BTV NEWS

អាវុធហត្ថរាជធានីភ្នំពេញ បង្ក្រាបគ្រឿងញៀនជាង ៦គីឡូក្រាមឃាត់ខ្លួនមនុស្ស ១១នាក់

ជនជាតិខ្មែរ និងបរទេសជិត ៥ពាន់នាក់ ត្រូវជាប់ឃុំ ខណៈមន្ត្រីនគរបាល ៧៧នាក់ ត្រូវវិន័យធ្ងន់ធ្ងរដោយសារ Online Scams

នគរបាលរាជធានីឃាត់ខ្លួនបុរសម្នាក់ បែកធ្លាយសម្លេងតាមបណ្តាញសង្គម ម៉ាក់ងាយធ្ងន់ធ្ងរលើវីរជនកងទ័ពកម្ពុជា

កម្លាំងសមត្ថកិច្ចឃាត់ខ្លួនជនជាតិចិនចំនួន០៧នាក់ និងដកហូតសារធាតុញៀនជិត១តោន រួមទាំងអាវុធវែងខ្លីជាច្រើនដើម

សន្តិសុខ និង សង្គម

អង្គការសហប្រជាជាតិ ជំរុញការផ្តល់ស្បៀងអាហារដល់ជនភៀសខ្លួនរ៉ូហ៊ីងយ៉ា នៅប្រទេសបង់ក្លាដែស

កម្មវិធីស្បៀងអាហារពិភពលោក (WFP) បាននិយាយកាលពីថ្ងៃអង្គារ (០២ មករា) ថាអង្គការសហប្រជាជាតិបង្កើនការផ្ដល់ស្បៀងអាហារសម្រាប់ជនភៀសខ្លួនរ៉ូហ៊ីងយ៉ាម្នាក់ៗក្នុងប្រទេសបង់ក្លាដែស ចំនួន ២ដុល្លារទៀតក្នុងមួយខែដែលឡើងដល់ចំនួន ១០ដុល្លារ ចាប់ពីថ្ងៃទី០១ ខែមករា ខណៈទីភ្នាក់ងារស្បៀងអាហារ UN មួយនេះសម្ដែងការដឹងគុណដល់ម្ចាស់ជំនួយដែលបានជួយដល់កិច្ចខិតខំប្រឹងប្រែងដែលខ្វះថវិកានេះ។អង្គការសហប្រជាជាតិបានកាត់បន្ថយជំនួយស្បៀងអាហារកាលពីឆ្នាំមុនដល់ជនភៀសខ្លួនចំនួនមួយភាគបីមកនៅត្រឹមចំនួន ៨ដុល្លារជារៀងរាល់ខែ ដោយសារខ្លួនរៃអង្គាសបានថវិកាតិចជាងពាក់កណ្តាលនៃចំនួន ៨៧៦លានដុល្លារដែលត្រូវការដើម្បីជួយអ្នករងគ្រោះទាំងនោះ។សមាជិកជិតមួយលាននាក់នៃជនជាតិភាគតិចមូស្លីមរ៉ូហ៊ីងយ៉ាមកពីប្រទេសមីយ៉ាន់ម៉ា រស់នៅក្នុងជំរំធ្វើពីឫស្សី និងផ្លាស្ទិកក្នុងសង្កាត់ព្រំដែន ខុកស៍បាហ្សា (Cox's Bazar) របស់ប្រទេសបង់ក្លាដែស ដែលភាគច្រើនបានភៀសខ្លួនចេញពីការបង្ក្រាបដោយយោធាក្នុងឆ្នាំ២០១៧។ទីភ្នាក់ងារ WFP បាននិយាយថា ការស្ទង់មតិចុងក្រោយបង្អស់បានបង្ហាញពីកង្វះអាហារូបត្ថម្ភនៅក្នុងជំរំជនភៀសខ្លួនរ៉ូហ៊ីងយ៉ាក្នុងប្រទេសបង់ក្លាដែស មានកម្រិតខ្ពស់បំផុតចាប់តាំងពីការហូរចូលឆ្នាំ២០១៧ ហើយបានលើសពីកម្រិតសង្គ្រោះបន្ទាន់ ១៥% នេះបើយោងតាមចំណាត់ថ្នាក់គ្រាអាសន្នរបស់អង្គការសុខភាពពិភពលោក៕

អ៊ីស្រាអែល នឹងតតាំងប្រឆាំងនឹងការអះអាងរបស់អាហ្វ្រិកខាងត្បូង អំពើប្រល័យពូជសាសន៍ នៅតំបន់ហ្កាហ្សា នៅតុលាការ

