BTV NEWS

ឃុំខ្លួនឧក្រិដ្ឋជនបរទេស ២២នាក់ ដាក់ពន្ធនាគារបណ្តោះអាសន្ន ពាក់ព័ន្ធនឹងបទល្មើស Online Scams

សមត្ថកិច្ចចុះបង្ក្រាបអគារកាស៊ីណូ ជីន យូ មេន តាំង ឃាត់ខ្លួនជនបរទេសជាច្រើនរយនាក់

សមត្ថកិច្ចរាជធានីភ្នំពេញ បង្ក្រាបទីតាំង Online Scams ២កន្លែងក្នុងខណ្ឌ៧មករា និងឃាត់ខ្លួនជនបរទេស ៥៨នាក់ភាគច្រើនជនជាតិឥណ្ឌូនេស៊ី

បណ្ដេញជនជាតិចិន ៣១៨នាក់ ចេញពីកម្ពុជាពាក់ព័ន្ធករណីឆបោកតាមប្រព័ន្ធបច្ចេកវិទ្យា (Online Scams)

សន្តិសុខ និង សង្គម

អាមេរិក បានព្រមានអ៊ីរ៉ង់ ពីការគំរាមកំហែងពីភេរវកម្មមុនការវាយប្រហារថ្ងៃទី៣ មករា

មន្ត្រីអាមេរិកមួយរូបបាននិយាយកាលពីថ្ងៃព្រហស្បតិ៍ (២៥ មករា) ថារដ្ឋាភិបាលសហរដ្ឋអាមេរិក ធ្លាប់បានព្រមានជាឯកជនដល់អ៊ីរ៉ង់ អំពី «ការគំរាមកំហែងភេរវកម្ម» នៅក្នុងព្រំដែនរបស់ខ្លួន មុនពេលការវាយប្រហារដ៏បង្ហូរឈាមមួយក្នុងខែនេះ ដែលត្រូវបានអះអាងដោយក្រុមសកម្មប្រយុទ្ធរដ្ឋអ៊ីស្លាម។ខណៈពេលដែលមន្ត្រីរូបនោះបាននិយាយថា ការព្រមានអំពីការវាយប្រហារកាលពីថ្ងៃទី០៣ ខែមករា ដែលជាការបំផ្ទុះគ្រាប់បែកអត្តឃាតចំនួនពីរនៅក្នុងទីក្រុង ឃើម៉ាន (Kerman) ភាគអាគ្នេយ៍ដែលបានសម្លាប់មនុស្សជិត ១០០នាក់ និងបង្ករបួសជាច្រើននាក់ គឺជាទម្លាប់ធម្មតានោះ ក្រុមអ្នកវិភាគបាននិយាយថា នេះអាចបង្ហាញពីកិច្ចខិតខំប្រឹងប្រែងរបស់សហរដ្ឋអាមេរិក ក្នុងការកសាងទំនុកចិត្តជាមួយអ៊ីរ៉ង់។កិច្ចខិតខំប្រឹងប្រែងបែបនេះនឹងកើតឡើងប្រឆាំងនឹងភាពតានតឹងនៃការវាយប្រហារដោយភ្នាក់ងារគាំទ្រដោយអ៊ីរ៉ង់ លើផលប្រយោជន៍លោកខាងលិច រួមទាំងការវាយលុករបស់ក្រុមហាម៉ាស កាលពីថ្ងៃទី០៧ ខែតុលា ដែលបានសម្លាប់មនុស្សប្រហែល ១.២០០នាក់ នៅភាគខាងត្បូងអ៊ីស្រាអែល និងការវាយប្រហារដោយមីស៊ីលកាលពីថ្ងៃសៅរ៍ លើមូលដ្ឋានទ័ពអាកាសអ៊ីរ៉ាក់ ដែលដាក់ទ័ពអាមេរិកជាច្រើន៕

