BTV NEWS

សំណុំរឿងថ្មីមួយទៀតពាក់ព័ន្ធឈ្មោះ លី សាម៉េត មនុស្ស ៤នាក់ត្រូវបានចោទប្រកាន់ពីបទសូកប៉ាន់ និងពុករលួយ

គំនរសំរាមនៅផ្លូវចូល ផ្សាររតនាផ្លាហ្សា សង្កាត់ទឹកថ្លា ខណ្ឌសែនសុខ កំពុងជះក្លិនស្អុយប៉ះពាល់ដល់បរិស្ថាន និងពលរដ្ឋ

បុរសម្នាក់បើករថយន្តក្នុងល្បឿនលឿនរ៉េចង្កូតបុករះម៉ូតូ និងរថយន្តជាច្រើនគ្រឿង បង្កឲ្យរងរបួសមនុស្ស ៤នាក់

ករណីក្រុមក្មេងទំនើងបង្កហិង្សា បណ្តាលឱ្យមនុស្សស្លាប់ និងរងរបួស តុលាការសម្រេចចោទប្រកាន់០៤បទល្មើស

សន្តិសុខ និង សង្គម

អ៊ីស្រាអែល ចោទអាហ្វ្រិកខាងត្បូង ថាបានធ្វើការអះអាងមិនពិតក្នុងបណ្ដឹងប្រល័យពូជសាសន៍ ICJ

ក្រសួងការបរទេសរបស់អ៊ីស្រាអែល បាននិយាយថា អាហ្រ្វិកខាងត្បូងកំពុង «បង្ហាញការអះអាងលំអៀង និងមិនពិត» ដែល «ពឹងផ្អែកលើប្រភពក្រុមហាម៉ាស ដែលមិនគួរឱ្យទុកចិត្ត» ក្នុងការឆ្លើយតបទៅនឹងសំណុំរឿងដែលបានដាក់ទៅកាន់តុលាការកំពូលរបស់អង្គការសហប្រជាជាតិ ដោយចោទប្រកាន់អ៊ីស្រាអែល ពីបទប្រល័យពូជសាសន៍កាលពីថ្ងៃព្រហស្បតិ៍ (១៦ ឧសភា)។សេចក្តីថ្លែងការណ៍របស់ក្រសួងនេះបាននិយាយថា «អ៊ីស្រាអែល ធ្វើសកម្មភាពស្របតាមច្បាប់អន្តរជាតិ និងកាតព្វកិច្ចមនុស្សធម៌ ខណៈពេលដែលកំពុងអនុវត្តវិធានការកាត់បន្ថយគ្រោះថ្នាក់ដល់ជនស៊ីវិល និងគ្រឿងបរិក្ខារស៊ីវិល»។ក្រសួងនេះបានអំពាវនាវដល់តុលាការយុត្តិធម៌អន្តរជាតិ ដែលត្រូវបានគេស្គាល់ថាជាតុលាការយុត្តិធម៌អន្តរជាតិ (ICJ) «ឱ្យបដិសេធការអំពាវនាវរបស់អាហ្រ្វិកខាងត្បូង និងបញ្ចប់ការរំលោភលើតុលាការ»។ អាហ្រ្វិកខាងត្បូង បានជំរុញឱ្យតុលាការពិភពលោកនេះបញ្ជាឱ្យអ៊ីស្រាអែល បញ្ឈប់ការវាយប្រហាររបស់ខ្លួនលើក្រុងរ៉ាហ្វា ជាផ្នែកនៃសំណុំរឿងរបស់ខ្លួនដែលចោទប្រកាន់អ៊ីស្រាអែល ពីបទប្រល័យពូជសាសន៍ប្រឆាំងនឹងប៉ាឡេស្ទីន។អាហ្រ្វិកខាងត្បូងបានប្រាប់តុលាការនៅទីក្រុងឡាអេ កាលពីថ្ងៃព្រហស្បតិ៍ថា ប្រជាជនប៉ាឡេស្ទីនកំពុងប្រឈមនឹង «ការបំផ្លិចបំផ្លាញកំពុងបន្ត» ហើយការវាយលុកលើក្រុងរ៉ាហ្វា គឺជា «ផ្នែកនៃចុងបញ្ចប់ដែលហ្កាហ្សា ត្រូវបានបំផ្លាញទាំងស្រុង»៕

មានការប្រយុទ្ធគ្នាយ៉ាងខ្លាំងនៅអ៊ុយក្រែន ខណៈកងកម្លាំងរុស្ស៊ី រុលចូលទៅក្នុងតំបន់ ខាគីវ

