BTV NEWS

សំណុំរឿងថ្មីមួយទៀតពាក់ព័ន្ធឈ្មោះ លី សាម៉េត មនុស្ស ៤នាក់ត្រូវបានចោទប្រកាន់ពីបទសូកប៉ាន់ និងពុករលួយ

គំនរសំរាមនៅផ្លូវចូល ផ្សាររតនាផ្លាហ្សា សង្កាត់ទឹកថ្លា ខណ្ឌសែនសុខ កំពុងជះក្លិនស្អុយប៉ះពាល់ដល់បរិស្ថាន និងពលរដ្ឋ

បុរសម្នាក់បើករថយន្តក្នុងល្បឿនលឿនរ៉េចង្កូតបុករះម៉ូតូ និងរថយន្តជាច្រើនគ្រឿង បង្កឲ្យរងរបួសមនុស្ស ៤នាក់

ករណីក្រុមក្មេងទំនើងបង្កហិង្សា បណ្តាលឱ្យមនុស្សស្លាប់ និងរងរបួស តុលាការសម្រេចចោទប្រកាន់០៤បទល្មើស

សន្តិសុខ និង សង្គម

នគរបាលព្រហ្មទណ្ឌក្រសួងមហាផ្ទៃ អំពាវនាវដល់ជនរងគ្រោះធ្លាប់បាត់ម៉ូតូ សូមកាន់ឯកសារមកផ្ទៀងផ្ទាត់ ដើម្បីទទួលយកម៉ូតូវិញ