ក្រុមហាម៉ាស សម្លឹងមើលតួនាទីក្រោយសង្គ្រាម នៅក្នុងនយោបាយប៉ាឡេស្ទីន

មន្ត្រីជាន់ខ្ពស់ និងក្រុមអ្នកវិភាគ បាននិយាយថា ការចេញផ្សាយឯកសារដ៏ចម្រូងចម្រាសមួយរបស់ក្រុមហាម៉ាស ដែលបង្ហាញអំពីភាពត្រឹមត្រូវនៃការវាយប្រហារកាលពីថ្ងៃទី៧ ខែតុលា បង្ហាញថា ក្រុមអ៊ី ស្លាមនិយម កំពុងដាក់ខ្លួនឯងសម្រាប់តួនាទីនយោបាយក្រោយសង្គ្រាម។បន្ទាប់ពីការបោះពុម្ពផ្សាយនៃការរៀបរាប់របស់យើង...កិច្ចប្រតិបត្តិការឈ្មោះថា Al-Aqsa Flood ជាភាសាអង់គ្លេសដែលសរសេរបានល្អ និងក្រោយមកជាភាសាបារាំង ក៏ដូចជាភាសាអារ៉ាប់ មន្ត្រីជាន់ខ្ពស់របស់ហាម៉ាស បានពន្យល់ថា ក្រុមដែលអ៊ីស្រាអែល បានប្តេជ្ញាថា នឹងកម្ទេចនោះ បានព្យាយាមចងចាំ ពាក្យសម្តីនោះ។លោកបាសសេម ណេម (Bassem Naim) ប្រធានផ្នែកទំនាក់ទំនងអន្តរជាតិរបស់ក្រុមហាម៉ាស បាននិយាយថា សកម្មភាពរបស់ក្រុមនេះ នៅកម្រិតថ្នាក់ដឹកនាំជាតិ និង «ការតស៊ូប្រឆាំងនឹងគម្រោងជ្វីហ្វនិយម... ធ្វើឲ្យខ្លួនមានលក្ខណៈសម្បត្តិគ្រប់គ្រាន់ ក្នុងការដឹកនាំរបស់ប្រជាជនប៉ាឡេស្ទីន»។លោកណេម អតីតរដ្ឋមន្ត្រីសុខាភិបាលនៅតំបន់ហ្កាហ្សា បានថ្លែងថា៖ តាមរយៈឯកសារនេះ ចលនានេះ «មិនទាមទារ ឬបើមិនដូច្នេះទេ គឺទាមទារភាពផ្តាច់មុខនៃការដឹកនាំរបស់ប្រជាជនប៉ាឡេស្ទីន»។លោកបានប្រាប់សារព័ត៌មានAFPថា៖«ក្រុមហាម៉ាស បានអំពាវនាវឲ្យមានការរៀបចំឡើងវិញនូវការផ្តល់ជម្រកដល់ប្រជាជនប៉ាឡេស្ទីន និងកំណែទម្រង់នៃអង្គការរំដោះប៉ាឡេស្ទីន ដើម្បីឲ្យវាក្លាយជាតំណាងឲ្យប្រជាជនទាំងអស់»។

សហរដ្ឋអាមេរិក បង្កើតបណ្ដាញជាមួយអ៊ីស្រាអែល ដើម្បីស្វែងរកចម្លើយលើការស្លាប់ជនស៊ីវិលហ្កាហ្សា

សហរដ្ឋអាមេរិក បានបង្កើតបណ្តាញមួយជាមួយអ៊ីស្រាអែល ដើម្បីពិភាក្សាអំពីការព្រួយបារម្ភលើឧបទ្ទវហេតុនៅតំបន់ហ្កាហ្សា ដែលជនស៊ីវិលត្រូវបានសម្លាប់ ឬរងរបួសដោយយោធាអ៊ីស្រាអែល និងមូលដ្ឋានស៊ីវិលត្រូវបានកំណត់គោលដៅ នេះបើយោងតាមមន្ត្រីអាមេរិកពីរនាក់ដែលមានចំណេះដឹងពីបញ្ហានេះបានប្រាប់សារព័ត៌មានរ៉យទ័រ។បណ្តាញនេះត្រូវបានបង្កើតឡើងបន្ទាប់ពីកិច្ចប្រជុំមួយកាលពីដើមខែនេះរវាងរដ្ឋមន្ត្រីការបរទេសអាមេរិក លោក អាន់តូនី ប្លីងខិន (Antony Blinken) និងគណៈរដ្ឋមន្ត្រីសង្គ្រាមរបស់អ៊ីស្រាអែល ក្នុងអំឡុងពេលដែលលោក ប្លីងខិន បានសម្តែងការព្រួយបារម្ភអំពីរបាយការណ៍ «ឥតឈប់ឈរ» នៃការវាយប្រហាររបស់អ៊ីស្រាអែល ដែលបានវាយប្រហារលើទីតាំងមនុស្សធម៌ ឬបណ្តាលឱ្យមានជនស៊ីវិលស្លាប់យ៉ាងច្រើនលើសលប់។មន្ត្រីអាមេរិកម្នាក់បាននិយាយថា នៅក្នុងកិច្ចប្រជុំនោះ លោក ប្លីងខិន បានប្រាប់នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) រដ្ឋមន្ត្រីការពារជាតិ លោក យ៉ាវ ហ្កាឡាន់ (Yoav Gallant) និងលោករដ្ឋមន្ត្រី បេននី ហ្គាន់ស៍ (Benny Gantz) ថា ទីក្រុងវ៉ាស៊ីនតោន ត្រូវដឹងពី «អ្វីដែលជាចម្លើយ» នៅពេលនិយាយអំពីការរាយការណ៍នៃការវាយប្រហារ ហើយបានស្វះស្វែងរក «បណ្តាញដែលអាចទុកចិត្តបាន» ដែលតាមរយៈនោះសហរដ្ឋអាមេរិក អាចលើកបញ្ហាបែបនេះជាមួយអ៊ីស្រាអែលជាប្រចាំ៕

