BTV NEWS

ជនជាតិវៀតណាម និងជនជាតិចិនជាងពីររយនាក់ទៀតត្រូវបានអាជ្ញាធរបណ្តេញចេញពីកម្ពុជាក្រោយរក ឃើញជាប់ពាក់ព័ន្ធករណី Online Scams

អាជ្ញាធរនិងមន្ត្រីជំនាញខេត្តកំពង់ឆ្នាំងចុះរៀបចំសណ្ដាប់ធ្នាប់តាមដងផ្លូវជាតិលេខ៥ ក្នុងស្រុកកំពង់ត្រឡាច

បណ្តេញជនជាតិវៀតណាមជិត ២០០នាក់ទៀតចេញពីកម្ពុជាពាក់ព័ន្ធករណី Online Scams

ស្នងការរាជធានី អំពាវនាវដល់យុវជនជៀសឆ្ងាយពីសកម្មភាពក្មេងទំនើង បើប្រព្រឹត្តល្មើសមានតែការអនុវត្តផ្លូវច្បាប់ប៉ុណ្ណោះ

សន្តិសុខ និង សង្គម

រុស្ស៊ីបង្ហាញពីកម្លាំងទ័ពជើងទឹករបស់ខ្លួន នៅក្នុងក្បួនដង្ហែព្យុហយាត្រា នៅសមុទ្រ ក្នុងក្រុង St. Petersburg

ប្រធានាធិបតីរុស្ស៊ី លោក វ្ល៉ាឌីមៀរ ពូទីន (Vladimir Putin) បានត្រួតពិនិត្យក្បួនដង្ហែព្យុហយាត្រានៃនាវាចម្បាំង និងនាវាមុជទឹកនុយក្លេអ៊ែរ នៅឯក្រុងកំណើតរបស់លោក St Petersburg កាលពីថ្ងៃអាទិត្យ (ទី៣០ ខែកក្កដា) ហើយប្រកាសថា កងទ័ពជើងទឹករុស្ស៊ី នឹងទទួលបាននាវាថ្មីចំនួន៣០គ្រឿង នៅឆ្នាំនេះ។នាវា នាវាមុជទឹក និងនាវាផ្សេងទៀតចំនួន ៤៥គ្រឿង បានចូលរួមក្នុងព្រឹត្តិការណ៍ទិវាកងទ័ពជើងទឹកប្រចាំឆ្នាំរបស់ប្រទេសរុស្ស៊ី ជាប្រពៃណីនៃការបង្ហាញកម្លាំងយោធា ដែលធ្វើឡើងនៅឈូងសមុទ្រហ្វាំងឡង់ និងនៅទន្លេ Neva ក្នុងទីក្រុង St Petersburg ហើយជាមួយគ្នានេះ វិមានក្រឹមឡាំង បានឲ្យដឹងថា ទាហានជើងទឹកប្រហែល ៣.០០០នាក់ ក៏បានចូលរួមក្នុងក្បួនដង្ហែនៅលើគោកផងដែរ។លោក ពូទីន អមដំណើរដោយរដ្ឋមន្ត្រីការពារជាតិលោក Sergei Shoigu និងឧត្តមនាវីឯក លោក Nikolai Yevmenov ដែលជាមេបញ្ជាការកងទ័ពជើងទឹក បានត្រួតពិនិត្យនាវាមួយចំនួនពីលើនាវាខ្នាតតូច នៅទន្លេ Neva មុនពេលធ្វើសុន្ទរកថា។លោក ពូទីន បាននិយាយថា៖ «ថ្ងៃនេះ ប្រទេសរុស្ស៊ីកំពុងអនុវត្តប្រកបដោយទំនុកចិត្តនូវភារកិច្ចទ្រង់ទ្រាយធំនៃគោលនយោបាយដែនសមុទ្រជាតិរបស់យើង ហើយកំពុងកសាងកម្លាំងកងទ័ពជើងទឹករបស់យើងយ៉ាងខ្ជាប់ខ្ជួន។ ក្នុងឆ្នាំនេះតែមួយឆ្នាំប៉ុណ្ណោះ កប៉ាល់ចំនួន ៣០គ្រឿង ក្នុងកម្រិតផ្សេងៗគ្នា កំពុងត្រូវបានបញ្ចូលបន្ថែមទៅក្នុងកងនាវារវបស់យើង»។ក្នុងសន្ទរកថា លោក ពូទីន មិនបានធ្វើការអត្ថាធិប្បាយជាក់លាក់ពាក់ព័ន្ធនឹងអ្វីដែលរុស្ស៊ីហៅថា ជា «ប្រតិបត្តិការយោធាពិសេស» របស់ខ្លួន នៅអ៊ុយក្រែននោះឡើយ។ យោងតាមវិមានក្រឹមឡាំង បានឲ្យដឹងថា ប្រមុខរដ្ឋអាហ្រ្វិក ៤រូប បានចូលរួមក្នុងព្រឹត្តិការណ៍កាលពីថ្ងៃអាទិត្យនេះ ហើយប្រទេសអាហ្វ្រិកចំនួន ៥ផ្សេងទៀត បានបញ្ជូនតំណាងមកជំនួស៕

