BTV NEWS

អាវុធហត្ថរាជធានីភ្នំពេញ បង្ក្រាបគ្រឿងញៀនជាង ៦គីឡូក្រាមឃាត់ខ្លួនមនុស្ស ១១នាក់

ជនជាតិខ្មែរ និងបរទេសជិត ៥ពាន់នាក់ ត្រូវជាប់ឃុំ ខណៈមន្ត្រីនគរបាល ៧៧នាក់ ត្រូវវិន័យធ្ងន់ធ្ងរដោយសារ Online Scams

នគរបាលរាជធានីឃាត់ខ្លួនបុរសម្នាក់ បែកធ្លាយសម្លេងតាមបណ្តាញសង្គម ម៉ាក់ងាយធ្ងន់ធ្ងរលើវីរជនកងទ័ពកម្ពុជា

កម្លាំងសមត្ថកិច្ចឃាត់ខ្លួនជនជាតិចិនចំនួន០៧នាក់ និងដកហូតសារធាតុញៀនជិត១តោន រួមទាំងអាវុធវែងខ្លីជាច្រើនដើម

សន្តិសុខ និង សង្គម

លោក ពូទីន និយាយថារុស្ស៊ី នឹងបង្កើនការវាយប្រហារកាន់តែខ្លាំងក្លាលើអ៊ុយក្រែន

ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយកាលពីថ្ងៃចន្ទ (០១ មករា) ថាទីក្រុងមូស្គូ នឹងបង្កើនការវាយប្រហារកាន់តែខ្លាំងលើគោលដៅយោធាក្នុងប្រទេសអ៊ុយក្រែន បន្ទាប់ពីការវាយប្រហារដែលមិនធ្លាប់មានរបស់អ៊ុយក្រែន កាលពីចុងសប្តាហ៍ទៅលើទីក្រុង ប៊ែលហ្កូរ៉ូដ (Belgorod) របស់រុស្ស៊ី។ការវាយប្រហាររបស់អ៊ុយក្រែនកាលពីថ្ងៃសៅរ៍ ដែលបានសម្លាប់មនុស្ស ២៥នាក់រួមទាំងកុមារ ៥នាក់នោះបានកើតឡើងបន្ទាប់ពីទីក្រុងមូស្គូ បានបើកការវាយប្រហារទ្រង់ទ្រាយធំទៅលើទីក្រុងនានារបស់អ៊ុយក្រែន។ ទន្ទឹមនឹងនេះ ទីក្រុងគីវ បាននិយាយថា ប្រទេសរុស្ស៊ីបានកំណត់គោលដៅលើខ្លួនជាមួយនឹងយានដ្រូនក្នុងចំនួន «ដ៏ច្រើនបំផុតក្នុងកំណត់ត្រា» នៅថ្ងៃចូលឆ្នាំថ្មី។លោក ពូទីន បាននិយាយក្នុងអំឡុងពេលធ្វើទស្សនកិច្ចទៅមន្ទីរពេទ្យយោធាថា៖ «យើងនឹងបង្កើនការវាយប្រហារឲ្យកាន់តែខ្លាំង។ មិនមានឧក្រិដ្ឋកម្មប្រឆាំងនឹងជនស៊ីវិលណាមួយមិនត្រូវបានដាក់ទោសនោះទេ»។ ការអត្ថាធិប្បាយរបស់ប្រធានាធិបតីរុស្ស៊ីរូបនេះបានកើតឡើងនៅចុងបញ្ចប់នៃសប្តាហ៍ដ៏បង្ហូរឈាមនៅក្នុងប្រទេសអ៊ុយក្រែន ដោយភាគីទាំងពីរបានវាយប្រហារគ្នាទៅវិញទៅមកដោយការវាយប្រហារទ្រង់ទ្រាយធំ។លោក ពូទីន បាននិយាយថា រុស្ស៊ីនឹងបន្តវាយលុកអ្វីនូវដែលលោកហៅថា «ការដំឡើងយោធា» ដោយលោកបានចោទប្រកាន់កងកម្លាំងអ៊ុយក្រែនថាបានកំណត់គោលដៅ «នៅចំកណ្តាលទីក្រុងជាទីដែលមនុស្សម្នាដើរកម្សាន្តមុនថ្ងៃចូលឆ្នាំសកល» ហើយបានចោទប្រកាន់ថាអ៊ុយក្រែនបាន «វាយប្រហារជនស៊ីវិលដោយចេតនា»៕

មនុស្សយ៉ាងហោចណាស់៨នាក់បានស្លាប់ ក្រោយការរញ្ជួយដីវាយប្រហារប្រទេសជប៉ុនចំថ្ងៃឆ្លងឆ្នាំថ្មី