ប្រមុខ WHO រន្ធត់ចិត្តដោយចាត់ទុកស្ថានភាពតំបន់ហ្កាហ្សាថាជា «ឋាននរក»

ប្រមុខអង្គការសុខភាពពិភពលោក បានអំពាវនាវឱ្យមានបទឈប់បាញ់និង «ដំណោះស្រាយពិតប្រាកដ» ចំពោះជម្លោះអ៊ីស្រាអែល-ប៉ាឡេស្ទីន នៅក្នុងការអង្វរសុំចិត្តដល់ស្ថាប័នគ្រប់គ្រងរបស់ស្ថាប័នសុខភាពពិភពលោក កាលពីថ្ងៃព្រហស្បតិ៍ ជាកន្លែងដែលលោកបាននិយាយថាស្ថានភាពនៅតំបន់ហ្កាហ្សា ជា «ឋាននរក»។អគ្គនាយកអង្គការសុខភាពពិភពលោក លោក Tedros Adhanom Ghebreyesus ដែលធ្លាប់ឆ្លងកាត់សង្រ្គាមកាលពីកុមារភាព និងកូនៗដែលបានលាក់ខ្លួននៅក្នុងលេនដ្ឋានអំឡុងការទម្លាក់គ្រាប់បែកនៅជម្លោះព្រំដែនឆ្នាំ ១៩៩៨ដល់ឆ្នាំ២០០០របស់ប្រទេសអេត្យូពី ជាមួយប្រទេសអេរីទ្រា បានក្លាយជាស្ថានភាពដែលពិពណ៌នាអំពីអារម្មណ៍នៅក្នុងតំបន់ហ៊ុមព័ទ្ធហ្កាហ្សារងការទម្លាក់គ្រាប់បែក ខណៈមានមនុស្សជាង ២៥.០០០នាក់ ត្រូវបានសម្លាប់។លោកបានប្រាប់គណៈកម្មការធិការប្រតិបត្តិរបស់អង្គការសុខភាពពិភពលោក ក្នុងអំឡុងពេលពិភាក្សាអំពីភាពអាសន្នផ្នែកសុខភាពនៅក្នុងតំបន់ហ៊ុមព័ទ្ធហ្កាហ្សាថា លោកគិតថា អ្នកទាំងអស់គ្នាបាននិយាយអំពីដំណោះស្រាយរដ្ឋពីរ ដូច្នេះហើយសង្ឃឹមថា សង្រ្គាមនេះនឹងបញ្ចប់ ហើយឈានទៅរកដំណោះស្រាយពិតប្រាកដ។ តំណាងអ៊ីស្រាអែល លោក Waleed Gadban បាននិយាយថា សហគមន៍អន្តរជាតិ បានជ្រើសរើស «មិនខ្វល់ខ្វាយ« អំពីចំណាប់ថ្នូរ ហើយនិយាយថា «ការសម្រេចចិត្តនេះ បង្ហាញពីភាពគ្មានសីលធម៌ធ្ងន់ធ្ងរ។

អភិបាលខណ្ឌច្បារអំពៅ ដឹកនាំកម្លាំងចុះអនុវត្តច្បាប់ចរាចរណ៍ ត្រួតពិនិត្យគ្រឿងស្រវឹង នៅស្តុបវត្តច្បារអំពៅ

ចាប់ពីយប់ថ្ងៃទី២៥ ខែមករា ឆ្នាំ ២០២៤នេះតទៅ កម្លាំងនគរបាលរាជធានីភ្នំពេញ បានចាប់ផ្ដើមរឹតបន្តឹងការអនុវត្តច្បាប់ចរាចរណ៍ផ្លូវគោកបន្ថែម ក៏ដូចជាការត្រួតពិនិត្យគ្រឿងស្រវឹង ទៅលើអ្នកបើកបរ ហើយការរឹងបន្តឹង និងការត្រួតពិនិត្យនេះ នឹងត្រូវធ្វើឡើងដោយចល័តទីតាំងថែមទៀត។ជាក់ស្តែងនៅយប់ថ្ងៃទី២៥ ខែមករា ឆ្នាំ២០២៤នេះ គណៈបញ្ជាការឯកភាពខណ្ឌច្បារអំពៅ ដឹកនាំដោយលោក ចេង មុនីរ៉ា អភិបាលខណ្ឌច្បារអំពៅ បានដឹកនាំកម្លាំងសមត្ថកិច្ចចម្រុះ ដាក់គោលដៅអនុវត្តច្បាប់ចរាចរណ៍ ត្រួតពិនិត្យទៅលើអ្នកបើកបរយានយន្ត ដើម្បីពិនិត្យ និងវាស់ជាតិអាល់កុលលើអ្នកបើកបរ ក្នុងគោលបំណងកាត់បន្ថយគ្រោះថ្នាក់ចរាចរណ៍ ដែលកើតចេញពីអ្នកបើកបរផ្ទុកនូវជាតិស្រវឹងលើសកម្រិត។លោក ចេង មុនីរ៉ា បានឱ្យដឹងថា ការចាប់ផ្ដើមរឹតបន្តឹងបន្ថែមនេះបន្ទាប់ពីសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា កាលពីថ្ងៃទី២៣ ខែមករា កន្លងទៅនេះ បានណែនាំឲ្យលោកនាយឧត្តមសេនីយ៍ ស ថេត អគ្គស្នងការនគរបាលជាតិ ពង្រឹងឡើងវិញ នូវការត្រួតពិនិត្យគ្រឿងស្រវឹង ខណៈករណីគ្រោះថ្នាក់ចរាចរណ៍បានកើតឡើងច្រើនជាបន្តបន្ទាប់។បើតាមលោក ម៉ៅ សឿត អធិការខណ្ឌច្បារអំពៅ បានឱ្យដឹងថា នាយប់នេះកម្លាំងអធិការដ្ឋានខណ្ឌ មានកម្លាំងចូលរួមអនុវត្តច្បាប់ចរាចរណ៍ និងត្រួតពិនិត្យគ្រឿងស្រវឹងនាយប់នេះមានចំនួន ៤០នាក់ ដោយឡែកកម្លាំងប្រជាការពារខណ្ឌ រួមទាំងមន្ត្រីខណ្ឌចំនួន ២០នាក់ផងដែរ៕ អត្ថបទ៖ លីហេង