ភ្នំពេញ ៖ នាយកដ្ឋាននគរបាលព្រហ្មទណ្ឌ មានកិត្តិយសសូមជម្រាបជូនសាធារណៈឲ្យបានជ្រាបថា ដោយអនុវត្តតាមបទបញ្ជារបស់ឯកឧត្តម ឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ បានបើកប្រតិបត្តិការបង្ក្រាបករណីកាប់ប្លន់ និងឈានដល់បំបែកសំបុកបញ្ចាំខុសច្បាប់ នៅខណ្ឌទួលគោក រកឃើញម៉ូតូមិនមានឯកសារជាច្រើនគ្រឿង ផ្លាកលេខម៉ូតូ៦០ផ្លាក និងកាតគ្រីមួយចំនួនទៀត សូមអំពាវនាវជនរងគ្រោះធ្លាប់បាត់ម៉ូតូ សូមកាន់ឯកសារមកផ្ទៀងផ្ទាត់ នៅនាយកដ្ឋាននគរបាលព្រហ្មទណ្ឌ ដែលមានទីតាំងនៅក្នុងអគ្គស្នងការដ្ឋាននគរបាលជាតិ ឬទំនាក់ទំនងលេខលោកវរសេនីយ៍ឯក ឡេង ប៊ុនហួរ នាយការិយាល័យព្រហ្មទណ្ឌកម្រិតស្រាល 092 899 919។សូមបញ្ជាក់ផងដែរ កាលពីថ្ងៃទី០៧ ខែឧសភា ឆ្នាំ ២០២៤ ដោយមានការដឹកនាំសម្របសម្រួលពីលោក គឹម ហុងសាន ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ នាយកដ្ឋាននគរបាលព្រហ្មទណ្ឌធ្វើការឆែកឆេរ ទីតាំងទទួលទិញ និងបញ្ចាំម៉ូតូឃ្លាំងលេខ៧ ផ្ទះលេខ៥ផ្លូវ១៩២ សង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ រកឃើញម៉ូតូមិនមានឯកសារបញ្ជាក់អត្តសញ្ញាណច្បាស់លាស់, ផ្លាកលេខ និងកាតគ្រីមួយចំនួនទៀត ដឹកយកមករក្សាទុកនៅនាយដ្ឋាន។គួររំលឹកថា កាលពីម៉ោង២៤៖៥០នាទីរំលងអាធាត្រ ឈានចូលថ្ងៃទី០៤ ខែឧសភា ឆ្នាំ២០២៤ មានករណីលួចមានស្ថានទម្ងន់ទោស កាប់ប្លន់យកម៉ូតូម៉ាក HONDA C125 ពណ៌ខ្មៅ ឆ្នាំ២០២៣ ពាក់ស្លាកលេខភ្នំពេញ1JV-3592 ពីជនរងគ្រោះ នៅចំណុចភូមិកណ្តាល សង្កាត់រលួស ខណ្ឌដង្កោ រាជធានីភ្នំពេញ ជនសង្ស័យមានគ្នា៣នាក់ បានជិះម៉ូតូចំនួន២គ្រឿង ម៉ាក HONDA DREAM C125 ពណ៌ខ្មៅ បានធ្វើសកម្មភាពយកកាំបិតប៉័ងតោកាប់ទៅលើជនរងគ្រោះ ចំកណ្ដាល ខ្នងចំនួនមួយកាំបិត តែមិនមុតបណ្តាលឲ្យដួលម៉ូតូ រួចពួកគេបានស្ទុះមកកាប់បន្ថែមទៀត រួចលើកយកម៉ូតូជិះគេចខ្លួនបាត់។ក្រោយពីទទួលបានព័ត៌មានករណីកាប់ប្លន់យកម៉ូតូនេះដោយមានការដឹកនាំបញ្ជា ប្រធាននាយកដ្ឋាននគរបាលព្រហ្មទណ្ឌ បានចាត់កម្លាំងជំនាញ ការិយាល័យព្រហ្មទណ្ឌកម្រិតស្រាលដឹកនាំធ្វើការស្រាវជ្រាវ និងស៊ើបអង្កេត ជាលទ្ធផលឈានដល់កំណត់បានមុខសញ្ញាធ្វើសកម្មភាព និងទីតាំងយកម៉ូតូទៅលក់។នៅថ្ងៃទី០៦ ខែឧសភា ឆ្នាំ២០២៤ កម្លាំងជំនាញការិយាល័យព្រហ្មទណ្ឌកម្រិតស្រាល នៃនាយកដ្ឋាននគរបាលព្រហ្មទណ្ឌ នាំខ្លួនជនសង្ស័យបានចំនួន៦នាក់ ពីចំណុចខាងក្រោយវាំង សង្កាត់ជ័យជំនះ ខណ្ឌដូនពេញ រាជធានីភ្នំពេញ ។ ជនសង្ស័យបានសារភាពថា បក្ខពួករបស់ខ្លួនមានគ្នាចំនួន៩នាក់បានធ្វើសកម្មភាព វាយកាប់ប្លង់យកម៉ូតូ និងឆក់ទូរស័ព្ទដៃពីជនរងគ្រោះនៅភូមិសាស្ត្រ ខណ្ឌដង្កោ រាជធានីភ្នំពេញ និងក្រុងតាខ្មៅ ខេត្តកណ្តាល។ នាយកដ្ឋានបាននាំខ្លួន០៦នាក់ នៅសល់០៣នាក់ទៀត កំពុងដើរធ្វើសកម្មភាពនៅ ក្នុងក្រុងតាខ្មៅខេត្តកណ្តាល។ ដោយមានការចង្អុលបង្ហាញរបស់ជនសង្ស័យខាងលើ កម្លាំងជំនាញនាយកដ្ឋាន នៅថ្ងៃទី០៦ ខែឧសភា ឆ្នាំ២០២៤ បានបន្តស្រាវជ្រាវ និងឃាត់ខ្លួនបក្ខពួក របស់ជនសង្ស័យបាន០៣នាក់បន្ថែមទៀត។ជនសង្ស័យទាំង៩នាក់ខាងលើ បានសារភាពដូចៗគ្នាថា ក្រុមបក្ខពួកខ្លួនបានធ្វើសកម្មភាពវាយកាប់ប្លន់ យកម៉ូតូបានចំនួន៣គ្រឿង និងឆក់ទូរស័ព្ទដៃពីជនរងគ្រោះ នៅភូមិសាស្ត្រ ខណ្ឌដង្កោ រាជធានីភ្នំពេញ និងក្រុងតាខ្មៅ ខេត្តកណ្តាល ប្រាកដមែន។ បន្ទាប់ពីធ្វើសកម្មភាពប្លន់បានម៉ូតូខាងលើរួច បានយកទៅលក់ឲ្យជនមិនស្គាល់អត្តសញ្ញាណ នៅម្តុំឃ្លាំរំសេវ ខណ្ឌទួលគោក រាជធានីភ្នំពេញ៕អត្ថបទ ៖ កុម្ភៈ

