BTV NEWS

អាវុធហត្ថរាជធានីភ្នំពេញ បង្ក្រាបគ្រឿងញៀនជាង ៦គីឡូក្រាមឃាត់ខ្លួនមនុស្ស ១១នាក់

ជនជាតិខ្មែរ និងបរទេសជិត ៥ពាន់នាក់ ត្រូវជាប់ឃុំ ខណៈមន្ត្រីនគរបាល ៧៧នាក់ ត្រូវវិន័យធ្ងន់ធ្ងរដោយសារ Online Scams

នគរបាលរាជធានីឃាត់ខ្លួនបុរសម្នាក់ បែកធ្លាយសម្លេងតាមបណ្តាញសង្គម ម៉ាក់ងាយធ្ងន់ធ្ងរលើវីរជនកងទ័ពកម្ពុជា

កម្លាំងសមត្ថកិច្ចឃាត់ខ្លួនជនជាតិចិនចំនួន០៧នាក់ និងដកហូតសារធាតុញៀនជិត១តោន រួមទាំងអាវុធវែងខ្លីជាច្រើនដើម

សន្តិសុខ និង សង្គម

ពលរដ្ឋហ្កាហ្សា អធិស្ឋានសុំឆ្នាំថ្មីអាចនាំមកនូវសន្តិភាព បន្ទាប់ពីការបំផ្លិចបំផ្លាញក្នុងឆ្នាំចាស់

ខណៈឆ្នាំ២០២៣ ដែលជាឆ្នាំនាំមកនូវការលំបាកដ៏ជូរចត់បន្ទាប់ពីរយៈពេល ១២សប្តាហ៍នៃការវាយលុកដែលកំពុងកើនឡើងរបស់អ៊ីស្រាអែល បានកន្លងផុត ប្រជាជននៅតំបន់ហ្កាហ្សា មានសង្ឃឹមតិចតួចណាស់ដែលថាឆ្នាំ២០២៤ អាចនឹងនាំមកនូវការធូរស្បើយ។នៅទីក្រុងរ៉ាហ្វាហ្វ នៅតាមព្រំដែនហ្កាហ្សា ជាមួយប្រទេសអេហ្ស៊ីប ដែលបានក្លាយជាចំណុចបង្គោលធំបំផុតសម្រាប់ប្រជាជនប៉ាឡេស្ទីន ដែលភៀសខ្លួនចេញពីផ្នែកផ្សេងទៀតនៃតំបន់នោះ កាលពីថ្ងៃអាទិត្យ (៣១ ធ្នូ) ប្រជាជនមានការចាប់អារម្មណ៍ខ្លាំងក្នុងការព្យាយាមស្វែងរកទីជម្រក អាហារ និងទឹកជាជាងអបអរចូលឆ្នាំថ្មី។ពលរដ្ឋភៀសខ្លួនហ្កាហ្សា នៅទីក្រុងរ៉ាហ្វាហ្វបាននិយាយថា «នៅក្នុងឆ្នាំថ្មី២០២៤នេះ យើងចង់ត្រឡប់ទៅផ្ទះរបស់យើងវិញ ចង់បោះតង់ និងរស់នៅទីនោះ ហើយចង់ឲ្យកូនៗយើងរស់នៅដោយសុខសាន្ត សុវត្ថិភាព អាចចូលរៀន អាចត្រឡប់ទៅសាកលវិទ្យាល័យវិញ ហើយកម្មករនិយោជិត ត្រឡប់ទៅធ្វើការវិញ និងស្វែងរកប្រភពចំណូល»។ការទម្លាក់គ្រាប់បែករបស់អ៊ីស្រាអែល បានរុញច្រានពលរដ្ឋហ្កាហ្សា ស្ទើរតែទាំងអស់ឲ្យចេញពីផ្ទះរបស់ពួកគេ និងបានសម្លាប់មនុស្សជាង ២១.៨០០នាក់ នេះបើយោងទៅតាមអាជ្ញាធរសុខាភិបាលនៅក្នុងតំបន់ហ៊ុមព័ទ្ធដែលគ្រប់គ្រងដោយក្រុមហាម៉ាស ហើយបានធ្វើឱ្យអ្នកនៅរស់រានមានជីវិតប្រឈមនឹងភាពអត់ឃ្លាន ជំងឺ និងទុរ្ភិក្ស។ ក្តីសង្ឃឹមណាមួយនៃដំណោះស្រាយនយោបាយចំពោះជម្លោះនេះ និងដំណើរស្វែងរកសេរីភាព និងការសម្រេចចិត្តដោយខ្លួនឯងអស់រយៈពេល ៧៥ឆ្នាំរបស់ប៉ាឡេស្ទីន ហាក់ដូចជានៅឆ្ងាយខ្លាំងណាស់៕