មនុស្ស២០នាក់បានស្លាប់ និង១៥០នាក់របួស ក្នុងការវាយប្រហាររបស់អ៊ីស្រាអែល លើកន្លែងពលរដ្ឋតម្រង់ជួរយកអាហារ

ក្រសួងសុខាភិបាលគ្រប់គ្រងដោយក្រុមហាម៉ាសរបស់តំបន់ហ្កាហ្សា បាននិយាយថាការវាយប្រហាររបស់អ៊ីស្រាអែលទៅលើទីក្រុងហ្កាហ្សា បានសម្លាប់ជនជាតិប៉ាឡេស្ទីនចំនួន ២០នាក់ និង ១៥០ នាក់របួស ពេលកំពុងតម្រង់ជួរយកជំនួយស្បៀងអាហារកាលពីថ្ងៃព្រហស្បតិ៍ ទី២៥ខែ មករា ជានូវអ្វីដែល ប៉ាឡេស្ទីនហៅថាជា ឧក្រិដ្ឋកម្មសង្គ្រាម។ យោធាអ៊ីស្រាអែលបាននិយាយថា ខ្លួនកំពុងពិនិត្យមើលរបាយការណ៍នេះ។ គណៈកម្មាធិការតាមដានកងកម្លាំងជាតិ និងឥស្លាម ដែលជាសម្ព័ន្ធនៃក្រុមសកម្មប្រយុទ្ធ និងក្រុមនយោបាយ បាននិយាយថា កងកម្លាំងអ៊ីស្រាអែលបានដាក់គោលដៅលើជនស៊ីវិលដែលកំពុងរង់ចាំជំនួយសង្គ្រោះ។ ក្រុមនេះបាននិយាយនៅក្នុងសេចក្តីថ្លែងការណ៍មួយថា មនុស្សរាប់សិបនាក់បានស្លាប់ និងរងរបួសនៅក្នុង ឧក្រិដ្ឋកម្មសង្រ្គាម និងអំពើប្រល័យពូជសាសន៍។ អ្នកស្រុកបាននិយាយថា នៅភាគខាងត្បូងតំបន់រងការឡោមព័ទ្ធមួយនេះ កងរថក្រោះអ៊ីស្រាអែលបានវាយលុកតំបន់នានាជុំវិញមន្ទីរពេទ្យចំនួនពីរក្នុងទីក្រុង ខាន់យូនីស (Khan Younis) ភាគខាងត្បូងនៃតំបន់ហ្កាហ្សា ដោយបង្ខំឱ្យមនុស្សភៀសខ្លួនចូលទៅក្នុងភាពច្របូកច្របល់យ៉ាងអស់សង្ឃឹមដើម្បីសុវត្ថិភាព។ ទន្ទឹមនឹងនេះ នៅភាគខាងជើង មន្ត្រីអង្គការសុខភាពពិភពលោកបានហៅស្ថានភាពស្បៀងអាហារនេះថា ជាហេតុការណ៍គួរឱ្យរន្ធត់ ហើយបុគ្គលិកមនុស្សធម៌បាននិយាយថា ការចែកចាយជំនួយដ៏កម្រត្រូវបានប្រមូលផ្តុំដោយមនុស្សអស់សង្ឃឹម ដែលអាចមើលឃើញភាពអត់ឃ្លានដោយផ្ទាល់ភ្នែក។ ក្រុមមន្ត្រីសុខាភិបាលហ្កាហ្សាបាននិយាយថា ពលរដ្ឋប៉ាឡេស្ទីយ៉ាងហោចណាស់ ៥០ នាក់បានស្លាប់ ក្នុងរយៈពេល ២៤ ម៉ោងចុងក្រោយនេះនៅក្នុងទីក្រុង Khan Younis ជាទីដែលអ៊ីស្រាអែលបានផ្លាស់ប្តូរប្រតិបត្តិការយោធាពេញបន្ទុកបន្ទាប់ពីបានចាប់ផ្តើមដកកងកម្លាំងចេញពីតំបន់ភាគខាងជើង ដែលខ្លួននិយាយថាឥឡូវនេះបានគ្រប់គ្រងភាគច្រើន៕