ការរញ្ជួយដីដ៏ខ្លាំងក្លាដែលបានវាយប្រហារកណ្តាលប្រទេសជប៉ុននៅថ្ងៃចូលឆ្នាំសកលបានសម្លាប់មនុស្សយ៉ាងហោចណាស់៨ នាក់ ស្របពេលនគរបាល និងក្រុមអាជ្ញាធរមូលដ្ឋាននៅព្រឹកថ្ងៃអង្គារ ២ ខែមករានេះ បានរាយការណ៍ថាសាកសពមួយចំនួនត្រូវបានទាញចេញពីគំនរបាក់បែកនៃអគារដែលដួលរលំ។ការរញ្ជួយដីកម្រិត៧,៦រ៉ិចទ័របានវាយប្រហារកាលពីពាក់កណ្តាលរសៀលថ្ងៃចន្ទ ដោយបានបំផ្លាញអគារនានា កាត់ផ្ដាច់ចរន្តអគ្គិសនីពីលំនៅឋានរាប់ម៉ឺនខ្នង និងបានជំរុញឱ្យអ្នកស្រុកនៅតំបន់ឆ្នេរមួយចំនួនភៀសខ្លួនទៅកាន់ទីកន្លែងមានសុវត្ថិភាព។ រញ្ជួយដីនេះក៏បានបង្កឲ្យមានរលកកម្ពស់ប្រហែល ១ម៉ែត្រ តាមបណ្តោយឆ្នេរសមុទ្រភាគខាងលិចដ៏វែងរបស់ប្រទេសជប៉ុន ក៏ដូចជានៅប្រទេសជិតខាងកូរ៉េខាងត្បូងផងដែរ។ បុគ្គលិកកងទ័ពត្រូវបានបញ្ជូនទៅជួយក្នុងប្រតិបត្តិការសង្គ្រោះ ខណៈអាកាសយានដ្ឋានក្នុងស្រុកមួយត្រូវបានបិទ បន្ទាប់ពីគ្រោះរញ្ជួយដី បានបណ្ដាលឲ្យប្រេះនៅលើផ្លូវរត់។ ទំហំនៃការខូចខាត ព្រមទាំងចំនួនអ្នកស្លាប់នៅតែមិនច្បាស់លាស់មួយថ្ងៃបន្ទាប់ពីគ្រោះមហន្តរាយនេះ ដោយផ្លូវសំខាន់ៗទៅកាន់តំបន់ដែលរងផលប៉ះពាល់ខ្លាំងបំផុត បានរងការខូចខាតយ៉ាងធ្ងន់ធ្ងរ ដែលរារាំងដល់កិច្ចខិតខំប្រឹងប្រែងជួយសង្គ្រោះ។ ទូរទស្សន៍ NHK បានរាយការណ៍ថា ក្រុមគ្រូពេទ្យមិនអាចទៅដល់មន្ទីរពេទ្យក្នុងទីក្រុង ស៊ូស៊ុយ (Suzu) ដែលរងគ្រោះខ្លាំងនោះទេ។ប្រភពដដែលនេះ បាននិយាយថា មន្ទីរពេទ្យនោះ កំពុងពឹងផ្អែកលើម៉ាស៊ីនភ្លើងបម្រុងដោយសារតែដាច់ភ្លើង។ ទីភ្នាក់ងារនគរបាលជាតិបាននិយាយថា មនុស្ស ៨ នាក់ត្រូវបានគេបញ្ជាក់ថាបានស្លាប់រហូតមកដល់ពេលនេះ៕