ជនស៊ីវិលអ៊ុយក្រែនរាប់ពាន់នាក់ ត្រូវបានបង្ខំឱ្យជម្លៀសចេញពីការប្រយុទ្ធគ្នាដ៏កក្រើកនៅភាគឦសានរបស់ប្រទេសនេះ។ អ៊ុយក្រែន បាននិយាយកាលពីថ្ងៃព្រហស្បតិ៍ទី១៦ឧសភា សប្ដាហ៍នេះ ថា កងកម្លាំងរបស់ខ្លួន កំពុងប្រយុទ្ធប្រឆាំងការវាយលុករបស់រុស្ស៊ីកាន់តែខ្លាំង នៅក្នុងតំបន់ ខាគីវ (Kharkiv) ។ កងទ័ពរបស់ទីក្រុងមូស្គូ ត្រូវបានគេរាយការណ៍ថាបានវាយប្រហារលើទីតាំងមួយចំនួនរបស់អ៊ុយក្រែននៅក្នុងស្រុកនានាភាគខាងជើងទីក្រុង វៅចាន់ស៍(Vovchansk) ដែលមានចម្ងាយប្រហែល ៥ គីឡូម៉ែត្រពីព្រំដែនរុស្ស៊ី ទោះបីជាទីក្រុង Kyiv បាននិយាយថា ខ្លួនកំពុងរារាំងការសម្រុករុលចូលទៅមុខក៏ដោយ។ អគ្គសេនាធិការនៃកងកម្លាំងប្រដាប់អាវុធអ៊ុយក្រែន បានសរសេរនៅលើបណ្ដាញសង្គម Facebook ថា កងកម្លាំងការពារអ៊ុយក្រែន បានចាត់វិធានការយ៉ាងម៉ឺងម៉ាត់ដើម្បីកាត់បន្ថយសកម្មភាពរបស់កងទ័ពរុស្ស៊ីយ៉ាងច្រើន ។ ប្រទេសរុស្ស៊ីបានចាប់ផ្តើមប្រតិបត្តិការនៅក្នុងតំបន់ភាគឦសានកាលពីសប្តាហ៍មុន ដែលជាការលុកលុយតាមព្រំដែនដ៏សំខាន់បំផុតរបស់ខ្លួន ចាប់តាំងពីការលុកលុយពេញបន្ទុក បានចាប់ផ្តើមកាលពីដើមឆ្នាំ២០២២មក ។ ការវាយរុលទៅមុខនេះ បានបង្ខំឱ្យកងទ័ពដែលនៅសេសសល់របស់ទីក្រុង Kyiv ប្រមូលផ្តុំគ្នាពង្រឹងកម្លាំង ដោយសហរដ្ឋអាមេរិកបានសន្យាផ្តល់ជំនួយយោធាបន្ថែមទៀតកាលពីថ្ងៃពុធសប្ដាហ៍នេះ។ ប្រធានាធិបតីអ៊ុយក្រែនលោក Volodymr Zelenskyy បានសម្រេចចិត្តបញ្ឈប់ការធ្វើដំណើរទស្សនកិច្ចដែលបានគ្រោងទុកទៅកាន់ប្រទេសព័រទុយហ្គាល់ និងអេស្ប៉ាញនៅចុងសប្តាហ៍នេះ ដើម្បីដោះស្រាយវិបត្តិ ដោយបានគូសបញ្ជាក់ពីភាពធ្ងន់ធ្ងរនៃការគំរាមកំហែងដល់ទាហានរបស់លោកនៅសមរភូមិ ខណៈលោកបានទៅកាន់ភាគឦសានទីក្រុងខាគីវ និងសួរសុខទុក្ខទាហានដែលរងរបួស៕

