BTV NEWS

អាជ្ញាធររាជធានីភ្នំពេញបន្តរកឃើញបទល្មើស Online Scams ពីរទីតាំងបន្ថែមទៀត

បង្រ្កាបបទល្មើសគ្រឿងញៀននៅចំណុចស្តារវីហ្កាសឃាត់ខ្លួនមនុស្ស ចំនួន១៤១នាក់

អាវុធហត្ថខេត្តព្រះសីហនុបង្រ្កាបទីតាំង ONLINE SCAMS មួយកន្លែងឃាត់ខ្លួនជនសង្ស័យចំនួន ១៨នាក់

ជនជាតិចិន ១៦៤នាក់ពាក់ទៀត ព័ន្ធករណី Online Scams ត្រូវបានបណ្ដេញចេញពីកម្ពុជា

សន្តិសុខ និង សង្គម

មនុស្ស៥នាក់ បានស្លាប់ក្នុងប្រទេសអូស្ត្រាលី បន្ទាប់ពីរថយន្តមួយគ្រឿងបើកបុកហ្វូងមនុស្ស

ក្រុមអាជ្ញាធរបាននិយាយនៅថ្ងៃច័ន្ទ (០៦ វិច្ឆិកា) នេះថា មនុស្ស៥នាក់ រួមទាំងកុមារពីរនាក់ បានស្លាប់ និងជាច្រើននាក់ទៀតរងរបួស នៅក្នុងទីប្រជុំជនទេសចរណ៍ដ៏ពេញនិយមមួយក្នុងតំបន់ជនបទនៃប្រទេសអូស្ត្រាលី បន្ទាប់ពីរថយន្តមួយគ្រឿងបានបើកបុកហ្វូងមនុស្សនៅសួនច្បារមុខហាងស្រាមួយកន្លែង។ស្នងការនគរបាល លោក Shane Patton បាននិយាយក្នុងអំឡុងសន្និសីទសារព័ត៌មានមួយថា រថយន្ត SUV មួយគ្រឿងនោះ បានបើកលើឃឿនផ្លូវ ហើយបន្ទាប់មកបានបើកឆ្លងកាត់តំបន់ស្មៅនៅខាងក្រៅសណ្ឋាគារ រ៉ូយ៉ាល់ ដេឡេសហ្វដ (Royal Daylesford) ទៅបុកនឹងហ្វូងមនុស្សនៅទីនោះ។នគរបាលមិនបានបញ្ជាក់ថា តើជនរងគ្រោះជាសាច់ញាតិនឹងគ្នា ឬមិនមែននោះទេ ហើយក៏មិនបានបញ្ជាក់ថា ការបើកបរហួសល្បឿនកំណត់ ជាមូលហេតុពីក្រោយគ្រោះថ្នាក់នេះ ឬយ៉ាងណានោះដែរ ប៉ុន្តែបាននិយាយថា អ្នកស្លាប់មិនមែនជាអ្នកស្រុកនោះទេ។ ជនរងគ្រោះទាំងអស់មិនទាន់ត្រូវបានគេស្គាល់អត្តសញ្ញាណជាផ្លូវការនៅឡើយទេ ហើយនគរបាលបាននិយាយថា ស្ថានភាពពិតប្រាកដនៃគ្រោះថ្នាក់នេះក៏មិនទាន់ត្រូវបានកំណត់នៅឡើយដែរ។អ្នកបើកបររថយន្តបង្កគ្រោះថ្នាក់នោះមានឈ្មោះ ចន វ័យ ៦៦ឆ្នាំ បានរងរបួសធ្ងន់ ប៉ុន្តែមិនគំរាមកំហែងអាយុជីវិតទេ។ អ្នកបើកបររូបនោះត្រូវបានធ្វើតេស្តគ្រឿងស្រវឹង ប៉ុន្តែមិនមានជាតិអាល់កុលនៅក្នុងខ្លួនឡើយ ហើយនគរបាលបាននិយាយថា ពួកគេគ្រោងនឹងធ្វើការសាកសួរបុរសរូបនោះនៅល្ងាចថ្ងៃច័ន្ទនេះ ពេលដែលលោកចេញពីមន្ទីរពេទ្យ៕

ជនអន្តោប្រវេសន៍ ដែលបានទៅដល់ប្រជុំកោះ កាណារី របស់អេស្ប៉ាញ មានជិត ៣២.០០០នាក់នៅឆ្នាំនេះ