មានការព្រមានអំពីរលកយក្សស៊ូណាមិ នៅប្រទេសជប៉ុន បន្ទាប់ពីមានការរញ្ជួយដីដ៏ខ្លាំងក្លា

ប្រទេសជប៉ុនបានចេញការព្រមានអំពីរលកយក្សស៊ូណាមិ បន្ទាប់ពីការរញ្ជួយដីកម្រិត ៧,៦វ៉ិចទ័រ បានវាយប្រហារតំបន់កណ្តាលរបស់ប្រទេស។ទូរទស្សន៍ជាតិ NHK បានរាយការណ៍ថា អ្នកស្រុកនៅតំបន់ឆ្នេរ Noto ក្នុងខេត្ត Ishikawa ត្រូវបានណែនាំឲ្យ «ជម្លៀសភ្លាមៗទៅកាន់តំបន់ទីទួលខ្ពស់»។ ទូរទស្សន៍នេះ បានបន្ថែមថា រលកកម្ពស់រហូតដល់ ៥ម៉ែត្រ បានទៅដល់តំបន់ឆ្នេ Noto។អាជ្ញាធរក៏បានចេញការព្រមានអំពីរលកយក្សស៊ូណាមិផងដែរ សម្រាប់ខេត្តជិតខាងគ្នា Niigata និង Toyama ដោយព្រមានថា រលកនៅទីនោះ អាចមានកម្ពស់ដល់ទៅ ៣ម៉ែត្រ។ ទូរទស្សន៍រដ្ឋបានបង្ហាញពាក្យ «EVACUATE» (ជម្លៀសចេញ) ជាអក្សរធំ ដោយជំរុញឲ្យអ្នកស្រុកភៀសខ្លួនទៅកាន់ទីទួលខ្ពស់ទោះបីជាពេលនេះស្ថិតក្នុងអាកាសធាតុរដូវរងាក៏ដោយ។ ជាមួយគ្នានេះ មនុស្សម្នាក៏បានបង្ហោះពីរូបភាពវីដេអូរញ្ជួយដីពីផ្ទះសម្បែងរបស់ពួកគេ និងពីខាងក្នុងស្ថានីយរថភ្លើងក្រោមដីផងដែរ។ប្រតិបត្តិករថាមពលនុយក្លេអ៊ែរដ៏ធំបំផុតរបស់ប្រទេសជប៉ុន គឺក្រុមហ៊ុន Kansai Electric បាននិយាយថា «មិនមានភាពមិនប្រក្រតី» ក្នុងរោងចក្រនុយក្លេអ៊ែរនៅក្នុងតំបន់ ដែលរងផលប៉ះពាល់នោះទេ។ចំណែកឯទីភ្នាក់ងារឧតុនិយមរបស់ប្រទេសកូរ៉េខាងត្បូង បានព្រមានថា រលកយក្សស៊ូណាមិ ដែលមានកម្ពស់រហូតដល់ ០,៣ម៉ែត្រ អាចកើតមាននៅឆ្នេរសមុទ្រភាគខាងកើតនៃប្រទេស ចន្លោះពីម៉ោង ១៨:២៩នាទៅ ដល់ ១៩:១៧នាទី ម៉ោងក្នុងស្រុក (ត្រូវនឹងម៉ោង ៩:២៩នាទី ដល់ម៉ោង ១០:១៧នាទី ម៉ោងសកល)៕

មេបញ្ជាការយោធាស៊ូដង់ ទាមទារឲ្យកងកម្លាំងយោធាប៉ារ៉ាដកចេញ ដើម្បីទទួលបានបទឈប់បាញ់

ប្រធានក្រុមប្រឹក្សាអធិបតេយ្យភាពបណ្តោះអាសន្នរបស់ប្រទេសស៊ូដង់ និងជាអគ្គមេបញ្ជាការកងកម្លាំងប្រដាប់អាវុធស៊ូដង់ (SAF) លោក Abdel Fattah Al-Burhan កាលពីថ្ងៃអាទិត្យ បាននិយាយថា ការបញ្ឈប់សង្គ្រាមនៅស៊ូដង់ នឹងមិនសម្រេចបានឡើយ លុះត្រាតែដកកងកម្លាំងគាំទ្ររហ័សយោធាប៉ារ៉ា (RSF) ចេញពី ទីក្រុងទាំងអស់ លំនៅឋានប្រជាជន និងទីស្នាក់ការរដ្ឋាភិបាល។លោក Al-Burhan បាននិយាយនៅក្នុងសុន្ទរកថាទៅកាន់ប្រជាជនស៊ូដង់ ក្នុងឱកាសខួបលើកទី ៦៨ នៃឯករាជ្យភាពរបស់ប្រទេសស៊ូដង់ ដែលត្រូវបានចាក់ផ្សាយដោយទូរទស្សន៍ផ្លូវការរបស់ប្រទេសស៊ូដង់ថា មានវិធីតែមួយគត់ ដើម្បីបញ្ឈប់សង្គ្រាម ដែលនោះគឺការដកខ្លួនរបស់កងជីវពលឧទ្ទាម ចេញពីរដ្ឋ Gezira និងពីទីក្រុងទាំងអស់របស់ស៊ូដង់ ក្រៅពីការប្រគល់លុយ និងទ្រព្យសម្បត្តិដែលលួចបានពីពលរដ្ឋ និងធនធានរបស់រដ្ឋាភិបាល និងការដកខ្លួនចេញពីលំនៅឋានរបស់ពលរដ្ឋ និងទីស្នាក់ការរដ្ឋាភិបាល។ លោក និយាយថា បទឈប់បាញ់ណាមួយ ដែលពុំមានការធានាដូចបានរៀបរាប់ខាងលើ នឹងមិនមានតម្លៃនោះទេ ខណៈប្រជាជនស៊ូដង់ នឹងមិនទទួលយកដើម្បីរស់នៅក្នុងចំណោមឃាតក ឧក្រិដ្ឋជន និងអ្នកដែលគាំទ្រពួកគេ។លោក Al-Burhan បានព្រមានប្រទេសជិតខាងរបស់ស៊ូដង់ប្រឆាំងនឹងការគាំទ្រកងកម្លាំងគាំទ្ររហ័ស ផងដែរ។ លោកនិយាយថា លោកនឹងផ្ញើសារទៅកាន់ប្រទេសដែលស្វាគមន៍ឃាតករទាំងនេះ ឱ្យឈប់ជ្រៀតជ្រែកក្នុងកិច្ចការរបស់យើង ព្រោះការផ្តល់ការគាំទ្រណាមួយដល់ការដឹកនាំរបស់ក្រុមឧទ្ទាម ត្រូវបានចាត់ទុកថាជាដៃគូក្នុងឧក្រិដ្ឋកម្ម និងឃាតកម្ម និងបំផ្លាញប្រជាជនស៊ូដង់។