ទឹកជំនន់ធ្ងន់ធ្ងរបន្តវាយប្រហារប្រទេសកេនយ៉ា ខណៈអ្នកស្លាប់ឡើងជិត ៣០០ នាក់

អាជ្ញាធរគ្រប់គ្រងគ្រោះរាំងស្ងួតជាតិ (NDMA) របស់កេនយ៉ា បាននិយាយកាលពីថ្ងៃពុធ (១៥ ឧសភា) ថាភ្លៀងធ្លាក់ខ្លាំងបានធ្វើឱ្យស្រុកចំនួន ២៣ នៅតំបន់ស្ងួតហួតហែង និងតំបន់ពាក់កណ្តាលស្ងួតរបស់ប្រទេសកេនយ៉ា (ASAL) ដែលជាធម្មតាងាយប្រឈមនឹងគ្រោះរាំងស្ងួត ស្ថិតក្នុងទឹកជំនន់ធ្ងន់ធ្ងរ ខណៈចំនួនអ្នកស្លាប់សរុបឡើងជិតដល់ ៣០០ នាក់។អាជ្ញាធរគ្រោះរាំងស្ងួត NDMA នេះ បាននិយាយនៅក្នុងរបាយការណ៍ចុងក្រោយរបស់ខ្លួនថា តំបន់ដែលបានងើបឡើងវិញទាំងស្រុងពីគ្រោះរាំងស្ងួតនាពេលថ្មីៗនេះ ឥឡូវនេះកំពុងប្រឈមមុខនឹងទឹកជំនន់ ហើយគ្រោះធម្មជាតិយ៉ាងទូលំទូលាយនេះបានធ្វើឱ្យខូចសន្តិសុខស្បៀងនៅក្នុងតំបន់ទាំងនោះ។នៅក្នុងខែមីនា អាជ្ញាធរ NDMA បាននិយាយថាចំនួនមនុស្សដែលត្រូវការជំនួយស្បៀងអាហារនៅក្នុងប្រទេសកេនយ៉ា មានចំនួន ២ លាននាក់ ហើយតួលេខនេះនឹងកើនឡើងដោយសារតែការរំខានដែលបណ្តាលមកពីភ្លៀងធ្លាក់ខ្លាំង។ យោងតាមរដ្ឋាភិបាលកេនយ៉ា មនុស្សយ៉ាងហោចណាស់ ២៨៩ នាក់ត្រូវបានសម្លាប់ មនុស្ស ១៨៨ នាក់បានរងរបួស និង ២៨៥.៦០០ នាក់ត្រូវបានជម្លៀសចេញ ខណៈមនុស្ស ៤១២.៣៣៦ នាក់ផ្សេងទៀតបានរងផលប៉ះពាល់ដោយអាកាសធាតុធ្ងន់ធ្ងរ។យោងតាមនាយកដ្ឋានឧតុនិយមកេនយ៉ា បានឱ្យដឹងថា តំបន់មួយចំនួនទទួលបានភ្លៀងរហូតដល់ ២០០ មីលីម៉ែត្រក្នុងមួយថ្ងៃ ដោយសារបម្រែបម្រួលអាកាសធាតុផ្លាស់ប្តូរគំរូអាកាសធាតុនៅក្នុងប្រទេសអាហ្វ្រិកខាងកើតមួយនេះ ដែលធ្វើឱ្យតំបន់ដីស្ងួតទទួលបានទឹកភ្លៀងច្រើនបំផុត៕

មន្ត្រីអង្គការសហប្រជាជាតិ ព្រមានពីគ្រោះទុរ្ភិក្សនៅក្នុងប្រទេសស៊ូដង់

មន្ត្រីជាន់ខ្ពស់នៃកម្មវិធីស្បៀងអាហារពិភពលោករបស់អង្គការសហប្រជាជាតិ (WFP) លោក ខាល ស្កាវ (Carl Skau) កាលពីថ្ងៃពុធ (១៥ ឧសភា) បានព្រមានថា ឱកាសដើម្បីជួយសង្គ្រោះជីវិតមនុស្សនៅក្នុងប្រទេសស៊ូដង់កំពុងជិតអស់ ខណៈដែលទុរ្ភិក្សកំពុងកើតមាននៅក្នុងបណ្ដាតំបន់ដែលហែកហួរដោយសង្រ្គាមរបស់ប្រទេសនេះ។យ៉ាងហោចណាស់មនុស្ស ៥ លាននាក់នៅក្នុងប្រទេសស៊ូដង់ កំពុងធ្លាក់ក្នុងភាពអត់ឃ្លាន ដែលភាគច្រើននៃអ្នកទាំងនោះនៅក្នុងតំបន់ដែលរងផលប៉ះពាល់ដោយជម្លោះ ដែលបានផ្ទុះឡើងកាលពីខែមេសា ឆ្នាំមុន រួមទាំងតំបន់ ដាហ្វឺ (Darfur) និងតំបន់ ខូដូហ្វាន (Kordofan) និងរដ្ឋធានី ខាទុម (Khartoum) នេះបើយោងតាមកម្មវិធីស្បៀងអាហារ WFP ។ទីភ្នាក់ងារនេះបានព្រមានម្តងហើយម្តងទៀតថា ស៊ូដង់អាចប្រឈមមុខនឹងវិបត្តិអត់ឃ្លានដ៏អាក្រក់បំផុតរបស់ពិភពលោក ខណៈដែលជម្លោះបានឈានចូលដល់ឆ្នាំទីពីររបស់ខ្លួន។ យោងតាមអង្គការសហប្រជាជាតិ ពាក់កណ្តាលនៃចំនួនប្រជាជនស៊ូដង់ ឬប្រហែល ២៥ លាននាក់ ត្រូវការជំនួយមនុស្សធម៌ និងការការពារ ខណៈដែលជិត ១៨ លាននាក់ប្រឈមមុខនឹងអសន្តិសុខស្បៀងធ្ងន់ធ្ងរ។ស៊ូដង់បាននិងកំពុងឃើញការប៉ះទង្គិចគ្នាយ៉ាងបង្ហូរឈាមរវាងកងកម្លាំងប្រដាប់អាវុធស៊ូដង់ និងកងកម្លាំងគាំទ្ររហ័សយោធាប៉ារ៉ា ចាប់តាំងពីថ្ងៃទី១៥ ខែមេសា ឆ្នាំ២០២៣ ដែលបានសម្លាប់មនុស្ស ១៥.៥៥០ នាក់ និងជម្លៀសមនុស្ស ៨,៧ លាននាក់ទៀតមកទល់ពេលនេះ នេះបើយោងតាមការប៉ាន់ស្មានថ្មីៗរបស់ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌៕

ប្រជាជនហ្ស៊កហ្ស៊ី ប្រតិកម្មចំពោះការបញ្ឈប់ដែលអាចកើតមានចំពោះសមាហរណកម្មសហភាពអឺរ៉ុប

សហភាពអឺរ៉ុបកាលពីថ្ងៃពុធ បានជំរុញឱ្យប្រទេសហ្សកហ្ស៊ី ដកសេចក្តីស្នើច្បាប់ «ភ្នាក់ងារបរទេស» ដែលមានភាពចម្រូងចម្រាស់ខ្លាំង ដោយនិយាយថា វិធានការនេះនឹងកំណត់ឡើងវិញនូវបំណងប្រាថ្នារបស់ប្រទេសនេះ ក្នុងការចូលរួមក្នុងប្លុកអឺរ៉ុប ខណៈការតវ៉ាប្រឆាំងច្បាប់នេះ បានបន្តចូលក្នុងវិបត្តិនយោបាយ។ សភារបស់ប្រទេសហ្សកហ្ស៊ី កាលពីថ្ងៃអង្គារ បានអនុម័តអំណានលើកទីបីនិងលើកចុងក្រោយនៃសេចក្តីស្នើច្បាប់ ដែលនឹងតម្រូវឱ្យអង្គការនានាទទួលមូលនិធីច្រើនជាង២០ភាគរយពីបរទេស នឹងត្រូវចុះឈ្មោះជាភ្នាក់ងារបរទេស ដោយដាក់លក្ខខណ្ឌតម្រូវឱ្យបង្ហាញព័ត៌មាន និងពិន័យជាប្រាក់សម្រាប់ការបំពាន។សេចក្តីថ្លែងការណ៍ពីប្រធានគោលនយោបាយការបរទេសសហភាពអឺរ៉ុប លោក Josep Borrell និងគណៈកម្មាធិការអឺរ៉ុប ដែលជាស្ថាប័នប្រតិបត្តិរបស់ប្លុកអឺរ៉ុប បាននិយាយថា ការអនុម័តច្បាប់នេះ នឹងធ្វើឲ្យប៉ះពាល់អវិជ្ជមានដល់វឌ្ឍនភាពរបស់ប្រទេសហ្ស៊កហ្ស៊ី លើមាគ៌ាសមាហរណកម្មសហភាពអឺរ៉ុប។ ជម្រើសនេះស្ថិតនៅក្នុងដៃរបស់ប្រទេសហ្ស៊កហ្ស៊ី យើងជំរុញឲ្យអាជ្ញាធរប្រទេស ដកច្បាប់នេះចេញ។រដ្ឋាភិបាលប្រទេសហ្ស៊កហ្ស៊ី បាននិយាយថា ច្បាប់នេះគឺចាំបាច់ដើម្បីធានាបាននូវតម្លាភាពនៃការផ្តល់មូលនិធិពីបរទេស សម្រាប់អង្គការក្រៅរដ្ឋាភិបាល។ កាលពីថ្ងៃពុធ ក្រុមបាតុកររាប់ពាន់នាក់ដែលប្រឆាំងច្បាប់នេះ បានបិទផ្លូវប្រសព្វសំខាន់ៗនៅទូទាំងទីក្រុងប៊ីលីស៊ី(Tbilisi) ដែលនាំឱ្យចរាចរណ៍ត្រូវផ្អាកភាគច្រើននៅទីក្រុង។ ក្រសួងមហាផ្ទៃរបស់ប្រទេសហ្ស៊កហ្ស៊ី បាននិយាយថាបុរសម្នាក់ត្រូវបានចាប់ខ្លួនពីបទវាយប្រហារនគរបាលក្នុងអំឡុងពេលការតវ៉ា។

បាតុកម្មជុំវិញពិភពលោក ក្នុងខួបលើកទី៧៦នៃទិវាNakba និងអំពាវនាវឲ្យមានបទឈប់បាញ់នៅហ្កាហ្សា