គ្រោះថ្នាក់ចរាចរណ៍នៅរាជធានីភ្នំពេញ ក្នុងថ្ងៃឆ្លងឆ្នាំ កើតឡើង០៩ករណី បណ្តាលឱ្យមនុស្សស្លាប់០៦នាក់ រងរបួសធ្ងន់ស្រាល០៥នាក់

យោងតាមរបាយការណ៍ របស់នគរបាលរាជធានីភ្នំពេញ នៅថ្ងៃទី៣១ ខែធ្នូ ឆ្នាំ២០២៣ម្សិលមិញ ដែលជាថ្ងៃចុងក្រោយ នៃឆ្នាំចាស់ បន្តផ្លាស់ចូលឆ្នាំថ្មីឆ្នាំសកល២០២៤ ក្នុងភូមិសាស្ត្ររាជធានីភ្នំពេញ មានករណីគ្រោះថ្នាក់ចរាចរណ៍កើតឡើងចំនួន០៩ករណី ដែលបានឆក់យកជីវិតមនុស្សចំនួន០៦នាក់ និងបណ្តាលឱ្យមនុស្ស០៣នាក់រងរបួសធ្ងន់ និង០២នាក់រងរបួសស្រាល ។ អ្នកនាំពាក្យ នៃស្នងការដ្ឋាននគរបាលរាជធានីភ្នំពេញ បានបញ្ជាក់ថា ៖ ក្នុងចំណោមករណីគ្រោះថ្នាក់ចរាចរណ៍ខាងលើដែលបានកើតឡើង មាន០១ករណី គឺនៅខណ្ឌទួលគោក មានរថយន្តបុក ម៉ូតូ០១គ្រឿងបណ្តាលឱ្យស្លាប់មនុស្សម្នាក់ និងរបួសធ្ងន់ម្នាក់ បន្ទាប់មកជនបង្កបើករថយន្តគេចខ្លួនពីកន្លែងកើតហេតុ។ ប៉ុន្តែគាត់បានបើករថយន្តចូលខ្លួនសារភាពដោះស្រាយ នៅស្នងការដ្ឋាននគរបាលរាជធានីភ្នំពេញទាំងយប់។ ដោយឡែកសម្រាប់អ្នកបើកបរបង្កគ្រោះថ្នាក់ចរាចរណ៍ផ្សេងទៀត បានរត់គេចខ្លួនពីកន្លែងកើតហេតុ ដូច្នោះហើយនគរបាលអំពាវនាវសូមឱ្យជនដែលបើកយានយន្តបង្ក ចូលខ្លួនមកសារភាពដូចករណីគ្រោះថ្នាក់ចរាចរណ៍ក្នុងខណ្ឌទួលគោក ដើម្បីឱ្យសមត្ថកិច្ចអនុវត្តតាមនីតិវិធី ជៀសវៀងការគេចវេសពីសំណាញ់ច្បាប់ ។ អ្នកនាំពក្យនគរបាល បានបន្តថា រាល់ករណីគ្រោះថ្នាក់ចរាចរណ៍បើករត់គេចនេះ ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានដាក់បញ្ជាឱ្យមន្ត្រីជំនាញស្រាវជ្រាវយ៉ាងម៉ឺងម៉ាត់នៅកន្លែងកើតហេតុរួមទាំងវត្ថុតាង និងបានបង្កើតក្រុមការងារតាមដានស្រាវជ្រាវស្វែងរកចាប់ខ្លួនរាល់ជនបង្ក ពោលគឺមិនអាចគេចខ្លួនពីសំណាញ់ច្បាប់បាននោះទេ។ ជាពិសេសក្នុងករណីបើកបង្កគ្រោះថ្នាក់ហើយគេចខ្លួនមិនទទួលខុសត្រូវជាបទល្មើសផ្សេងមួយទៀតផងដែរ ៕ លីហេង

ក្រុមសកម្មប្រយុទ្ធប៉ាឡេស្ទីន បាញ់រ៉ុក្កែតចូលទៅក្នុងប្រទេសអ៊ីស្រាអែល ក្នុងពេលចាប់ផ្តើមឆ្នាំ ២០២៤

