប់ពីហ្ស៊ីមបាបវ៉េ ប្រកាសថាប្រទេសជួបគ្រោះមហន្តរាយរាំងស្ងួត

អង្គការសហប្រជាជាតិ កាលពីថ្ងៃពុធ (០៣ មេសា) បានសន្យាថានឹងជួយប្រទេសហ្ស៊ីមបាបវ៉េ ក្នុងការប្រមូលធនធានដើម្បីដោះស្រាយវិបត្តិគ្រោះរាំងស្ងួតដែលបណ្តាលមកពីគំរូអាកាសធាតុ អ៊ែលនីញ៉ូ (El Nino)។ការប្តេជ្ញាចិត្តនេះ ធ្វើឡើងបន្ទាប់ពីការប្រកាសរបស់ប្រធានាធិបតីហ្ស៊ីមបាបវ៉េ លោក អ៊ែមមើសុន ម៉ានហ្កាវ៉ា (Emmerson Mnangagwa) អំពីស្ថានភាពនៃគ្រោះមហន្តរាយនៅថ្ងៃមុននោះ ដោយសារគ្រោះរាំងស្ងួត ដែលបានកាត់បន្ថយទិន្នផលធញ្ញជាតិយ៉ាងច្រើន និងប៉ះពាល់ដល់ធនធានសន្តិសុខស្បៀងដ៏សំខាន់សម្រាប់សហគមន៍ជនបទ។ជាផ្នែកនៃសកម្មភាពដែលរំពឹងទុក និងការឆ្លើយតបដំបូងរបស់ខ្លួន អង្គការសហប្រជាជាតិបានបែងចែកប្រាក់ចំនួន ៥ លានដុល្លារដល់ហ្ស៊ីមបាបវ៉េ ពីមូលនិធិឆ្លើយតបគ្រោះអាសន្នកណ្តាលរបស់ខ្លួនក្នុងខែធ្នូ ឆ្នាំ ២០២៣ ដោយផ្តោតលើវិស័យដូចជាទឹក អនាម័យ និងភាពស្អាត សុខភាព សន្តិសុខស្បៀង និងអាហារូបត្ថម្ភ។ដោយលើកឡើងពីផលប៉ះពាល់យ៉ាងធ្ងន់ធ្ងរនៃគ្រោះរាំងស្ងួតនៅក្នុងប្រទេសហ្ស៊ីមបាបវ៉េ និងតំបន់អាហ្វ្រិកខាងត្បូង លោក អ៊ែដវើត ខាលលុន (Edward Kallon) អ្នកសម្របសម្រួលផ្នែកប្រជាជន និងមនុស្សធម៌របស់អង្គការសហប្រជាជាតិ បាននិយាយថា នៅប្រទេសហ្ស៊ីមបាវ៉េ វិបត្តិមានផលវិបាកយ៉ាងធំធេងនៅទូទាំងវិស័យផ្សេងៗនៃសេដ្ឋកិច្ច។ ប្រធានាធិបតីនៃប្រទេសអាហ្រ្វិកមួយនេះនិយាយថា ហ្ស៊ីមបាបវ៉េ ត្រូវការប្រាក់ជាង ២ ពាន់លានដុល្លារ ដើម្បីឆ្លើយតបនឹងគ្រោះរាំងស្ងួត៕

អាមេរិក៖ លោកប្ល៊ីនខិន និងប្រធានាធិបតីអាស៊ែរបៃហ្សង់ ពិភាក្សាគ្នាអំពីការបន្ធូរបន្ថយភាពតានតឹងជាមួយអាមេនី