មានការតវ៉ាជាច្រើន ដើម្បីរំលឹកខួបលើកទី៧៦ នៃទិវា Nakba និងការអំពាវនាវឱ្យមានបទឈប់បាញ់នៅតំបន់ហ្កាហ្សា ដែលត្រូវបានគេមើលឃើញនៅជុំវិញពិភពលោក។ ទិវា Nakba ដែលមានន័យជាភាសាអារ៉ាប់ថា«មហន្តរាយ» ដែលនិយាយយោងទៅរកការជម្លៀសប្រជាជនប៉ាឡេស្ទីនដោយបង្ខំ ប្រមាណ៧៥០.០០០នាក់ ពីលំនៅឋានរបស់ពួកគេ ក្នុងការត្រៀមរៀបចំសម្រាប់ការបង្កើតអ៊ីស្រអែល ក្នុងឆ្នាំ១៩៤៨។ យោងតាមអង្គការសហប្រជាជាតិ បានឲ្យដឹងថា អំឡុងសង្គ្រាមអារ៉ាប់-អ៊ីស្រាអែលឆ្នាំ១៩៤៨ កងជីវពលជនជាតិជ្វីហ្វមួយចំនួន បានសម្លាប់ជនស៊ីវិលប៉ាឡេស្ទីនយ៉ាងច្រើន ហើយមនុស្សរាប់សែននាក់ ត្រូវបានបង្ខំឱ្យភៀសខ្លួនចេញពីលំនៅឋានរបស់ពួកគេ ។ ទោះបីជា ទិវា Nakba មិនត្រូវបានគេជឿថាបានកើតឡើងតែមួយថ្ងៃក៏ដោយ វាត្រូវបានប្រារព្ធយ៉ាងទូលំទូលាយនៅថ្ងៃទី ១៥ ខែឧសភា។ ឆ្នាំនេះ ទិវា Nakba ធ្វើឡើងក្នុងពេលមានសង្គ្រាមរបស់អ៊ីស្រាអែលនៅតំបន់ហ្កាហ្សា ដែលបានសម្លាប់ជនជាតិប៉ាឡេស្ទីនជាង ៣៥.០០០នាក់ នេះបើយោងតាមមន្ត្រីសុខាភិបាលតំបន់។ កាលពីសប្តាហ៍មុន កងទ័ពអ៊ីស្រាអែល បានព្រងើយកន្តើយទៅនឹងការព្រមានរបស់សហរដ្ឋអាមេរិក ហើយបានបញ្ជាឱ្យមនុស្សប្រហែល ១០០.០០០នាក់ ជម្លៀសខ្លួនចេញពីទីក្រុង Rafah ជាកន្លែងដែលមនុស្សជាច្រើនរស់នៅក្នុងតំបន់ហ្កាហ្សា បានភៀសខ្លួនចូលទៅក្នុងទីក្រុងនេះ រយៈពេល៧ខែនៃសង្រ្គាម។ ប្រជាជនប៉ាឡេស្ទីន ដែលត្រូវបានបង្ខំឱ្យចាកចេញពីលំនៅឋាន ភ័យខ្លាចថាត្រូវបានគេ បណ្តេញចេញពីទឹកដីជាអចិន្ត្រៃយ៍ ដូចសាច់ញាតិពួកគេជាច្រើននាក់ កាលពីឆ្នាំ ១៩៤៨។កាលពីចុងសប្តាហ៍ ហ្វូងមនុស្ស បានមកប្រមូលផ្តុំគ្នានៅក្នុងទីក្រុងនានានៅជុំវិញពិភពលោក រួមទាំងនៅសហរដ្ឋអាមេរិក ចក្រភពអង់គ្លេស ហូឡង់ អូស្ត្រាលី នូវែលហ្សេឡង់ កាណាដា និងប្រទេសអៀរឡង់។ ក្រុមបាតុករ បានចេញធ្វើបាតុកម្មដោយកាន់ទង់ជាតិប៉ាឡេស្ទីន និងស្លាក អំពាវនាវឱ្យមានបទឈប់បាញ់នៅតំបន់ហ្កាហ្សា ព្រមទាំងពាក្យសរសេរថា «សិទ្ធិពលរដ្ឋប៉ាឡេស្ទីនភៀសខ្លួន ត្រឡប់ទៅលំនៅឋានរបស់ពួកគេវិញ»។ ការតវ៉ាបន្ថែមទៀត នៅក្នុងប្រទេសជាច្រើនទៀត ដូចជា ដែនដីវ៉ែល ប្រទេសអាល្លឺម៉ង់ និងបែលហ្ស៊ិក ក៏មានផែនការការរៀបចំធ្វើបាតុកម្មនៅសប្តាហ៍នេះ។

ចំនួនអ្នកស្លាប់ក្នុងជំនន់កម្អែភ្នំភ្លើងនៅឥណ្ឌូនេស៊ី បានកើនឡើងដល់៦៧នាក់ និង២០នាក់បាត់ខ្លួន