អ្នកនាំពាក្យរបស់អ៊ីស្រាអែល បាននិយាយថា អ៊ីស្រាអែលនឹងតតាំងប្រឆាំងនឹងការអះអាងរបស់អាហ្វ្រិកខាងត្បូងដែលថា ខ្លួនកំពុងប្រព្រឹត្តអំពើ «ប្រល័យពូជសាសន៍» នៅតំបន់ហ្កាហ្សា នៅតុលាការយុត្តិធម៌អន្តរជាតិ(ICJ)។ លោក Eylon Levy បាននិយាយទៅកាន់មេដឹកនាំអាហ្វ្រិកខាងត្បូងថា៖«ប្រវត្តិសាស្ត្រ នឹងវិនិច្ឆ័យអ្នក ហើយវានឹងវិនិច្ឆ័យអ្នកដោយគ្មានមេត្តា»។ប្រទេសអាហ្វ្រិកខាងត្បូង បានដាក់សំណុំរឿងនេះទៅតុលាការ ICJ កាលពីថ្ងៃសុក្រ ដោយធ្វើឲ្យអ៊ីស្រា អែលផ្ទុះកំហឹង។អាហ្រ្វិកខាងត្បូង គឺជាអ្នកគាំទ្រដ៏ម៉ឺងម៉ាត់របស់ប៉ាឡេស្ទីន ហើយបានថ្កោលទោសអ៊ីស្រាអែលម្តងហើយម្តងទៀត ចាប់តាំងពីការចាប់ផ្តើមនៃសង្រ្គាមនៅតំបន់ហ្កាហ្សា នៅថ្ងៃទី៧ ខែតុលា។ប្រជាជនប៉ាឡេស្ទីនជាង ២២.០០នាក់ ដែលភាគច្រើនជាជនស៊ីវិល ត្រូវបានសម្លាប់ នៅក្នុងការវាយប្រហាររបស់អ៊ីស្រាអែល ចាប់តាំងពីសង្រ្គាម បានចាប់ផ្តើម នេះបើយោងតាមក្រសួងសុខាភិបាលនៃតំបន់ហ្កាហ្សា ដែលគ្រប់គ្រងដោយក្រុមអ៊ីស្លាមនិយមហាម៉ាស។អ៊ីស្រាអែល បានប្រកាសសង្រ្គាមទៅលើក្រុមហាម៉ាស បន្ទាប់ពីក្រុមនេះ បានដឹកនាំការវាយប្រហារដ៏ធំលើសហគមន៍នានាក្នុងប្រទេសអ៊ីស្រាអែល ដោយបានសម្លាប់មនុស្សប្រហែល ១.២០០នាក់ ភាគច្រើនជាជនស៊ីវិល និងបានចាប់មនុស្សប្រហែល ២៤០នាក់ទៀតទៅកាន់តំបន់ហ្កាហ្សា ជាចំណាប់ថ្នូរ។

អាមេរិក បានឈានដល់កិច្ចព្រមព្រៀងដោយសម្ងាត់ជាមួយកាតា ដើម្បីបន្តប្រតិបត្តិការមូលដ្ឋានយោធាធំបំផុតនៅមជ្ឈិមបូព៌ា