ក្រុមសកម្មប្រយុទ្ធប៉ាឡេស្ទីន នៅតំបន់ហ្កាហ្សា បានបាញ់រ៉ុក្កែតចូលទៅភាគកណ្តាលប្រទេសអ៊ីស្រាអែលនៅពាក់កណ្តាលអធ្រាត្រ ថ្ងៃទី ១ ខែមករា ដោយបានបណ្តាលឱ្យមានសំឡេងស៊ីរ៉ែន នៅទូទាំងផ្នែកភាគកណ្តាល និងភាគខាងត្បូងប្រទេស។ ប្រព័ន្ធផ្សព្វផ្សាយអ៊ីស្រាអែល បានថតវីដេអូពីការស្ទាក់ចាប់បានជាច្រើនគ្រាប់។ស្លាបកងកម្លាំងប្រដាប់អាវុធរបស់ក្រុមហាម៉ាស បាននិយាយថា ការបាញ់រារាំងនេះ គឺដើម្បីឆ្លើយតបទៅនឹង ការសម្លាប់រង្គាលទៅលើជនស៊ីវិលនៅក្នុងតំបន់ហ្កាហ្សា។ ពលរដ្ឋ និងក្រុមគ្រូពេទ្យបឋម បាននិយាយថាកាលពីព្រឹកថ្ងៃអាទិត្យ ទី៣១ ខែធ្នូ យន្តហោះអ៊ីស្រាអែល បានបង្កើនការវាយប្រហារលើតំបន់ហ្កាហ្សាភាគកណ្តាល ខណៈការប្រយុទ្ធបានផ្ទុះរាលដាលនៅទូទាំងទីក្រុងបាក់បែក និងជំរំជនភៀសខ្លួននៅក្នុងសង្គ្រាម ដែលនាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយថានឹងចំណាយពេល ច្រើនខែទៀតដើម្បីបញ្ចប់។គោលដៅដែលបានបញ្ជាក់របស់យោធាអ៊ីស្រាអែល គឺដើម្បីលុបបំបាត់ក្រុមហាម៉ាស ជាក្រុមសកម្មប្រយុទ្ធប៉ាឡេស្ទីន ដែលបានបើកការវាយប្រហារឆ្លងព្រំដែនគួរឱ្យភ្ញាក់ផ្អើលទៅលើទីក្រុងនានារបស់អ៊ីស្រាអែល កាលពីថ្ងៃទី ៧ ខែតុលា បណ្តាលឲ្យមនុស្ស ១.២០០នាក់ស្លាប់ ភាគច្រើនជាជនស៊ីវិលនិងបានចាប់ចំណាប់ថ្នូរចំនួន ២៤០នាក់ ។យោងតាមអាជ្ញាធរសុខាភិបាលនៅតំបន់ហ្កាហ្សាគ្រប់គ្រងដោយក្រុមហាម៉ាសបានឲ្យដឹងថា ការទម្លាក់គ្រាប់បែកតាមអាកាស និងការបាញ់ផ្លោងដោយកាំភ្លើងធំ របស់អ៊ីស្រាអែល បានសម្លាប់មនុស្សជាង ២១.៨០០ នាក់ ដោយមានមនុស្សជាច្រើនទៀត ត្រូវបានបារម្ភថាបានស្លាប់នៅក្នុងគំនរបាក់បែក និងបានបណ្តាលឲ្យប្រជាជនជិត ២,៣លាននាក់ ជម្លៀសខ្លួនចេញពីលំនៅឋានរបស់ពួកគេ។

អ៊ីស្រាអែល ត្រៀមខ្លួនរួចជាស្រេចក្នុងការអនុញ្ញាតឱ្យកប៉ាល់នាំជំនួយទៅកាន់តំបន់ហ្កាហ្សា

រដ្ឋមន្ត្រីការបរទេសអ៊ីស្រាអែលបាននិយាយកាលពីថ្ងៃអាទិត្យ (៣១ ធ្នូ) ថាអ៊ីស្រាអែលបានត្រៀមខ្លួនដើម្បីអនុញ្ញាតឱ្យកប៉ាល់ផ្តល់ជំនួយ «ភ្លាមៗ» ទៅកាន់តំបន់ហ្កាហ្សាស្ទ្រីប ដែលត្រូវបានបំផ្លិចបំផ្លាញដោយសង្រ្គាម និងជាផ្នែកនៃច្រករបៀងសមុទ្រដែលបានស្នើឡើងពីប្រទេសកោះស៊ីប។ក្រោមការរៀបចំដែលបានស្នើឡើងដំបូងដោយរដ្ឋធានីនីកូស៊ី (Nicosia) ក្នុងខែវិច្ឆិកា ទំនិញនឹងឆ្លងកាត់ការត្រួតពិនិត្យសន្តិសុខនៅក្នុងកំពង់ផែ ស៊ីប នៃទីក្រុងឡាណាកា (Larnaca) មុនពេលត្រូវបានដឹកតាមសាឡាងទៅកាន់ឆ្នេរសមុទ្រហ្កាហ្សា ដែលមានចំងាយ ៣៧០គីឡូម៉ែត្រ ជាជាងឆ្លងកាត់ប្រទេសជិតខាងអេហ្ស៊ីប ឬអ៊ីស្រាអែល។ប្រសិនបើផែនការនេះដំណើរការទៅមុខ វានឹងបង្ហាញពីការបន្ធូរបន្ថយដំបូងនៃការបិទផ្លូវរបស់កងទ័ពជើងទឹកអ៊ីស្រាអែល ដែលបានដាក់លើតំបន់ហ្កាហ្សា ក្នុងឆ្នាំ២០០៧ បន្ទាប់ពីក្រុមសកម្មប្រយុទ្ធអ៊ីស្លាមហាម៉ាស បានដណ្តើមកាន់កាប់តំបន់ហ៊ុមព័ទ្ធប៉ាឡេស្ទីន។ អ៊ីស្រាអែលបានពណ៌នាច្រករបៀងនេះថាជាមធ្យោបាយនៃការបញ្ចប់ទំនាក់ទំនងស៊ីវិលរបស់ខ្លួនទៅកាន់តំបន់ហ្កាហ្សា ជាទីដែលខ្លួនបានធ្វើការវាយលុករយៈពេល ១២សប្តាហ៍ក្នុងការសងសឹកចំពោះការសម្លាប់ឆ្លងព្រំដែន និងការចាប់ជំរិតដោយខ្មាន់កាំភ្លើងក្រុមហាម៉ាស។ដោយមានជនស៊ីវិលប៉ាឡេស្ទីនរាប់សែននាក់ត្រូវភៀសខ្លួន និងប្រឈមមុខនឹងការខ្វះខាតយ៉ាងធ្ងន់ធ្ងរនៃសម្ភារៈសំខាន់ៗ គំនិតជំនួយផ្លូវទឹកនេះក៏អាចក្លាយជាលទ្ធផលមួយនៃការប្រជុំសេចក្ដីសម្រេចក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃទី២២ ខែធ្នូ ដែលអំពាវនាវឱ្យមានការពង្រីកយន្តការជំនួយមនុស្សធម៌៕