សារព័ត៌មាន Financial Times និយាយថា អ៊ុយក្រែន បានប្រើប្រាស់គ្រាប់រ៉ូកែតរបស់កូរ៉េខាងជើង

របាយការណ៍មួយកាលពីចុងសប្ដាហ៍ដោយសារព័ត៌មាន Financial Times របស់ចក្រភពអង់គ្លេស និយាយពីស្ថានភាពនៅទីតាំងមួយជិតទីក្រុងបាកមូដ (Bakhmut) ដែលត្រូវបានបំផ្លិចបំផ្លាញនៅភាគខាងកើតរបស់ប្រទេសអ៊ុយក្រែន។ ទាហានអ៊ុយក្រែន ដែលកំពុងធ្វើប្រតិបត្តិការដោយប្រើប្រព័ន្ធបាញ់គ្រាប់រ៉ូកែត សម័យសហភាពសូវៀត ត្រូវគេមើលឃើញកំពុងប្រើគ្រាប់រ៉ូកែតពីកូរ៉េខាងជើង។ សារព័ត៌មាននេះ បន្ថែមថា ទាហាននិយាយថា អាវុធទាំងនោះ ត្រូវបានរឹបអូសដោយប្រទេសជាសម្ព័ន្ធមិត្តមួយហើយក្រោយមកបានបញ្ជូនឲ្យទៅអ៊ុយក្រែន។ យោងតាមរបាយការណ៍នេះ ក្រសួងការពារជាតិអ៊ុយក្រែន បានលើកឡើងថា អាវុធទាំងនោះត្រូវបានដណ្ដើមពីទាហានរុស្ស៊ី។ សហរដ្ឋអាមេរិក បានចោទប្រកាន់ប្រទេសកូរ៉េខាងជើងពីបទផ្ដល់អាវុធឲ្យទៅរុស្ស៊ី ។ប៉ុន្តែពុំមានភស្តុតាងបញ្ជាក់ទេ។ ហើយអាវុធរបស់កូរ៉េខាងជើង ពុំត្រូវបានតាមឃ្លាំមើលដោយទូលំទូលាយនៅលើសមរភូមិរបស់អ៊ុយក្រែនទេ។កូរ៉េខាងជើង និងរុស្ស៊ីសុទ្ធតែបានច្រានចោលការចោទប្រកាន់ពីការផ្ដល់អាវុធនេះ ។ របាយការណ៍របស់សារព័ត៌មាននេះ បានចេញផ្សាយប៉ុន្មានថ្ងៃ ប៉ុណ្ណោះ បន្ទាប់ពីរដ្ឋមន្ត្រីការពារជាតិរុស្ស៊ី លោក Sergei Shoigu បានបំពេញទស្សនកិច្ចដ៏កម្រទៅកាន់ទីក្រុងព្យុងយ៉ាង ដើម្បីចូលរួមប្រារព្ធខួបទី៧០ នៃការបញ្ចប់សង្រ្គាមកូរ៉េ ៕

ចិន៖ ជំនួយយោធាអាមេរិកដល់តៃវ៉ាន់ នឹងមិនរារាំងឆន្ទៈរបស់ខ្លួន ក្នុងការបង្រួបបង្រួមកោះនេះទេ