មន្ត្រីការពារជាតិអាមេរិកបីនាក់ និងមន្ត្រីម្នាក់ទៀតដែលដឹងពីកិច្ចព្រមព្រៀងនេះបានប្រាប់ CNN ថា សហរដ្ឋអាមេរិកបានឈានដល់កិច្ចព្រមព្រៀងដោយសម្ងាត់ដែលត្រូវពង្រីកវត្តមានយោធារបស់ខ្លួននៅឯមូលដ្ឋានដ៏ធំមួយក្នុងប្រទេសកាតាសម្រាប់រយៈពេល ១០ ឆ្នាំទៀត ។ កិច្ចព្រមព្រៀង ដែលមិនត្រូវបានប្រកាសជាសាធារណៈ បង្ហាញពីការពឹងផ្អែករបស់ទីក្រុងវ៉ាស៊ីនតោន លើប្រទេសឈូងសមុទ្រតូចមួយនេះ ដែលថ្មីៗនេះបានដើរតួនាទីសំខាន់ក្នុងការសម្របសម្រួលការដោះលែងចំណាប់ថ្នូរជនជាតិអាមេរិកពីការជាប់ឃុំឃាំងនៅតំបន់ហ្កាហ្សា និងវេណេហ្ស៊ុយអេឡា។មូលដ្ឋានទ័ពអាកាស អេអាយ យូដេដ (Al Udeid) ដែលមានទីតាំងនៅវាលខ្សាច់ភាគនិរតីនៃទីក្រុង ដូហា(Doha) ប្រទេសកាតា គឺជាការដំឡើងសាច់ដុំយោធាដ៏ធំបំផុតរបស់សហរដ្ឋអាមេរិកនៅមជ្ឈិមបូព៌ា ហើយអាចផ្ទុកទាហានអាមេរិកជាង១ម៉ឺននាក់។រដ្ឋមន្ត្រីក្រសួងការពារជាតិអាមេរិក លោក ឡយ អូស្ទីន (Lloyd Austin) បានទៅទស្សនកិច្ចនៅមូលដ្ឋានទ័ពអា អាយ យូដែដ (Al Udeid)កាលពីខែមុន ជាទីដែលលោកបានថ្លែងអំណរគុណដល់ប្រទេសកាតា សម្រាប់ការបង្កើនការចំណាយរបស់ពួកគេលើមូលដ្ឋានទ័ពនេះ។ ប៉ុន្តែលោកពុំបាននិយាយអំពីការបន្តឡើងវិញនោះទេ ហើយរដ្ឋបាល លោកBiden ពុំបានផ្សព្វផ្សាយជាសាធារណៈដែរ នៅពេលប្រទេសកាតា ស្ថិតនៅក្រោមការត្រួតពិនិត្យកាន់តែខ្លាំងឡើងសម្រាប់ការធ្វើជាម្ចាស់ផ្ទះទទួលមេដឹកនាំជាន់ខ្ពស់របស់ក្រុមហាម៉ាស។ ក្រុមមន្ត្រីកាតាបានប្រឆាំងថា នោះគ្រាន់តែជាសំណើរបស់សហរដ្ឋអាមេរិកក្នុងអំឡុងរដ្ឋបាលលោកអតីតប្រធានាធិបតី អូបាម៉ា ប៉ុណ្ណោះដែលក្រុមហាម៉ាស ត្រូវបានអនុញ្ញាតឱ្យបើកការិយាល័យនយោបាយនៅទីក្រុងដូហា។ មូលដ្ឋាននេះជាមជ្ឈមណ្ឌលសំខាន់សម្រាប់ប្រតិបត្តិការផ្លូវអាកាសរបស់ទីបញ្ជាការកណ្តាលអាមេរិកក្នុងឬជុំវិញប្រទេសអាហ្វហ្គានីស្ថាន អ៊ីរ៉ង់ និងទូទាំងមជ្ឈិមបូព៌ា។ កងទ័ពអាកាសកាតា និងអង់គ្លេសក៏ប្រតិបត្តិការពីមូលដ្ឋាននោះដែរ។ការពង្រីកឥទ្ធិពលយោធានេះ កើតឡើងនៅពេលសហរដ្ឋអាមេរិកបានពង្រឹងវត្តមានរបស់ខ្លួននៅក្នុងតំបន់ស្របពេលមានការគំរាមកំហែងកាន់តែខ្លាំងឡើងពីក្រុមសកម្មប្រយុទ្ធ ដែលគាំទ្រដោយអ៊ីរ៉ង់នៅក្នុងប្រទេសអ៊ីរ៉ាក់ ស៊ីរី និងយេម៉ែន៕

ការប្រយុទ្ធគ្នារវាងក្រុមហាម៉ាស និងអ៊ីស្រាអែល នៅតែបន្ត ខណៈអ្នកស្លាប់ខាងប៉ាឡេស្ទីនឡើងលើស ២២.០០០នាក់

អ៊ីស្រាអែលបាននិយាយកាលពីថ្ងៃអង្គារ (០២ មករា) ថាកងទ័ពរបស់ខ្លួនបានសម្លាប់ពួកសកម្មប្រយុទ្ធរាប់សិបនាក់នៅភាគខាងជើងនៃតំបន់ហ្កាហ្សាស្ទ្រីប ខណៈដែលយន្តហោះ និងរថក្រោះរបស់ខ្លួនបានបង្កើនការវាយប្រហារនៅភាគខាងត្បូងនៃតំបន់ប៉ាឡេស្ទីន។ អ្នកស្រុកបាននិយាយថា ការប្រយុទ្ធគ្នាយ៉ាងខ្លាំងក្លាក៏កំពុងបន្តផ្ទុះឡើងនៅក្នុងតំបន់កណ្តាលផងដែរ ដោយលើកឡើងពីការបាញ់ផ្លោងដោយរថក្រោះអ៊ីស្រាអែលលើផ្នែកខ្លះនៃជំរំជនភៀសខ្លួន អាល់ប៊ុរេច (Al-Bureij)។ក្រសួងសុខាភិបាលហ្កាហ្សាបាននិយាយថា ប្រជាជនប៉ាឡេស្ទីនចំនួន ២០៧នាក់ត្រូវបានសម្លាប់ និងមនុស្ស ៣៣៨នាក់បានរងរបួសក្នុងរយៈពេល ២៤ម៉ោងចុងក្រោយនេះ ដែលនាំឱ្យចំនួនអ្នកស្លាប់សរុបខាងប៉ាឡេស្ទីនដែលបានកត់ត្រាកើនឡើងដល់ ២២.១៨៥នាក់ និងរបួសចំនួន ៥៧.០៣៥នាក់ ក្នុងរយៈពេលជិត ៣ខែនៃសង្គ្រាមនៅក្នុងតំបន់ហ៊ុមព័ទ្ធដែលគ្រប់គ្រងដោយក្រុមហាម៉ាស។ការប្រយុទ្ធចុងក្រោយនេះបានកើតឡើងបន្ទាប់ពីអ៊ីស្រាអែលបានប្រកាសពីផែនការដកកងទ័ពមួយចំនួនមកវិញ ដែលជាសញ្ញានៃដំណាក់កាលថ្មីក្នុងសង្គ្រាមប្រឆាំងនឹងក្រុមហាម៉ាស ស្របពេលមានការព្រួយបារម្ភជាសកលចំពោះស្ថានភាពរបស់អ្នកស្រុកនៅតំបន់ហ្កាហ្សា។ការទម្លាក់គ្រាប់បែករបស់អ៊ីស្រាអែលបានបំផ្លាញទឹកដីភាគច្រើននៃតំបន់នេះទៅជាកម្ទេចថ្ម និងបានធ្វើឲ្យអ្នកស្រុកហ្កាហ្សាចំនួន ២,៣លាននាក់ស្ថិតនៅក្នុងគ្រោះមហន្តរាយមនុស្សធម៌ ដែលមនុស្សជាច្រើនត្រូវបានទុកចោលយ៉ាងគួរឲ្យអាណិត និងរងគំរាមកំហែងដោយទុរ្ភិក្សដោយសារកង្វះការផ្គត់ផ្គង់ស្បៀងអាហារ៕

