នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ជនជាតិវៀតណាម និងជនជាតិចិនជាងពីររយនាក់ទៀតត្រូវបានអាជ្ញាធរបណ្តេញចេញពីកម្ពុជាក្រោយរក ឃើញជាប់ពាក់ព័ន្ធករណី Online Scams
អាជ្ញាធរនិងមន្ត្រីជំនាញខេត្តកំពង់ឆ្នាំងចុះរៀបចំសណ្ដាប់ធ្នាប់តាមដងផ្លូវជាតិលេខ៥ ក្នុងស្រុកកំពង់ត្រឡាច
បណ្តេញជនជាតិវៀតណាមជិត ២០០នាក់ទៀតចេញពីកម្ពុជាពាក់ព័ន្ធករណី Online Scams
ស្នងការរាជធានី អំពាវនាវដល់យុវជនជៀសឆ្ងាយពីសកម្មភាពក្មេងទំនើង បើប្រព្រឹត្ត​ល្មើស​មានតែ​ការអនុវត្តផ្លូវច្បាប់ប៉ុណ្ណោះ

សន្តិសុខ និង សង្គម

ជនអន្តោប្រវេសន៍ មិនត្រូវបានរារាំងដោយរបាំងបណ្តែតទឹកឆ្លងកាត់ទន្លេ Rio Grande នោះទេ

2023/07/31 02:04:49 pm        159
Facebook Telegram Linkin
អាមេរិក៖ ជនអន្តោប្រវេសន៍ បានបន្តឆ្លងកាត់ទន្លេ ( រីយ៉ូ ហ្ក្រានដេ) Rio Grande កាលពីថ្ងៃសៅរ៍ ទោះបីជាមានរបាំងពោងបណ្តែតទឹក ត្រូវបានដាក់នៅនឹងកន្លែងដោយរដ្ឋតិចសាស់ដើម្បីរារាំងពួកគេក៏ដោយ។ វីដេអូថតដោយយានដ្រូន បានបង្ហាញពីជនអន្តោប្រវេសន៍ដើរឆ្លងកាត់ខ្សែលួសបន្លាប្រវែងជាច្រើនម៉ាយស៍ ស្វែងរកចំណុចចូលទៅកាន់សហរដ្ឋអាមេរិកពីប្រទេសម៉ិកស៊ិក ដើម្បីប្រគល់ខ្លួនដល់សមាជិកឆ្មាំជាតិរបស់កងទ័ព និង ក្រសួងនគរបាលសុវត្ថិភាពសាធារណៈរបស់រដ្ឋតិចសាស់ នៅជិតទីក្រុង Eagle Pass រដ្ឋតិចសាស់។  អាជ្ញាធរនៅរដ្ឋតិចសាស់ បានចាប់ផ្តើមតម្លើងរបាំងបណ្តែតទឹកនៅកណ្តាលទន្លេជិតទីក្រុង Eagle Pass បង្កឲ្យមានការត្អូញត្អែរផ្នែកការទូតពីប្រទេសម៉ិកស៊ិក។ ក្នុងប៉ុន្មានខែថ្មីៗនេះ កងទ័ពឆ្មាំជាតិរដ្ឋតិចសាស់ បានដាក់ពង្រាយខ្សែបន្លាលួស ដើម្បីបញ្ឈប់លំហូរជនអន្តោប្រវេសន៍ពីប្រទេសម៉ិកស៊ិក។ អ្នកនាំពាក្យក្រសួងការបរទេស បាននិយាយថា រដ្ឋតិចសាស់មិនបានពិគ្រោះយោបល់ជាមួយមន្ត្រីសហព័ន្ធនោះទេ នៅមុនពេលតម្លើងពោងបណ្តែតទឹក ហើយប្រធានាធិបតីសហរដ្ឋអាមេរិក លោក Joe Biden បានដាក់បណ្តឹងប្តឹងរដ្ឋតិចសាស់ជុំវិញការតម្លើងរបាំងបណ្តែតទឹករបស់រដ្ឋនេះ៕

ភោជនីយដ្ឋានជប៉ុននៅចិន ព្រួយបារម្ភពីផលប៉ះពាល់សុខភាពខណៈការបញ្ចេញទឹកកង្វក់រោងចក្រ Fukushima