សាកសពចុងក្រោយត្រូវបានរកឃើញបន្ទាប់ពីការរញ្ជួយដីដ៏ធ្ងន់ធ្ងរបំផុតរបស់ចិន ក្នុងរយៈពេលមួយទសវត្សរ៍

សាកសពមនុស្សពីរនាក់ចុងក្រោយដែលបានបាត់ខ្លួនក្រោយការរញ្ជួយដីដ៏ធ្ងន់ធ្ងរបំផុតរបស់ប្រទេសចិន ក្នុងរយៈពេលជិតមួយទសវត្សរ៍ត្រូវបានរកឃើញកាលពីថ្ងៃអាទិត្យ (៣១ ធ្នូ) ជាសោកនាដកម្មមួយដែលបានធ្វើឱ្យមានការព្រួយបារម្ភជាថ្មីអំពីចំនួនប្រជាជនដែលប្រឈមមុខនឹងការរញ្ជួយដីនៅក្នុងតំបន់រញ្ជួយសកម្ម។ប្រព័ន្ធផ្សព្វផ្សាយរដ្ឋបានរាយការណ៍ថា ការរកឃើញនោះបានបង្កើនចំនួនអ្នកស្លាប់ជាផ្លូវការពីការរញ្ជួយដីកម្រិត ៦,២រ៉ិចទ័រ ដែលបានអង្រួនខេត្តភាគពាយ័ព្យ ឈីងហៃ (Qinghai) និងខេត្តកានស៊ូ (Gansu) ជិតពីរសប្តាហ៍មុនដល់ចំនួន ១៥១នាក់។ សាកសពចុងក្រោយត្រូវបានរកឃើញក្នុងខេត្តឈីងហៃ នៅម៉ោង ១:១៦នាទីរំលងអាធ្រាត (ម៉ោងក្នុងស្រុក) កាលពីថ្ងៃសៅរ៍។គ្រោះរញ្ជួយដីដែលកើតឡើងនៅចំណុចកណ្តាលរវាងខេត្តឈីងហៃ និងខេត្តកានស៊ូ គឺធ្ងន់ធ្ងរបំផុតនៅក្នុងប្រទេសចិន ចាប់តាំងពីការរញ្ជួយដីកម្រិត ៦,៥រ៉ិចទ័របានវាយប្រហារខេត្ត យ៉ុនណាន (Yunnan) ភាគនិរតីក្នុងឆ្នាំ២០១៤ មកនិងបានសម្លាប់មនុស្សចំនួន ៦១៧នាក់។សោកនាដកម្មនៅក្នុងខេត្តឈីងហៃ និងខេត្តកានស៊ូ ដែលរងគ្រោះដោយគ្រោះមហន្តរាយ និងជាផ្ទះរបស់ជនជាតិហួយជាច្រើន ដែលជាជនជាតិភាគតិចត្រូវបានកំណត់ដោយអត្តសញ្ញាណមូស្លីម បានធ្វើឱ្យមានការព្រួយបារម្ភជាថ្មីអំពីលំនៅឋានដែលហួសសម័យ និងសាងសង់មិនសូវល្អក្នុងប្រទេសចិន៕