មន្រ្តីជំនាញ ចុះបង្ក្រាបទីតាំងល្បែងស៊ីសងប្រភេទឡូតូតូចធំ 8888

គណៈកម្មការគ្រប់គ្រងល្បែងពាណិជ្ជកម្មកម្ពុជា សហការជាមួយ កម្លាំងនគរបាលនាយកដ្ឋានប្រឆាំងបទល្មើសល្បែង នៃក្រសួងមហាផ្ទៃ បានចុះឆ្មក់ចុះបង្ក្រាបទីតាំងដែលបើកល្បែងស៊ីសងប្រភេទឡូតូ តូចធំនៅក្នុងមូលដ្ឋានខណ្ឌ ៧មករាចំនួន ០២ទីតាំង និងឃាត់ខ្លួនមនុស្ស ជាង១០នាក់។ប្រតិបត្តិការនេះបានធ្វើឡើងនៅវេលាម៉ោង ៩ព្រឹកថ្ងៃទី ២៥ ខែមករាឆ្នាំ ២០២៤ នៅចំណុចទីតាំង តោះជុំគ្នាការហ្វ នៅតាមបណ្ដោយផ្លូវលេខ២៤២ សង្កាត់បឹងព្រលិត និងមួយទីតាំងទៀតស្ថិតនៅទីតាំងយីហោ ឃ្វីន សាឡន មូលដ្ឋានសង្កាត់មនោរម្យ ខណ្ឌ៧មករា រាជធានីភ្នំពេញ ក្នុងរង្វង់ប្រតិបត្តិការនេះផងដែរដោយមានការដឹកនាំផ្ទាល់ដោយព្រះរាជអាជ្ញារង យស វាសនា នៃអយ្យការអមសាលាដំបូងរាជធានីភ្នំពេញ។តាមប្រភពពីមន្ត្រីជំនាញបានឲ្យដឹងថាក្នុងការចុះប្រតិបត្តិការនេះកម្លាំងជំនាញបានចុះចំនួន០២ ទីតាំង ដោយទីតាំងនីមួយៗបានបើកអាជីវកម្មប្រភេទឡូតូតូចធំ 8888 ក៏ប៉ុន្តែមន្ត្រីជំនាញមិនបានបញ្ជាក់ឲ្យស៊ីជម្រៅនោះទេថាល្បែងស៊ីសង ប្រភេទនេះមានច្បាប់ឬមិនមានច្បាប់អាជីវកម្មនោះឡើយ។ក្នុងការចុះប្រតិបត្តិការនេះ មហាជនមានការងឿឆ្ងល់ផងដែរថាកន្លងមកអាជ្ញាធរបានអះអាងថា ល្បែងស៊ីសងប្រភេទឡូតូតូចធំ 8888 នេះថាមានច្បាប់អាជីវកម្មត្រឹមត្រូវ ដោយមិនឃើញមានការចុះបង្ក្រាបនោះឡើយ។ ស្រាប់តែ ពេលនេះ មន្ត្រីជំនាញនៃគណៈកម្មការគ្រប់គ្រងល្បែងពាណិជ្ជកម្មកម្ពុជា សហការជាមួយ កម្លាំងនគរបាលនាយកដ្ឋានប្រឆាំងបទល្មើសល្បែង នៃក្រសួងមហាផ្ទៃ បានចុះមកបង្ក្រាបចំពោះល្បែងស៊ីសងប្រភេទឡូតូ 8888នេះ។មហាជនបានលើកឡើងបន្តទៀតថាបើល្បែងស៊ីសងប្រភេទឡូតូ 8888នេះខុសច្បាប់មែន។ ដូច្នេះ ទីតាំងល្បែងស៊ីសង់ប្រភេទនេះគឺមានច្រើនទីតាំងរីកដុះដាលពេញទីតាំងហាងកាហ្វេ និងភោជនីយដ្ឋានគ្រប់ទីកន្លែងក្នុងភូមិសាស្ត្ររាជធានីភ្នំពេញ៕ អត្ថបទ៖ កុម្ភៈ

អគ្គស្នងការដ្ឋាននគរបាលជាតិ បង្កើតប្រព័ន្ធដាក់ពាក្យប្តឹងតាមអនឡាញ លើករណីឆបោកតាមបច្ចេកវិទ្យា