2023/07/31 02:02:18 pm        110
Facebook Telegram Linkin
ចិន៖ មានរយៈពេលជាង៣សប្តាហ៍ ចាប់តាំងពីប្រទេសចិន បានបង្កើនការត្រួតពិនិត្យ លើការនាំចូលអាហារ  ជប៉ុនជុំវិញការព្រួយបារម្ភពីសារធាតុវិទ្យុសកម្ម ប៉ុន្តែលោក Kazuyuki Tanioka បានព្រួយបារម្ភរួចទៅហើយសម្រាប់អនាគតនៃភោជនីយដ្ឋានអាហារស៊ូស៊ីដ៏ទំនើបនៅទីក្រុងប៉េកាំង។ ដូចជាភោជនីយដ្ឋភាគច្រើន នៅក្នុងប្រទេសចិន ភោជនីយដ្ឋាន Toya ដែលមានអាយុកាល៨ឆ្នាំ របស់លោក Tanioka បានតស៊ូរយៈពេលច្រើនឆ្នាំពីការរឹតត្បិតជំងឺ Covid-19 ដែលទើបតែបានបន្ធូរបន្ថយកាលពីចុងឆ្នាំកន្លងទៅនេះ។ ពេលនេះ វាកំពុងប្រឈមនឹងកង្វះទាំងអតិថិជន ទាំងអាហារសមុទ្រ នៅមុនពេលផែនការរបស់ប្រទេសជប៉ុនបញ្ចេញទឹកកង្វក់មានសារធាតុវិទ្យុសកម្មដែលបានធ្វើប្រព្រឹត្តិកម្មរួចចូលទៅសមុទ្រ ពីរោងចក្រនុយក្លេអ៊ែរ Fukushima ដែលទទួលរងដោយគ្រោះមហន្តរាយ។ ចុងភៅភោជនីយដ្ឋានមានអាយុ៤៩ឆ្នំមកពីតំបន់ Kumamoto ប្រទេសជប៉ុនភាគខាងត្បូង បាននិយាយថា ខ្ញុំពិតជាមានការព្រួយបារម្ភអំពីថាតើយើងអាចនៅបន្តឬយ៉ាងណា។ ការដែលមិនអាចនាំចូលបាននូវគ្រឿងផ្សំអាហារ គឺជាជីវិតពិតប្រាកដ ឬស្ថានភាពស្លាប់សម្រាប់ពួកយើង។ ប្រទេសចិន គឺជាអ្នកនាំចូលអាហារសមុទ្រជប៉ុនធំបំផុត។ ភ្លាមៗបន្ទាប់ពីរលកយក្សស៊ូណាមិ និងរញ្ជួយដី ឆ្នាំ២០១១ បានបំផ្លាញរោងចក្រ Fukushima ដែលប្រទេសនេះបានហាមឃាត់ការនាំចូលអាហារនិងផលិតផលកសិកម្មមកពីខេត្តចំនួន៥របស់ជប៉ុន។ ក្រោយមកទៀត ប្រទេសចិន បានពង្រីកបម្រាមរបស់ខ្លួន ដែលបច្ចុប្បន្នគ្របដណ្តប់លើខេត្តចំនួន១០ ក្នុងចំណោមខេត្តសរុបចំនួន៤៧ របស់ប្រទេសជប៉ុន។ ការរឹតត្បិតការនាំចូលចុងក្រោយ ត្រូវបានដាក់នៅក្នុងខែនេះ បន្ទាប់ពីអង្គការឃ្លាំមើលនុយក្លេអ៊ែររបស់អង្គការសហប្រជាជាតិ បានអនុម័តផែនការរបស់ប្រទេសជប៉ុន ក្នុងការបញ្ចេញទឹកដែលបានធ្វើប្រព្រឹត្តិកម្មរួច។ ប្រទេសចិន បានរិះគន់យ៉ាងខ្លាំងចំពោះចំណាត់ការនេះ ដែលបានប្រឈមមុខការប្រឆាំងនៅក្នុងប្រទេស ដោយនិយាយថា ការបញ្ចេញទឹកកង្វក់នេះបង្កគ្រោះថ្នាក់ដល់ជីវិតសត្វសមុទ្រ និងសុខភាពមនុស្ស។