ក្រុមវេជ្ជសាស្រ្ដទួរគី ព្រមានពីការរាតត្បាតនៃជំងឺផ្តាសាយ និងជំរុញឱ្យមនុស្សម្នាពាក់ម៉ាស់

ថ្មីៗនេះ សមាគមវេជ្ជសាស្រ្ដទួរគី បានព្រមានអំពីការកើនឡើងដែលអាចកើតមាននៃជំងឺគ្រុនផ្តាសាយពាសពេញប្រទេស ដោយជំរុញឱ្យប្រជាជនពាក់ម៉ាស់តាមមធ្យោបាយដឹកជញ្ជូនសាធារណៈ។ ក្រុមវេជ្ជសាស្រ្ដនេះបាននិយាយនៅក្នុងលិខិតព្រមានមួយផ្ញើទៅកាន់ក្រសួងសុខាភិបាលក្នុងសប្តាហ៍នេះថា មាន «ភាពខ្លាំងមិនធម្មតា» នៅក្នុងបន្ទប់សង្គ្រោះបន្ទាន់នៅមន្ទីរពេទ្យទូទាំងប្រទេសដោយសារតែការរីករាលដាលនៃជំងឺផ្តាសាយ។វេជ្ជបណ្ឌិតម្នាក់ៗនៅមជ្ឈមណ្ឌលគ្រួសារមើលថែអ្នកជំងឺយ៉ាងតិចណាស់ ១០០នាក់ ដែលមានរោគសញ្ញាគ្រុនផ្តាសាយក្នុងមួយថ្ងៃក្នុងទីក្រុងអ៊ីស្តង់ប៊ុល នេះបើយោងតាមសមាគមវេជ្ជសាស្រ្ដ។ សមាគមក៏បានជំរុញដល់អាជ្ញាធរពាក់ព័ន្ធត្រូវចែកម៉ាស់ដោយមិនគិតថ្លៃ និងផ្សព្វផ្សាយពីការប្រើប្រាស់ម៉ាសក្នុងយានជំនិះសាធារណៈ។អ្នកជំនាញសុខភាពទួរគីម្នាក់ក៏បានព្រមានកាលពីថ្ងៃសៅរ៍ថា ជំងឺគ្រុនផ្តាសាយកំពុងរីករាលដាលពាសពេញប្រទេសទួរគី។ លោកបានជំរុញឲ្យប្រជាពលរដ្ឋពាក់ម៉ាស់ក្នុងផ្ទះ គោរពច្បាប់អនាម័យ និងចៀសវាងការបញ្ជូនកុមារឈឺទៅសាលារៀន រហូតដល់ខែឧសភា ជាពេលដែលជំងឺផ្តាសាយនឹងធូរស្រាលដោយសារតែអាកាសធាតុក្តៅ៕

មីស៊ីលធ្លាក់ចំផ្លូវដ៏មមាញឹកមួយ ខណៈដែលមនុស្ស១០នាក់បានស្លាប់ ក្នុងការវាយប្រហារដ៏កម្ររបស់អ៊ុយក្រែនលើទីក្រុងរុស្ស៊ី

មីស៊ីលមួយគ្រាប់ ត្រូវគេវាយប្រហារទៅលើផ្លូវដ៏មមាញឹកមួយ នៅកណ្តាលទីក្រុងរុស្ស៊ី កាលពីព្រឹកថ្ងៃសៅរ៍ អំឡុងពេលការវាយប្រហារដោយអ៊ុយក្រែន ដោយបានធ្លាក់ទៅលើរថយន្ត និងបណ្តាលឲ្យពួកវាឆេះ ខណៈដែលប្រជាជន រត់ទៅរកកន្លែងសុវត្ថិភាព។ផ្សែងហុយចេញពីផ្លូវនានាក្នុងទីក្រុងបែលហ្គោរូដ (Belgorod) ជិតព្រំដែនជាមួយប្រទេសអ៊ុយក្រែន ខណៈដែលរថយន្តជាច្រើនគ្រឿង បានឆេះយ៉ាងសន្ធោសន្ធៅ និងកម្ទេចថ្មនៅរប៉ាត់រប៉ាយពាសពេញផ្លូវ។វិមានក្រឹមឡាំង បាននិយាយថា ការវាយប្រហារនៅថ្ងៃបន្ទាប់ ទៅលើទីក្រុងនេះ បានសម្លាប់មនុស្ស ១០ នាក់ និង ៤៥នាក់ទៀតរងរបួស ដោយបន្ថែមថា លោក វ្ល៉ាឌីមៀ ពូទីន ត្រូវបានគេរាយការណ៍ជូនដោយសង្ខេបអំពីស្ថានភាពនេះ។អ្នកនាំពាក្យលោក Dmitry Peskov បានប្រាប់ទីភ្នាក់ងារព័ត៌មាន TASS ថា៖«លោកប្រធានាធិបតី វ្ល៉ាឌីមៀ ពូទីន ត្រូវបានគេជូនដំណឹងអំពីការវាយប្រហាររបស់កងកម្លាំងប្រដាប់អាវុធអ៊ុយក្រែនលើសង្កាត់លំនៅដ្ឋាន ក្នុងទីក្រុងបែលហ្គោរូដ ។វានៅតែមិនច្បាស់ថាតើការវាយប្រហារលើដងផ្លូវក្នុងទីក្រុងបែលហ្គោរូដ គឺបណ្តាលមកពីមីស៊ីលរបស់អ៊ុយក្រែនឬក៏កំហុសមកពីប្រព័ន្ធការពារដែនអាកាសរបស់រុស្ស៊ី។