ប៉ូឡូញ នឹងមិនទទួលយកជនអន្តោប្រវេសន៍ ក្រោមកតិកាសញ្ញាថ្មីរបស់សហភាពអឺរ៉ុបឡើយ

នាយករដ្ឋមន្ត្រីប្រទេសប៉ូឡូញ លោក ដូណាល់ ថាស់(Donald Tusk) បាននិយាយកាលពីថ្ងៃអង្គារថា ប្រទេសប៉ូឡូញ នឹងមិនទទួលយកជនអន្តោប្រវេសន៍ណាម្នាក់ឡើយ នៅក្រោមកតិកាសញ្ញាថ្មី របស់សហភាពអឺរ៉ុប ស្តីពីការធ្វើអន្តោប្រវេសន៍ និងសិទ្ធិជ្រកកោន។លោក Tusk បាននិយាយក្នុងសន្និសីទសារព័ត៌មានមួយ បន្ទាប់ពីកិច្ចប្រជុំគណៈរដ្ឋមន្ត្រីថា រដ្ឋាភិបាលរបស់លោក បានបោះឆ្នោតប្រឆាំងកតិកាសញ្ញានេះ។ លោក និយាយថា កតិកាសញ្ញានេះ ត្រូវបានអនុម័ត ខណៈបច្ចុប្បន្ន ផ្តល់ឱកាសឱ្យប្រទេសប៉ូឡូញបញ្ចៀសផលវិបាកអវិជ្ជមានណាមួយ។ ប្រទេសប៉ូឡូញ នឹងក្លាយជាអ្នកទទួលផលនៃកតិកាសញ្ញានេះ។លោកបានបញ្ជាក់ថា ប្រទេសប៉ូឡូញ ដែលបានទទួលយកជនអន្តោប្រវេសន៍រាប់ម៉ឺននាក់ នឹងពុំមានកាតព្វកិច្ចដើម្បីទទួលយកជនអន្តោប្រវេសន៍បន្ថែមទៀតនោះទេ ហើយសហភាពអឺរ៉ុប នឹងមិនដាក់កូតាអន្តោប្រវេសន៍ណាមួយមកលើប្រទេសប៉ូឡូញឡើយ។ លោកនាយករដ្ឋមន្ត្រី បាននិយាយថា ប្រទេសរបស់លោក នឹងអនុវត្តយ៉ាងមានប្រសិទ្ធភាពនូវការគាំទ្រផ្នែកហិរញ្ញវត្ថុពីសហភាពអឺរ៉ុប ទាក់ទងទៅនឹងការទទួលជនអន្តោប្រវេសន៍មកពីប្រទេសជិតខាងភាគខាងកើតរបស់ប្លុកនេះ។នីតិប្បញ្ញត្តិចំនួន១០ ដែលធ្វើកំណែទម្រង់ក្របខ័ណ្ឌអឺរ៉ុបសម្រាប់ការគ្រប់គ្រងសិទ្ធិជ្រកកោន និងការធ្វើអន្តោប្រវេសន៍ ត្រូវបានអនុម័តដោយរដ្ឋជាសមាជិកកាលពីថ្ងៃអង្គារ។ កតិកាសញ្ញាថ្មី ព្យាយាមរឹត្បិតព្រំដែនកាន់តែតឹងរ៉ឹង និងការទទួលខុសត្រូវរួមគ្នាសម្រាប់អ្នកស្វែងរកសិទ្ធិជ្រកកោន ក្នុងចំណោមសមាជិកសហភាពអឺរ៉ុប។

មនុស្ស ៨ នាក់ស្លាប់ ក្នុងគ្រោះថ្នាក់រថយន្តក្រុងនៅរដ្ឋ Florida របស់អាមេរិក ខណៈអ្នកបើកបរត្រូវចាប់ខ្លួន

អាជ្ញាធរបាននិយាយថា រថយន្តក្រុងដឹកកម្មករកសិដ្ឋាននៅភាគខាងជើងរដ្ឋហ្វ្លរីដា (Florida) របស់សហរដ្ឋអាមេរិក បានបុកជាមួយរថយន្តភីកអាប់មួយគ្រឿងកាលពីថ្ងៃអង្គារ (១៤ ឧសភា) ហើយបានក្រឡាប់ ដោយសម្លាប់មនុស្សយ៉ាងហោចណាស់ ៨ នាក់ និងមនុស្ស ៨ នាក់ផ្សេងទៀតរងរបួសយ៉ាងធ្ងន់ធ្ងរ។អ្នកបើកបររថយន្តភីកអាប់ ឈ្មោះ ប្រាយអ៊ិន មែកឃ្លីន ហូវើដ (Bryan Maclean Howard) ត្រូវបានចាប់ខ្លួនដោយទាហានល្បាតផ្លូវហាយវេរដ្ឋហ្វ្លរីដា ពីបទមនុស្សឃាតចំនួន ៨ ករណី ខណៈពេលកំពុងបើកបរក្រោមឥទ្ធិពលគ្រឿងស្រវឹង នេះបើយោងតាមសេចក្តីថ្លែងការណ៍របស់នាយកប្រតិបត្តិនៃនាយកដ្ឋានសុវត្ថិភាពផ្លូវហាយវេ និងយានជំនិះនៅរដ្ឋហ្វ្លរីដា។ទីភ្នាក់ងារអគ្គិភ័យ និងជួយសង្រ្គោះក្នុងតំបន់ (MCFR) បាននិយាយនៅក្នុងសេចក្តីថ្លែងការណ៍មួយថា ក្រៅពីមនុស្សប្រាំបីនាក់បានស្លាប់ និងប្រាំបីនាក់រងរបួសធ្ងន់ធ្ងរ អ្នកដំណើរក្នុងរថយន្តក្រុងចំនួន ៣៧ នាក់ផ្សេងទៀតត្រូវបានគេបញ្ជូនទៅមន្ទីរពេទ្យជាមួយនឹងរបួសដែលមិនគំរាមកំហែងដល់អាយុជីវិត។លោក ស្ទីវ ហ្គាសស្គីនស៍ (Steve Gaskins) អ្នកនាំពាក្យរបស់សេវាល្បាតផ្លូវហាយវេរដ្ឋ បាននិយាយនៅក្នុងសេចក្តីថ្លែងការណ៍មួយថា រថយន្តក្រុងនោះបានបុករបងទ្រូងផ្លូវ ហើយទៅប៉ះនឹងរថយន្តភីកអាប់មួយគ្រឿង រួចក៏បានក្រឡាប់ចេញពីផ្លូវ បង្កជាគ្រោះថ្នាក់នេះឡើង៕