ប្រទេសស៊ូដង់បន្ថែមការបិទផ្លូវអាកាស រហូតដល់ពាក់កណ្តាលខែសីហា ក្នុងពេលមានជម្លោះ

2023/07/31 01:55:53 pm        140
Facebook Telegram Linkin
ស៊ូដង់៖ អាកាសយានដ្ឋានអន្តរជាតិ Khartoum នៅថ្ងៃចន្ទ (ទី៣១ ខែកក្កដា) នេះ បានឲ្យដឹងនៅក្នុងសេចក្តីថ្លែងការណ៍ថា អាជ្ញាធរអាកាសចរណ៍ស៊ីវិលស៊ូដង់ បានបន្ថែមរយៈពេលនៃការបិទផ្លូវអាកាសរបស់ប្រទេសស៊ូដង់ រហូតដល់ថ្ងៃទី១៥ ខែសីហា ដោយលើកលែងតែជំនួយមនុស្សធម៌ និងការហោះហើរជម្លៀសប៉ុណ្ណោះ។ផ្លូវអាកាសរបស់ប្រទេសស៊ូដង់ ត្រូវបានបិទចាប់តាំងពីការផ្ទុះឡើងនៃការប៉ះទង្គិចគ្នា នៅពាក់កណ្តាលខែមេសា ដោយសារប្រព័ន្ធបង្ហាញទិសផ្លូវអាកាស នៅអាកាសយានដ្ឋាន ត្រូវបានប៉ះពាល់ដោយជម្លោះ រវាងក្រុមពួក ដែលមានសង្រ្គាមជាមួយគ្នា។យោងតាមតួលេខដែលចេញផ្សាយដោយក្រសួងសុខាភិបាលស៊ូដង់ បានឲ្យដឹងថា ជម្លោះប្រដាប់អាវុធ ដែលបានផ្ទុះឡើង កាលពីថ្ងៃទី១៥ ខែមេសា រវាងកងទ័ពស៊ូដង់ និងកងកម្លាំងគាំទ្ររហ័សប៉ារ៉ាយោធា បានបណ្តាលឲ្យមនុស្សស្លាប់ជាង ៣.០០០នាក់ និងជាង ៦.០០០នាក់ រងរបួស៕

ឯកឧត្តម វេង សាខុន និងលោកជំទាវ ព្រមទាំងក្រុមការងារនាំយកទៀនព្រះវស្សា និងទេយ្យទាន ប្រគេនព្រះសង្ឃវត្តចំនួន៩

2023/07/31 01:47:37 pm        176
Facebook Telegram Linkin
កំពង់ចាម៖ ឯកឧត្តម វេង សាខុន ប្រធានក្រុមការងារគណបក្សចុះមូលដ្ឋានស្រុកកំពង់សៀម ខេត្តកំពង់ចាម និងស្រុកតំបែរ ខេត្តត្បូងឃ្មុំ និងលោក ជំទាវ រួមជាមួយសហការីដែលជាប្រធាន អនុប្រធាន និងសមាជិកក្រុមការងារចុះឃុំតំបែរ និងឃុំត្រពាំងព្រីង ស្រុកតំបែរ បាននាំយកទៀនចំណាំព្រះវស្សា ទេយ្យទាន គ្រឿងបរិក្ខារ និងបច្ច័យមួយចំនួនទៀត មកប្រគេនព្រះចៅអធិកាដែលគង់ចាំព្រះវស្សា ដូនជី តាជីប្រតិបត្តិធម៌ និងសមាទានសីល តាមទំនៀមទំលាប់ព្រះពុទ្ធសាសនា ចំនួន៩ វត្ត នាព្រឹកថ្ងៃចន្ទ ១៤កើត ខែទុតិយាសាឍ ឆ្នាំថោះ ចត្វាស័ក ព.ស. ២៥៦៧ ត្រូវនឹងថ្ងៃទី៣១ ខែកក្កដា ឆ្នាំ២០២៣នេះ។ពិធីនេះបានប្រព្រឹត្តនៅពីរទីតាំង៖ ទីតាំងទីមួយនៅវត្តសុវណ្ណមុនីជោត ក្នុងភូមិស្វាយតាមែក ឃុំតំបែរមានចំនួនប្រាំវត្ត ក្នុងនេះមានវត្តសុវណ្ណមុនីជោត, វត្តត្រពាំងព្រីង, វត្តតំបែរ, វត្តសេដាសេនជ័យ និងវត្តកោះក្រញ៉ាញ់ និងទីតាំងពិធីមួយទៀតបានរៀបចំនៅវត្តវណ្ណ:ណារាម ក្នុងភូមិបង្ហើខ្លែង ឃុំត្រពាំងព្រីង ដែលមានវត្តវណ្ណារាម, វត្តស្រែកក់, វត្តភ្នំទួល និងវត្តភ្នំបុត្រ ។ ឯកឧត្តមបានធ្វើការសំណេះសំណាលជាមួយព្រះតេជគុណព្រះចៅអធិការ និងប្រជាពលរដ្ឋពុទ្ធិបរិស័តដែលនិមន្តមកពីប្រាំបួនវត្តចំនួនប្រាំអង្គ និង ៦០០នាក់ ដោយបានពាំនាំនូវការផ្តាំផ្ញើសាកសួរសុខទុក្ខពីសំណាក់ សម្តេចតេជោ នាយករដ្ឋមន្រ្តី សម្តេចកិត្តិព្រឹទ្ធបណ្ឌិត មកប្រគេនព្រះតេជគុណព្រះសង្ឃគ្រប់ព្រះអង្គ និងជូនប្រជាពលរដ្ឋទូទាំងស្រុកតំបែរ សូមទទួលយកពុទ្ធពរទាំបួនប្រការកុំបីឃ្លៀឃ្លាតឡើយ។ ក្នុងនាមប្រធាន អនុប្រធានក្រុមការងារ អាជ្ញាធរមូលដ្ឋាន និងប្រជាពលរដ្ឋទូទាំងស្រុកតំបែរ ឯកឧត្តមបានអបអរសាទរ អរគុណយ៉ាងជ្រាលជ្រៅជាទីបំផុតចំពោះប្រជាពលរដ្ឋនៅស្រុកតំបែរទាំអស់ និងសូមវាយតម្លៃខ្ពស់ចំពោះជោគជ័យដ៏ធំធេងនៃលទ្ធផលបោះឆ្នោតជ្រើសតាំងតំណាងរាស្រ្តនីតិកាលទី៧ ដែលគណបក្សប្រជាជនកម្ពុជាស្រុកតំបែរទទួលបានការគាំទ្រជាង ១០០% យោងតាមលទ្ធផលបណ្តោះអាសន្នរបស់ គ ជ ប។ លទ្ធផលជាប្រវត្តិសាស្រ្តនេះ គឺមិនអាចកាត់ផ្តាច់បានពីការខិតខំពុះពារ និងលះបង់គ្រប់បែបយ៉ាងរបស់សមាជិកគណបក្សគ្រប់ជាន់ថ្នាក់បានឡើយ។ ក្នុងនាមប្រធានក្រុមការងារគណបក្សប្រជាជនចុះមូលដ្ឋានស្រុកតំបែរ ឯកឧត្តមបានថ្លែងអំណរគុណជូនចំពោះឯកឧត្តម លោក ជំទាវ លោក លោកស្រី ដែលជាអុប្រធានចុះជួយស្រុក ប្រធាន អនុប្រធាន និងសមាជិកក្រុមការងារចុះឃុំទាំងពីរ អាជ្ញាធរមូលដ្ឋាន និងពុទ្ធិបរិស័តចំណុះជើងវត្ត ដែលបានបរិច្ចាគ ចាប់មគ្គផលធ្វើបុណ្យតាមប្រពៃណីព្រះពុទ្ធសាសនានាព្រឹកនេះ។ ឯកឧត្តមបានឧទ្ទិសភាគផលបុណ្យ កុសលទានជូនសប្បុរសជនទាំងអស់ទទួលយកនូវផលា និសង្ឃតាមសទ្ធារៀងៗខ្លួន និងទទួលយកនូវពុទ្ធពរទាំងបួនប្រការកុំបីឃ្លៀងឃ្លាតឡើយ៕