អ៊ីស្រាអែលបន្តវាយលុកតំបន់ហ្កាហ្សា ខណៈលោក Netanyahu ចង្អុលបង្ហាញពីសង្រ្គាមអូសបន្លាយពេលយូរ

ក្រុមអ្នកស្រុក និងក្រុមគ្រូពេទ្យបាននិយាយថា យន្តហោះអ៊ីស្រាអែលបានបង្កើនការវាយប្រហារទៅលើភាគកណ្តាលតំបន់ហ្កាហ្សាកាលពីថ្ងៃអាទិត្យ (៣១ ធ្នូ) ខណៈដែលការប្រយុទ្ធគ្នាបានផ្ទុះឡើងតាមរយៈគំនរបាក់បែកនៃទីក្រុង និងជំរំជនភៀសខ្លួន នៅក្នុងសង្គ្រាមដែលនាយករដ្ឋមន្ត្រីអ៊ីស្រាអែល លោកបេនចាមីន ណេតាន់យ៉ាហ៊ូ (Benjamin Netanyahu) បាននិយាយថានឹងចំណាយពេល «ច្រើនខែទៀត» ដើម្បីបញ្ចប់។ការអត្ថាធិប្បាយរបស់លោក ណេតាន់យ៉ាហ៊ូ បង្ហាញសញ្ញាថានឹងមិនមានការបន្ធូរបន្ថយនៅក្នុងយុទ្ធនាការមួយដែលបានសម្លាប់មនុស្សរាប់ពាន់នាក់ និងធ្វើឲ្យតំបន់ហ្កាហ្សា កាន់តែខ្ទេចខ្ទី ខណៈដែលការប្តេជ្ញារបស់លោកក្នុងការស្ដារការគ្រប់គ្រងរបស់អ៊ីស្រាអែល ឡើងវិញលើតំបន់ហ៊ុមព័ទ្ធព្រំដែននៃប្រទេសអេហ្ស៊ីប បានចោទជាសំណួរថ្មីអំពីដំណោះស្រាយរដ្ឋពីរ។យោធាអ៊ីស្រាអែល នឹងបញ្ចេញទាហានបំរុងមួយចំនួនដែលត្រូវបានកោះហៅឱ្យទៅប្រយុទ្ធនឹងក្រុមហាម៉ាស នៅតំបន់ហ្កាហ្សា ជាទង្វើមួយដែលខ្លួនបាននិយាយកាលពីថ្ងៃអាទិត្យថានឹងជួយដល់សេដ្ឋកិច្ចនៅពេលដែលប្រទេសនេះរៀបចំសម្រាប់សង្រ្គាមដ៏យូរ។ វីដេអូពីទីភ្នាក់ងារអឌ្ឍចន្ទក្រហមមួយដែលត្រូវបានផ្សព្វផ្សាយកាលពីថ្ងៃអាទិត្យបានបង្ហាញក្រុមអ្នកជួយសង្គ្រោះដែលកំពុងធ្វើការក្នុងភាពងងឹតដើម្បីដឹកកុមារដែលរងរបួសពីគំនរបាក់បែកនៅតំបន់កណ្តាលហ្កាហ្សា។ការទម្លាក់គ្រាប់បែកតាមអាកាស និងវាយប្រហារដោយកាំភ្លើងធំរបស់អ៊ីស្រាអែល បានសម្លាប់មនុស្សជាង ២១.៨០០នាក់ បើយោងតាមអាជ្ញាធរសុខាភិបាលនៅតំបន់ហ្កាហ្សាគ្រប់គ្រងដោយក្រុមហាម៉ាស ដោយមានមនុស្សជាច្រើនត្រូវភ័យខ្លាចថាបានស្លាប់នៅក្នុងគំនរបាក់បែក ហើយសង្រ្គាមនេះបានរុញច្រានប្រជាជនជិត ២,៣លាននាក់ ចេញពីលំនៅឋានរបស់ពួកគេ៕