ប្រមុខ UN ហៅការវាយប្រហារដែលសម្លាប់មេដឹកនាំរងរបស់ក្រុមហាម៉ាសនៅលីបង់ ថាជារឿងគួរឲ្យបារម្ភជាខ្លាំង

អ្នកនាំពាក្យរបស់អង្គការសហប្រជាជាតិបាននិយាយកាលពីថ្ងៃអង្គារ (០២ មករា) ថាអគ្គលេខាធិការអង្គការសហប្រជាជាតិលោក អង់តូនីញ៉ូ ហ្គុយតើរ៉េស (Antonio Guterres) មើលឃើញថាការធ្វើឃាតមេដឹកនាំជាន់ខ្ពស់ម្នាក់របស់ក្រុមហាម៉ាស នៅក្នុងការវាយប្រហារដែលសង្ស័យពីអ៊ីស្រាអែល នៅទីក្រុងបេរ៉ូត (Beirut) នៅប្រទេសលីបង់ គឺជាការវិវឌ្ឍន៍ដ៏គួរឱ្យព្រួយបារម្ភយ៉ាងខ្លាំង។លោកស្រី ហ្វ្លរ៉េនសា សូតូនីណូ (Florencia Soto Nino) ដែលជាសហការីអ្នកនាំពាក្យរបស់លោក ហ្គុយតើរ៉េស បាននិយាយថា «ជាក់ស្តែងណាស់ ការវិវឌ្ឍន៍នេះគឺជារឿងដ៏ព្រួយបារម្ភយ៉ាងខ្លាំង។ ហើយខ្ញុំគិតថានេះពិតជាបញ្ជាក់ពីអ្វីដែលលោកអគ្គលេខាធិកាទើបតែបាននិយាយអំពីគ្រោះថ្នាក់នៃការរាលដាលនៃជម្លោះរបស់អ៊ីស្រាអែល និងប៉ាឡេស្ទីន នៅក្នុងតំបន់ដ៏ធំទូលាយ»។លោកស្រីបានបន្ថែមថា «លោកអគ្គលេខាធិការជំរុញឱ្យភាគីទាំងអស់អនុវត្តការអត់ធ្មត់ជាអតិបរមា និងចាត់វិធានការជាបន្ទាន់ដើម្បីកាត់បន្ថយភាពតានតឹងនៅក្នុងតំបន់»។ទីភ្នាក់ងារសារព័ត៌មានជាតិរបស់ប្រទេសលីបង់ បាននិយាយថា មនុស្ស៦នាក់បានស្លាប់ នៅពេលដែលយានដ្រូនបានវាយប្រហារការិយាល័យរបស់ក្រុមហាម៉ាស។ ប្រភពសន្តិសុខចំនួនពីរបាននិយាយថា ការវាយប្រហារបានកំណត់គោលដៅលើកិច្ចប្រជុំមួយ ហើយមេបញ្ជាការសកម្មប្រយុទ្ធប៉ាឡេស្ទីនម្នាក់ទៀតក៏ស្ថិតក្នុងចំណោមពួកគេនោះដែរ ប៉ុន្តែមិនមានព័ត៌មានលម្អិតអំពីជនរងគ្រោះបួននាក់ទៀតនោះទេ៕