មន្ត្រី៖ការបាញ់ប្រហារនៅស្នាក់ការគរបាលនៅឧបទ្វីប Sinai ប្រទេសអេហ្ស៊ីប បានសម្លាប់មន្ត្រីយ៉ាងហោចណាស់៤នាក់

2023/07/31 01:36:20 pm        99
Facebook Telegram Linkin
អេហ្ស៊ីប​​៖ មន្ត្រីសន្តិសុខពីរនាក់ និងមន្ត្រីសុខាភិបាល បាននិយាយថា ការបាញ់ប្រហារកាលពីថ្ងៃអាទិត្យនៅស្នាក់ការ នគរបាលដែលមានការពារយ៉ាងតឹងរ៉ឹង នៅក្នុងផ្នែកដែលមានភាពជ្រួលច្របល់នៃឧបទ្វីបស៊ីណៃ( Sinai) ប្រទេសអេហ្ស៊ីប បានសម្លាប់នគរបាលយ៉ាងហោចណាស់ ៤នាក់ រួមទាំងមន្ត្រីជាន់ខ្ពស់ម្នាក់។ពួកគេបាននិយាយថា យ៉ាងហោចណាស់កងកម្លាំង២១នាក់ផ្សេងទៀត បានរងរបួសនៅក្នុងការបាញ់ប្រហារនៅទីស្នាក់ការសន្តិសុខជាតិក្នុងទីក្រុង el-Arish រដ្ឋធានីនៃខេត្តស៊ីណៃខាងជើង។បញ្ជីឈ្មោះអ្នកស្លាប់ និងរបួស ដែលទទួលបានដោយសារព័ត៌មានAP បានបង្ហាញថា កងកម្លាំងមួយចំនួន បានទទួលរងការបាញ់ប្រហារដោយកាំភ្លើង និងខ្លះទៀតប្រឈមមុខនឹងការពិបាកដកដង្ហើម ដោយសារឧស្ម័នបង្ហូរទឹកភ្នែក ដែលត្រូវបានបាញ់នៅខាងក្នុងស្នាក់ការនោះ។ បញ្ជីឈ្មោះ បានបង្ហាញថា មានមន្ត្រី៨នាក់ ស្ថិតក្នុងចំណោមអ្នករងរបួស។មន្ត្រីទាំងនោះ បាននិយាយក្នុងលក្ខខណ្ឌសុំមិនបញ្ចេញឈ្មោះ ព្រោះពួកគេ មិនត្រូវបានអនុញ្ញាតឲ្យនិយាយទៅកាន់ប្រព័ន្ធផ្សព្វផ្សាយ។កាលៈទេសៈជុំវិញការបាញ់ប្រហារនេះ ពុំទាន់ដឹងច្បាស់នៅឡើយទេ ហើយក៏មិនទាន់មានការអត្ថាធិប្បាយភ្លាមៗពីក្រសួងមហាផ្ទៃ ដែលគ្រប់គ្រងកម្លាំងនគរបាល៕