ផែនការបីដំណាក់កាលសម្រាប់សន្តិភាព ផ្តល់ក្តីសង្ឃឹមបញ្ចប់សង្គ្រាម នៅតំបន់ហ្កាហ្សា

ផែនការចរចាសន្តិភាពថ្មីមួយ បានធ្វើឲ្យមានក្តីសង្ឃឹមនៃបទឈប់បាញ់ឡើងវិញ ជាមួយនឹងសំណើ ដើម្បីប្រមូលផ្តុំមេដឹកនាំ នៅតំបន់វេសបែង( West Bank) និង តំបន់ហ្កាហ្សា សម្រាប់បទឈប់បាញ់ជាអចិន្ត្រៃយ៍។ផែនការបីដំណាក់កាលនេះ កំពុងប្រឈមនឹងការប្រឆាំងយ៉ាងតឹងរ៉ឹងពីក្រុមប៉ាឡេស្ទីន ប៉ុន្តែនៅមិនទាន់ត្រូវបានគេបដិសេធជាផ្លូវការទេ បើទោះបីជាត្រូវបានគេលើកដំបូងប្រហែលមួយសប្តាហ៍មុនក៏ដោយ។ផែនការនេះពាក់ព័ន្ធនឹងបទឈប់បាញ់រយៈពេលពីរសប្តាហ៏ និងអាចពង្រីកបាន ដើម្បីអនុញ្ញាតឲ្យមានការដោះដូរចំណាប់ថ្នូរអ៊ីស្រាអែល និងអ្នកទោសប៉ាឡេស្ទីនដំបូង។ដំណាក់កាលទីពីរមានគោលបំណងបង្រួបបង្រួមអ្នកនយោបាយប៉ាឡេស្ទីនដែលបែកបាក់គ្នា ដើម្បីគ្រប់គ្រងតំបន់ហ្កាហ្សា និងតំបន់វេសបែង ជាមួយនឹងរដ្ឋាភិបាលដែលមានជំនាញបច្ចេកទេស ហើយទីបីនឹងនាំឲ្យមានបទឈប់បាញ់ចុងក្រោយ។សំណើ ដែលបានត្រូវបានធ្វើឡើងជាមួយអ្នកសម្រុះសម្រួលអេហ្ស៊ីប និងកាតា មិនបានបំពេញតាមការទាមទាររបស់អ៊ីស្រាអែល និងប៉ាឡេស្ទីន។ វាមិនបំពេញគោលដៅសំខាន់របស់អ៊ីស្រាអែល ក្នុងការរុះរើក្រុមហាម៉ាសទាំងស្រុងទេ ហើយវាណែនាំឲ្យដោះលែងចំណាប់ថ្នូរនៅតំបន់ហ្កាហ្សាមុនពេលបទឈប់បាញ់ជាអចិន្ត្រៃយ៍ដែលផ្ទុយនឹងលក្ខខណ្ឌសំខាន់របស់ប៉ាឡេស្ទីន។

ក្រុមហ៊ួទីនៅយេម៉ែននិយាយថា សមាជិក១០នាក់ ត្រូវបានសម្លាប់ដោយកងកម្លាំងអាមេរិក នៅសមុទ្រក្រហម

ចលនាសកម្មប្រយុទ្ធក្រុមហ៊ួទី នៅប្រទេសយេម៉ែន បាននិយាយកាលពីថ្ងៃអាទិត្យថា បុគ្គលិកកងទ័ពជើងទឹករបស់ពួកគេ ១០ នាក់ បានស្លាប់ និងបាត់ខ្លួន បន្ទាប់ពីទូករបស់ពួកគេបីគ្រឿង ត្រូវបានវាយប្រហារដោយកងកម្លាំងសហរដ្ឋអាមេរិកនៅក្នុងសមុទ្រក្រហម។យោធាអាមេរិក បាននិយាយនៅមុននេះថា ក្រុមសម្ព័ន្ធមិត្តអ៊ីរ៉ង់ ដែលបាននិងកំពុងវាយប្រហារលើការដឹកជញ្ជូនទំនិញនៅសមុទ្រក្រហមរយៈពេលជាច្រើនសប្តាហ៍នេះ ជាអ្វីដែលខ្លួនចាត់ទុកថា ជាការឆ្លើយតបទៅនឹងសង្រ្គាមរបស់អ៊ីស្រាអែល នៅតំបន់ហ្កាហ្សា ដែលបានវាយប្រហារលើនាវាដឹកទំនិញ Maersk កាលពីថ្ងៃសៅរ៍ និងថ្ងៃអាទិត្យ។យោធានិយាយថា ឧទ្ធម្ភាគចក្រកងទ័ពជើងទឹករបស់សហរដ្ឋអាមេរិក បានពន្លិចទូកតូចៗចំនួនបីគ្រឿងក្នុងចំណោមទូកតូចៗចំនួនបួនគ្រឿង ដែលក្រុមហ៊ួទី បានប្រើប្រាស់ក្នុងការវាយប្រហារ កាលពីថ្ងៃអាទិត្យ ហើយបានបើកទូកទីបួន ត្រឡប់ទៅកាន់ឆ្នេរសមុទ្រវិញ។អ្នកនាំពាក្យយោធារបស់ក្រុមនេះ លោកស្រី Yahya Sarea បាននិយាយថា កងកម្លាំងរបស់សត្រូវអាមេរិក បានវាយប្រហារទូកចំនួនបីគ្រឿងដែលជាកម្មសិទ្ធិរបស់កងកម្លាំងកងទ័ពជើងទឹកក្រុមហ៊ួទី នៅយេម៉ែន បានបណ្តាលឲ្យសមាជិកនៃកងទ័ពជើងទឹកចំនួន១០នាក់បានស្លាប់ និងកំពុងបាត់ខ្លួន។ លោកស្រី Sarea និយាយថា កងកម្លាំងទ័ពជើងទឹកក្រុមហ៊ួទី បានវាយប្រហារដោយមីស៊ីល លើនាវាដឹកទូទំនិញ Maersk Hangzhou បន្ទាប់ពីនាវិករបស់នាវានេះ បដិសេធមិនស្តាប់តាមការហៅព្រមាន។