ប្រទេសទួរគី ចាប់ខ្លួនជនសង្ស័យរាប់សិបនាក់ពីបទចារកម្មឲ្យអ៊ីស្រាអែល

ប្រទេសទួរគី ត្រូវគេរាយការណ៍ថា បានឃុំខ្លួនមនុស្ស ៣៣នាក់ ដែលសង្ស័យថាបានធ្វើចារកម្មឲ្យ ប្រទេសអ៊ីស្រាអែល។ទីភ្នាក់ងារ Anadolu បានរាយការណ៍កាលពីថ្ងៃអង្គារថា ក្រុមអាជ្ញាធរនៅតែកំពុងស្វែងរកមនុស្ស ១៣នាក់ផ្សេងទៀត ដែលត្រូវគេជឿថាមានទំនាក់ទំនងជាមួយសេវាសន្តិសុខ ម៉ូហ្សាដ (Mossad)របស់អ៊ីស្រាអែល។ ទីក្រុងអង់ការ៉ា ធ្លាប់បានព្រមានថា ខ្លួននឹងមិនអនុញ្ញាតឱ្យអ៊ីស្រាអែល វាយប្រហារលើក្រុមហាម៉ាស នៅខាងក្នុងព្រំដែនរបស់ប្រទេសទួរគីឡើយ។ ទីភ្នាក់ងារនេះបានរាយការណ៍ថា ជនសង្ស័យត្រូវបានឃុំខ្លួននៅក្នុងការវាយឆ្មក់ក្នុងទីក្រុងអ៊ីស្តង់ប៊ុល និងខេត្តចំនួន៧រផ្សេងទៀតលើការចោទប្រកាន់ថាមានផែនការធ្វើសកម្មភាពដែលរួមមាន ការឈ្លបយកការណ៍ និង ការតាមប្រមាញ់ វាយប្រហារ និងចាប់ជំរិត ជនបរទេសដែលរស់នៅក្នុងប្រទេសទួរគី។រដ្ឋមន្ត្រីមហាផ្ទៃលោកអាលី យឺលីកាយ៉ា (Ali Yerlikaya) បាននិយាយនៅលើប្រព័ន្ធផ្សព្វផ្សាយសង្គមថា យើងនឹងមិនអនុញ្ញាតឱ្យសកម្មភាពចារកម្ម ត្រូវបានធ្វើឡើងប្រឆាំងនឹងការរួបរួមជាតិ និងសាមគ្គីភាពនៃប្រទេសរបស់យើងឡើយ។សារព័ត៌មាន Anadolu ពុំបានផ្តល់ព័ត៌មានអំពីជនសង្ស័យឬជនបរទេសដែលត្រូវបានគេចោទថាជាគោលដៅនោះទេ។ របាយការណ៍នេះបានកើតឡើងប៉ុន្មានសប្តាហ៍បន្ទាប់ពីប្រធានទីភ្នាក់ងារសន្តិសុខក្នុងស្រុករបស់អ៊ីស្រាអែល លោក ស៊ីនបេត (Shin Bet) បាននិយាយនៅក្នុងខ្សែអាត់សំឡេងថា អង្គការរបស់លោក ត្រូវបានរៀបចំដើម្បីបំផ្លាញក្រុមហាម៉ាស នៅគ្រប់ទីកន្លែង រួមទាំងនៅក្នុងប្រទេសលីបង់ ទួរគី និងកាតា។ លោកប្រធានាធិបតីទួរគី រីស៊ីប តាយីប អឺដូហ្គែន (Recep Tayyip Erdogan) បានព្រមានអ៊ីស្រាអែលពី ផលវិបាកធ្ងន់ធ្ងរ ប្រសិនបើប្រទេសនេះ នៅតែបន្តទៅមុខដោយការគំរាមកំហែងរបស់ខ្លួនក្នុងការវាយប្រហារលើក្រុមមន្ត្រីក្រុមហាម៉ាស នៅលើទឹកដីរបស់ទួរគី៕

បារាំងបញ្ជូនក្រុមអ្នកជំនាញនីតិកោសល្យវិទ្យាទៅទីក្រុងតូក្យូ ក្រោយហេតុការណ៍ប៉ះទង្គិចយន្តហោះ