មន្ត្រីទីភ្នាក់ងារគ្រោះមហន្តរាយជាន់ខ្ពស់របស់ប្រទេសឥណ្ឌូនេស៊ី បានប្រកាសកាលពីថ្ងៃពុធទី១៥ឧសភា ថា ចំនួនអ្នកស្លាប់ដោយសារទឹកជំនន់ និងជំនន់កម្អែភ្នំភ្លើងត្រជាក់នៅក្នុងខេត្តស៊ូម៉ាត្រា ខាងលិច(West Sumatra)របស់ប្រទេសនេះ បានកើនឡើងដល់ ៦៧ នាក់ ហើយមនុស្ស ២០ នាក់នៅតែបាត់ខ្លួន។ លោក ស៊ូហារីយ៉ាន់តូ (Suharyanto) ប្រធានទីភ្នាក់ងារគ្រប់គ្រង និងកាត់បន្ថយគ្រោះមហន្តរាយជាតិ បាននិយាយថា ទាហាន និងនគរបាល ត្រូវបានបញ្ជូនទៅកាន់តំបន់រងគ្រោះ ដើម្បីជួយជម្លៀសប្រជាពលរដ្ឋ និងស្វែងរកជនរងគ្រោះ។លោកបានប្រាប់ក្រុមអ្នកព័ត៌មាន បន្ទាប់ពីកិច្ចប្រជុំជាមួយប្រជាពលរដ្ឋក្នុងតំបន់ ថា គ្រឿងចក្រធុនធ្ងន់ត្រូវបានបញ្ជូនទៅជួយសម្អាតកម្ទេចកម្ទី រួមមាន សំណល់ សំណាត់ឈើ ថ្ម និងល្បាប់ដែលបណ្តាល មកពីជំនន់កម្អែភ្នំភ្លើង។ លោកបានបន្តថា ទីភ្នាក់ងារនេះ កំពុងពិចារណាអំពីការផ្លាស់ទីលំនៅ ជាដំណោះស្រាយមួយដើម្បីទប់ស្កាត់ការកើតឡើងវិញនៃផលវិបាកដ៏សោកនាដកម្មនៃគ្រោះមហន្តរាយស្រដៀងគ្នានេះនៅពេលអនាគត។ លោក ស៊ូហារីយ៉ានតូ បាននិយាយថា ការវាយតម្លៃមួយត្រូវបានធ្វើឡើង ដោយបន្ថែមថា រដ្ឋបាលក្នុងតំបន់នឹងបែងចែកដីធ្លី ប្រសិនបើការផ្លាស់ទីលំនៅត្រូវធ្វើឡើងមែននោះ។ យោងតាមក្រុមអ្នកជំនាញឲ្យដឹងថា គ្រោះមហន្តរាយ ដែលបានកើតឡើងកាលពីយប់ថ្ងៃសៅរ៍សប្ដាហ៍មុន គឺជាការកើតឡើងវិញនៃគ្រោះធម្មជាតិស្រដៀងគ្នា ដែលបានកើតឡើងប្រហែល ៤៥ ឆ្នាំមុននៅក្នុងតំបន់ដូចគ្នាទាំងនេះ ៕

មនុស្សរាប់ពាន់នាក់ បន្តជម្លៀសខ្លួនចេញពីលំនៅឋាននៅកាណាដា ដោយការគំរាមកំហែងចំហេះព្រៃ

ប្រជាជននៅទីក្រុង ហ្វត មុកម័រី(Fort McMurray) ប្រទេសកាណាដា ភាគខាងជើង បានចេញមកឈរពាសពេញផ្លូវ ក្នុងការព្យាយាមដើម្បីគេចចេញពីចំហេះព្រៃ ដែលកាន់តែខិតជិតមកដល់ កាលពីពេលយប់។ មនុស្សជាច្រើន នៅក្នុងតំបន់បានរាយការណ៍ថាតំបន់នេះមានពន្លឺពណ៌ទឹកក្រូច និងធំក្លិនផ្សែងខ្លាំង ខណៈបានមកអង្គុយជាច្រើនម៉ោង ដើម្បីស្តាប់ការជូនដំណឹងរបស់អាជ្ញាធរតំបន់អំពីការជម្លៀសខ្លួនចេញ។ក្រុមមន្ត្រី បាននិយាយកាលពីថ្ងៃពុធថា ខ្យល់អំណោយផល ត្រូវបានគេរំពឹងថានឹងរុញច្រានចំហេះព្រៃព្រៃដ៏ធំ ចេញពីវាលខ្សាច់ប្រេងនៅទីក្រុង ហ្វត មុកម័រី (Fort McMurray) របស់ប្រទេសកាណាដា ខណៈមនុស្សជាង៦ពាន់នាក់ បានជម្លៀសខ្លួនចេញពីលំនៅឋាន។ចំហេះព្រៃ ដែលហួសពីការគ្រប់គ្រង បានកើនឡើងពេញមួយយប់ និងរហូតដល់នៅពេលព្រឹកព្រលឹមដែលមានចម្ងាយត្រឹមតែ ៥,៥ គីឡូម៉ែត្រ ពីកន្លែងចាក់សំរាមនៅទីក្រុង ដែលលាតសន្ធឹងនៅជាយក្រុងនៅភាគអាគ្នេយ៍។ទីក្រុង Fort McMurray គឺជាមជ្ឈមណ្ឌលសម្រាប់ទិន្នផលវាលខ្សាច់ប្រេងរបស់ប្រទេសកាណាដា។គួរំលឹកថា ចំហេះព្រៃដ៏ធំ កាលពីឆ្នាំ២០១៦ បានបង្ខំឱ្យមានការជម្លៀសប្រជាជនចំនួន ៩០.០០០ នាក់ និងបានឆេះបំផ្លាញអគារប្រហែល ២.៤០០ខ្នង និងបានបិទទិន្នផលប្រេងក្នុងបរិមាណជាង១ លានបារ៉ែល ក្នុងមួយថ្ងៃ។