ក្រុមអាជ្ញាធរក្នុងតំបន់បាននិយាយកាលពីថ្ងៃអាទិត្យ (០៥ វិច្ឆិកា) ថា ជនអន្តោប្រវេសន៍ជិត ៣២.០០០នាក់ បានទៅដល់ប្រជុំកោះ កាណារី របស់អេស្ប៉ាញ តាមទូកតូចៗពីអាហ្វ្រិកខាងលិច ក្នុងឆ្នាំនេះ ដោយលើសពីកំណត់ត្រាមុនដែលបានបង្ហោះក្នុងឆ្នាំ២០០៦។ ក្រុមអាជ្ញាធរក្នុងតំបន់បានប្រាប់សារព័ត៌មាន រ៉យទ័រ ថា មកទល់ពេលនេះ មនុស្សចំនួន ៣១.៩៣៣នាក់ បានទៅដល់ប្រជុំកោះនេះ បើធៀបនឹងវិបត្តិទូកតូចៗកាលពីឆ្នាំ២០០៦ នៅពេលដែលមនុស្សចំនួន ៣១,៦៧៨នាក់ បានទៅដល់ប្រជុំកោះកាណារី របស់អេស្ប៉ាញមួយនេះ។ឆ្មាំល្បាតឆ្នេរអេស្ប៉ាញ បាននិយាយថា ចាប់តាំងពីថ្ងៃសុក្រមក មនុស្សចំនួន ៧៣៩នាក់ ត្រូវបានជួយសង្គ្រោះនៅមហាសមុទ្រអាត្លង់ទិក ក្បែរកោះ អ៊ែល អៀរ៉ូ (El Hierro) ដែលជាកោះតូចបំផុត និងនៅចុងខាងលិចបំផុតនៅក្នុងប្រជុំកោះនេះ។ មនុស្សពីរនាក់ត្រូវបានគេរកឃើញស្លាប់នៅក្នុងចំណោមទូកចំនួនបួន ហើយបន្ទាប់មកមនុស្សពីរនាក់ផ្សេងទៀតបានស្លាប់នៅក្នុងមន្ទីរពេទ្យ នេះបើតាមឆ្មាំស៊ីវិលអេស្ប៉ាញ ដែលបានចូលរួមក្នុងការជួយសង្គ្រោះ បាននិយាយកាលពីថ្ងៃសៅរ៍ ដោយក្នុងនោះមានស្ត្រីនិងកុមារជាច្រើនស្ថិតក្នុងចំណោមអ្នកដែលបានជួយសង្គ្រោះទាំងនោះ។ចំនួនជនអន្តោប្រវេសន៍ ដែលបានទៅដល់អេស្ប៉ាញ បានហក់ឡើងនាពេលថ្មីៗនេះ ខណៈអាកាសធាតុអំណោយផលជាងមុន និងសមុទ្រមានសភាពស្ងប់ស្ងាត់ចាប់តាំងពីខែកញ្ញា មក ដែលបានធ្វើឱ្យមនុស្សជាច្រើនកាន់តែមានលទ្ធភាពក្នុងការព្យាយាមធ្វើដំណើរដ៏គ្រោះថ្នាក់ឆ្លងកាត់ពីទ្វីបអាហ្វ្រិកទៅកាន់អឺរ៉ុប។ រដ្ឋាភិបាលអេស្ប៉ាញ បាននិយាយថា ខ្លួននឹងបង្កើតកន្លែងស្នាក់នៅបន្ទាន់បន្ថែមសម្រាប់ជនអន្តោប្រវេសន៍ប្រហែល ៣.០០០នាក់ នៅក្នុងបន្ទាយយោធា សណ្ឋាគារ និងផ្ទះសំណាក់ផ្សេងៗទៀតផងដែរ៕