អគ្គស្នងការដ្ឋាននគរបាលជាតិ កំពុងដំណើរការលើប្រព័ន្ធទទួល និងដាក់ពាក្យបណ្តឹងតាមអនឡាញលើករណីឆបោកតាមប្រព័ន្ធបច្ចេកវិទ្យា។ថ្លែងប្រាប់BTV News នៅថ្ងៃទី២៥ ខែមករា ឆ្នាំ២០២៤ លោកឧត្តមសេនីយ៍ឯក ជា ពៅ អគ្គស្នងការរងនគរបាលជាតិ បានឲ្យដឹងថា យោងតាមសេចក្តីសម្រេចរបស់ក្រសួងមហាផ្ទៃ កាលពីចុងខែធ្នូ ឆ្នាំ២០២៣ ដែលរៀបចំឲ្យបង្កើតការទទួលពាក្យបណ្តឹងឆបោកតាមប្រព័ន្ធបច្ចេកវិទ្យា ដោយប្រែក្លាយពីប្រព័ន្ធពាក់កណ្តាលស្វ័យប្រវត្តិមកជាប្រព័ន្ធស្វ័យប្រវត្តិទាំងស្រុង ដើម្បីឲ្យស្របតាមយុទ្ធសាស្រ្តបញ្ចកោណដំណាក់កាលទី១។ លោកឧត្តមសេនីយ៍ឯក បន្ត ការបង្កើតឲ្យមានការទទួលពាក្យបណ្តឹងតាមប្រព័ន្ធអនឡាញនេះ គឺប្រជាពលរដ្ឋគ្រប់ទីកន្លែងមិនថាក្នុងប្រទេស ឬក្រៅប្រទេសអាចដាក់ពាក្យបណ្តឹងបានឲ្យតែករណីទាំងនោះជាបទល្មើសកើតឡើងនៅកម្ពុជា។ លោកឧត្តមសេនីយ៍ឯក បញ្ជាក់ថា គោលដៅនៃការទទួលពាក្យបណ្តឹងតាមប្រព័ន្ធអនឡាញធ្វើឡើងស្របតាមការវិវឌ្ឍន៍បច្ចេកវិទ្យា ដើម្បីសម្រួលដល់ការជួយសង្គ្រោះប្រជាពលរដ្ឋ ហើយមានល្បឿនលឿនដល់ការស្រាវជ្រាវ និងផ្តល់ទំនុកចិត្តជូនប្រជាពលរដ្ឋ ក៏ដូចជាជនរងគ្រោះ។លោកឧត្តមសេនីយ៍ឯក ជា ពៅ អះអាងថា ដើម្បីផ្តល់ប្រសិទ្ធភាពលើការងារខាងលើ ការទទួលពាក្យបណ្តឹងលើអនឡាញនេះត្រូវបានដាក់ចេញនូវបទបញ្ជា និងគោលការណ៍ដល់មន្រ្តីទទួលបន្ទុកយ៉ាងច្បាស់លាស់ ដោយគ្រប់ពេលវេលាដែលមានប្រជាពលរដ្ឋជួបប្រទះបញ្ហាប្រឈមដោយសារបទល្មើសឆបោកនឹងមានមន្រ្តីទទួលហើយចាត់វិធានការទៅតាមនីតិវិធីជូនប្រជាពលរដ្ឋ។លោកឧត្តមសេនីយ៍ឯក ថ្លែងថា បន្ទាប់ពីបង្កើតការទទួលពាក្យបណ្តឹងតាមអនឡាញ អគ្គស្នងការដ្ឋាននគរបាលជាតិ បានគិតគូរពីផែនការបន្ទាប់លើការប្រឆាំងបទល្មើសឆបោកតាមប្រព័ន្ធបច្ចេកវិទ្យាឲ្យស្របទៅតាមសម័យកាល ដោយជំហានបន្ទាប់នឹងរៀបចំឲ្យមានជាភាសាបរទេស គឺភាសាចិន និងភាសាអង់គ្លេសនាពេលឆាប់ៗខាងមុខ។ លោកឧត្តមសេនីយ៍ឯក បន្ថែមថា ការរៀបចំឲ្យមានប្រសិទ្ធភាពលើការងារប្រឆាំងនឹងបទល្មើសឆបោកតាមប្រព័ន្ធបច្ចេកវិទ្យា នឹងបន្តឥតឈប់ឈរប្រសិនសម័យកាលវិវឌ្ឍន៍របស់បច្ចេកវិទ្យាកាន់តែជឿនលឿន ដោយអគ្គស្នងការដ្ឋាននគរបាលបានកំណត់ពង្រឹងថែមទៀតលើធនធានមនុស្ស បច្ចេកវិទ្យា និងសុវត្ថិភាព៕ អត្ថបទ៖ ឧត្ដម

អ៊ីស្រាអែល បដិសេធការវាយប្រហារលើជំរំជនភៀសខ្លួនរបស់អង្គការសហប្រជាជាតិនៅតំបន់ហ្កាហ្សា