ក្រុមបាតុករគាំទ្រប៉ាឡេស្ទីន ចូលកាន់កាប់បណ្ណាល័យសាកលវិទ្យាល័យ UCI និងបង្កើតជំរំ

ក្រុមបាតុករគាំទ្រប៉ាឡេស្ទីន បានចូលកាន់កាប់បណ្ណាល័យនៅសាកលវិទ្យាល័យ កាលីហ្វនីញ៉ា អឺវីន(California Irvine) និងបានបោះជំរំតវ៉ា កាលពីថ្ងៃពុធ។ វីដេអូ បានបង្ហាញកងកម្លាំងនគរបាល មកដល់បរិវេណសាកលវិទ្យាល័យ ខណៈនិស្សិតកំពុងកាន់ទង់ជាតិប៉ាឡេស្ទីន និងស្លាកពាក្យស្លោក អំពាវនាវឱ្យសាកលវិទ្យាល័យដកខ្លួនចេញពីទំនាក់ទំនងរបស់ខ្លួនជាមួយ ប្រទេសអ៊ីស្រាអែល។ការតវ៉ារបស់និស្សិត ជុំវិញសង្គ្រាមនៅតំបន់ហ្កាហ្សា បានរាលដាលនៅសហរដ្ឋអាមេរិក កាលពីប៉ុន្មានសប្តាហ៍កន្លងទៅនេះ ដោយនគរបាល បានបោសសម្អាតជំរំជាច្រើនកន្លែង បន្ទាប់ពីការប្រឈមមុខដាក់គ្នារវាងក្រុមបាតុករ និងក្រុមអ្នកតវ៉ាប្រឆាំង។ជំរំតង់ដែលត្រូវបានបង្កើតឡើងក្នុងពេលតវ៉ា ត្រូវបានរុះរើបន្ទាប់ពីសាកលវិទ្យាល័យ បានយល់ព្រមចំពោះការទាមទាររបស់ក្រុមអ្នកតវ៉ា ខណៈបាតុកម្មមួយចំនួនទៀត នៅបន្ត។ការតវ៉ាប្រឆាំងនៅក្នុងបរិវេណសាកលវិទ្យាល័យ ត្រូវបានដឹកនាំដោយក្រុមជនជាតិអាមេរិក-អ៊ីស្រាអែល និងក្រុមចលនាជាតិនិយមជ្វីហ្វ ព្រមទាំងនិស្សិត និងសមាជិកសហគមន៍ជនជាតិជ្វីហ្វ-អាមេរិក។

ប្រតិកម្មភ្ញាក់ផ្អើលរបស់ពិភពលោកចំពោះការបាញ់ប្រហារលើនាយករដ្ឋមន្ត្រីស្លូវ៉ាគី លោក Robert Fico