កងកម្លាំងអ៊ុយក្រែន បើកការវាយប្រហារដោយមីស៊ីលលើទីតាំងផលិតនាវានៅតំបន់គ្រីម៉េ

យោធាអ៊ុយក្រែននិយាយថា ខ្លួនបានធ្វើការវាយប្រហារដោយមីស៊ីលទៅលើទីតាំងផលិតនាវាមួយកន្លែងនៅតំបន់គ្រីម៉េ ជាតំបន់នៅភាគខាងត្បូងប្រទេស ដែលត្រូវបានភ្ជាប់ឧបសម្ព័ន្ធជាឯកតោភាគី ដោយប្រទេសរុស្ស៊ីកាលពីឆ្នាំ ២០១៤។ មេបញ្ជាការកងទ័ពអាកាសអ៊ុយក្រែន បាននិយាយនៅលើបណ្តាញសង្គមថា យន្តហោះចម្បាំងរបស់ខ្លួន បានបាញ់មីស៊ីលទៅលើទីតាំងផលិតនាវា Zaliv កាលពីថ្ងៃសៅរ៍។ លោកបាននិយាយបង្ហើបថា ពួកគេប្រើប្រាស់មីស៊ីលស៊ីបគោលដៅ SCALP ដែលផ្តល់ដោយប្រទេសបារាំង។ប្រព័ន្ធផ្សព្វផ្សាយក្នុងប្រទេសរុស្ស៊ី កាលពីថ្ងៃអាទិត្យបានដកស្រង់សម្តីមន្ត្រីក្រសួងការពារជាតិរបស់ប្រទេសនេះដែលបាននិយាយថា មីស៊ីលស៊ីបគោលដៅចំនួន១៥គ្រាប់ ត្រូវបានបាញ់ទៅលើទីតាំងផលិតនាវា ហើយ ១៣គ្រាប់ត្រូវបានស្ទាក់ចាប់ ដែលបណ្តាលឱ្យនាវាមួយគ្រឿងប៉ុណ្ណោះរងការខូចខាត។ភាគីអ៊ុយក្រែន បាននិយាយថា នាវាទំនើបបំផុតរបស់រុស្ស៊ី ជានាវាផ្ទុកមីស៊ីលស៊ីបគោលដៅ Kalibr បានបោះយុថ្កានៅទីតាំងផលិតនាវា ប៉ុន្តែពុំបានប្រាប់ពីឈ្មោះនាវាដែលរងការខូចខាតនោះទេ។កាលពីពេលថ្មីៗនេះ កងកម្លាំងអ៊ុយក្រែន បានធ្វើការវាយប្រហារលើមូលដ្ឋានយោធារុស្ស៊ីនៅតំបន់គ្រីម៉េ។ ពួកគេបានវាយប្រហារលើទីស្នាក់ការកណ្តាលនៃកងនាវានៅសមុទ្រខ្មៅ ក្នុងទីក្រុងកំពង់ផែកងទ័ពជើងទឹក Sevastopol កាលពីខែកញ្ញា។

នាយករដ្ឋមន្ត្រីអ៊ីស្រាអែល ផ្អាកតំណែងរដ្ឋមន្ត្រីម្នាក់ជុំវិញការអត្ថាធិប្បាយប្រើប្រាស់នុយក្លេអ៊ែរក្នុងសង្រ្គាមហ្កាហ្សា

នាយករដ្ឋមន្ត្រីអ៊ីស្រាអែល លោក Benjamin Netanyahu កាលពីថ្ងៃអាទិត្យ (០៥ វិច្ឆិកា) បានដាក់វិន័យដល់សមាជិកជាន់ខ្ពស់ម្នាក់នៃគណៈរដ្ឋមន្ត្រីរបស់ខ្លួន ដែលបង្ហាញពីការបើកចំហចំពោះគំនិតរបស់អ៊ីស្រាអែល ក្នុងការធ្វើការវាយប្រហារនុយក្លេអ៊ែរលើតំបន់ហ្កាហ្សា ជាទីដែលសង្រ្គាមជាមួយក្រុមហាម៉ាស កំពុងធ្វើឱ្យចំនួនការស្លាប់នៃជនស៊ីវិលប៉ាឡេស្ទីន កើនឡើងយ៉ាងខ្លាំង។ការិយាល័យរបស់លោក Netanyahu បានចេញសេចក្តីថ្លែងការណ៍មួយដោយនិយាយថា រដ្ឋមន្ត្រីពាក់ព័ន្ធ ដែលជារដ្ឋមន្ត្រីបេតិកភណ្ឌ លោក Amihay Eliyahu មកពីគណបក្សស្តាំនិយមក្នុងរដ្ឋាភិបាលចម្រុះ ត្រូវបានផ្អាកពីកិច្ចប្រជុំគណៈរដ្ឋមន្ត្រី «រហូតដល់មានការជូនដំណឹងបន្ថែម»។នៅពេលសួរនៅក្នុងបទសម្ភាសន៍តាមវិទ្យុអំពីជម្រើសនុយក្លេអ៊ែរសម្មតិកម្ម លោករដ្ឋមន្ត្រីបេតិកភណ្ឌ Eliyahu បានឆ្លើយតបថា «នោះជាវិធីមួយដែលអាចទៅរួច»។ សុន្ទរកថារបស់លោក បានទាក់ទាញការថ្កោលទោសយ៉ាងឆាប់រហ័សពីជុំវិញបណ្ដាប្រទេសអារ៉ាប់ ដែលធ្វើឲ្យប្រព័ន្ធផ្សព្វផ្សាយរបស់អ៊ីស្រាអែល កើតមានរឿងអាស្រូវ និងត្រូវបានចាត់ទុកថាជា «ការជំទាស់ដែលអាចទៅរួច» ដោយមន្ត្រីសហរដ្ឋអាមេរិក។ទាំងលោក Eliyahu និងមេដឹកនាំគណបក្សរបស់លោក មិនមានតួនាទីនៅក្នុងវេទិកាថ្នាក់រដ្ឋមន្ត្រីដែលដោះស្រាយបញ្ហាសង្រ្គាមតំបន់ហ្កាហ្សា នោះទេ។ ពួកគេក៏មិនមានចំណេះដឹងខាងក្នុងអំពីសមត្ថភាពនុយក្លេអ៊ែររបស់អ៊ីស្រាអែល ដែលប្រទេសនេះមិនទទួលស្គាល់ជាសាធារណៈ ព្រមទាំងមិនមានសិទ្ធិអំណាចក្នុងការដាក់ឱ្យប្រើប្រាស់គ្រឿងសព្វាវុធទាំងនោះដែរ៕-