អ៊ីស្រាអែលវាយប្រហារតាមអាកាស បានសម្លាប់មនុស្ស៤០នាក់ នៅទីតាំងចំនួន ២ នៅហ្កាហ្សាភាគកណ្តាល

មន្ទីរពេទ្យនៅតំបន់ហ្កាហ្សាភាគកណ្តាល បានរាយការណ៍ថា មនុស្ស ៤០នាក់ ត្រូវបានសម្លាប់ នៅក្នុងការវាយប្រហារតាមអាកាសចំនួនពីររបស់អ៊ីស្រាអែល នៅពេលយប់ ក្នុងចម្ងាយពីរបីរយម៉ែត្រពីគ្នា។ មន្ទីរពេទ្យ Al Aqsa បាននិយាយថា ខ្លួនបានទទួលសាកសពចំនួន ២៩នាក់ ពីការវាយប្រហារមួយ ដែលក្នុងនោះមាន ៩នាក់ជាកុមារ ខណៈដែលមន្ទីរពេទ្យ Al Awda បាននិយាយថា ខ្លួនបានទទួលសាកសពចំនួន ១១នាក់ បន្ទាប់ពីការវាយប្រហារលើកទី២។សាក្សី បាននិយាយថា ការវាយប្រហារទាំងនោះ បានកើតឡើង នៅម៉ោងប្រហែល ១ ព្រឹក និង ២: ៤៥នាទីព្រឹកថ្ងៃអង្គារ ម៉ោងក្នុងស្រុក (ម៉ោង ៦ល្ងាច និង ៧:៤៥ ល្ងាចថ្ងៃចន្ទ)។ក្រុមអ្នកជួយសង្គ្រោះ បានបន្តកិច្ចខិតខំប្រឹងប្រែង ដើម្បីស្វែងរកសាកសព នៅក្រោមគំនរបាក់បែកនៃអគារ ៤ជាន់ នៅជំរំជនភៀសខ្លួន Nuseirat ដែលត្រូវបានកម្ទេចនៅក្នុងការវាយប្រហារលើកដំបូង។ សាក្សី បាននិយាយថា មនុស្សរាប់សិបនាក់ បានជ្រកក្នុងទីធ្លានៃអគារនោះ។វីដេអូរបស់ទូរទស្សន៍ CNN បានបង្ហាញអ្នករងរបួស និងស្លាប់ ត្រូវបាននាំយកទៅកាន់មន្ទីរពេទ្យ Al Aqsa Martyrs ខណៈវីដេអូផ្សេងទៀតបង្ហាញពីសាកសពកុមារជាច្រើននាក់ ត្រូវបានគេយកចេញពីបំណែកបាក់បែកនៃអគារនោះ។

និស្សិតសាកលវិទ្យាល័យ Harvard នៅអាមេរិក ដែលតវ៉ាគាំទ្រប៉ាឡេស្ទីន បញ្ចប់ជំរំបាតុកម្ម ប៉ុន្តែប្ដេជ្ញាបន្តតវ៉ា