ប្រទេសចិន បានចោទប្រកាន់សហរដ្ឋអាមេរិកថា បានប្រែក្លាយកោះតៃវ៉ាន់ទៅជា«ឃ្លាំងគ្រាប់រំសេវ» បន្ទាប់ពីសេតវិមាន បានប្រកាសកញ្ចប់ជំនួយយោធាចំនួន ៣៤៥ លានដុល្លារ សម្រាប់កោះនេះ។ការិយាល័យកិច្ចការតៃវ៉ាន់របស់ប្រទេសចិន បានចេញសេចក្តីថ្លែងការណ៍មួយកាលពីល្ងាចថ្ងៃសៅរ៍ (ទី ២៩ ខែកក្កដា) ប្រឆាំងនឹងជំនួយយោធាដល់តៃវ៉ាន់ ដែលចិនអះអាងថា ជាទឹកដីរបស់ខ្លួន។លោក Chen Binhua អ្នកនាំពាក្យការិយាល័យកិច្ចការតៃវ៉ាន់បាននិយាយថា វាមិនសំខាន់ថាតើលុយបង់ពន្ធរបស់ប្រជាជនសាមញ្ញប៉ុន្មាននោះទេ… កងកម្លាំងបំបែកខ្លួនរបស់តៃវ៉ាន់ ក៏ត្រូវចំណាយដែរ ទោះបីជាអាវុធរបស់អាមេរិកមានច្រើនប៉ុនណានោះ វានឹងមិនធ្វើឲ្យរង្គោះរង្គើដល់ការតាំងចិត្តរបស់យើងក្នុងការដោះស្រាយបញ្ហាតៃវ៉ាន់ ឬធ្វើឲ្យរង្គោះរង្គើដល់ឆន្ទៈរឹងមាំរបស់យើង ដើម្បីសម្រេចបាននូវការបង្រួបបង្រួមរបស់មាតុប្រទេសរបស់យើងឡើងវិញនោះទេ។សេចក្តីថ្លែងការណ៍នោះ បានឲ្យដឹងថា៖«សកម្មភាពរបស់ពួកគេ កំពុងប្រែក្លាយតៃវ៉ាន់ទៅជាឃ្លាំងគ្រាប់កាំភ្លើង និងឃ្លាំងគ្រាប់រំសេវ ដោយធ្វើឲ្យមានការគំរាមកំហែងនៃសង្គ្រាម នៅក្នុងច្រកសមុទ្រតៃវ៉ាន់ កាន់តែធ្ងន់ធ្ងរ»។សហរដ្ឋអាមេរិកកាលពីថ្ងៃសុក្រ បានបង្ហាញកញ្ចប់ជំនួយយោធាចំនួន ៣៤៥ លានដុល្លារ សម្រាប់តៃវ៉ាន់ ដែលត្រូវបានរៀបចំឡើងយ៉ាងឆាប់រហ័ស ក្នុងការពង្រឹងសមត្ថភាពរបស់កោះនេះ ដើម្បីទប់ស្កាត់លទ្ធភាពលុកលុយរបស់ប្រទេសចិន។