អ្នកនាំពាក្យក្រសួងការបរទេសអាមេរិក បាននិយាយថា រដ្ឋមន្ត្រីការបរទេសអាមេរិក លោកអង់តូនី ប្ល៊ីនខិន (Antony Blinken)កាលពីថ្ងៃពុធ បាននិយាយជាមួយប្រធានាធិបតីអាស៊ែរបៃហ្សង់ លោក Ilham Aliyev អំពីសារៈសំខាន់នៃការជំរុញដំណើរការសន្តិភាពជាមួយប្រទេសជិតខាង អាមេនី។ទីក្រុងយ៉េរ៉េវ៉ាន់ បានរងបរាជ័យដ៏ធំមួយកាលពីខែកញ្ញាឆ្នាំមុន នៅពេលដែលកងកម្លាំងរបស់ទីក្រុងបាគូ ដណ្តើមយកតំបន់ណាហ្គ័រណូ-ការ៉ាបាក់ (Nagorno-Karabakh) ខណៈពេលដែលផ្នែកមួយនៃអាស៊ែរ បៃហ្សង់ មានប្រជាជនអាមេនីដ៏ច្រើនលើសលុប។សាធារណរដ្ឋកូកាសខាងត្បូងទាំងពីរ កំពុងព្យាយាមយល់ព្រមលើសន្ធិសញ្ញាសន្តិភាពផ្លូវការមួយ ប៉ុន្តែការពិភាក្សា បានក្លាយទៅជាបញ្ហាជាច្រើនរួមទាំងការបោះបង្គោលព្រំដែនប្រវែង១.000 គីឡូម៉ែត្រ (៦២០ ម៉ាយ) របស់ពួកគេ ដែលនៅតែបិទ និងមានយោធាឈរជើងយ៉ាងច្រើន។ការសង្ស័យគ្នាទៅវិញទៅមក នៅតែមានកម្រិតខ្ពស់ ហើយកាលពីថ្ងៃអាទិត្យ ក្រសួងការពារជាតិអាស៊ែរបៃហ្សង់ បាននិយាយថា ប្រទេសអាមេនី កំពុងប្រមូលផ្តុំកងទ័ពនៅតាមផ្នែកនៃព្រំដែន។ ប្រទេសអាមេនី បានច្រានចោលរបាយការណ៍នេះ។អ្នកនាំពាក្យក្រសួងការបរទេសលោក Matthew Miller បាននិយាយនៅក្នុងសេចក្តីថ្លែងការណ៍មួយថា លោកប្ល៊ីនខិន បានប្រាប់លោក Aliyev ថា មិនមានហេតុផលសម្រាប់ការកើនឡើងភាពតានតឹង នៅតាមព្រំដែននោះទេ ហើយបានព្រមានថា សកម្មភាពឈ្លានពាន និងវោហាស័ព្ទពីភាគីណាមួយនឹងធ្វើឲ្យខូចដល់ក្តីរំពឹងទុកចំពោះសន្តិភាព។

មន្ត្រីរាជការ១៤នាក់ ត្រូវបានចាប់ខ្លួនពីការចោទប្រកាន់បទឧក្រិដ្ឋរៀបចំទុក ក្នុងប្រទេសអេក្វាឌ័រ

ការិយាល័យក្រសួងយុត្តិធម៌របស់ប្រទេស បាននិយាយថា យ៉ាងហោចណាស់មន្ត្រីរាជការចំនួន ១៤ នាក់ នៅក្នុងប្រទេសអេក្វាឌ័រ រួមទាំងចៅក្រម និងមន្រ្តីនគរបាល ត្រូវបានចាប់ខ្លួន កាលពីថ្ងៃពុធនៅក្នុងប្រតិបត្តិការទូទាំងប្រទេសប្រឆាំងអំពើពុករលួយនៅក្នុងប្រព័ន្ធច្បាប់។នគរបាល បានចាប់ខ្លួន និងឆ្មក់ចូលលំនៅឋានក្នុងខេត្តចំនួនប្រាំបី ជាផ្នែកមួយនៃប្រតិបត្តិការ ដែលកំណត់គោលដៅលើមន្ត្រីរាជការដែលត្រូវបានសង្ស័យនៃការអនុញ្ញាតជាប្រព័ន្ធឱ្យឧក្រិដ្ឋជនគេចចេញពីយុត្តិធម៌ ជាថ្នូរទៅនឹងប្រាក់ ឬការអនុគ្រោះ។ការិយាល័យ បាននិយាយនៅក្នុងការបង្ហោះនៅលើគេហទំព័រប្រព័ន្ធផ្សព្វផ្សាយសង្គម X ថា អ្នកដែលត្រូវបានចោទប្រកាន់ថាជាប់ពាក់ព័ន្ធ បានផ្តល់ផលប្រយោជន៍ដល់មនុស្សដែលមានគ្រោះថ្នាក់ខ្លាំង ដោយផ្តល់សេរីភាពឱ្យពួកគេតាមរយៈល្បិចផ្នែកច្បាប់ និងការបំពានច្បាប់។ការិយាល័យបាននិយាយថា ចៅក្រមដែលជាប់ពាក់ព័ន្ធ បានអនុញ្ញាតឱ្យឧក្រិដ្ឋជនដែលនៅក្នុងពន្ធនាគាររួចហើយនោះ ទទួលបានសេរីភាពដោយខុសច្បាប់ ទោះបីជាវាមានលក្ខណៈស្របច្បាប់ក៏ដោយ។ប្រតិបត្តិការនេះ មានគោលបំណង ដើម្បីលុបបំបាត់បញ្ហាជាបន្តបន្ទាប់ ដែលដំណើរការនៅក្នុងប្រព័ន្ធយុត្តិធម៌ ដែលត្រូវបានរៀបចំជាប្រព័ន្ធ។