ក្រុមហេសបូឡា៖ អ៊ីស្រាអែលនឹងទទួលផលចំពោះទង្វើដែលខ្លួនធ្វើ បន្ទាប់ពីការវាយប្រហារសម្លាប់កុមារ ៣ នាក់នៅលីបង់

សមាជិកសភាក្រុមហេសបូឡា បាននិយាយថា ការវាយប្រហាររបស់អ៊ីស្រាអែល ទៅលើរថយន្តមួយគ្រឿងនៅប្រទេសលីបង់ភាគខាងត្បូង បានបណ្តាលឲ្យកុមារបីនាក់ និងជីដូនរបស់ពួកគេ ស្លាប់ កាលពីថ្ងៃអាទិត្យ ដោយបានហៅការវាយប្រហារនេះថាជា «ការវិវឌ្ឍន៍ដ៏គ្រោះថ្នាក់» ដែលអ៊ីស្រាអែលនឹងទទួលផលចំពោះទង្វើដែលខ្លួនធ្វើ។ សមាជិកសភា លោក Hassan Fadlallah បាននិយាយថា ម្តាយរបស់កូនបីនាក់ ជាក្មេងស្រីអាយុចន្លោះពី ៨ ទៅ ១៤ ឆ្នាំ បានរងរបួសនៅក្នុងការវាយប្រហារទៅលើរថយន្តមួយគ្រឿងខណៈរថយន្តកំពុងបើកបរនៅចន្លោះភូមិ Aynata និងភូមិ Aitaroun នៅជិតព្រំដែនប្រទេសអ៊ីស្រាអែល។លោក Fadlallah បានប្រាប់សារព័ត៌មានរ៉យទ័រ ក្នុងសេចក្តីថ្លែងការណ៍ថា «សត្រូវនឹងទទួលផលចំពោះទង្វើដែលខ្លួនបានធ្វើ សម្រាប់ឧក្រិដ្ឋកម្មមកលើជនស៊ីវិល» ។ដោយត្រូវបានសួរអំពីការរាយការណ៍មុនៗពីប្រភពសន្តិសុខក្នុងប្រទេសលីបង់ដែលការវាយប្រហាររបស់អ៊ីស្រាអែល បានសម្លាប់មនុស្សបីនាក់នៅក្នុងរថយន្តនៅជិតភូមិ Aynata អ្នកនាំពាក្យកងទ័ពអ៊ីស្រាអែលបាននិយាយថា កងទ័ពបានចេញសេចក្តីថ្លែងការណ៍មួយនៅល្ងាចថ្ងៃអាទិត្យអំពីការវាយប្រហារនៅក្នុងប្រទេសលីបង់។អ៊ីស្រាអែល និងក្រុមហេសបូឡាដែលគាំទ្រដោយអ៊ីរ៉ង់ប្រដាប់ដោយអាវុធធុនធ្ងន់ បាននិងកំពុងបាញ់តគ្នានៅព្រំដែន ចាប់តាំងពីក្រុមសកម្មប្រយុទ្ធប៉ាឡេស្ទីនហាម៉ាស់ និងអ៊ីស្រាអែល បានធ្លាក់ចូលក្នុងសង្រ្គាមចាប់តាំងពីថ្ងៃទី ៧ ខែតុលា។ វាបានកត់សម្គាល់អំពើហិង្សាដ៏ឃោឃៅបំផុតនៅទូទាំងព្រំដែនចាប់តាំងពីប្រទេសអ៊ីស្រាអែល និងហេសបូឡា ប្រយុទ្ធគ្នាក្នុងសង្រ្គាមនៅក្នុងឆ្នាំ ២០០៦មក។

ជនភៀសខ្លួននៅតំបន់ហ្កាហ្សា ស្ទ្រីប ជ្រកកោននៅមន្ទីរពេទ្យ ដោយបន្ថែមសម្ពាធដល់ប្រព័ន្ធវេជ្ជសាស្ត្រ