ពលរដ្ឋតំបន់ហ្គាហ្សា តវ៉ាប្រឆាំងការបែកបាក់ផ្ទៃក្នុង និងវិបត្តិអំណាចរយៈពេលយូរមកហើយ

ពលរដ្ឋប៉ាឡេស្ទីន រាប់រយនាក់ បានមកប្រមូលផ្តុំគ្នានៅក្នុងតំបន់ហ្គាហ្សា កាលពីថ្ងៃអាទិត្យ ដោយអំពាវនាវសុំឲ្យបញ្ចប់ការបែកបាក់ផ្ទៃក្នុងនៅប៉ាឡេស្ទីនរយៈពេល១៦ឆ្នាំមកនេះ និងវិបត្តិអំណាចរយៈពេលយូរ នៅក្នុងតំបន់។ នៅក្នុងទីក្រុងគែរ មានកិច្ចប្រជុំមួយរវាងភាគីប៉ាឡេស្ទីនដឹកនាំដោយប្រធានាធិបតី លោក Mahmoud Abbas និងបានចូលរួមដោយលោក Ismail Haniyeh( អ៊ីស្មាអ៊ីល ហានីយេ) មេដឹកនាំក្រុមអ៊ីស្លាមនិយមប៉ាឡេស្ទីនហាម៉ាស់ និងភាគីផ្សេងៗទៀត ដែលបានបញ្ចប់ទៅដោយគ្មានអត្ថន័យប្រាកដប្រជា។ លោក Abbas និងលោក Haniyeh ពុំអាចជួសជុលការបែកបាក់គ្នា ចាប់តាំងពីឆ្នាំ២០០៧ នៅពេលក្រុមហាម៉ាស់ ដែលបានប្រឆាំងកិច្ចព្រមព្រៀងសន្តិភាពជាមួយប្រទេសអ៊ីស្រាអែលបានដណ្តើមគ្រប់គ្រងតំបន់ហ្គាហ្សា។អាជ្ញាធរប៉ាឡេស្ទីនដែលគាំទ្រដោយប្រទេសលោកខាងលិច របស់លោកប្រធានាធិបតី Abbas នៅតែមានអំណាចលេចធ្លោនៅក្នុងតំបន់West Bank ដែលកាន់កាប់ដោយអ៊ីស្រាអែល។

រុស្ស៊ីព្រមានថា ខ្លួនត្រូវតែប្រើអាវុធនុយក្លេអ៊ែរ ប្រសិនបើការវាយបករបស់អ៊ុយក្រែនទទួលបានជោគជ័យ

អតីតប្រធានាធិបតីរុស្ស៊ី លោក ឌីមីទ្រី ម៉េដវ៉េដេវ(Dmitry Medvedev) ដែលពេលខ្លះបានបង្កឲ្យមានក្ដីបារម្ភការផ្ទុះសង្រ្គាមនុយក្លេអ៊ែរ ជុំវិញជម្លោះអ៊ុយក្រែន បាននិយាយកាលពីថ្ងៃអាទិត្យថា ក្រុងមូស្គូ នឹងត្រូវតែប្រើអាវុធនុយក្លេអ៊ែរ ប្រសិនបើការវាយបករបស់ទីក្រុងគីវ ដែលនៅតែបន្តនោះ ទទួលបានជោគជ័យ ។លោក Medvedevដែលកាន់តំណែងជាអនុប្រធានក្រុមប្រឹក្សាសន្តិសុខរុស្ស៊ី ជាស្ថាប័នមួយត្រូវបានដឹកនាំដោយលោកប្រធានាធិបតី Vladimir Putin បាននិយាយនៅក្នុងសារមួយនៅលើបណ្ដាញសង្គមផ្លូវការរបស់លោកថា រុស្ស៊ី ត្រូវបានបង្ខំឲ្យត្រឡប់ទៅអនុវត្តន៍គោលការណ៍នុយក្លេអ៊ែររបស់ខ្លួននៅក្នុង សេណារីយោបែបនេះ។ លោកបាននិយាយថា សាកស្រមៃមើលថាប្រសិនបើការវាយលុកដែលគាំទ្រដោយណាតូ ជោគជ័យ ហើយពួកគេបានកាន់កាប់ផ្នែកមួយនៃទឹកដីរបស់យើងនោះ យើងនឹងត្រូវបង្ខំឲ្យប្រើអាវុធនុយក្លេអ៊ែរស្របតាមច្បាប់នៃក្រឹត្យរបស់ប្រធានាធិបតីរុស្ស៊ី។លោកបាននិយាយថា ពិតជាពុំមានជម្រើសផ្សេងទៀតទេ។ ដូច្នេះសត្រូវរបស់យើងគួរតែបួងសួងឲ្យក្រុមអ្នកចម្បាំងរបស់យើង ទទួលបានជោគជ័យ ។ ពួកគេកំពុងធ្វើឲ្យប្រាកដថា ភ្លើងនុយក្លេអ៊ែរសកលមិនត្រូវបានដុតបញ្ឆេះទេ ។លោក Medvedev ដែលបានចាត់ទុកខ្លួនឯងថាជាសំឡេងដ៏មានឥទ្ធិពលបំផុតមួយរបស់ទីក្រុងមូស្គូ ទំនងសំដៅលើផ្នែកមួយនៃគោលនយោបាយនុយក្លេអ៊ែររបស់រុស្ស៊ី ដែលកំណត់ថា អាវុធនុយក្លេអ៊ែរ អាចត្រូវបានប្រើប្រាស់ក្នុងការឆ្លើយតបទៅនឹងការឈ្លានពានប្រឆាំងនឹងរុស្ស៊ីដែលបានអនុវត្តដោយប្រើអាវុធធម្មតាដែលគំរាមដល់សន្តិសុខរដ្ឋរបស់រុស្ស៊ី ៕