មនុស្សរាប់ម៉ឺននាក់ត្រូវបានជម្លៀស ខណៈភាគខាងជើងប្រទេសចិន រងការវាយប្រហារដោយភ្លៀងធ្លាក់ខ្លាំង

2023/07/31 12:15:29 pm        130
Facebook Telegram Linkin
មនុស្សរាប់ម៉ឺននាក់ត្រូវបានជម្លៀសចេញពីតំបន់ដែលមានហានិភ័យខ្ពស់នៃទីក្រុងប៉េកាំង និងទីក្រុងភាគខាងជើងមួយផ្សេងទៀត ខណៈដែលតំបន់ភាគច្រើននៃប្រទេសចិន ត្រូវបានវាយប្រហារដោយភ្លៀងធ្លាក់យ៉ាងខ្លាំង កាលពីថ្ងៃអាទិត្យ (ថ្ងៃទី៣០ ខែកក្កដា)។ព្យុះដ៏គ្រោះថ្នាក់ Doksuri បានបោកបក់ឆ្ពោះទៅភាគខាងជើងប្រទេសចិន ចាប់តាំងពីថ្ងៃសុក្រ (ទី២៨ ខេកក្កដា) មក នៅពេលដែលព្យុះនោះ បានបោកបក់ក្នុងល្បឿនយ៉ាងលឿនចូលមកក្នុងខេត្ត Fujian ភាគខាងត្បូង បន្ទាប់ពីបានវាយប្រហារប្រទេសហ្វីលីពីន ក្នុងនាមជាព្យុះទីហ្វុង។ រដ្ឋធានីរបស់ប្រទេសចិន និងតំបន់ជុំវិញនោះ ត្រូវភ្លៀវធ្លាក់យ៉ាងជោគជាំ កាលពីចុងសប្តាហ៍កន្លងមក ដោយក្រុមមន្ត្រី បានព្រមានអំពីស្ថានភាពដែលអាចមានគ្រោះថ្នាក់ រួមមានទឹកជំនន់ កម្រិតទឹកទន្លេឡើងខ្ពស់ បំណាក់ល្បាប់ភក់ និងបំណាក់ដី។ប្រព័ន្ធផ្សព្វផ្សាយរដ្ឋ បានរាយការណ៍ថា មនុស្សជាង ២៧.០០០នាក់ នៅក្នុងតំបន់ ដែលមានហានិភ័យខ្ពស់នៃទីក្រុងប៉េកាំង ត្រូវបានជម្លៀសចេញ ហើយ ២០.០០០នាក់ផ្សេងទៀត ត្រូវបានផ្លាស់ទីលំនៅពីផ្នែកខ្លះនៃខេត្តជិតខាង ក្នុងទីក្រុង Shijiazhuang ( ស៊ើជាជ័ង)របស់ខេត្ត Hebei។មនុស្សរាប់រយលាននាក់នៅភាគខាងជើងប្រទេសចិន ក្នុងនោះរួមទាំងនៅទីក្រុងប៉េកាំង នៅតែស្ថិតក្រោមការប្រកាសអាសន្នពណ៌ក្រហម ដែលជាកម្រិតខ្ពស់បំផុតសម្រាប់ភ្លៀងធ្លាក់ខ្លាំង យ៉ាងហោចណាស់ក៏រហូតដល់រសៀលថ្ងៃចន្ទ (ទី៣១ ខែកក្កដា) នេះ។ ការជូនដំណឹងននេះ គ្របដណ្ដប់លើចំនួនប្រជាជន ២២លាននាក់របស់ទីក្រុងប៉េកាំង និង ១៤លាននាក់របស់ទីក្រុង Tianjin ក៏ដូចជាផ្នែកខ្លះនៃខេត្ត Hebei, Shanxi, Shandong និង Henan។ តាមប្រព័ន្ធផ្សព្វផ្សាយក្នុងស្រុក បានឲ្យដឹងថា នេះជាលើកទីមួយហើយ គិតចាប់តាំងពីឆ្នាំ២០១១ ដែលការព្រមានពីភ្លៀងធ្លាក់ខ្លាំងបែបនេះត្រូវបានធ្វើឡើង៕