អង្គការសហប្រជាជាតិ បាននិយាយកាលពីថ្ងៃពុធថា រថក្រោះអ៊ីស្រាអែល បានវាយប្រហារបរិវេណជំរំជនភៀសខ្លួនដ៏ធំរបស់ UN នៅក្នុងតំបន់ហ្កាហ្សា ដែលផ្តល់ជម្រកដល់ប្រជាជនប៉ាឡេស្ទីន ដែលជម្លៀសខ្លួនដោយបណ្តាលឲ្យ «ស្លាប់ និងរបួសជាច្រើន» ប៉ុន្តែអ៊ីស្រាអែល បានបដិសេធថា កងកម្លាំងរបស់ខ្លួន មិនទទួលខុសត្រូវ ហើយបានបញ្ជាក់ថា ប្រហែលជាក្រុមហាម៉ាសជាអ្នកវាយប្រហារទេ។ការវាយប្រហារដែលUN បាននិយាយថា បានត្រូវចំមជ្ឈមណ្ឌលបណ្តុះបណ្តាលវិជ្ជាជីវៈមួយកន្លែងសម្រាប់ជនភៀសខ្លួនចំនួន ៣០.000នាក់ នៅក្នុងទីក្រុងខាន់យូនីស ( Khan Younis) ភាគខាងត្បូងទីក្រុងសំខាន់របស់តំបន់ហ្កាហ្សា បានជំរុញឲ្យមានការថ្កោលទោសយ៉ាងដាច់អហង្ការពីសហរដ្ឋអាមេរិក។អ្នកសម្របសម្រួលផ្នែកមនុស្សធម៌របស់អង្គការសហប្រជាជាតិសម្រាប់ដែនដីប៉ាឡេស្ទីន លោក ជេម ហ្គោលឌ្រីក (James McGoldrick) បាននិយាយថា៖«ការស្លាប់ និងរបួសជាច្រើន បានកើតឡើង អគារមួយចំនួន ត្រូវបានឆាបឆេះ និងមានសេចក្តីរាយការណ៍អំពីអ្នកស្លាប់។លោក Thomas White នាយកកិច្ចការតំបន់ហ្កាហ្សាសម្រាប់ទីភ្នាក់ងារ UNRWA របស់អង្គការសហប្រជាជាតិ បាននិយាយថា គ្រាប់កាំភ្លើងធំចំនួនពីរគ្រាប់ បានត្រូវចំប្រហារអគារមួយនៃមជ្ឈមណ្ឌលបណ្តុះបណ្តាលនេះ ដែលមានមនុស្សផ្លាស់ទីលំនៅប្រហែល ៨០០នាក់ កំពុងស្នាក់នៅ។ យ៉ាងហោចណាស់មនុស្ស ៩ នាក់ បានស្លាប់ និង ៧៥ នាក់រងរបួស។ ប្រធានទីភ្នាក់ងារ លោក ហ្វីលីព ឡាស់ហ្សារីនី (Philippe Lazzarini) បាននិយាយថា ចំនួនអ្នកស្លាប់ ប្រហែលជាខ្ពស់ជាងនេះ។

UN ស្នើឱ្យក្រុមហ៊ូទី ពិចារណាឡើងវិញនូវបញ្ជាបណ្តេញជនជាតិអាមេរិក និងអង់គ្លេសចេញពីយេម៉ែន