UN ព្រមានថា ការកើនឡើងជាសកលនៃជំនួយដែលត្រូវបានរារាំង បានគំរាមដល់អាយុជីវិតកុមារ

អង្គការសហប្រជាជាតិ បានបង្កើនការព្រមានកាលពីថ្ងៃពុធ អំពីការកើនឡើងជាសកលដែលគួរឱ្យព្រួយបារម្ភ នៅក្នុងឧបទ្ទវហេតុដែលជំនួយមនុស្សធម៌សម្រាប់កុមារ ត្រូវបានរារាំង ដោយព្រមានពីផលវិបាកធ្ងន់ធ្ងរសម្រាប់អ្នកដែលងាយរងគ្រោះបំផុត។ ក្នុងអំឡុងសន្និសីទសារព័ត៌មានរបស់ក្រុមប្រឹក្សាសន្តិសុខអង្គការសហប្រជាជាតិស្តីពីកុមារនិងជម្លោះប្រដាប់អាវុធ លោកស្រី វឺជីនៀ ហ្គាំបា( Virginia Gamba) តំណាងពិសេសទទួលបន្ទុកកុមារ និងជម្លោះប្រដាប់អាវុធ របស់អគ្គលេខាធិការអង្គការសហប្រជាជាតិ បាននាំមកការបំភ្លឺអំពីការពន្លឿនជាបន្ទាន់នៃការដោះស្រាយផលវិបាកចំពោះការបដិសេធដំណើរការមនុស្សធម៌សម្រាប់កុមារ។លោកស្រី Gamba បាននិយាយថា នៅឆ្នាំ ២០២២ តួលេខខ្ពស់បំផុតនៃការបដិសេធដំណើរការ ត្រូវបានផ្ទៀងផ្ទាត់នៅក្នុងដែនដីប៉ាឡេស្ទីន ប្រទេសយេម៉ែន អាហ្វហ្គានីស្ថាន និងប្រទេសម៉ាលី ដោយបញ្ជាក់អំពីនិន្នាការដែលទំនងជាកាន់តែធ្ងន់ធ្ងរទៅៗជាសាកល ដោយសារតែការអនុម័តច្បាប់រឹតត្បិត ក្រឹត្យរដ្ឋបាល និងបង្កើនការគ្រប់គ្រងលើកិច្ចខិតខំប្រឹងប្រែងមនុស្សធម៌។ លោកស្រីបានបញ្ជាក់ថា គ្រប់ភាគីពាក់ព័ន្ធក្នុងជម្លោះត្រូវតែទទួលខុសត្រូវចំពោះការរារាំងកុមារមិនឲ្យទទួលបានជំនួយសង្គ្រោះជីវិត ដែលគំរាមកំហែង មិនត្រឹមតែការរស់រានមានជីវិតរបស់ពួកគេប៉ុណ្ណោះទេ ប៉ុន្តែថែមទាំងការរីកលូតលាស់ និងការវិវឌ្ឍន៍រយៈពេលវែងរបស់ពួកគេផងដែរ។លោកស្រី Gamba និយាយថា ការបដិសេធដំណើរការចូលផ្នែកមនុស្សធម៌ រួមមានការរំលោភបំពានជាច្រើន រួមទាំងការរឹតបន្តឹងលើសកម្មភាពមនុស្សធម៌ ការជ្រៀតជ្រែកក្នុងប្រតិបត្តិការ ការវាយប្រហារដោយផ្ទាល់លើហេដ្ឋារចនាសម្ព័ន្ធស៊ីវិល និងអំពើហិង្សាលើបុគ្គលិកផ្តល់ជំនួយមនុស្សធម៌។លោកស្រី Gamba បានអំពាវនាវឱ្យគ្រប់ភាគីទាំងអស់ដែលមានជម្លោះ ដើម្បីអនុញ្ញាត និងសម្របសម្រួលដំណើរការផ្នែកមនុស្សធម៌ប្រកបដោយសុវត្ថិភាព ទាន់ពេលវេលា និងគ្មានការរារាំង ដោយសង្កត់ធ្ងន់លើកាតព្វកិច្ចក្រោមអនុសញ្ញាទីក្រុងហ្សឺណែវ និងអនុសញ្ញាស្តីពីសិទ្ធិកុមារ ដើម្បីជួយសម្រួលដល់ការផ្តល់ជំនួយមនុស្សធម៌ដល់កុមារដែលត្រូវការជំនួយ។