ប្លុកអាហ្រ្វិកគំរាមកំហែងប្រើប្រាស់កម្លាំង លើក្រុមមេដឹកនាំរដ្ឋប្រហារនីហ្សេ

ក្រុមមេដឹកនាំនៃប្លុកប្រទេសអាហ្វ្រិកខាងលិច បានជួបប្រជុំគ្នាកាលពីថ្ងៃអាទិត្យ ហើយបានថ្កោលទោសរដ្ឋប្រហារយោធាមួយ ដែលកាលពីសប្តាហ៍មុន បានផ្តួលរំលំរដ្ឋាភិបាលនីហ្សេ ហើយបានចេញឱសានវាទដល់ក្រុមមេដឹកនាំរដ្ឋប្រហារ។ «ក្នុងករណីដែលការទាមទាររបស់អាជ្ញាធរ មិនត្រូវបានបំពេញក្នុងរយៈពេលមួយ សប្តាហ៍ត្រូវចាត់វិធានការទាំងអស់ដែលចាំបាច់ ដើម្បីស្តារសណ្តាប់ធ្នាប់រដ្ឋធម្មនុញ្ញ នៅក្នុងសាធារណរដ្ឋនីហ្សេ។ វិធានការបែបនេះ អាចរាប់បញ្ចូលទាំងការប្រើប្រាស់កម្លាំងផងដែរ។លើសពីការគំរាមកំហែងនៃការប្រើប្រាស់កម្លាំង និងពេលវេលាកំណត់រយៈពេលមួយសប្តាហ៍ ក្រុមមេដឹកនាំនៅក្នុងកិច្ចប្រជុំកំពូលនៅទីក្រុងអាប៊ូចា (Abuja)ប្រទេសនីហ្ស៊េរីយ៉ា បានប្រកាសពីសកម្មភាពបន្ទាន់ មួយចំនួន ព្រំដែនជាមួយប្រទេសនីហ្សេ នឹងត្រូវបិទ ជើងហោះហើរពាណិជ្ជកម្ម ត្រូវបានហាមឃាត់ ប្រតិបត្តិការហិរញ្ញវត្ថុ ត្រូវបានបញ្ឈប់ ទ្រព្យសម្បត្តិជាតិ ត្រូវបានបង្កក និងជំនួយ ត្រូវបានបញ្ចប់។

បារាំងព្រមានថា ខ្លួននឹងមិនអត់ឱនឲ្យឡើយ ក្រោយក្រុមបាតុករគាំទ្ររដ្ឋប្រហារនីហ្សេ វាយប្រហារលើស្ថានទូតរបស់ខ្លួន