ភ្លៀងធ្លាក់ខ្លាំងនៅភាគខាងកើតអូស្ត្រាលី ធ្វើឱ្យអ្នកស្រុកដែលរងគ្រោះដោយខ្យល់ព្យុះកាន់តែលំបាក

ភ្លៀងដ៏ខ្លាំងបានធ្លាក់នៅផ្នែកខ្លះនៃភាគខាងកើតនៃប្រទេសអូស្ត្រាលី នៅថ្ងៃចន្ទ (០១ មករា) នេះដោយបង្កជាទឹកជំនន់ដ៏គំហុក ជន់លិចផ្លូវថ្នល់ និងនាំមកនូវភាពលំបាកបន្ថែមទៀតសម្រាប់អ្នកស្រុកមួយចំនួនបន្ទាប់ពីព្យុះផ្គររន្ទះវាយប្រហារតំបន់នេះកាលពីថ្ងៃបុណ្យណូអែល។តំបន់ភាគឦសាននៃរដ្ឋ ញ៉ូវសៅវេលស៍ (New South Wales) និងរដ្ឋ ឃ្វីនស៍ឡែន (Queensland) ភាគអាគ្នេយ៍ត្រូវបានវាយលុកដោយប្រព័ន្ធអាកាសធាតុយ៉ាងធ្ងន់ធ្ងរពេញមួយយប់ ដោយទីក្រុងជាច្រើនមានកម្រិតទឹកភ្លៀងធ្លាក់ស្មើនឹងរយៈពេលប្រហែលមួយខែ ក្នុងរយៈពេល ២៤ម៉ោងដល់ព្រឹកថ្ងៃចន្ទនេះ។ភ្លៀងធ្លាក់ខ្លាំងបន្ថែមទៀតត្រូវបានព្យាករណ៍រហូតដល់ព្រឹកថ្ងៃអង្គារ ជាមួយនឹងកម្រិតទឹកភ្លៀងសរុបត្រូវបានកំណត់លើសពី ២៥០មីលីម៉ែត្រ ច្រើនជាងមធ្យមភាគក្នុងខែមករា។ ឆ្នេរទេសចរណ៍ ហ្គូល ខូស (Gold Coast) ដ៏ពេញនិយមក្នុងរដ្ឋ ឃ្វីនស៍ឡែន ស្ថិតក្នុងចំណោមតំបន់ដែលរងផលប៉ះពាល់ខ្លាំងបំផុត ដោយវីដេអូនៅលើប្រព័ន្ធផ្សព្វផ្សាយសង្គមបង្ហាញពីរថយន្តជាប់គាំងនៅក្នុងផ្លូវលិចទឹក និងតំបន់ទំនាបជាច្រើនស្ថិតនៅក្រោមទឹក។ប្រជាពលរដ្ឋរាប់ពាន់នាក់ក្នុងរដ្ឋ ឃ្វីនស៍ឡែន នៅតែគ្មានអគ្គិសនីប្រើប្រាស់ បន្ទាប់ពីមានព្យុះផ្គររន្ទះកាលពីថ្ងៃទី២៥ និងទី២៦ ខែធ្នូ ដែលបានបណ្ដាលឲ្យបាក់រលំដើមឈើ និងដួលរលំខ្សែបណ្តាញអគ្គិសនី។ ក្រុមអាជ្ញាធរបាននិយាយថា ព្យុះចុងក្រោយនេះអាចពន្យារពេលកិច្ចខិតខំប្រឹងប្រែងតភ្ជាប់អគ្គិសនីឡើងវិញក្នុងទីតាំងដែលប៉ះពាល់៕