ជនភៀសខ្លួនរាប់ម៉ឺននាក់នៅតំបន់ហ្កាហ្សា ស្ទ្រីប បានទៅជ្រកកោននៅតាមមន្ទីរពេទ្យក្នុងស្រុកនានា ដោយបង្កើនសម្ពាធកាន់តែខ្លាំងឡើងទៅលើស្ថាប័នវេជ្ជសាស្ត្រក្នុងស្រុក ដែលស្ថិតនៅក្រោមបន្ទុកដ៏ធ្ងន់ធ្ងររួចទៅហើយនោះ ខណៈជម្លោះជុំថ្មីរវាងប៉ាឡេស្ទីន និងអ៊ីស្រាអែល បានឆក់យកជីវិតមនុស្សជាង ១១,០០០នាក់ សម្រាប់ភាគីជម្លោះទាំងសងខាង គិតត្រឹមថ្ងៃសៅរ៍ (០៤ វិច្ឆិកា)។ទិន្នន័យរបស់អង្គការសហប្រជាជាតិបានបង្ហាញថា ប្រជាជនជាង ១,៤លាននាក់ នៃប្រជាជនទាំងអស់នៅតំបន់ហ្កាហ្សា ដែលមានប្រហែល ២,៣លាននាក់ ត្រូវបានផ្លាស់ទីលំនៅដោយសារសកម្មភាពយោធារបស់អ៊ីស្រាអែល ប្រឆាំងនឹងតំបន់ហ្កាហ្សា ក្នុងប៉ុន្មានសប្តាហ៍ថ្មីៗនេះ។ ជាងមួយភាគបីនៃជនភៀសខ្លួនទាំងនោះ កំពុងត្រូវបានគេដាក់ឲ្យស្នាក់នៅក្នុងបរិវេណទីតាំងរបស់អង្គការសហប្រជាជាតិ ដោយមនុស្សរាប់សែននាក់ទៀត ត្រូវបានបង្ខំឱ្យស្វែងរកជម្រកនៅក្នុងមន្ទីរពេទ្យ សាលារៀន និងវិហារអ៊ីស្លាមជាដើម។មន្ទីរពេទ្យ ណាសសឺ (Nasser) គឺជាមន្ទីរពេទ្យធំជាងគេនៅទីក្រុងខាន់ យ៉ូនីស (Khan Younis) ដែលជាទីក្រុងមួយនៅភាគខាងត្បូងតំបន់ហ្កាហ្សា ស្រ្ទីប ដោយជនភៀសខ្លួនជាង ១.៥០០០នាក់ បានស្នាក់នៅបោះតង់បណ្តោះអាសន្ននៅក្នុងទីលាននៃមន្ទីរពេទ្យមួយនោះ ហើយនៅខាងក្នុងស្ថាប័នវេជ្ជសាស្ត្រមួយនេះ មានមនុស្សពេញវ័យ និងកុមារជាច្រើនស្នាក់នៅតាមច្រករបៀងនៃទីធ្លាមន្ទីរពេទ្យ។យោងតាមការប៉ាន់ប្រមាណរបស់នាយកដ្ឋានសុខាភិបាលក្នុងតំបន់ហ្កាហ្សា បានឲ្យដឹងថា នាពេលបច្ចុប្បន្ននេះ ស្ថាប័នវេជ្ជសាស្ត្រក្នុងតំបន់មួយនេះ បានផ្ទុកប្រជាជនភៀសខ្លួនយ៉ាងហោចណាស់ ១០០.០០០នាក់។ សម្រាប់ជនភៀសខ្លួនទាំងនោះ ពួកគេគ្រាន់តែចង់ស្វែងរកទីជម្រកដែលមានសុវត្ថិភាពប៉ុណ្ណោះ ប៉ុន្តែបញ្ហានេះក៏ដាក់សម្ពាធយ៉ាងខ្លាំងទៅលើស្ថាប័នវេជ្ជសាស្ត្រក្នុងស្រុកផងដែរ៕-

មនុស្សជាច្រើនជាប់នៅច្រកព្រំដែនរ៉ាហ្វា តំបន់ហ្កាហ្សា បន្ទាប់ពីការជម្លៀស ត្រូវបានផ្អាក