ផ្លូវច្រើនខ្សែប្រែក្លាយជាទន្លេ បន្ទាប់ពីព្យុះសង្ឃរាវាយបោកបក់នៅភាគខាងលិចសហរដ្ឋអាមេរិក

អាកាសធាតុមិនអំណោយផលខ្លាំង បានបណ្តាលឱ្យមានការបំផ្លិចបំផ្លាញដល់ទីក្រុងជាច្រើននៅទូទាំងតំបន់ Midwest សហរដ្ឋអាមេរិក ដោយមានព្យុះសង្ឃរាជាបន្តបន្ទាប់ បានធ្វើឱ្យខូចខាតដល់ហេដ្ឋារចនាសម្ព័ន្ធ លំនៅឋាន និងតំបន់សហគមន៍នានា។ខណៈប្រព័ន្ធព្យុះសង្ឃរាបន្តដំណើរឆ្ពោះទៅទិសខាងកើត រដ្ឋដូចជា អូហៃយ៉ូ ភេនស៊ីលវ៉ានៀ និងរដ្ឋអ៊ីឌីអាណា បានកត់ត្រាការបំផ្លិចបំផ្លាញធ្ងន់ធ្ងរ។រហូតមកដល់ពេលនេះ មានអ្នករងរបួសមួយចំនួនត្រូវបានរាយការណ៍។ មន្ត្រីឧតុនិយម បានព្រមានថា នៅពេលដែលព្យុះសង្ឃរានៅតែបន្តកើតមាន តំបន់នានានៅភាគខាងកើត រដ្ឋវឺជីននៀ និងនៅភាគខាងជើងរដ្ឋខារ៉ីឡៃណាខាងជើង អាចប្រឈមនឹងព្យុះផ្គររន្ទះយ៉ាងខ្លាំង ខណៈអាកាសធាតុប្រែប្រួល បានអូសបន្លាយបន្តិចម្តងៗទៅកាន់ភាគអាគ្នេយ៍។

មនុស្ស ២១ នាក់ត្រូវបានសម្លាប់ក្នុងការប្រឈមមុខដាក់គ្នាប្រដាប់អាវុធនៅភាគខាងត្បូងយេម៉ែន

មន្ត្រីយោធាម្នាក់របស់យេម៉ែន បាននិយាយថា មនុស្សសរុបចំនួន ២១ នាក់ត្រូវបានសម្លាប់កាលពីថ្ងៃពុធ(០៣ មេសា) នៅក្នុងការប្រឈមមុខដាក់គ្នាដោយប្រដាប់អាវុធដ៏ខ្លាំងក្លារវាងកងកម្លាំងរដ្ឋាភិបាលរបស់ប្រទេសយេម៉ែន និងក្រុមឧទ្ទាមហ៊ូទី នៅក្នុងខេត្ត ឡាច (Lahj) ភាគខាងត្បូងរបស់ប្រទេសនេះ។ប្រភពយោធា ដែលបាននិយាយក្នុងលក្ខខណ្ឌមិនបញ្ចេញឈ្មោះនោះបាននិយាយថា ការប្រឈមមុខដាក់គ្នាដោយប្រដាប់អាវុធដ៏បង្ហូរឈាមនេះបានផ្ទុះឡើងនៅតំបន់ជួរមុខ ស៊ូរ៉ាយចា (Shurayjah) នៅភាគខាងជើងនៃទីក្រុង ឡាច ជាទីដែលកងកម្លាំងរដ្ឋាភិបាល និងក្រុមសកម្មប្រយុទ្ធ ហ៊ូទី បានបាញ់កាំភ្លើងធំ និងការបាញ់ផ្លោងដាក់គ្នាទៅវិញទៅមុខ។ការប្រយុទ្ធគ្នាយ៉ាងខ្លាំងនេះបានបណ្តាលឱ្យទាហានរដ្ឋាភិបាលស្លាប់ ១២ នាក់ រួមទាំងមេបញ្ជាការដ្ឋានម្នាក់ និង ៨ នាក់ផ្សេងទៀតរងរបួស។ ទន្ទឹមនឹងនេះដែរ អ្នកប្រយុទ្ធក្នុងក្រុមសកម្មប្រយុទ្ធហ៊ូទី ៩ នាក់បានស្លាប់ និងយ៉ាងហោចណាស់ ១៥ នាក់បានរងរបួសនៅក្នុងការប្រយុទ្ធ។ការប៉ះទង្គិចគ្នានៅក្នុងទីក្រុង ឡាច នេះកើតឡើងតែប៉ុន្មានថ្ងៃបន្ទាប់ពីការប្រយុទ្ធគ្នាស្រដៀងគ្នារវាងភាគីសង្រ្គាមទាំងពីរនៅក្នុងខេត្ត ដាលៀ (Dhalea) ភាគខាងត្បូង និងតំបន់ជិតខាងនោះ ដោយបានគូសបញ្ជាក់ពីភាពតានតឹងដែលកំពុងកើនឡើងនៅទូទាំងជួរមុខជាច្រើននៅក្នុងប្រទេសយេម៉ែន៕