ក្រុមអ្នកគាំទ្ររដ្ឋប្រហារបានវាយប្រហារស្ថានទូតបារាំងនៅក្នុងរដ្ឋធានី នីញ៉ាម៉េ (Niamey) កាលពីថ្ងៃអាទិត្យទី៣០កក្កដា ដោយដុតបំពួកភ្លើងនៅខាងក្រៅរបងស្ថានទូត និងវាយកម្ទេចបង្អួចក្នុងការតវ៉ាប្រឆាំងអតីតប្រទេសមហាអំណាចម្ចាស់នឹមអាណានិគមរបស់ប្រទេសនីហ្សេមួយនេះ។ ជាមួយគ្នានេះ បណ្ដាប្រទេសនៅអាហ្រ្វិកខាងលិច បានដាក់ទណ្ឌកម្មសេដ្ឋកិច្ចនិងការធ្វើដំណើរលើក្រុមមេដឹកនាំយោធាថ្មីរបស់ប្រទេសនីហ្សេ ដោយគាំរាមប្រើកម្លាំង ប្រសិនបើពួកគេបរាជ័យក្នុងការប្រគល់អំណាចឲ្យទៅប្រធានាធិបតីដែលត្រូវបានទម្លាក់ចេញពីតំណែងវិញគឺ លោក មហាម៉េដ បាហ្សូម (Mohammed Bazoum) ក្នុងរយៈពេលមួយសប្ដាហ៍។ នៅថ្ងៃជាមួយគ្នានោះដែរ ប្រទេសបារាំង បាននិយាយថាខ្លួននឹងមិនអត់ឱនឲ្យឡើយចំពោះការវាយប្រហារទាំងឡាយ មកលើផលប្រយោជន៍របស់ខ្លួន បន្ទាប់ពីក្រុមអ្នកគាំទ្ររបបយោធាក្នុងប្រទេសនេះ បានវាយប្រហារស្ថានទូតរបស់ខ្លួន ដោយដុតទង់ជាតិបារាំង និងស្រែកសុភាសិតប្រឆាំងប្រទេសបារាំង ក្នុងការតវ៉ាមួយរៀបចំឡើងដោយក្រុមមេដឹកនាំយោធាថ្មី ។ ការធ្វើរដ្ឋប្រហារនេះ ត្រូវបានថ្កោលទោសយ៉ាងទូលំទូលាយ ដោយបណ្ដាប្រទេសជិតខាង និងដៃគូអន្តរជាតិ រួមទាំងសហរដ្ឋអាមេរិក អង្គការសហប្រជាជាតិ សហជីពអាហ្វ្រិក សហភាពអឺរ៉ុប និងប្រទេសបារាំងដែលជាអតីតម្ចាស់អាណានិគម ។ ប្រទេសទាំងនោះ ពុំទទួលស្គាល់ក្រុមមេដឹកនាំថ្មីទាំងនេះឡើយ និងបានទាមទារថា ត្រូវតែប្រគល់អំណាចឲ្យទៅលោកប្រធានាធិបតី មហាម៉េដ បាហ្សូម វិញ៕