អ៊ុយក្រែន និងរុស្ស៊ី ចោទប្រកាន់គ្នាទៅវិញទៅមកពីការវាយប្រហារនៅដើមឆ្នាំថ្មី

មន្ត្រីម្នាក់ដែលដំឡើងដោយរុស្ស៊ី នៅក្នុងតំបន់ភាគខាងកើតនៃប្រទេសអ៊ុយក្រែន បាននិយាយថាការបាញ់ផ្លោងរបស់អ៊ុយក្រែនទៅលើទីក្រុងដូណិតស៍្ក (Donetsk) នៅប៉ុន្មានម៉ោងក្នុងពេលព្រឹកព្រលឹមនៃថ្ងៃចូលឆ្នាំថ្មី បានសម្លាប់មនុស្ស ៤នាក់ ខណៈក្រុមមន្ត្រីអ៊ុយក្រែនបាននិយាយថា យ៉ាងហោចណាស់មនុស្សម្នាក់បានស្លាប់នៅក្នុងការវាយប្រហារតាមអាកាសរបស់រុស្ស៊ីលើទីក្រុង អូដេសា (Odesa) ដោយនោះជាការចោទដាក់គ្នាទៅវិញទៅមកម្ដងទៀតនៅក្នុងឆ្នាំថ្មី ដែលសង្រ្គាមកំពុងឈានចូលដល់អាយុកាលពីរឆ្នាំ។មនុស្ស ១៤នាក់ក៏បានរងរបួសផងដែរនៅក្នុង «ការបាញ់ផ្លោងយ៉ាងធ្ងន់ធ្ងរ» ដោយកងកម្លាំងអ៊ុយក្រែននៅកណ្តាលនៃទីក្រុង ដូណិតស៍្ក នេះបើយោងតាមលោក ដេនីស ភូស៊ីលីន (Denis Pushilin) ប្រធានតំបន់ ដូណិតស៍្ក ដែលត្រូវបានតែងតាំងដោយរុស្ស៊ី ជាទីដែលទីក្រុង ដូណិតស៍្ក ជាមជ្ឈមណ្ឌលរដ្ឋបាល។លោក អូឡេហ្វ គីភើ (Oleh Kiper) អភិបាលនៃតំបន់ អូដេសា (Odesa) ដែលព័ទ្ធជុំវិញទីក្រុង អូដេសា បាននិយាយនៅលើបណ្ដាញតេឡេក្រាមថា យ៉ាងហោចណាស់មនុស្សម្នាក់បានស្លាប់នៅក្នុងការវាយប្រហារដោយយានដ្រូនរបស់រុស្ស៊ីលើកំពង់ផែ អូដេសា (Odesa) ភាគខាងត្បូងអ៊ុយក្រែន។ លោក គីភើ បាននិយាយថា ប្រព័ន្ធការពារដែនអាកាសរបស់អ៊ុយក្រែន បានទប់ស្កាត់ការវាយប្រហារដោយយានដ្រូននោះ ប៉ុន្តែកំទេចកំទីដែលបានធ្លាក់ចុះបានបណ្តាលឱ្យមានអគ្គីភ័យជាច្រើនកន្លែងនៅក្នុងអគារលំនៅដ្ឋាននៅក្នុងផ្នែកផ្សេងៗនៃទីក្រុង និងបានធ្វើឱ្យមនុស្សមួយចំនួនរងរបួសផងដែរ៕

យោធាអ៊ីស្រាអែល នឹងដកទាហានបម្រុងមួយចំនួនចេញពីតំបន់ហ្កាហ្សា

យោធាអ៊ីស្រាអែលបាននិយាយថា ខ្លួននឹងដកទាហានបម្រុងមួយចំនួនចេញពីតំបន់ហ្កាហ្សា ខណៈ ប្រតិបត្តិការជើងគោករបស់ខ្លួន នៅតែបន្តនៅក្នុងតំបន់ហ៊ុមព័ទ្ធនោះ។ អ្នកនាំពាក្យយោធាអ៊ីស្រាអែល លោក Daniel Hagari បានប្រាប់អ្នកសារព័ត៌មានកាលពីថ្ងៃអាទិត្យ ថា ទាហានបម្រុងមួយចំនួននឹងត្រឡប់ទៅរកគ្រួសារ និងការងាររបស់ពួកគេវិញ។ លោកនិយាយថា នេះនឹងជួយសម្រាលបន្ទុកយ៉ាងខ្លាំងលើសេដ្ឋកិច្ច និងអនុញ្ញាតឱ្យពួកគេប្រមូលកម្លាំងសម្រាប់សកម្មភាពនៅពេលខាងមុខ។ ប្រព័ន្ធផ្សព្វផ្សាយធំមួយរបស់អ៊ីស្រាអែល Haaretz បានរាយការណ៍ថា យោធាបានដកអង្គភាពមួយចំនួនរួចហើយ ហើយគ្រោងនឹងដកកងទ័ពបន្ថែមទៀត អាស្រ័យលើស្ថានភាព។ អ៊ីស្រាអែល បានកែណ្ឌទាហានបម្រុងចំនួន ៣៦០.០០០នាក់ ជាការឆ្លើយតបទៅនឹងការវាយប្រហារកាលពីខែតុលា ដោយក្រុមអ៊ីស្លាមនិយមហាម៉ាស។ ប៉ុន្តែចំណាត់ការនេះ បានបង្កើនក្តីបារម្ភថា កង្វះកម្លាំងការងារ អាចប៉ះពាល់ដល់សេដ្ឋកិច្ចក្នុងស្រុក។ ក្រុមអ្នកសង្កេតការណ៍ បាននិយាយថា យោធាទំនងជានឹងកាត់បន្ថយទំហំនៃការដាក់ពង្រាយកងទ័ពរបស់ខ្លួននៅក្នុងតំបន់ហ្កាហ្សា ខណៈដែលខ្លួនរំពឹងថានឹងមានការប្រយុទ្ធរយៈពេលយូរ។ អាជ្ញាធរសុខាភិបាលនៅក្នុងតំបន់ហ្កាហ្សានិយាយនៅថ្ងៃដដែលនោះថា មនុស្ស ១៥០ នាក់បានស្លាប់ ក្នុងរយៈពេល ២៤ ម៉ោង កន្លងទៅនេះ ដែលនាំឱ្យចំនួនអ្នកស្លាប់សរុបនៅក្នុងតំបន់ហ៊ុមព័ទ្ធនេះឡើងដល់ ២១.៨២២នាក់ ចាប់តាំងពីការចាប់ផ្តើមជម្លោះបច្ចុប្បន្ន។ ស្លាបកងកម្លាំងប្រដាប់អាវុធរបស់ក្រុមហាម៉ាស ជាកងពលតូច Al-Qassam បាននិយាយនៅក្នុងការបង្ហោះលើបណ្តាញផ្សព្វផ្សាយសង្គមនៅថ្ងៃចន្ទនេះថា ខ្លួនបានវាយប្រហារដោយគ្រាប់រ៉ុក្កែតទៅលើទីក្រុង Tel Aviv និងតំបន់ជុំវិញក្នុងប្រទេសអ៊ីស្រាអែល។ កងកម្លាំងការពារជាតិអ៊ីស្រាអែល បានឆ្លើយតបនៅលើបណ្តាញផ្សព្វផ្សាយសង្គមដោយនិយាយថា ក្រុមហាម៉ាស បានសម្រេចចាប់ផ្តើមឆ្នាំ ២០២៤ ដោយបាញ់រ៉ុក្កែតរាំងទៅលើអ៊ីស្រាអែល។កងកម្លាំងការពារជាតិអ៊ីស្រាអែល និយាយថា ពុំមានឆ្នាំថ្មីដ៏រីករាយនោះទេ រហូតទាល់តែចំណាប់ថ្នូរទាំងអស់ ដែលត្រូវបានចាប់ខ្លួនដោយក្រុមឥស្លាមនិយម ត្រឡប់ទៅដល់លំនៅឋានវិញ។