ភាពតានតឹង កើនឡើងរវាងប៉ូឡូញ និងអ៊ីស្រាអែល បន្ទាប់ពីមានការសម្លាប់បុគ្គលិកជំនួយ

ជម្លោះមួយ បានផ្ទុះឡើងរវាងទីក្រុងវ៉ាសូវី និងរដ្ឋាភិបាលអ៊ីស្រាអែល បន្ទាប់ពីការស្លាប់របស់បុគ្គលិក ប៉ូឡូញម្នាក់នៃអង្គការជំនួយ World Central Kitchen ក្នុងការវាយប្រហារតាមអាកាសរបស់អ៊ីស្រាអែលកាលពីថ្ងៃអង្គារ នៅតំបន់ហ្កាហ្សាស្ទ្រីប។កាលពីថ្ងៃពុធ នាយករដ្ឋមន្ត្រីប៉ូឡូញ លោកដូណាល់ ថាស់ (Donald Tusk) បានរិះគន់ប្រតិកម្មរបស់សមភាគីអ៊ីស្រាអែល លោកបេនចាមីន ណេតាន់យ៉ាហ៊ូ (Benjamin Netanyahu) ចំពោះឧប្បត្តិហេតុ និងសេចក្តីថ្លែងការណ៍ដែលធ្វើឡើងដោយឯកអគ្គរដ្ឋទូតអ៊ីស្រាអែលប្រចាំប្រទេសប៉ូឡូញ លោក Yacov Livne។លោកថាស់ បានសរសេរនៅលើបណ្តាញសង្គមXថា៖«លោកនាយករដ្ឋមន្ត្រីណេតាន់យ៉ាហ៊ូ និងលោកឯកអគ្គរដ្ឋទូត Livne បានដឹងហើយថា ភាគច្រើននៃប្រជាជនប៉ូឡូញ បានបង្ហាញពីសាមគ្គីភាពជាមួយ អ៊ីស្រាអែល បន្ទាប់ពីការវាយប្រហាររបស់ក្រុមហាម៉ាស»។ «អ្នកកំពុងដាក់ការសាកល្បងចំពោះសាមគ្គីភាពនេះ។ ការវាយប្រហារដ៏សោកនាដកម្មលើអ្នកស្ម័គ្រចិត្ត និងប្រតិកម្មរបស់អ្នកធ្វើឲ្យមានការខឹងសម្បាដែលអាចយល់បាន។ពលរដ្ឋប៉ូឡូញ លោក Damian Sobol គឺជាបុគ្គលិកជំនួយម្នាក់ក្នុងចំណោមបុគ្គលិកជំនួយ ៧នាក់ដែលត្រូវបានសម្លាប់ នៅក្នុងការវាយប្រហារតាមអាកាសរបស់កងទ័ពអ៊ីស្រាអែល។ លោកណេតាន់យ៉ាហ៊ូ បាននិយាយថា អ៊ីស្រាអែល ជាអ្នកទទួលខុសត្រូវ និងបានលើកឡើងអំពី«ករណីសោកនាដកម្មនៃការវាយប្រហារដោយអចេតនា»។ លោកថា រឿងបែបនេះ កើតឡើងក្នុងសង្គ្រាម។លោក Livne បានធ្វើឲ្យមានរលកនៃកំហឹង នៅក្នុងប្រទេសប៉ូឡូញ បន្ទាប់ពីការស្លាប់របស់លោក Sobol ជាមួយនឹងការចោទប្រកាន់ប្រឆាំងនឹងជ្វីហ្វនិយម។ ឯកអគ្គរដ្ឋទូតអ៊ីស្រាអែលប្រចាំប្រទេសប៉ូឡូញ កំពុងសំដៅទៅលើការប្រកាសរបស់អ្នកនយោបាយប្រឆាំងលោក Krzysztof Bosak មកពីគណបក្សសម្ព័ន្ធស្តាំនិយមជ្រុលជ្រុលនៅលើបណ្តាញសង្គមX។លោក Bosak បានចង្អុលបង្ហាញថា ក្បួនរថយន្តដែលត្រូវបានវាយប្រហារដោយអ៊ីស្រាអែល ត្រូវបានគេដាក់ឈ្មោះថា ជាជំនួយមនុស្សធម៌។ លោក Bosak បានសរសេរថា៖«វាហាក់ដូចជាគោលបំណងនៃការបញ្ជារបស់អ៊ីស្រាអែល គឺដើម្បីធ្វើការវាយប្រហារទៅលើអង្គការមនុស្សធម៌ និងបង្កើនភាពស្រេកឃ្លានក្នុងចំណោមប្រជាជនប៉ាឡេស្ទីន»។ «ទង្វើបែបនេះ មានឈ្មោះថា «ឧក្រិដ្ឋកម្មសង្គ្រាម»។