បណ្ដាញសង្គម

ព័ត៌មានថ្មីៗ

សម្តេច ម៉ែន សំអន ថ្លែងអំណរគុណក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ដែលបានចុះពិនិត្យ ព្យាបាលជំងឺ និងផ្តល់ការអប់រំសុខភាព ជូនប្រជាពលរដ្ឋដោយឥតគិតថ្លៃជូនប្រជាពលរដ្ឋ ក្នុងខេត្តស្វាយរៀង

លោក Trump បដិសេធសំណើរបស់អ៊ីរ៉ង់ ក្នុងការបើកច្រកសមុទ្រ Hormuz និងបញ្ចប់ការប្រយុទ្ធគ្នា

ភ្លៀងធ្លាក់ខ្លាំង និងទឹកជំនន់ នៅទីក្រុងបាងកក ជំរុញឱ្យជម្លៀសប្រជាជន ខណៈមានអ្នកស្លាប់ ២នាក់

ប្រមុខការទូតកម្ពុជាប្រាប់មហាសន្និបាត UN អំពីកិច្ចខិតខំប្រឹងប្រែងរបស់កម្ពុជាក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យាដែលជាអាទិភាពដ៏សំខាន់បំផុត

ប្រមុខការទូតកម្ពុជាប្រាប់មហាសន្និបាត UN ថា កម្ពុជាជ្រើសយកយន្តការផ្សះផ្សាដោយបង្ខំក្រោមអនុសញ្ញា UNCLOS ដើម្បីការពារអធិបតេយ្យ និងសិទ្ធិលើដែនសមុទ្រស្របតាមច្បាប់អន្តរជាតិ

ប្រមុខការទូតកម្ពុជាប្រាប់មហាសន្និបាត UN ថា ជម្លោះកម្ពុជា-ថៃធ្វើឱ្យប៉ះពាល់យ៉ាងធ្ងន់ធ្ងរដល់ជំនឿទុកចិត្តរវាងប្រទេសទាំងពីរ ខណៈសម្រាប់កម្ពុជាការស្តារទំនុកចិត្តឡើងវិញត្រូវតែផ្អែកលើការប្តេជ្ញាចិត្តជាក់ស្តែង

រដ្ឋមន្ត្រីការបរទេសកម្ពុជា-នីហ្សេ ចុះហត្ថលេខាលើកិច្ចព្រមព្រៀងស្តីពីការបង្កើតទំនាក់ទំនងការទូតរវាងប្រទេសទាំងពីរ

ក្រោយមានបទបញ្ជារបស់សម្តេចធិបតី នាយករដ្ឋមន្រ្តី កងពលតូចដឹកជញ្ជូនលេខ៩៩ បានត្រៀមកម្លាំង និងសម្ភារៈរួចជាស្រេច២៤ម៉ោងលើ២៤ម៉ោង ដើម្បីចុះអន្តរាគមន៍ពលរដ្ឋរងគ្រោះដោយទឹកជំនន់

ប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ ចុះពិនិត្យស្ថានភាព និងផ្តល់ជំនួយដល់ពលរដ្ឋរងគ្រោះទឹកជំនន់ នៅក្រុងប៉ោយប៉ែត

ជំនន់ស្ទឹងសង្កែបណ្ដាលឱ្យប៉ះពាល់ផ្ទះពលរដ្ឋនៅស្រុកឯកភ្នំជាង ៣ពាន់ខ្នង និងដំណាំជាង ៣ពាន់ហិកតា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877