និស្សិតសាកលវិទ្យាល័យ ហាវើដ (Harvard) មួយក្រុម នៅក្នុងសហរដ្ឋអាមេរិក បាននិយាយកាលពីថ្ងៃអង្គារ (១៤ ឧសភា) ថា ពួកគេនឹងបញ្ចប់ដោយសន្តិវិធីនូវការបោះជំរំតវ៉ាដែលគាំទ្រប៉ាឡេស្ទីន បន្ទាប់ពីសាកលវិទ្យាល័យបានយល់ព្រមពិភាក្សាអំពីការសម្របសម្រួលរបស់ខ្លួនជាមួយក្រុមបាតុករ ហើយចាប់ផ្តើមពិចារណាឡើងវិញនូវការបណ្ដេញចេញមិនស្ម័គ្រចិត្ត ដែលខ្លួនបានដាក់លើបាតុករមួយចំនួន។អ្នកនាំពាក្យរបស់សាកលវិទ្យាល័យ Harvard បាននិយាយថា សាលាបានយល់ព្រមលើ «ការពិភាក្សាទាក់ទងនឹងសំណួររបស់សិស្សដែលទាក់ទងនឹងការសម្របសម្រួល» ហើយបានយោងទៅលើសេចក្តីថ្លែងការណ៍ពីមុនរបស់ថ្នាក់ដឹកនាំសាកលវិទ្យាល័យ Harvard ដែលបដិសេធការអំពាវនាវឱ្យមានការដកខ្លួនចេញពីក្រុមហ៊ុន ដែលមានទំនាក់ទំនងជាមួយអ៊ីស្រាអែល។សម្ព័ន្ធ ហាវើដគាំទ្រប៉ាឡេស្ទីន (HOOP) ដែលបានអំពាវនាវឱ្យសាលាដកខ្លួនចេញពីក្រុមហ៊ុនដែលមានទំនាក់ទំនងជាមួយអ៊ីស្រាអែលនេះ បានប្រកាសនៅក្នុងគណនីបណ្ដាញសង្គម អ៊ីនស្តាក្រាម (Instagram) ថាខ្លួននឹងរុះរើជំរំតវ៉ាដែលមានរយៈពេល ៣ សប្តាហ៍ ប៉ុន្តែបានប្តេជ្ញាថានឹង «បង្កើតក្រុមឡើងវិញ ហើយអនុវត្តការតស៊ូដ៏រ៉ាំរ៉ៃនេះតាមមធ្យោបាយផ្សេងទៀត»។ការបោះជំរំតវ៉ានៅសាកលវិទ្យាល័យដ៏មានកិត្យានុភាពបំផុតរបស់ប្រទេសនេះ បានបង្កភាពខ្វែងគំនិតក្នុងសហគមន៍សាកលវិទ្យាល័យ ដោយអតីតនិស្សិតមួយចំនួន ដែលជាអ្នកមានទ្រព្យសម្បត្តិ បានថ្កោលទោសការតវ៉ានេះថាជាការប្រឆាំងនឹងជនជាតិជ្វីហ្វ និងប្រឆាំងទៅនឹង «តម្លៃរបស់លោកខាងលិច» ខណៈដែលអ្នកផ្សេងទៀតបានចុះហត្ថលេខាលើលិខិតគាំទ្រក្រុមបាតុករ៕

នគរបាលប៉េរូ រាយការណ៍ថា មនុស្ស១៣នាក់ស្លាប់ ក្នុងឧបទ្ទវហេតុរថយន្តក្រុង

នគរបាលនៅក្នុងប្រទេសប៉េរូ បានរាយការណ៍កាលពីថ្ងៃអង្គារថា មនុស្ស១៣នាក់បានស្លាប់នៅក្នុងឧបទ្ទវហេតុរថយន្តក្រុងនៅលើដងផ្លូវក្នុងតំបន់ភ្នំអង់ នៃប្រទេសអាមេរិកខាងត្បូង ជាឧប្បត្តិហេតុចុងក្រោយដែលមានស្លាប់។អាជ្ញាធរតំបន់ បាននិយាយនៅក្នុងសេចក្តីថ្លែងការណ៍ថា ឧបទ្ទវហេតុដែលពាក់ព័ន្ធទៅនឹងរថយន្តក្រុង ជាកម្មសិទ្ធិរបស់ក្រុមហ៊ុនដឹកជញ្ជូន អ៊ីនធឺប្រូវីនសល ស៊ីវ៉ា (Interprovincial Civa) បានកើតឡើង នៅជិតទីក្រុង Vinchos ខណៈរថយន្តក្រុងធ្វើដំណើរពីរដ្ឋធានី Lima ទៅកាន់ក្រុងអាយ៉ាឈូចូ( Ayachucho)។នៅពេលដំបូង អាជ្ញាធរបាននិយាយថា មនុស្ស១៤នាក់បានរងរបួស ប៉ុន្តែក្រោយមកនគរបាល បានប្រាប់ទូរទស្សន៍ Canal N ថាចំនួនអ្នករងរបួសមានយ៉ាងហោចណាស់១៨នាក់។អាជ្ញាធរក្រុង Ayacucho បាននិយាយថា រថយន្តសង្គ្រោះចំនួនប្រាំពីរគ្រឿង ត្រូវបានបញ្ជូនទៅកាន់កន្លែងកើតហេតុ ព្រមទាំងបុគ្គលិកសុខាភិបាលជាង២០នាក់ ហើយអ្នករងរបួស ត្រូវបានបញ្ជូនទៅមន្ទីរពេទ្យចំនួនបី ដាច់ដោយឡែកពីគ្នាដើម្បីព្យាបាល។

អ៊ុយក្រែន ដកថយបន្ថែមពីតំបន់ Kharkiv ខណៈព្រមានពីការបង្កើនកម្លាំងរបស់រុស្ស៊ី ជិតតំបន់ Sumy