បណ្ដាញសង្គម

ព័ត៌មានថ្មីៗ

រយៈពេល ៣ឆ្នាំ វិទ្យាស្ថានពហុបច្ចេកទេសខេត្តកំពង់ចាម បណ្ដុះបណ្ដាលយុវជនជំនាញជាង ២ពាន់នាក់

ជនអន្តោប្រវេសន៍បន្តជាប់ខ្លួនលើដែនដី Ceuta របស់អេស្ប៉ាញ ខណៈប្រតិបត្តិការចាប់ផ្តើម ដើម្បីពង្រីកជម្រកបណ្តោះអាសន្ន

យុវជនសុទ្ធតែជាកម្មកររ៉ែ ៣៧នាក់ ដែលបានស្លាប់នៅក្នុងការឃុំឃាំងរបស់យោធានៅនីហ្សេរីយ៉ា

វិទ្យាស្ថានពហុបច្ចេកទេសខេត្តកោះកុង បណ្តុះបណ្តាលជំនាញដល់សិស្សជិត ៥ពាន់នាក់ ក្នុងរយៈពេល៣ឆ្នាំ

ក្រសួងការងារ ជំរុញការធ្វើអាជីវកម្មប្រកបដោយការទទួលខុសត្រូវ ដើម្បីពង្រឹងការប្រកួតប្រជែង និងការងារសមរម្យ

ប្រធានក្រុមការងារចុះមូលដ្ឋានស្រុករមាសហែក អញ្ជើញបិទសិក្ខាសាលាស្តីពី «ការពង្រឹងអភិបាលកិច្ចគណៈកម្មការគ្រប់គ្រងសហគមន៍ព្រៃឈើត្រពាំងពិការ» និងប្រកាសដាក់ឱ្យដំណើរការ «ភូមិមិត្តភាព» តំបន់កសិកម្មចម្រុះ និងសេវាកម្មទេសចរណ៍សហគមន៍ព្រៃឈើត្រពាំងពិការ

គណៈកម្មាធិការគណបក្សប្រជាជនកម្ពុជាខេត្តបាត់ដំបងបណ្ដុះបណ្ដាលជនបង្គោលលើការងារមហាជន

សម្តេច ម៉ែន សំអន៖ «ការដាំដើមឈើ និងការពារព្រៃឈើ ជាការជួយខ្លួនឯង ដែលអាចជួយទប់ទល់នឹងការប្រែប្រួលអាកាសធាតុ សុវត្ថិភាពពីគ្រោះធម្មជាតិ និងក្លាយជាក្តីសង្ឃឹមសម្រាប់កូនចៅជំនាន់ក្រោយ»

គ្រួសារដែលរងគ្រោះដោយការបាក់ស្រុតច្រាំងក្នុងស្រុកស្រីសន្ធរ បានទទួលអំណោយពីសម្ដេចធិបតី នាយករដ្ឋមន្រ្ដី

រដ្ឋបាលខេត្តត្បូងឃ្មុំបិទផ្សាយទិន្នន័យការវិនិច្ឆ័យចុះបញ្ជីដីធ្លីមានលក្ខណៈជាប្រព័ន្ធនៅតំបន់វិនិច្ឆ័យ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877