ទីប្រឹក្សារបស់លោកអាបាស រិះគន់ផែនការរបស់អ៊ីស្រាអែល ក្នុងការគ្រប់គ្រងព្រំដែនហ្កាហ្សា ជាមួយអេហ្ស៊ីប

ទីប្រឹក្សាប្រធានអាជ្ញាធរប៉ាឡេស្ទីន លោក ម៉ាខ្មូត អាបាស (Mahmoud Abbas) បានរិះគន់ផែនការរបស់អ៊ីស្រាអែល សម្រាប់ការត្រួតពិនិត្យរយៈពេលវែង នៅលើព្រំដែនរវាងតំបន់ហ្កាហ្សាស្ទ្រីប និងអេហ្ស៊ីប។លោក Hussein al-Sheikh អគ្គលេខាធិការនៃអង្គការរំដោះប៉ាឡេស្ទីន (PLO) បាននិយាយក្នុងការបង្ហោះលើគេហទំព័រXថា សំណើររបស់ប្រធានាធិបតីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) ដណ្តើមបានការគ្រប់គ្រងច្រករបៀង Philadelpphi និងច្រក Rafah របស់ភាគីប៉ាឡេស្ទីន ក៏ដូចជាការបង្កើតតំបន់ការពារ និងការរៀបចំសន្តិសុខថ្មី គឺជាភ័ស្តុតាងច្បាស់លាស់នៃការសម្រេចចិត្ត ដើម្បីបង្កើតការកាន់កាប់ពេញលេញឡើងវិញ»។ លោកបានបន្ថែមថា ការសម្រេចបែបនេះ ធ្វើឲ្យប៉ះពាល់ដល់ «កិច្ចព្រមព្រៀងជាមួយអេហ្ស៊ីប និងបញ្ចប់កិច្ចព្រមព្រៀងទាំងអស់ជាមួយអង្គការរំដោះប៉ាឡេស្ទីន (PLO)» ។លោកបានធ្វើការអត្ថាធិប្បាយលើសេចក្តីថ្លែងការណ៍របស់លោកណេតាន់យ៉ាហ៊ូ ដែលធ្វើឡើងកាលពីល្ងាចថ្ងៃសៅរ៍ថា បន្ទាប់ពីសង្រ្គាមហ្កាហ្សា អ៊ីស្រាអែល ក៏គួរតែគ្រប់គ្រងច្រករបៀង Philadelphia តាមបណ្តោយព្រំដែនរវាងតំបន់ហ្កាហ្សាស្ទ្រីប និងអេហ្ស៊ីប ដែលមានប្រវែងប្រហែល១៤ គីឡូម៉ែត្រ។លោកណេតាន់យ៉ាហ៊ូ បាននិយាយថា នេះគឺជាមធ្យោបាយតែមួយគត់ ដើម្បីធានាដល់ការគ្មានយោធានៅតំបន់ហ្កាហ្សាស្ទ្រីបនេះ។