យោធាអ៊ុយក្រែន បាននិយាយកាលពីថ្ងៃអង្គារ (១៤ ឧសភា) ថា កងកម្លាំងរបស់ខ្លួនបានដកថយទៅកាន់ទីតាំងថ្មីនៅក្នុងតំបន់ចំនួនពីរនៃតំបន់ ខាគីវ (Kharkiv) ភាគឦសាន ជាទីដែលទីក្រុងមូស្គូ កំពុងវាយលុក ហើយបានព្រមានអំពីការបង្កើនកម្លាំងទ័ពរបស់រុស្ស៊ី កាន់តែខ្លាំងក្លានៅភាគខាងជើងក្បែរតំបន់ ស៊ូមី (Sumy) របស់ខ្លួន។ការវាយប្រហារឆ្លងព្រំដែនលើផ្នែកថ្មីនៅក្នុងតំបន់ ស៊ូមី ទំនងជានឹងពង្រីកខ្សែការពារដែលបាត់បង់របស់ទីក្រុងគីវ បន្ថែមទៀត បន្ទាប់ពីការលុកលុយរបស់រុស្ស៊ី ចូលទៅក្នុងតំបន់ ខាគីវ បានបើកសមរភូមិថ្មីកាលពីថ្ងៃសុក្រ ដែលបង្ខំឱ្យអ៊ុយក្រែនប្រញាប់ប្រញាល់ក្នុងការពង្រឹងកម្លាំង។រុស្សី បានវាយបើកផ្លូវចូលទៅក្នុងភាគខាងជើងនៃតំបន់ ខាគីវ ហើយបាននិយាយកាលពីថ្ងៃអង្គារថា ខ្លួនបានវាយយកភូមិព្រំដែនទី១០ គឺភូមិ ប៊ូរូវ៉ាត់កា (Buhruvatka)។ ប្រមុខនគរបាលនៅទីក្រុង វូវឆានស្ក៍ (Vovchansk) ដែលជាទីប្រជុំជនចម្ងាយ ៥ គីឡូម៉ែត្រ ពីព្រំដែនដែលជាគោលដៅនៃការរុញច្រានដ៏សំខាន់មួយរបស់រុស្ស៊ី បានរាយការណ៍ពីការផ្ទុះអាវុធនៅភាគខាងជើងនៃទីក្រុង។ក្រៅពីការបំផ្លិចបំផ្លាញ និងទុក្ខសោករបស់ប្រជាជនអ៊ុយក្រែននៅក្នុងតំបន់ ខាគីវ ដែលជាទីក្រុងធំទីពីររបស់ខ្លួននេះ ការលុកលុយគឺជាការរំខានដល់ប្រតិបត្តិការការពាររបស់ទីក្រុងគីវ នៅភាគខាងកើត ដែលរុស្ស៊ី បានផ្តោតការវាយលុកអស់រយៈពេលជាច្រើនខែ៕

ចំនួនអ្នកស្លាប់ក្នុងទឹកជំនន់នៅឥណ្ឌូនេស៊ី កើនឡើងដល់ ៥៧នាក់ និងបាត់ខ្លួន ២២នាក់

ក្រុមមន្ត្រីខេត្តបាននិយាយថា ក្រុមអ្នកជួយសង្គ្រោះបានរកឃើញសាកសពមួយចំនួនបន្ថែមទៀតកាលពីថ្ងៃអង្គារទី១៤ឧសភា បន្ទាប់ពីទឹកជំនន់ដ៏គំហុកកាលពីចុងសប្តាហ៍មុន និងលំហូរកម្អែរភ្នំភ្លើងត្រជាក់នៅលើកោះស៊ូម៉ាត្រា របស់ប្រទេសឥណ្ឌូនេស៊ី បានសម្លាប់មនុស្សយ៉ាងហោចណាស់ ៥៧ នាក់ និងបណ្ដាលឱ្យមនុស្ស ២២ នាក់ផ្សេងទៀតបាត់ខ្លួន។ ភ្លៀងធ្លាក់ខ្លាំងជាច្រើនម៉ោង បានបណ្តាលឱ្យផ្ទាំងថ្មភ្នំភ្លើងដ៏ធំរមៀលធ្លាក់ពីភ្នំភ្លើងផ្ទុះសកម្មបំផុតមួយរបស់ប្រទេសឥណ្ឌូនេស៊ី ចូលទៅក្នុងស្រុកចំនួន៦នៅលើកោះស៊ូម៉ាត្រា កាលពីល្ងាចថ្ងៃសៅរ៍ ខណៈទឹកជំនន់ជន់លិចផ្លូវថ្នល់ ផ្ទះសម្បែងប្រជាពលរដ្ឋ និងវិហារអ៊ីស្លាមនានា។ លោក អ៊ីលហាំ វ៉ាហាប់ (Ilham Wahab) មន្ត្រីទីភ្នាក់ងារសម្រាលគ្រោះមហន្តរាយ នៅខេត្ត ស៊ូម៉ាត្រាខាងលិច បានប្រាប់សារព័ត៌មាន AFP ថា មកដល់ពេលនេះ ជនរងគ្រោះចំនួន៥៧ នាក់ត្រូវបានរកឃើញ ថាបានស្លាប់ ហើយមនុស្ស២២នាក់ផ្សេងទៀត នៅតែបាត់ខ្លួន។ក្រុមអ្នកសង្រ្គោះ បានសម្អាតអគារដែលរងការខូចខាតបន្ទាប់ពីទឹកជំនន់ ស្របពេលក្រុមអ្នកជួយ សង្គ្រោះបានប្រើប្រាស់ យានដ្រូនជួយស្វែងរក ដោយប្រើឧបករណ៍ជីកកកាយតាមបំណាក់ដី និងល្បាប់ និងប្រើដៃទទេរបស់ពួកគេ ដើម្បីព្យាយាមស្វែងរកអ្នកនៅរស់រានមានជីវិតនៅក្នុងទន្លេ និងគំនរកម្ទេចថ្ម៕