មនុស្សមួយចំនួនស្លាប់ ក្នុងការប៉ះទង្គិចគ្នាក្នុងជំរំជនភៀសខ្លួនប៉ាឡេស្ទីន នៅប្រទេសលីបង់

2023/07/31 12:11:43 pm        148
Facebook Telegram Linkin
ប្រភពពីកងកម្លាំងសន្តិសុខ បាននិយាយកាលពីថ្ងៃអាទិត្យទី៣០កក្កដាថា មនុស្សយ៉ាងហោចណាស់៥នាក់បានស្លាប់ និង៧នាក់រងរបួស ក្នុងការប៉ះទង្គិចគ្នានៅក្នុងជំរំជនភៀសខ្លួនជនជាតិប៉ាឡេស្ទីនដ៏ធំបំផុតរបស់ប្រទេសលីបង់ នៅជិតក្រុងកំពង់ផែ ស៊ីដុន( Sidon) ជាទីដែលក្រុម Fatah បានវាយប្រយុទ្ធ ប្រឆាំងនឹងក្រុមគូប្រជែងមួយចំនួន ដែលគាំទ្រក្រុមជ្រុលនិយម។ ក្រុមហ្វាតារបស់ជនជាតិប៉ាឡេស្ទីន បាននិយាយនៅក្នុងសេចក្ដីថ្លែងការណ៍មួយកាលពីថ្ងៃអាទិត្យ ដោយបានបញ្ជាក់ពីការស្លាប់របស់មេបញ្ជាការក្រុមនេះលោក អាស្រាហ្វ អាល់ អាម៉ូជី(Ashraf al-Armouchi) និងកងកម្លាំងរបស់លោក៤នាក់ទៀត អំឡុងប្រតិបត្តិការបោសសម្អាតអំពើឧក្រិដ្ឋកម្ម។ សេចក្ដីថ្លែងការណ៍នេះ បានថ្កោលទោសឧក្រិដ្ឋកម្មគួរឲ្យស្អប់ខ្ពើមនិងកំសាក ក្នុងបំណងបង្កអសន្តិសុខ និងស្ថិរភាព នៅជំរំជនជាតិប៉ាឡេស្ទីនក្នុងប្រទេសលីបង់។ ការប៉ះទង្គិចគ្នានេះ បានចាប់ផ្ដើម នៅថ្ងៃដែលបរាជ័យប៉ុនប៉ងធ្វើឃាតលើមេដឹកនាំក្រុមអ៊ីស្លាមជ្រុលនិយមប្រកាន់តឹងម្នាក់ ដែលបានបណ្ដាលឲ្យមនុស្សម្នាក់ស្លាប់ ។ ហេតុការណ៍នេះ បានកើតឡើងក្រោយការបាញ់ប្រហារ និងការវាយប្រហារដោយក្រុមសម្មប្រយុទ្ធប្រដាប់អាវុធនៅទីស្នាក់ការរបស់ក្រុម Fatah។ ជនភៀសខ្លួនប្រមាណ៤០ម៉ឺននាក់ រស់នៅក្នុងជំរំប៉ាឡេស្ទីនចំនួន១២កន្លែងរបស់ប្រទេសលីបង់ ដែលមានតាំងពីសង្រ្គាមឆ្នាំ១២៤៨ មក រវាងអ៊ីស្រាអែល និងក្រុមប្រទេសអារ៉ាប់ជិតខាងរបស់ខ្លួន ៕

កូរ៉េខាងជើងប្តេជ្ញាថា នឹងកម្ទេចសហរដ្ឋអាមេរិក ក្នុង​សតវត្សរ៍​នេះ

2023/07/31 12:01:23 pm        178
Facebook Telegram Linkin
ក្រសួងការបរទេសកូរ៉េខាងជើងនៅសប្តាហ៍នេះ បានប្តេជ្ញាថា ប្រទេសនេះ នឹងបំផ្លាញសហរដ្ឋអាមេរិក ​ដោយបន្ថែមថា សហរដ្ឋអាមេរិក នឹងត្រូវបានបញ្ចប់ នៅសតវត្សរ៍នេះ។អ្នកការទូតកូរ៉េខាងជើង ​បាននិយាយនៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ ​ដែលជា ខួបលើកទី៧០នៃបទឈប់បាញ់សង្គ្រាមកូរ៉េថា៖«ប្រសិនបើសហរដ្ឋអាមេរិកជ្រើសរើស ធ្វើបាបសាធារណរដ្ឋ​របស់យើង យើងនឹងបំផ្លាញពួកគេ ដោយប្រើអំណាចយោធារបស់យើងទាំងអស់ ដែលយើងបានប្រមូលផ្តុំ រហូតមកទល់ពេលនេះ»។សង្រ្គាមកូរ៉េនៅសតវត្សរ៍ចុងក្រោយ គឺជាការចាប់ផ្តើមនៃការធ្លាក់ចុះនៃសហរដ្ឋអាមេរិក ឥឡូវនេះសតវត្សរ៍ ទី២១ ​នឹងឃើញការបញ្ចប់សហរដ្ឋអាមេរិក ដែលអាចផ្លាស់ប្តូរបាន។ ក្រុមមេដឹកនាំនៃសហរដ្ឋអាមេរិក ត្រូវបានណែនាំយ៉ាងល្អឲ្យបំភ្លេចចោល ដោយមិនគិតពីមេរៀនប្រវត្តិសាស្ត្រ។ បទឈប់បាញ់បញ្ចប់ជម្លោះ ត្រូវបានឈានដល់រវាងកូរ៉េខាងជើង ប្រទេសចិនដែលបានគាំទ្រកូរ៉េខាងជើង និងសហរដ្ឋអាមេរិកដែលបានគាំទ្រកូរ៉េខាងត្បូងក្នុងសង្គ្រាមនេះ។ កូរ៉េខាងត្បូង មិនយល់ព្រមចំពោះបទឈប់បាញ់នេះទេ។