ទីភ្នាក់ងាររដ្ឋបារាំងបាននិយាយកាលពីថ្ងៃអង្គារ (០២ មករា) ថាក្រុមអ្នកជំនាញផ្នែកនីតិកោសល្យវិទ្យាមកពីក្រុមហ៊ុនផលិតយន្តហោះ អ៊ែរប៊ឺស (Airbus) និងទីភ្នាក់ងាររដ្ឋបារាំង ប៊ីអេអ៊ី (BAE) ត្រូវបានបញ្ជូនទៅកាន់ប្រទេសជប៉ុន ហើយទៅដល់នៅថ្ងៃពុធ (០៣ មករា) នេះដើម្បីជួយក្រុមអាជ្ញាធរស៊ើបអង្កេតគ្រោះថ្នាក់ដ៏រន្ធត់ដែលពាក់ព័ន្ធនឹងយន្តហោះ A350 នៅអាកាសយានដ្ឋាន ហាណេដា (Haneda) ទីក្រុងតូក្យូ។ក្រុមហ៊ុន អ៊ែរប៊ឺស បាននិយាយនៅក្នុងសេចក្តីថ្លែងការណ៍ដាច់ដោយឡែកមួយថា យន្តហោះដែលពាក់ព័ន្ធក្នុងគ្រោះថ្នាក់នោះគឺប្រភេទ MSN 538 ដែលត្រូវបានប្រគល់ឱ្យក្រុមហ៊ុនអាកាសចរណ៍ជប៉ុន ជើផេន អ៊ែរឡាញស៍ (Japan Airlines) បន្ទាប់ពីបានផលិតក្នុងខែវិច្ឆិកា ឆ្នាំ២០២១ ហើយត្រូវបានបំពាក់ដោយម៉ាស៊ីនប្រភេទ រ៉ូលស៍រ៉យ ត្រេន អ៊ិចដាប់ប៊ែលយ៉ូប៊ី (Rolls-Royce Trent XWB)។យន្តហោះរបស់ក្រុមហ៊ុនអាកាសចរណ៍ ជើផេន អ៊ែរឡាញស៍ បានផ្ទុះឆេះកាលពីថ្ងៃអង្គារ ខណៈវាបានរអិលធ្លាក់ពីផ្លូវបន្ទាប់ពីបុកជាមួយយន្តហោះឆ្មាំសមុទ្រជប៉ុនដែលបានសម្លាប់នាវិកប្រាំនាក់ ក្នុងចំណោមនាវិកប្រាំមួយនាក់នៅលើនោះ។ អ្នកដំណើរទាំង ៣៦៧នាក់ និងនាវិក ១២នាក់ ត្រូវបានជម្លៀសចេញពីគ្រោះអគ្គិភ័យដោយសុវត្ថិភាព៕

លោកហ្សេឡិនស្គី៖ ការវាយប្រហារដោយមីស៊ីលរបស់រុស្ស៊ី សម្លាប់មនុស្ស៤នាក់ និងរបួស៩២នាក់ នៅទូទាំងអ៊ុយក្រែន

លោកប្រធានាធិបតី វ៉ូឡូមៀ ហ្សេឡិនស្គី ( Volodymyr Zelenskyy) បានប្រកាសនៅលើបណ្តាញសង្គម Telegram កាលពីថ្ងៃទី២ ខែមករាថា មនុស្ស៤នាក់ បានស្លាប់ និង៩២នាក់បានរងរបួស ដោយសារការវាយប្រហារដោយមីស៊ីលរបស់រុស្ស៊ីទៅលើអ៊ុយក្រែន។លោកបាននិយាយថា ការមិនសងសំណងដល់ផលវិបាកនានានៃការវាយប្រហាររុស្ស៊ីមួយផ្សេងទៀត លើអ៊ុយក្រែន កំពុងបន្តដំណើរការ។ សេវាកម្មចាំបាច់ទាំងអស់ ត្រូវបានចូលរួម ពោលគឺអ្នកជួយសង្គ្រោះជាង ៥០០នាក់នៃសេវាសង្គ្រោះបន្ទាន់របស់រដ្ឋអ៊ុយក្រែន ឧបករណ៍ប្រើប្រាស់ វិស្វករថាមពល និងនគរបាលជាដើម។លោកប្រធានាធិបតីរូបនេះ បានបន្តទៀតថា៖ «នៅទីក្រុងគីវ និងតំបន់ខាគីវ គិតត្រឹមពេលនេះ យើងដឹងអំពីចំនួនអ្នករងរបួស គឺ៩២នាក់»។«ពួកគេទាំងអស់នោះ កំពុងត្រូវបានជួយ។ ជាអកុសល មនុស្ស៤នាក់ បានស្លាប់។ ខ្ញុំសូមចូលរួមរំលែកទុក្ខដល់ក្រុមគ្រួសារ និងមិត្តភ័ក្តិ»។យោធារុស្ស៊ី បានបាញ់បង្ហោះយានដ្រូន Shahed ប្រហែល ១៧០គ្រឿង និងមីស៊ីលជាច្រើនប្រភេទ នៅអ៊ុយក្រែន ចាប់តាំងពីថ្ងៃទី៣១ ខែធ្នូ។ ភាគច្រើននៃពួកវា គឺសំដៅទៅលើគោលដៅស៊ីវិល។ ប្រមុខរដ្ឋ បានថ្លែងអំណរគុណដល់ដៃគូទាំងអស់ ដែលជួយពង្រឹងការការពារដែនអាកាសរបស់អ៊ុយក្រែន។

ប្រទេសចិន បំបែកកំណត់ត្រាកម្ដៅក្នុងឆ្នាំ២០២៣ ខណៈអាកាសធាតុក្ដៅខ្លាំងវាយលុកទីក្រុងនានាពីជើងទៅត្បូង