រដ្ឋមន្ត្រីអ៊ីស្រាអែល អំពាវនាវជាថ្មីឲ្យជនជាតិប៉ាឡេស្ទីន ចាកចេញពីតំបន់ហ្កាហ្សា

ឥស្សរជនជាន់ខ្ពស់ម្នាក់នៅក្នុងក្រុមចម្រុះស្តាំនិយមរបស់លោកនាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ (Benjamin Netanyahu) បានអំពាវនាវកាលពីថ្ងៃអាទិត្យ (៣១ ធ្នូ) ឱ្យប្រជាជនប៉ាឡេស្ទីននៅតំបន់ហ្កាហ្សាចាកចេញពីតំបន់ឡោមព័ទ្ធនោះ ដោយបើកផ្លូវឲ្យអ៊ីស្រាអែល ដែលអាចធ្វើឱ្យទីនោះក្លាយជាវាលរហោរដ្ឋាន។ការអត្ថាធិប្បាយរបស់រដ្ឋមន្ត្រីហិរញ្ញវត្ថុ លោក បេហ្សាលែល ស្មូទ្រីច (Bezalel Smotrich) ដែលត្រូវបានដកចេញពីគណៈរដ្ឋមន្ត្រីសង្គ្រាម និងការពិភាក្សាអំពីការរៀបចំបន្ទាប់នៅហ្កាហ្សា នេះហាក់ដូចជាបង្ហាញពីការភ័យខ្លាចនៅក្នុងពិភពអារ៉ាប់ជាច្រើន ដែលថាអ៊ីស្រាអែលចង់បណ្តេញជនជាតិប៉ាឡេស្ទីនចេញពីដីដែលពួកគេចង់សាងសង់ជារដ្ឋមួយនាពេលអនាគត ដោយធ្វើត្រាប់ឡើងវិញនូវការបណ្តេញជនជាតិប៉ាឡេស្ទីនយ៉ាងច្រើននៅពេលដែលអ៊ីស្រាអែលត្រូវបានបង្កើតឡើងក្នុងឆ្នាំ១៩៤៨។លោក ស្មូទ្រីច ដែលគណបក្សសាសនាជី្វហ្វប្រកាន់ស្តាំនិយមរបស់លោកទាក់ទាញការគាំទ្រពីសហគមន៍អ្នកតាំងលំនៅរបស់អ៊ីស្រាអែល បានធ្វើការបញ្ចេញមតិស្រដៀងគ្នានេះកាលពីមុន ដោយធ្វើឱ្យខ្លួនលោកមានជម្លោះជាមួយសម្ព័ន្ធមិត្តដ៏សំខាន់បំផុតរបស់អ៊ីស្រាអែល គឺសហរដ្ឋអាមេរិក។ប៉ុន្តែទស្សនៈរបស់លោក ស្មូទ្រីច មិនបានឆ្លុះបញ្ចាំងពីជំហរផ្លូវការរបស់រដ្ឋាភិបាល ដែលថាពលរដ្ឋហ្កាហ្សានឹងអាចត្រឡប់ទៅផ្ទះវិញបន្ទាប់ពីសង្គ្រាមប្រឆាំងនឹងចលនាអ៊ីស្លាមហាម៉ាស ដែលគ្រប់គ្រងតំបន់ហ្កាហ្សា ដោយឥឡូវនេះជិតចាប់ផ្តើមចូលខែទីបួនរបស់ខ្លួន៕

រដ្ឋមន្ត្រីការបរទេសចក្រភពអង់គ្លេស៖ អ៊ីរ៉ង់មានចំណែកទទួលខុសត្រូវចំពោះការទប់ស្កាត់ការវាយប្រហារនៅសមុទ្រក្រហម

រដ្ឋមន្ត្រីការបរទេសអង់គ្លេសលោក David Cameron បាននិយាយកាលពីថ្ងៃអាទិត្យថា លោកបានបញ្ជាក់យ៉ាងច្បាស់ នៅក្នុងការសន្ទនាតាមទូរស័ព្ទជាមួយរដ្ឋមន្ត្រីការបរទេសអ៊ីរ៉ង់លោក ហ៊ូសេន អាមីរ៉ាប់ឌូឡាហៀន (Hossein Amirabdollahian) ថា អ៊ីរ៉ង់មានចំណែកការទទួលខុសត្រូវចំពោះការទប់ស្កាត់ការវាយប្រហាររបស់ក្រុមហួទី នៅសមុទ្រក្រហម។លោកបាននិយាយនៅក្នុងការបង្ហោះនៅលើគេហទំព័រប្រព័ន្ធផ្សព្វផ្សាយសង្គម X ថា៖«ខ្ញុំបានបញ្ជាក់យ៉ាងច្បាស់ថា អ៊ីរ៉ង់មានចំណែកការទទួលខុសត្រូវចំពោះការទប់ស្កាត់ការវាយប្រហារទាំងនេះ ដោយបានផ្តល់ការគាំទ្រដ៏យូរអង្វែងរបស់ពួកគេ ដល់ក្រុមហួទី»។ប្រព័ន្ធផ្សព្វផ្សាយរដ្ឋរបស់ប្រទេសអ៊ីរ៉ង់ បានដកស្រង់សម្តីលោក អាមីរ៉ាប់ឌូឡាហៀនថា៖«របបអ៊ីស្រាអែល មិនអាចអនុញ្ញាតឲ្យប្រព្រឹត្តការសម្លាប់រង្គាលស្ត្រី និងកុមារ និងអំពើប្រល័យពូជសាសន៍ នៅតំបន់ហ្កាហ្សា និងដុតបំផ្លាញតំបន់នេះឡើយ ខណៈដែលការបញ្ឈប់នាវាជ្វីហ្វ នៅសមុទ្រក្រហម ត្រូវបានគេមើលឃើញថា មានគ្រោះថ្នាក់ដល់សន្តិសុខនៃផ្លូវទឹកសេដ្ឋកិច្ចនេះ»។