ចំនួនអ្នកស្លាប់ដោយសារការរលំអគារនៅអាហ្វ្រិកខាងត្បូង កើនឡើងដល់ ៣៣ នាក់

ចំនួនអ្នកស្លាប់ដោយសារការបាក់រលំអគារនៅទីក្រុង ចច (George) នៃប្រទេសអាហ្វ្រិកខាងត្បូង កាលពីសប្តាហ៍មុនបានកើនឡើងដល់ ៣៣ នាក់កាលពីថ្ងៃអង្គារ (១៤ ឧសភា) ខណៈដែលក្រុមអ្នកជួយសង្គ្រោះបានបន្តរុះរើគំនរបាក់បែក ដោយមនុស្ស ១៩ នាក់នៅតែមិនទាន់បានសង្គ្រោះនៅឡើយអស់រយៈពេលជាងមួយសប្តាហ៍បន្ទាប់ពីឧបទ្ទវហេតុនេះ។មន្ត្រីសាលាក្រុងបាននិយាយនៅក្នុងសេចក្តីថ្លែងការណ៍មួយថា រហូតមកដល់ពេលនេះ មានតែអ្នកដែលត្រូវបានសម្លាប់នៅលើការដ្ឋានសំណង់ចំនួន ៦ នាក់ប៉ុណ្ណោះ ដែលត្រូវបានកំណត់អត្តសញ្ញាណ ដោយសារអាជ្ញាធរកំពុងជួបការលំបាកក្នុងការទទួលបានឈ្មោះត្រឹមត្រូវ។មនុស្សចុងក្រោយដែលត្រូវបានជួយសង្គ្រោះ ត្រូវគេទាញចេញពីគំនរបាក់បែកបន្ទាប់ពីជាប់ខ្លួនអស់ជិតមួយសប្ដាហ៍ នៅក្នុងអ្វីដែលនាយករដ្ឋមន្រ្ដីនៃខេត្ត វេសស្ទើន ខេប (Western Cape) នេះបានពណ៌នាថា «អព្ភូតហេតុនៅតែមាន»។គេមិនដឹងថាហេតុអ្វីបានជាអគារកម្ពស់ប្រាំជាន់នៅភាគខាងកើតនៃក្រុង ខេប ថោន (Cape Town) នេះបានបាក់រលំកាលពីថ្ងៃទី០៦ ឧសភា នោះទេ។ ការស៊ើបអង្កេតកំពុងតែប្រព្រឹត្តទៅ ហើយក្រុមអ្នកជួយសង្គ្រោះបានប្រើប្រាស់យានស្ទូច ឧបករណ៍ខួង និងដៃទទេរបស់ពួកគេ ដើម្បីព្យាយាមទៅដល់អ្នកជាប់ខ្លួននៅក្រោមអគារ៕

អង្គការសប្បុរសធម៌៖ ទឹកជំនន់បណ្ដាលឱ្យកុមារ ៤ម៉ឺននាក់ គ្មានផ្ទះសម្បែងនៅអាហ្វហ្គានីស្ថាន