កម្ដៅនៅក្នុងប្រទេសចិន បានកើនខ្លាំងក្នុងឆ្នាំ២០២៣ ជាមួយនឹងសីតុណ្ហភាពកម្រិតបំបែកកំណត់ត្រាចាប់ពីទីក្រុងប៉េកាំង ទៅកាន់ទីក្រុងសៀងហៃ ដែលបានជំរុញដោយសារបាតុភូតរលកកម្ដៅពិភពលោក ដែលបានវាប្រហារតំបន់ជាច្រើន និងបានបង្កើនការព្រួយបារម្ភបន្ថែមទៀតអំពីបម្រែបម្រួលអាកាសធាតុពិភពលោក។ប្រព័ន្ធផ្សព្វផ្សាយរដ្ឋបានរាយការណ៍កាលពីថ្ងៃអង្គារ (០២ មករា) ថាកម្ដៅដ៏ក្តៅគគុករបស់ប្រទេសចិនបានធ្វើឱ្យស្ថានីយ៍អាកាសធាតុជាតិចំនួន ១២៧ទីតាំង បំបែកកំណត់ត្រាសម្រាប់សីតុណ្ហភាពខ្ពស់ប្រចាំថ្ងៃក្នុងឆ្នាំ២០២៣។ ទីក្រុងប៉េកាំងបានបំបែកកំណត់ត្រាកម្ដៅអាយុកាល ២៣ឆ្នាំរបស់ខ្លួនកាលពីខែកក្កដាជាមួយនឹងសីតុណ្ហភាពក្ដៅ ២៧ថ្ងៃជាប់ៗគ្នាលើសពី ៣៥អង្សាសេ។សីតុណ្ហភាពជាតិជាមធ្យមមានកម្រិត ១០,៧អង្សាសេ ដែលខ្ពស់បំផុតចាប់តាំងពីឆ្នាំ១៩៦១ មកនិងមានកម្រិត ០,៨អង្សាសេ ខ្ពស់ជាងទិន្នន័យធម្មតាដែលស្ថិតក្នុងតួលេខ ៩,៩អង្សាសេ ហើយក៏បានបំបែកកំណត់ត្រាលើសសីតុណ្ហភាព ១០,៥អង្សាសេ ដែលបានកំណត់ក្នុងឆ្នាំ២០២១ នេះបើយោងតាមប្រព័ន្ធផ្សព្វផ្សាយរដ្ឋ CCTV។កម្ដៅដ៏ខ្លាំងក្លានេះក៏បានវាយលុកអឺរ៉ុប ឥណ្ឌា អាហ្វ្រិកខាងជើង ផ្នែកជាច្រើននៃភាគខាងត្បូងសហរដ្ឋអាមេរិក និងតំបន់អាស៊ីអាគ្នេយ៍។ យោងតាមទិន្នន័យពីមជ្ឈមណ្ឌលជាតិសម្រាប់ការទស្សន៍ទាយបរិស្ថានរបស់សហរដ្ឋអាមេរិក បានឲ្យដឹងថា ថ្ងៃដ៏ក្តៅបំផុតដែលមិនធ្លាប់មានក្នុងកំណត់ត្រាជាសកល គឺថ្ងៃទី០៣ ខែកក្កដា ឆ្នាំ២០២៣៕

លោក Biden រងសម្ពាធក្នុងចំណាត់លើអ៊ីស្រាអែល ខណៈមានក្ដីបារម្ភថ្មីនៃការបោសសម្អាតជាតិភាគតិចនៅហ្កាហ្សា