ជនបរទេសជាច្រើនបាននិយាយថា ពួកគេត្រូវបានជាប់នៅច្រកឆ្លងកាត់ព្រំដែន រ៉ាហ្វា (Rafah) របស់តំបន់ហ្កាហ្សា កាលពីថ្ងៃអាទិត្យទី៥វិឆ្ឆិកា បន្ទាប់ពីការជម្លៀសត្រូវបានផ្អាក។ ប្រភពនានាពីក្រុមមន្ត្រីអេហ្ស៊ីប បាននិយាយថា ការជម្លៀសចេញពីតំបន់ហ្កាហ្សា ត្រូវបានផ្អាកបន្ទាប់ពីការវាយប្រហារតាមអាកាសរបស់អ៊ីស្រាអែល កាលពីថ្ងៃសុក្រ ទី៣វិច្ឆិកា បានប៉ះចំរថយន្តគិលានសង្រ្គោះ ក្នុងតំបន់ហ្កាហ្សា ដែលត្រូវបានប្រើដើម្បីដឹកជញ្ជូនអ្នករបួស។អេហ្ស៊ីប សហរដ្ឋអាមេរិក និងក្រុមមន្ត្រីកាតា បាននិយាយថា កិច្ចខិតខំប្រឹងប្រែង នៅតែបន្តក្នុងការជម្លៀសពលរដ្ឋហ្កាហ្សារងរបួស និងជនបរទេសជាច្រើន តាមច្រកព្រំដែនរ៉ាហ្វា ចូលទៅកាន់ប្រទេសអេហ្ស៊ីប ។ អ្នកកាន់លិខិតឆ្លងដែន អាល្លឺម៉ង់ លោក ម៉ាចេដ អាល់ ហ៊ូវៃហៃ(Majed al-Huwaihi) បាននិយាយថា មនុស្សជាច្រើន រួមទាំងជនជាតិអាល្លឺម៉ង់ និងអេហ្ស៊ីប បានអំពាវនាវឲ្យរដ្ឋាភិបាលរបស់ពួកគេជួយនាំពួកគេ រួមទាំងក្រុមគ្រួសារចាកចេញពីទីនេះ ។ ស្ថានភាពកាន់តែធ្ងន់ធ្ងរជារៀងរាល់ថ្ងៃនៅក្នុងតំបន់ហ្កាហ្សា។ ប្រភពពីមន្ត្រីអេហ្ស៊ីប ពីរូប បាននិយាយថា ច្រកឆ្លងកាត់ព្រំដែនរ៉ាហ្វា ចូលទៅកាន់ឧបទ្វីបស៊ីណៃ របស់អេហ្ស៊ីប គឺជាច្រកចេញតែមួយគត់ពីតំបន់ហ្កាហ្សា ដែលមិនត្រូវបានគ្រប់គ្រងដោយអ៊ីស្រាអែល ។រថយន្តដឹកជំនួយនៅតែចូលទៅក្នុងតំបន់ហ្កាហ្សា ៕

ក្មេងស្រីម្នាក់ស្រែកយំពេលឪពុកម្តាយនាងត្រូវបូជា ខណៈអ្នកស្លាប់ដោយរញ្ជួយដីនៅនេប៉ាល់ កើនដល់១៥៧នាក់

សម្រែកយំរបស់ក្មេងស្រី Prem Kala Kami អាយុ ៨ ឆ្នាំ បានលឺនៅក្នុងភូមិមួយនៅប្រទេសនេប៉ាល់ កាលពីថ្ងៃអាទិត្យ ខណៈសាកសពឪពុកម្តាយនិងបងប្អូនប្រុសពីរនាក់របស់នាងគ្របដោយផ្ទាំងក្រណាត់ នៅក្បែរនាងកំពុងរង់ចាំការបូជា។ភូមិដាច់ស្រយាល Chiuri ជាកន្លែងមួយដែលរងគ្រោះខ្លាំងបំផុត នៅពេលការរញ្ជួយដីកម្រិត ៥,៦ រិចទ័រ បានវាយប្រហារភាគខាងលិចប្រទេសនេប៉ាល់កាលពីល្ងាចថ្ងៃសុក្រ។ភូមិនេះមានលំនៅឋានប្រហែល៤០ខ្នងប៉ុណ្ណោះ ដែលពេលនេះបានបាក់រាបទៅជាគំនរបាក់បែក ឬរងការបំផ្លាញខ្លាំង ហើយពលរដ្ឋចំនួន១៣នាក់បានស្លាប់។ ភូមិ Chiuri គឺជាទីតាំងលំនៅឋានកសិកម្មនៅជ្រលងភ្នំមួយក្នុងស្រុក Jajarkot មានជនរងគ្រោះភាគច្រើនដោយសារការរញ្ជួយដី ក្នុងចំណោមមនុស្សយ៉ាងហោចណាស់ ១៥៧ នាក់ដែលបានស្លាប់។ អ្នកភូមិទាំងមូលចំណាយពេលមួយយប់បន្ទាប់ពីរញ្ជួយដី បានជីករកសាកសពនិងអ្នកនៅរស់រានមានជីវិតចេញពីគំនរបាក់បែកលំនៅឋានរបស់ពួកគេ។ លោក Khumbaya Magar ភ្ញាក់ពីដំណេកដោយសាររញ្ជួយដី ហើយបានរត់ចេញពីលំនៅឋានរបស់គាត់ មុនពេលផ្លូវថ្នល់បានបាក់ ដោយគ្រាន់តែដឹងថាកូនស្រីនិងគ្រួសាររបស់គាត់ បានបាត់ខ្លួន។