ឃាត់ខ្លួនមនុស្ស ១០នាក់ ពាក់ព័ន្ធឃាតកម្មបាញ់សម្លាញ់បុរសម្នាក់នៅខណ្ឌបឹងកេងកង

ភ្នំពេញ៖ កម្លាំងនគរបាលការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញបានសហការជាមួយនឹងកម្លាំងនាយកដ្ឋានព្រហ្មទណ្ឌក្រសួងមហាផ្ទៃចុះឡោមព័ទ្ធទីតាំងមួយកន្លែងដែលមានយីហោសណ្ឋាគារសូផៃ ឃាត់ខ្លួនមនុស្សចំនួន១០នាក់ (ស្រី០៤នាក់) នាក់នាំយកទៅក្រសួងមហាផ្ទៃដើម្បីសួរនាំពាក់ព័ន្ធនឹងករណីឃាតកម្មសម្លាប់បុរសម្នាក់កាលម្សិលមិញនៅខណ្ឌបឹងកេងកង។ប្រតិបត្តិការនេះបានធ្វើឡើងនៅ វេលាម៉ោង១រសៀលថ្ងៃទី៣០ ខែកក្កដាឆ្នាំ ២០២៣ ស្ថិតនៅតាមបណ្ដោយផ្លូវលេខ២៧១ ទីតាំង សណ្ឋាគារសូផៃ ទល់មុខផ្សារហេងលី មូលដ្ឋានសង្កាត់ទឹកថ្លា ខណ្ឌសែនសុខ រាជធានីភ្នំពេញ។គួរបញ្ជាក់ផងដែរ កាលពីវេលាម៉ោង ២:០០រសៀល ថ្ងៃទី២៩ ខែកក្កដា ឆ្នាំ២០២៣ មានបុរសជនបរទេសម្នាក់ ត្រូវបានខ្មាន់កាំភ្លើងបាញ់ស្លាប់ភ្លាមៗយ៉ាងអាណោចអាធ័ម បន្ទាប់ពីឈ្លោះទាស់ទែងគ្នាមួយប្រាវ ដោយជនរងគ្រោះបានដកកាំបិត ប៉ុន្តែភាគីជនសង្ស័យមានកាំភ្លើង ក៏បានដកបាញ់ ៤គ្រាប់ផ្ទួនៗ រួចនាំគ្នារត់ឡើងឡានរត់គេចខ្លួនបាត់ស្រមោល ស្ថិតនៅចំណុចផ្លូវ៣៦០ កែងផ្លូវ១៦៣ សង្កាត់ទួលស្វាយព្រៃទី១ ខណ្ឌបឹងកេងកេង រាជធានីភ្នំពេញ។តាមប្រភពព័ត៌មានបានឲ្យដឹងថា មុនពេលកើតហេតុ គេបានឃើញជនរងគ្រោះ និងខ្មាន់កាំភ្លើង បានមានទំនាស់ទាស់ទែងគ្នា ពេលនោះជនរងគ្រោះក៏ដើរចេញ ស្រាប់តែភាគីម្ខាងទៀត បានទាញកាំភ្លើង ដេញបាញ់បុរសរងគ្រោះជាច្រើនគ្រាប់ផ្ទួនៗគ្នា ដោយជនរងគ្រោះបានព្យាយាមរត់ឲ្យគេជួយដែរ តែត្រូវជនដៃដល់ បាញ់ស្លាប់យ៉ាងរន្ធត់ រួចប្រញាប់រត់ឡើងជិះរថយន្តឡិចស៊ីស NX200t ដើម្បីគេចខ្លួនបាត់តែម្តង ។បើតាមការបញ្ជាក់ពីសមត្ថកិច្ចជនរងគ្រោះជាជនបរទេស តែមិនទាន់ដឹងជនជាតិ។ ជនរងគ្រោះមានអាយុប្រហែល ៣០ឆ្នាំជាង ស្លៀកខោខ្លី ពណ៌សាច់ ជើងខ្លី ពាក់អាវស ដៃវែង ស្ពាយកាបូបពណ៌ខ្មៅ ពាក់ស្បែកជើងស៊ក ហើយបើតាមការធ្វើកោសល្យវិច័យ នៅទីតាំងកើតហេតុផ្ទាល់ ឃើញមានគ្រាប់ចំនួន ៤គ្រាប់។បច្ចុប្បន្នជនសង្ស័យទាំង១០នាក់ បញ្ចូនទៅក្រសួងមហាផ្ទៃដើម្បីសួនាំ កសាងសំណុំរឿងចាត់ការតាមនីតិវិធី៕ អត្ថបទ៖ កុម្ភៈ

ប្រទេសសិង្ហបុរីប្រហារជីវិតស្ត្រីម្នាក់ជាលើកដំបូងក្នុងរយៈពេល២០ឆ្នាំ

សិង្ហបុរី៖ នៅថ្ងៃសុក្រនេះ ប្រទេសសិង្ហបុរីបានប្រហារជីវិតស្ត្រីម្នាក់ជាលើកដំបូងក្នុងរយៈពេលជិត ២០ឆ្នាំមកនេះ។ អ្នកស្រី Saridewi Djamani ជនជាតិសិង្ហបុរីវ័យ ៤៥ឆ្នាំត្រូវបានគេរកឃើញថាមានពិរុទ្ធពីបទជួញដូរគ្រឿងញៀនហេរ៉ូអ៊ីនចំនួន ៣០ក្រាម កាលពីឆ្នាំ២០១៨។អ្នកស្រីគឺជាអ្នកទោសគ្រឿងញៀនទី២ ដែលត្រូវបានកាត់ទោសប្រហារជីវិតនៅសប្តាហ៍នេះ បន្ទាប់ពីមិត្តរួមជាតិសិង្ហបុរីឈ្មោះ Mohd Aziz bin Hussain និងជាជនទី១៥ ដែលត្រូវបានកាត់ទោសប្រហារជីវិតចាប់តាំងពីខែមីនា ឆ្នាំ២០២២មក។ សិង្ហបុរីមានច្បាប់ប្រឆាំងគ្រឿងញៀនដ៏តឹងតែងបំផុតមួយចំនួនក្នុងពិភពលោក ដែលប្រទេសនេះនិយាយថាចាំបាច់ដើម្បីការពារសង្គម។ច្បាប់របស់ប្រទេសសិង្ហបុរីបានកំណត់ថា ទោសប្រហារជីវិតនឹងត្រូវដាក់លើអ្នកណាមួយដែលត្រូវបានចាប់ខ្លួនពីបទជួញដូរកញ្ឆាលើសពី ៥០០ក្រាម ឬហេរ៉ូអ៊ីនលើសពី ១៥ក្រាម។ តុលាការកំពូលរបស់ទីក្រុងបានច្រានចោលបណ្តឹងឧទ្ធរណ៍ប្រឆាំងនឹងការផ្តន្ទាទោសរបស់អ្នកស្រី Saridewi Djamani កាលពីថ្ងៃទី៦ ខែតុលាឆ្នាំមុន។ ក្រុមអាជ្ញាធរបាននិយាយថា ញត្តិសុំលើកលែងទោសរបស់លោកប្រធានាធិបតីក៏មិនបានជោគជ័យផងដែរ៕