អង្គការសហប្រជាជាតិ បានស្នើឱ្យអាជ្ញាធរក្រុមហ៊ូទីរបស់ប្រទេសយេម៉ែន ពិចារណាឡើងវិញនូវការសម្រេចចិត្តរបស់ពួកគេ ក្នុងការបណ្តេញជនជាតិអាមេរិក និងអង់គ្លេស ដែលកំពុងធ្វើការឱ្យស្ថាប័នពិភពលោកមួយនេះ នៅក្នុងតំបន់ដែលគ្រប់គ្រងដោយក្រុមហ៊ូទី នៅប្រទេសយេម៉ែន។ លោក Stephane Dujarric អ្នកនាំពាក្យរបស់អគ្គលេខាធិការអង្គការសហប្រជាជាតិ លោក Antonio Guterres បានបញ្ជាក់ថា អង្គការសហប្រជាជាតិ បានទទួលការទំនាក់ទំនងពីក្រុមហ៊ូទី ដែលបានផ្តល់ឱ្យស្ថាប័នពិភពលោកមួយនេះរយៈពេលមួយខែ សម្រាប់ជនជាតិអាមេរិក និងអង់គ្លេសទាំងអស់ ឱ្យចាកចេញពីតំបន់នានាដែលស្ថិតនៅក្រោមការគ្រប់គ្រងរបស់ក្រុមអាជ្ញាធរនេះ។ លោក Dujarric បាននិយាយថា អ្វីដែលចាំបាច់ត្រូវនិយាយគឺថា សំណើ ឬតម្រូវការណាមួយសម្រាប់បុគ្គលិកអង្គការសហប្រជាជាតិក្នុងការឲ្យចាកចេញដោយផ្អែកតែលើសញ្ជាតិរបស់បុគ្គលិកនោះ គឺមិនសមស្របទៅនឹងក្របខ័ណ្ឌច្បាប់ដែលអនុវត្តចំពោះអង្គការសហប្រជាជាតិឡើយ។ ពិតណាស់ វាក៏រារាំងសមត្ថភាពរបស់យើងក្នុងការផ្តល់ការតព្វកិច្ចដើម្បីគាំទ្រប្រជាជនទាំងអស់ក្នុងប្រទេសយេម៉ែន។ ហើយយើងសូមអំពាវនាវដល់អាជ្ញាធរទាំងអស់នៅក្នុងប្រទេសយេម៉ែន ធានាថាបុគ្គលិករបស់យើងអាចបន្តបំពេញមុខងាររបស់ពួកគេក្នុងនាមជាអង្គការសហប្រជាជាតិ។ លោកនិយាយថា បុគ្គលិករបស់អង្គការសហប្រជាជាតិបម្រើដោយមិនលម្អៀង និងបម្រើទង់ជាតិរបស់អង្គការសហប្រជាជាតិ និងគ្មានអ្វីផ្សេងទៀតឡើយ។ អ្នកនាំពាក្យរូបនេះ បានបដិសេធមិននិយាយថាតើមានជនជាតិអាមេរិក និងអង់គ្លេសប៉ុន្មាននាក់ ដែលកំពុងធ្វើការឱ្យអង្គការសហប្រជាជាតិនៅក្នុងតំបន់ដែលគ្រប់គ្រងដោយក្រុមហ៊ូទី នៅប្រទេសយេម៉ែន។ បទបញ្ជារបស់កងជីវពលហ៊ូទី បានកើតឡើងក្នុងពេលមានភាពតានតឹងកើនឡើង រវាងកងកម្លាំងអាមេរិក និងអង់គ្លេស ដែលបោះទីតាំងឈរជើងនៅសមុទ្រក្រហម ហើយក្រុមហ៊ូទី បាននិងកំពុងវាយប្រហារលើ នាវាដែលមានទំនាក់ទំនងជាមួយអ៊ីស្រាអែលនៅក្នុងតំបន់ ចាប់តាំងពីការចាប់ផ្តើមជម្លោះរវាងអ៊ីស្រាអែល និងក្រុមហាម៉ាស កាលពីថ្ងៃទី ៧ ខែតុលា ឆ្នាំ២០២៣ ។

បណ្ដាញសង្គម

ព័ត៌មានថ្មីៗ

ប្រាក់ចំណេញត្រីមាសទី១របស់ក្រុមហ៊ុនផលិតប្រេង Saudi Aramco កើនឡើង២៥% ខណៈមានវិបត្តិច្រកសមុទ្រ Hormuz

មេដឹកនាំកូរ៉េខាងជើង លោក Kim Jong-un សន្យាយកទំនាក់ទំនងជាមួយរុស្ស៊ីជាអាទិភាពកំពូល

អនុប្រធានសមាគមអតីតយុទ្ធជន អញ្ជើញជាអធិបតីសម្ពោធអគារទីស្នាក់សមាគមអតីតយុទ្ធជន និងនិវត្តជនកម្ពុជា ខេត្តត្បូងឃ្មុំ

ចិន ជំរុញឲ្យជប៉ុន និងហ្វីលីពីន បញ្ឈប់ការប្រឈមមុខដាក់គ្នា

ប្រធានក្រុមការងារគណបក្សប្រជាជនចុះមូលដ្ឋាន ប្រកាសបញ្ចូលសមាជិកគណបក្សថ្មីជាង ១៥០០នាក់នៃឃុំចំនួន៥ ក្នុងស្រុកកំពង់សៀម ខេត្តកំពង់ចាម

ប្រធានគណៈកម្មាធិការ ណបក្សប្រជាជនកម្ពុជា ខេត្តកំពង់ស្ពឺ លើកទឹកចិត្តឱ្យក្រុមការងារបន្តយកចិត្តទុកដាក់ដោះស្រាយរាល់សំណើរពលរដ្ឋ

អតីតសកម្មជនគណបក្សប្រឆាំង ៦៧នាក់ នៅស្រុកស្អាង ចូលរួមជីវភាពនយោបាយជាមួយគណបក្សប្រជាជនកម្ពុជា

ការបំផ្ទុះគ្រាប់បែកក្នុងរថយន្តនៅប៉ាគីស្ថាន បានសម្លាប់នគរបាលជាង១០នាក់ និងមួយចំនួនរងរបួស

WHO ៖វីរុស hanta មិនមែនជា COVID-19 ផ្សេងទៀតទេ ហើយហានិភ័យសុខភាពសាធារណៈនៅតែមានកម្រិតទាប

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877