ក្រុមអ្នកតស៊ូមតិនៅសហរដ្ឋអាមេរិកកំពុងជំរុញឱ្យលោកប្រធានាធិបតី Joe Biden បញ្ចប់ភាពស្មុគស្មាញរបស់រដ្ឋបាលរបស់លោកក្នុងការរំលោភសិទ្ធិពីសំណាក់អ៊ីស្រាអែល បន្ទាប់ពីសមាជិកសំខាន់ៗរបស់រដ្ឋាភិបាលអ៊ីស្រាអែលបានគាំទ្រគំនិតនៃការរុញជនជាតិប៉ាឡេស្ទីនចេញពីតំបន់ហ្កាហ្សា។ រដ្ឋមន្ត្រីអ៊ីស្រាអែលស្តាំនិយមលោកអ៊ីតាម៉ា បេន គ្រី( Itamar Ben-Gvir)និងលោក បេនហ្សាឡេលស្មូទ្រីច(Bezalel Smotrich)បាននិយាយនៅសប្តាហ៍នេះថា អ៊ីស្រាអែលគួរតែ លើកទឹកចិត្តឱ្យមានការធ្វើអន្តោប្រវេសន៍ ចេញពីតំបន់ឆ្នេរដែលជាជម្រករបស់ពលរដ្ឋប៉ាឡេស្ទីនប្រមាណ២,៣លាននាក់។ យោងតាមអង្គការសហប្រជាជាតិ អ៊ីស្រាអ៊ែល បាននិងកំពុងធ្វើប្រតិបត្តិការវាយប្រហារដោយយោធានៅតំបន់ហ្កាហ្សា ចាប់តាំងពីថ្ងៃទី ៧ ខែតុលា ដែលបានបណ្ដាលឲ្យពលរដ្ឋប៉ាឡេស្ទីនប្រមាណ១,៩ លាននាក់ត្រូវជម្លៀសខ្លួននៅខាងក្នុង តំបន់នេះ។ លោក Smotrich បាននិយាយកាលពីថ្ងៃអាទិត្យថា ប្រសិនបើមានជនជាតិអារ៉ាប់ចន្លោះពី១សែនឬ ២សែននាក់នៅក្នុងតំបន់ហ្កាហ្សា ហើយមិនមែនជនជាតិអារ៉ាប់ពីរលាននាក់ទេ ការពិភាក្សាទាំងមូលនៅថ្ងៃនោះ បន្ទាប់ពីសង្គ្រាមបានបញ្ចប់ នឹងខុសគ្នាទាំងស្រុង ដោយអំពាវនាវឱ្យ ការធ្វើអន្តោប្រវេសន៍ដោយស្ម័គ្រចិត្ត របស់ពលរដ្ឋប៉ាឡេស្ទីន។ សារព័ត៌មានរបស់អ៊ីស្រាអែល បានរាយការណ៍ថា មួយថ្ងៃក្រោយមក លោក បេនគ្រី(Ben-Gvir)ដែលទទួលខុសត្រូវផ្នែកសន្តិសុខជាតិបានអំពាវនាវស្រដៀងគ្នានេះ ដោយនិយាយថាវាជា ដំណោះស្រាយត្រឹមត្រូវ យុត្តិធម៌ សីលធម៌ និងមនុស្សធម៌។ការលើកឡើងរបស់ពួកគេគឺជាសម្ដីចុងក្រោយរបស់មន្ត្រីអ៊ីស្រាអែលដែលសំដៅទៅលើការរំពឹងទុកនៃការតាំងទីលំនៅថ្មីរបស់ជនប៉ាឡេស្ទីននៅក្រៅតំបន់ហ្កាហ្សា។ ក្រុមអ្នកជំនាញផ្នែកសិទ្ធិមនុស្ស និងច្បាប់បានព្រមានថា ការផ្លាស់ទីលំនៅដោយបង្ខំ គឺជាឧក្រិដ្ឋកម្មសង្គ្រាមក្រោមច្បាប់អន្តរជាតិ ហើយអាចឈានទៅដល់ការបោសសម្អាតជនជាតិភាគតិច៕

បណ្ដាញសង្គម

ព័ត៌មានថ្មីៗ

ទូតកម្ពុជាប្រចាំនៅជប៉ុន៖ យុវជនមានតួនាទីសំខាន់ក្នុងការរួមចំណែកពង្រឹងទំនាក់ទំនងរវាងកម្ពុជា-ជប៉ុន ឱ្យកាន់តែរឹងមាំថែមទៀត

សិស្សានុសិស្ស លោកគ្រូអ្នកគ្រូ រួមទាំងអាណាព្យាបាល នៅក្រុងស្ទឹងត្រែង ចំនួន ៣ ៥៩៩នាក់ ទទួលបានសេវាព្យាបាលពីក្រុមគ្រូពេទ្យ TYDA

ក្រសួងការងារបន្តផ្សព្វផ្សាយឱកាសការងារជាច្រើនម៉ឺនកន្លែងក្នុងស្រុក ដល់យុវជន និងអតីតពលករ នៅខេត្តប៉ៃលិន-បាត់ដំបង

ក្រុមការងារចលនាស្ត្រី នៃក្រុមការងារគណបក្សចុះមូលដ្ឋានខេត្តកណ្ដាល ប្តេជ្ញាបន្តសកម្មភាពបម្រើពលរដ្ឋដោយបេះដូងនិងស្មោះត្រង់

ប្រធានក្រុមការងារជួសជុល និងសាងសង់ឡើងវិញអគារសិក្សាអំណោយសម្ដេចតេជោ ចុះពិនិត្យ និងវាយតម្លៃស្ថានភាពអគារសិក្សាចំនួន ៤ ទីតាំងបន្ថែមទៀត ក្នុងស្រុកអង្គរជ័យ ខេត្តកំពត

ប្រមុខ UN ទទួលបន្ទុកជនភៀសខ្លួន ព្រមានពីស្ថានភាព «កាន់តែធ្ងន់ធ្ងរឡើង» នៅតំបន់ Sahara ខាងលិច

មនុស្សរាប់លាននាក់នៅភាគឦសានរបស់សហរដ្ឋអាមេរិក ត្រៀមប្រឈមនឹងព្យុះដ៏ខ្លាំងក្លា

កុមារនៅភាគខាងត្បូងលីបង់ ត្រឡប់ទៅសាលារៀនដែលត្រូវបានបំផ្លាញដោយការវាយប្រហាររបស់អ៊ីស្រាអែល

UN បន្ថែមក្រុមហ៊ុន ៦១ទៀតក្នុងបញ្ជីពាក់ព័ន្ធនឹងការតាំងទីលំនៅអ៊ីស្រាអែលធ្វើឲ្យចំនួនសរុបកើនដល់ ២១៤

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877