បណ្ដាញសង្គម

ព័ត៌មានថ្មីៗ

ប្រមុខការទូតកម្ពុជាប្រាប់មហាសន្និបាត UN ថា កម្ពុជាជ្រើសយកយន្តការផ្សះផ្សាដោយបង្ខំក្រោមអនុសញ្ញា UNCLOS ដើម្បីការពារអធិបតេយ្យ និងសិទ្ធិលើដែនសមុទ្រស្របតាមច្បាប់អន្តរជាតិ

ប្រមុខការទូតកម្ពុជាប្រាប់មហាសន្និបាត UN ថា ជម្លោះកម្ពុជា-ថៃធ្វើឱ្យប៉ះពាល់យ៉ាងធ្ងន់ធ្ងរដល់ជំនឿទុកចិត្តរវាងប្រទេសទាំងពីរ ខណៈសម្រាប់កម្ពុជាការស្តារទំនុកចិត្តឡើងវិញត្រូវតែផ្អែកលើការប្តេជ្ញាចិត្តជាក់ស្តែង

រដ្ឋមន្ត្រីការបរទេសកម្ពុជា-នីហ្សេ ចុះហត្ថលេខាលើកិច្ចព្រមព្រៀងស្តីពីការបង្កើតទំនាក់ទំនងការទូតរវាងប្រទេសទាំងពីរ

ក្រោយមានបទបញ្ជារបស់សម្តេចធិបតី នាយករដ្ឋមន្រ្តី កងពលតូចដឹកជញ្ជូនលេខ៩៩ បានត្រៀមកម្លាំង និងសម្ភារៈរួចជាស្រេច២៤ម៉ោងលើ២៤ម៉ោង ដើម្បីចុះអន្តរាគមន៍ពលរដ្ឋរងគ្រោះដោយទឹកជំនន់

ប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ ចុះពិនិត្យស្ថានភាព និងផ្តល់ជំនួយដល់ពលរដ្ឋរងគ្រោះទឹកជំនន់ នៅក្រុងប៉ោយប៉ែត

ជំនន់ស្ទឹងសង្កែបណ្ដាលឱ្យប៉ះពាល់ផ្ទះពលរដ្ឋនៅស្រុកឯកភ្នំជាង ៣ពាន់ខ្នង និងដំណាំជាង ៣ពាន់ហិកតា

ឯកឧត្តម ប្រាក់ សុខុន ជួបពិភាក្សាទ្វេភាគីជាមួយរដ្ឋមន្ត្រីការបរទេសអ៊ីរ៉ង់ ក្នុងឱកាសអញ្ជើញចូលរួមកិច្ចពិភាក្សាទូទៅនៃមហាសន្និបាត UN

ប្រមុខការទូតកម្ពុជា និងអគ្គលេខាធិការ UN ជួបពិភាក្សាទ្វេភាគី ផ្លាស់ប្តូរទស្សនៈគ្នាលើបច្ចុប្បន្នភាពនៅតាមបណ្តោយព្រំដែនកម្ពុជា-ថៃ

ប្រមុខការទូតកម្ពុជា ប្រាប់មហាសន្និបាត UN ថា ការស្តារទំនុកចិត្តឡើងវិញរវាងកម្ពុជា-ថៃ ត្រូវផ្អែកលើការប្តេជ្ញាចិត្តជាក់ស្តែង និងការអនុវត្តប្រកបដោយប្រសិទ្ធភាពពេញលេញនូវរាល់ការព្រមព្រៀងជាមួយគ្នា

ទូតកម្ពុជាប្រចាំនៅជប៉ុន៖ យុវជនមានតួនាទីសំខាន់ក្នុងការរួមចំណែកពង្រឹងទំនាក់ទំនងរវាងកម្ពុជា-ជប៉ុន ឱ្យកាន់តែរឹងមាំថែមទៀត

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877