ក្រុមអ៊ីស្លាមនិយមប៉ាគីស្ថាននិយាយថា ពួកគេត្រៀមខ្លួន ដើម្បីការពារពលរដ្ឋប៉ាឡេស្ទីន អំឡុងការប្រមូលផ្តុំគ្នា

មនុស្សប្រមាណ១០.០០០ នាក់បានចេញធ្វើបាតកម្មនៅតាមដងផ្លូវនៅរដ្ឋធានី Islamabad ប្រទេសប៉ាគីស្ថាន កាលពីថ្ងៃអាទិត្យ ក្នុងការប្រមូលផ្តុំក្រុមអ៊ីស្លាមនិយម ដែលបានអំពាវនាវឲ្យរដ្ឋាភិបាលដើម្បីអនុញ្ញាតឲ្យពួកគេបានចូលរួមនៅក្នុងជម្លោះរវាងក្រុមហាម៉ាស់ និងអ៊ីស្រាអែល។ បាតុកម្មនេះត្រូវបានរៀបចំឡើងដោយគណបក្ស Tehrik-e-Labaik របស់ប៉ាគីស្ថាន ជាចលនានៃអ្នកដើរតាមព្យាការី ដែលបានស្រែកថា «ខ្ញុំត្រៀមខ្លួនដើម្បីមក ហើយយើងត្រៀមខ្លួនដើម្បីការពារ Al-Aqsa ដោយនិយាយយោងទៅរកព្រះវិហារ Al-Aqsa របស់ទីក្រុងហ្សេរុយសាឡឹម ត្រូវបានចាត់ទុកដោយពលរដ្ឋមូស្លីម ថាជាទីតាំងពិសិដ្ឋបំផុតទី៣ ក្នុងសាសនាអ៊ីស្លាម។ការតវ៉ាបានដើរក្បួនឆ្ពោះទៅកាន់ស្ថានទូតសហរដ្ឋអាមេរិក ប៉ុន្តែបានឈប់ចតប្រហែលក្នុងចម្ងាយកន្លះគីឡូម៉ែត្រពីតំបន់ក្រហម ជាកន្លែងដែលស្ថានទូតមានទីតាំងស្ថិតនៅទីនោះ។នៅចំណុចមួយ ក្រុមអ្នកតវ៉ា បានប្រមូលផ្តុំគ្នានៅលើទង់ជាតិអ៊ីស្រាអែលលាបថ្នាំព័ណ៌ ដែលត្រូវបានគេគិតថាជាទង្វើគ្មានការគោរពចំពោះប្រទេសនោះ។ក្រុម Tehrik-e-Labaik Pakistan គឺជាក្រុមអ៊ីស្លាមនិយមនិកាយស៊ុននីនិយមជ្រុល បានផ្តោតសំខាន់លើការការពារការមើលងាយដ៏ខ្លាំងលើច្បាប់របស់ប្រទេសប៉ាគីស្ថាន និងដាក់ទណ្ឌកម្មលើអ្នកដែលប្រមាថ។

អ្នកការទូតអ៊ីស្រាអែល៖ ក្រុមហាម៉ាសកំពុង«ព្យាយាមពន្យាពេលវេលា» ក្នុងការដោះលែងចំណាប់ថ្នូរ