មានការចេញបទបញ្ជាជម្លៀស សម្រាប់ទីក្រុង នៅភាគខាងលិចកាណាដា ខណៈចំហេះព្រៃរាលដាលឆ្លងចូលពីសហរដ្ឋអាមេរិក

2023/07/31 11:19:54 am        107
Facebook Telegram Linkin
បទបញ្ជាឲ្យជម្លៀសចេញ សម្រាប់ទីក្រុង Osoyoos របស់ប្រទេសកាណាដា និងតំបន់ជុំវិញរបស់ប្រទេសនេះ ក្នុងខេត្ត British Columbia ត្រូវបានដាក់ចេញកាលពីយប់ថ្ងៃសៅរ៍ (ទី២៩ ខែកក្កដា) ដោយសារចំហេះព្រៃ ដែលមិនអាចគ្រប់គ្រងបាន ដែលបានឆេះរាលដាលឆ្លងព្រំដែនពីរដ្ឋវ៉ាស៊ីនតោន (Washington) របស់សហរដ្ឋអាមេរិក។យោងតាមសេវាចំហេះព្រៃរបស់ខេត្ត British Columbia បានឲ្យដឹងថា ចំហេះព្រៃដែលមានឈ្មោះថា Eagle Bluff មានចម្ងាយប្រហែល ៤គីឡូម៉ែត្រពីទីក្រុង Osoyoos ហើយពេលនេះ ត្រូវបានគេប៉ាន់ប្រមាណថា ការឆេះនោះមានទំហំ ៨៨៥ហិកតា នៅផ្នែកខាងដីក្នុងព្រំដែនរបស់ប្រទេសកាណាដា ខណៈវាមានទំហំប្រហែល ២.០០០ហិកតា នៅផ្នែកខាងដីរបស់សហរដ្ឋអាមេរិក។ យោងតាមគេហទំព័រអភិវឌ្ឍន៍សេដ្ឋកិច្ចរបស់ទីក្រុង Osoyoos បានឲ្យដឹងថា ទីក្រុង Osoyoos នេះ មានប្រជាជនក្នុងតំបន់ប្រហែល ៦.៧០០នាក់។សេវាចំហេះព្រៃរបស់ខេត្ត British Columbia បានឲ្យដឹងកាលពីថ្ងៃអាទិត្យ (ទី៣១ ខែកក្កដា) ថា៖ «យើងមានបុគ្គលិកនាវិកទប់ទល់ការវាយប្រហារដំបូង ប្រភពអង្គភាពមួយចំនួន ឧទ្ធម្ភាគចក្រ ២គ្រឿង បុគ្គលិកការពាររចនាសម្ព័ន្ធ និងឧបករណ៍ធុនធ្ងន់ ដែលឆ្លើយតបទៅនឹងហេតុការណ៍នេះ»។បទបញ្ជាជម្លៀសនេះ គ្របដណ្ដប់លើតំបន់ខាងជើងនៃព្រំដែនកាណាដា-សហរដ្ឋអាមេរិក ដល់ចំណុចប្រសព្វនៃផ្លូវហាយវេលេខ៩៧ និងផ្លូវហាយវេលេខ ៣ ក៏ដូចជាខាងលិច និងខាងជើងតាមបណ្តោយផ្លូវហាយវេលេខ ៣ ផងដែរ៕