អង្គការសប្បុរសធម៌ពិភពលោក Save the Children បាននិយាយកាលពីថ្ងៃចន្ទដើមសប្ដាហ៍នេះថា កុមារប្រហែល ៤០.០០០នាក់ បានបាត់បង់ផ្ទះសម្បែងរបស់ពួកគេនៅក្នុងខេត្តបាឡាន (Baghlan) ភាគខាងជើងក្នុងប្រទេសអាហ្វហ្គានីស្ថាន ខណៈភ្លៀងធ្លាក់ខ្លាំង និងទឹកជំនន់បានវាយប្រហារខេត្ត នេះ និងតំបន់ផ្សេងទៀត កាលពីថ្ងៃសុក្រសប្ដាហ៍មុន។ លោក អាសាដ ម៉ាលីគ (Arshad Malik)នាយកអង្គការសប្បុរសធម៌ប្រចាំតំបន់នេះ បាននិយាយថា កុមារមានការភ័យខ្លាច។ មនុស្សជាច្រើនបានបាត់បង់អ្វីៗគ្រប់គ្រង មិនត្រឹមតែផ្ទះសម្បែងរបស់ពួកគេប៉ុណ្ណោះទេ ថែមទាំង សាលារៀន និងកន្លែងដែលពួកគេលេងរាល់ថ្ងៃផងដែរ។ ពួកគេបានបាត់បង់អ្វីៗទាំងអស់ដែលធ្លាប់មាន។ពួកគេបានបាត់បង់ទម្លាប់ទាំងអស់នៅអាហ្វហ្គានីស្ថាន។ យោងតាមការិយាល័យកម្មវិធីស្បៀងអាហារពិភពលោកក្នុងប្រទេសអាហ្វានីស្ថាន និងមន្ត្រីអាហ្វហ្គានីស្ថានក្នុងតំបន់បានឱ្យដឹងថា មនុស្សជាង ៣៣០ នាក់ត្រូវបានសម្លាប់នៅទូទាំងប្រទេសក្រីក្រមួយនេះ ដែលភាគច្រើននៅក្នុងខេត្តបាឡាននិងមួយចំនួននៅក្នុងខេត្ត តាកា(Takhar)ខេត្ត បាដាកសាន (Badakhshan) និងខេត្តហ្គ័រ (Ghor ) ។ អង្គការពិភពលោកនានា និងក្រុមមន្ត្រីអាហ្វហ្គានីស្ថាន បានព្រមានពីការកើនឡើងចំនួនអ្នកស្លាប់ និង ជំងឺឆ្លង ជាពិសេសក្នុងចំណោមកុមារ បន្ទាប់ពីទឹកជំនន់។ឮអង្គការសុខភាពពិភពលោកបាននិយាយកាលពីថ្ងៃចន្ទថា ខ្លួនបានបញ្ជូនក្រុមឆ្លើយតបបន្ទាន់ចំនួន៨ក្រុមទៅកាន់តំបន់ដែលរងផលប៉ះពាល់ដោយសារទឹកជំនន់ ដើម្បីតាមដានហានិភ័យនៃការឆ្លងជំងឺ ដង្កាត់ផ្សេងៗ៕

បណ្ដាញសង្គម

ព័ត៌មានថ្មីៗ

ក្រសួងប្រៃសណីយ៍ ប្រកាសជ័យលាភី "ពានរង្វាន់ឌីជីថលកម្ពុជាឆ្នាំ២០២៤"

ឱកាសការងារជិត ៥០០កន្លែង ត្រៀមដាក់តាំងបង្ហាញក្នុងវេទិកាការងារនៅខេត្តស្វាយរៀងថ្ងៃសៅរស្អែកនេះ

កម្ពុជា និងភាគីចិន បន្តពង្រីកកិច្ចសហប្រតិបត្តិការក្នុងវិស័យ TVET ដើម្បីលើកកម្ពស់ឲ្យកាន់តែប្រសើរនៅកម្ពុជា

មន្រ្តីជាន់ខ្ពស់ក្រសួងអភិវឌ្ឍន៍ជនបទ កោតសរសើរដល់នាយកដ្ឋានវិស្វកម្ម ស្ថាបនាផ្លូវបានល្អប្រសើរ

ពលរដ្ឋលីបង់នៅទីក្រុង Tyre បង្ហាញការខឹងសម្បារ និងភាពក្រៀមក្រំចំពោះការបំផ្លិចបំផ្លាញពីការវាយប្រហាររបស់អ៊ីស្រាអែល

ក្រុមបាតុករនាំគ្នាតវ៉ានៅប្រទេសហ្សកដានី ដើម្បីបង្ហាញសាមគ្គីភាពជាមួយជនប៉ាឡេស្ទីននៅតំបន់ហ្កាហ្សា

មេបញ្ជាការជាន់ខ្ពស់របស់អ៊ុយក្រែនប្តេជ្ញាពង្រឹងទ័ពនៅសមរភូមិជួរមុខភាគខាងកើត ក្រោយទៅកាន់ទីនោះ

អគ្គស្នងការនគរបាលជាតិអាហ្វ្រិកខាងត្បូង សន្យាទប់ស្កាត់ការជីករ៉ែខុសច្បាប់

ប្រភព៖ រដ្ឋមន្ត្រីការពារជាតិអាល្លឺម៉ង់ ស្វែងរកកិច្ចព្រមព្រៀង ៤,៧ពាន់លានអឺរ៉ូ ដើម្បីទិញនាវាមុជទឹក ៤គ្រឿង

ក្រសួងអភិវឌ្ឍន៍ជនបទ កំពុងប្រែក្លាយផ្លូវដី ទៅជាផ្លូវកៅស៊ូ ឬបេតុងដើម្បីលើកកម្ពស់សហគមន៍មូលដ្ឋាន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877