ការិយាល័យរដ្ឋាភិបាលបាននិយាយថា នាយករដ្ឋមន្ត្រីស្លូវ៉ាគី លោក រ៉ូប៊ឺត ហ្វីកូ (Robert Fico) បានរងរបួសដែលគំរាមកំហែងដល់អាយុជីវិត នៅពេលដែលលោកត្រូវបានគេបាញ់ និងរងរបួសនៅក្នុងការប៉ុនប៉ងធ្វើឃាតកាលពីថ្ងៃពុធ (១៥ ឧសភា)។ ការប៉ុនប៉ងធ្វើឃាតនេះបង្កជាប្រតិកម្មយ៉ាងភ្ញាក់ផ្អើលក្នុងចំណោមមេដឹកនាំពិភពលោក។ប្រធានាធិបតីសហរដ្ឋអាមេរិក លោក ចូ បៃដិន (Joe Biden) និយាយថា «ខ្ញុំបារម្ភយ៉ាងខ្លាំងពេលបានដឹងពីរបាយការណ៍នៃការវាយប្រហារលើនាយករដ្ឋមន្រ្តីស្លូវ៉ាគី រ៉ូប៊ឺត ហ្វីកូ។ យើងថ្កោលទោសចំពោះអំពើហិង្សាដ៏អាក្រក់នេះ។ ស្ថានទូតរបស់យើងកំពុងទាក់ទងយ៉ាងជិតស្និទ្ធជាមួយរដ្ឋាភិបាលស្លូវ៉ាគី ហើយត្រៀមខ្លួនជាស្រេចដើម្បីជួយ»។ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) បាននិយាយក្នុងសារទៅកាន់ប្រធានាធិបតីស្លូវ៉ាគី ថា «មិនអាចមានហេតុផលសមស្របសម្រាប់ឧក្រិដ្ឋកម្មដ៏ឃោរឃៅនេះទេ។ ខ្ញុំដឹងថាលោក ហ្វីកូ ជាបុរសក្លាហាន និងមានស្មារតីរឹងមាំ ហើយគុណសម្បត្តិទាំងនេះនឹងជួយលោកឱ្យរួចផុតពីស្ថានភាពដ៏លំបាកនេះ»។ប្រធានគណៈកម្មាធិការអឺរ៉ុប លោកស្រី អឺស៊ូឡា វ៉ុនឌើលេយ៉េន (Ursula Von Der Leyen) លើកឡើងថា «អំពើហិង្សាបែបនេះមិនត្រូវកើតឡើងនៅក្នុងសង្គមរបស់យើងឡើយ និងធ្វើឱ្យខូចដល់លទ្ធិប្រជាធិបតេយ្យ ដែលជាផលប្រយោជន៍រួមដ៏មានតម្លៃបំផុតរបស់យើង។ ខ្ញុំសង្ឃឹមថាលោក ហ្វីកូ និងគ្រួសារ ឆ្លងផុតពីស្ថានភាពដ៏លំបាកនេះ»។ក៏មានមេដឹកនាំកំពូលៗជាច្រើនទៀតនៅជុំវិញពិភពលោក ដែលបង្ហាញពីការបួងសួងរបស់ពួកគេចំពោះលោក ហ្វីកូ រួមមានមេដឹកនាំមកពីប្រទេសអាល្លឺម៉ង់ អ៊ុយក្រែន ហុងគ្រី ប៉ូឡូញ អង់គ្លេស អង្គការណាតូ និងប្រទេសជាច្រើនទៀត។ មេដឹកនាំទាំងនោះមានការភ្ញាក់ផ្អើលយ៉ាងខ្លាំងចំពោះព័ត៌មាននេះ ហើយថ្កោលទោសយ៉ាងដាច់អហង្ការចំពោះការវាយប្រហារដ៏គួរឱ្យភ័យខ្លាច ទង្វើមិនអាចទទួលយកបាន និងព្រៃផ្សៃនៃហិង្សានយោបាយលើលោកនាយករដ្ឋមន្ត្រីស្លូវ៉ាគីរូបនេះ៕

បណ្ដាញសង្គម

ព័ត៌មានថ្មីៗ

ក្រសួងប្រៃសណីយ៍ ប្រកាសជ័យលាភី "ពានរង្វាន់ឌីជីថលកម្ពុជាឆ្នាំ២០២៤"

ឱកាសការងារជិត ៥០០កន្លែង ត្រៀមដាក់តាំងបង្ហាញក្នុងវេទិកាការងារនៅខេត្តស្វាយរៀងថ្ងៃសៅរស្អែកនេះ

កម្ពុជា និងភាគីចិន បន្តពង្រីកកិច្ចសហប្រតិបត្តិការក្នុងវិស័យ TVET ដើម្បីលើកកម្ពស់ឲ្យកាន់តែប្រសើរនៅកម្ពុជា

មន្រ្តីជាន់ខ្ពស់ក្រសួងអភិវឌ្ឍន៍ជនបទ កោតសរសើរដល់នាយកដ្ឋានវិស្វកម្ម ស្ថាបនាផ្លូវបានល្អប្រសើរ

ពលរដ្ឋលីបង់នៅទីក្រុង Tyre បង្ហាញការខឹងសម្បារ និងភាពក្រៀមក្រំចំពោះការបំផ្លិចបំផ្លាញពីការវាយប្រហាររបស់អ៊ីស្រាអែល

ក្រុមបាតុករនាំគ្នាតវ៉ានៅប្រទេសហ្សកដានី ដើម្បីបង្ហាញសាមគ្គីភាពជាមួយជនប៉ាឡេស្ទីននៅតំបន់ហ្កាហ្សា

មេបញ្ជាការជាន់ខ្ពស់របស់អ៊ុយក្រែនប្តេជ្ញាពង្រឹងទ័ពនៅសមរភូមិជួរមុខភាគខាងកើត ក្រោយទៅកាន់ទីនោះ

អគ្គស្នងការនគរបាលជាតិអាហ្វ្រិកខាងត្បូង សន្យាទប់ស្កាត់ការជីករ៉ែខុសច្បាប់

ប្រភព៖ រដ្ឋមន្ត្រីការពារជាតិអាល្លឺម៉ង់ ស្វែងរកកិច្ចព្រមព្រៀង ៤,៧ពាន់លានអឺរ៉ូ ដើម្បីទិញនាវាមុជទឹក ៤គ្រឿង

ក្រសួងអភិវឌ្ឍន៍ជនបទ កំពុងប្រែក្លាយផ្លូវដី ទៅជាផ្លូវកៅស៊ូ ឬបេតុងដើម្បីលើកកម្ពស់សហគមន៍មូលដ្ឋាន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877