លោក Michael Herzog ឯកអគ្គរដ្ឋទូតអ៊ីស្រាអែលប្រចាំនៅសហរដ្ឋអាមេរិក បានការពារការតស៊ូរបស់រដ្ឋាភិបាលរបស់លោកចំពោះការផ្អាកការវាយប្រហារជាលក្ខណៈមនុស្សធម៌ ក្នុងសង្គ្រាមប្រឆាំងនឹងក្រុមហាម៉ាស ដោយនិយាយថា វានឹងផ្តល់អត្ថប្រយោជន៍ដល់ក្រុមភេរវកម្ម។សហរដ្ឋអាមេរិក បានគាំទ្រដល់ការផ្អាកបណ្តោះអាសន្ន ក្នុងការប្រយុទ្ធ ដើម្បីធានាការដោះលែងចំណាប់ថ្នូរជាង ២០០នាក់ ដែលក្រុមហាម៉ាស បានចាប់ តាំងពីការវាយប្រហារថ្ងៃទី៧ ខែតុលា។ ប៉ុន្តែនាយករដ្ឋមន្ត្រីអ៊ីស្រាអែល លោក Benjamin Netanyahu បានបដិសេធសំណើទាំងនោះ ដោយនិយាយថា នឹងមិនមានការផ្អាកការវាយប្រហារជាលក្ខណៈមនុស្សធម៌ទេ ប្រសិនបើគ្មានការដោះលែងចំណាប់ថ្នូរទាំងអស់នោះទេ។លោក Herzog បានថ្លែងប្រាប់សារព័ត៌មាន «Face the Nation» កាលពីថ្ងៃអាទិត្យថា អ៊ីស្រាអែលគាំទ្រការផ្អាកមួយ ដែលនឹងអនុញ្ញាតឲ្យមានការដោះលែងចំណាប់ថ្នូរ ប៉ុន្តែបាននិយាយថា ក្រុមហាម៉ាស មិន«ប្រាកដប្រជា» ចំពោះការដោះលែងពួកគេទេ។លោក Herzog បាននិយាយថា៖«យើងកំពុងខិតខំប្រឹងប្រែង ដើម្បីដោះលែងចំណាប់ថ្នូរ»។ «នៅពេលដែលមនុស្សនិយាយអំពីការផ្អាកក្នុងការប្រយុទ្ធគ្នា យើងទាំងអស់គ្នា ត្រូវផ្អាកមួយ ដែលអនុញ្ញាតឲ្យមានការដោះលែងចំណាប់ថ្នូរ ។ ជាអកុសល ... វាមិនមែនជាការចាប់អារម្មណ៍របស់យើងទេ ដែលក្រុមហាម៉ាស យកចិត្តទុកដាក់ក្នុងការដោះលែងពួកគេទាំងអស់នោះ។ ពួកគេ កំពុងព្យាយាមពន្យារពេលវេលា។ ពួកគេកំពុងព្យាយាម បញ្ឈប់ការគាបសង្កត់របស់យើង ហើយបង្រួបបង្រួមខ្លួនពួកគេ ឡើងវិញ»។

បណ្ដាញសង្គម

ព័ត៌មានថ្មីៗ

បាល់ទាត់ពិភពលោក ២០២០៦៖ ព័រទុយហ្គាល់ត្រូវការបង្កើនប្រសិទ្ធភាពប្រយុទ្ធ មុនជួបអ៊ូសបេគីស្ថាន

លោក Vance ថា កិច្ចពិភាក្សាជាមួយមន្ត្រីអ៊ីរ៉ង់បានកំណត់ «មូលដ្ឋានគ្រឹះល្អ» សម្រាប់កិច្ចព្រមព្រៀងបញ្ចប់សង្គ្រាម

អ៊ីរ៉ង់បន្សល់សារសន្តិភាពក្រោយប្រកួតស្មើបែលហ្ស៊ិកក្នុងព្រឹត្តិការណ៍បាល់ទាត់ពិភពលោក

ការតម្រង់ជួរនៅស្ថានីយ៍ប្រេងឥន្ធនៈនៅបូលីវី ខណៈនៅតែបន្តស្ថិតក្រោមស្ថានភាពរដ្ឋក្នុងគ្រាអាសន្ន

២ឆ្នាំ ឆ្លងកាត់ ៣ទ្វីប ៤០ប្រទេស អ្នកជិះកង់កម្ពុជាបានត្រលប់មកដល់ប្រទេសកំណើតដោយសុវត្ថិភាព

មេដឹកនាំកូរ៉េខាងជើង៖ ប្រទេសរបស់លោកនឹងអនុវត្តជំហររបស់ខ្លួនជារដ្ឋនុយក្លេអ៊ែរ

កងទ័ពជើងទឹកអាមេរិក ព្រមានប្រឆាំងឥទ្ធិពលពីខាងក្រៅលើការប្រើប្រាស់ព្រែកជីកប៉ាណាម៉ា

ក្រុមប្រជាធិបតេយ្យនិយាយថា ចំណាត់ការរបស់រដ្ឋបាលលោក Trump លើអ៊ីរ៉ង់មិនស្របនឹងវោហាសាស្ត្ររបស់ខ្លួន

Messi ស៊ុតពីរគ្រាប់បំបែកកំណត់ត្រា World Cup ខណៈអាហ្សង់ទីនកក់កៅអីវគ្គបន្ទាប់

មនុស្ស៣នាក់ស្លាប់ រួមទាំងជនសង្ស័យក្នុងការបាញ់ប្រហារនៅទីក្រុងម៉ុងរ៉េអាល់ ប្រទេសកាណាដា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877