ស្លាប់ម្នាក់និងរងរបួសធ្ងន់-ស្រាល៧នាក់ ករណី​ខ្យល់កន្ដ្រាក់​​នៅស្រុកស្រែអំបិល

2023/07/31 10:57:07 am        643
Facebook Telegram Linkin
កោះកុង៖ ពលរដ្ឋ១នាក់ និង៧នាក់បានរងរបួសធ្ងន់-ស្រាល ក្នុងករណីគ្រោះធម្មជាតិភ្លៀងខ្យល់កន្រ្តាក់នៅភូមិបានទៀត ឃុំដងពែង ស្រុកស្រែអំបិល។លោកវេជ្ជបណ្ឌិត សៅ សូនី ប្រធានការិយាល័យប្រតិបត្តិសុខាភិបាលស្រុកស្រែអំបិល បានឲ្យដឹងនៅព្រឹកថ្ងៃទី៣១ ខែកក្កដា ឆ្នាំ២០២៣ថា ក្នុងចំណោមអ្នករបួសទាំង៧នាក់ មាន២នាក់បានបញ្ចូនទៅមន្ទីរពេទ្យនៅរាជធានីភ្នំពេញ។លោកវេជ្ជបណ្ឌិត សៅ សូនី បន្តថា កាលពីយប់ថ្ងៃទី៣០ ខែកក្កដា ថ្មីៗនេះ មានខ្យល់កន្រ្តាក់​លាយឡំនឹងភ្លៀងបណ្តាលឲ្យផ្ទះពលរដ្ឋចំនួន៣០ខ្នងបាក់ដួលរំលំ។ ក្នុងនោះមាន១២ខ្នង បាក់រំលំធ្ងន់ធ្ងរខ្លាំង។ បច្ចុប្បន្នពលរដ្ឋរងគ្រោះ​បាន​ជម្លៀស​មក​ទីទួល​សុវត្តិភាព ដោយផ្តល់​ជាស្បៀងអាហារ និងខ្លះទៀតកំពុងសម្រាកព្យាបាលជំងឺ៕ 

បណ្ដាញសង្គម

ព័ត៌មានថ្មីៗ

ក្រុមជួយសង្រ្គោះ ជម្លៀសភ្ញៀវទេសចរបរទេស អ្នកស្រុក ក្រោយទឹកជំនន់វាយប្រហារទីក្រុង Lonavala របស់ឥណ្ឌា
07/07/2026 09:07 PM
Facebook Telegram Linkin
UN៖ ករណីឆ្លងជំងឺអេបូឡានៅកុងហ្គោ កើនឡើងជាង ១.៥៦០នាក់ ស្របពេលវិបត្តិជម្លៀសខ្លួនកាន់តែអាក្រក់
07/07/2026 08:07 PM
Facebook Telegram Linkin
នាវាដឹកប្រេង ២គ្រឿងរងការវាយប្រហារនៅច្រកសមុទ្រ Hormuz ខណៈមនុស្សរាប់លាននាក់កាន់ទុក្ខលោក Khamenei
07/07/2026 08:07 PM
Facebook Telegram Linkin
រយៈពេល ១ពាន់ថ្ងៃនៃអំពើប្រល័យពូជសាសន៍អ៊ីស្រាអែលនៅតំបន់ហ្កាហ្សា
07/07/2026 08:07 PM
Facebook Telegram Linkin
ការតម្រង់ជួរយ៉ាងវែងនៅតាមស្ថានីយប្រេងក្នុងទីក្រុង Omsk ក្រោយអ៊ុយក្រែនវាយប្រហាររោងចក្រចម្រាញ់ប្រេងធំបំផុតរបស់រុស្ស៊ី
07/07/2026 08:07 PM
Facebook Telegram Linkin
អាមេរិក និងអង្គការណាតូ ប្រកាសកិច្ចព្រមព្រៀងការពារជាតិក្នុងកិច្ចប្រជុំកំពូលនៅទីក្រុង Ankara
07/07/2026 08:07 PM
Facebook Telegram Linkin
ពលរដ្ឋអ៊ីរ៉ង់កាន់បដាគំរាមលោក Trumpនៅពិធីបុណ្យសពអតីតមេដឹកនាំ Khamenei
07/07/2026 08:07 PM
Facebook Telegram Linkin
វិមានក្រឹមឡាំងសង្ឃឹមថា កិច្ចខិតខំសន្តិភាពរបស់អាមេរិកនៅអ៊ុយក្រែន នឹងជោគជ័យ
07/07/2026 08:07 PM
Facebook Telegram Linkin
មនុស្សម្នាក់ស្លាប់ និង ៧នាក់បាត់ខ្លួន ក្រោយបំណាក់ដីនៅរដ្ឋ Kerala ប្រទេសឥណ្ឌា
07/07/2026 08:07 PM
Facebook Telegram Linkin
ពលរដ្ឋហ្កាហ្សាសង្ឃឹមថា ការរំសាយស្ថាប័នក្រុមហាម៉ាស នឹងជំរុញឲ្យមានកសាងតំបន់ឡើងវិញ
07/07/2026 08:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.