មនុស្សជិត ២០០លាននាក់នៅសហរដ្ឋអាមេរិកកំពុងស្ថិតនៅក្រោមការណែនាំអំពីកម្ដៅ និងទឹកជំនន់

អាមេរិក៖ប្រជាជនជិត ២០០លាននាក់នៅក្នុងសហរដ្ឋអាមេរិក ឬស្មើនឹង ៦០% នៃចំនួនប្រជាជនអាមេរិកទាំងអស់ កំពុងស្ថិតនៅក្រោមការណែនាំអំពីរលកកម្ដៅ ការព្រមានអំពីទឹកជំនន់ ឬការឃ្លាំមើល នៅពេលដែលសីតុណ្ហភាពខ្ពស់បានរីករាលដាលពាលពេញប្រទេស ហើយតំបន់ជាច្រើនត្រូវបានព្រមានពីព្យុះដ៏ខ្លាំងដែលអាចនឹងកើតមានផងដែរ។សេវាអាកាសធាតុជាតិបាននិយាយថា រលកកម្ដៅដ៏គ្រោះថ្នាក់ បានចាប់ផ្តើមវាយប្រហារនៅភាគឦសាន និងតំបន់កណ្តាលអាត្លង់ទិកកាលពីថ្ងៃព្រហស្បតិ៍ ហើយនឹងបន្តដល់ចុងសប្តាហ៍។ ព្យុះផ្គររន្ទះ និងទឹកជំនន់ដ៏គំហុក អាចកើតមានសម្រាប់ផ្នែកខ្លះនៃភាគឦសាន និងខាងត្បូង រដ្ឋញូវអ៊ីងឡិន និងរដ្ឋហ្វ្លរីដាខាងត្បូងផងដែរ។ ទន្ទឹមនឹងនេះ សីតុណ្ហភាពកម្រិតបំបែកកំណត់ត្រានឹងបន្តកើតមានសម្រាប់ភាគនិរតី និងកណ្តាលខាងលិច។ក្រុមអ្នកវិទ្យាសាស្ត្របានព្រមានជាយូរមកហើយថា បម្រែបម្រួលអាកាសធាតុ ដែលជំរុញដោយការដុតឥន្ធនៈហ្វូស៊ីល នឹងនាំឱ្យអាកាសធាតុកាន់តែធ្ងន់ធ្ងរ និងអូសបន្លាយពេលយូរ។ការព្យាករណ៍សម្រាប់កំណើនកម្ដៅខ្លាំង កើតឡើងមួយថ្ងៃបន្ទាប់ពីអង្គការឧតុនិយមពិភពលោក និងសេវាកម្មផ្លាស់ប្តូរអាកាសធាតុ Copernicus របស់សហភាពអឺរ៉ុបបានប្រកាសថា ខែកក្កដាឆ្នាំ២០២៣នេះ ជាខែក្តៅបំផុតក្នុងកំណត់ត្រាពិភពលោក៕

បណ្ដាញសង្គម

ព័ត៌មានថ្មីៗ

ក្រុមជួយសង្រ្គោះ ជម្លៀសភ្ញៀវទេសចរបរទេស អ្នកស្រុក ក្រោយទឹកជំនន់វាយប្រហារទីក្រុង Lonavala របស់ឥណ្ឌា

UN៖ ករណីឆ្លងជំងឺអេបូឡានៅកុងហ្គោ កើនឡើងជាង ១.៥៦០នាក់ ស្របពេលវិបត្តិជម្លៀសខ្លួនកាន់តែអាក្រក់

នាវាដឹកប្រេង ២គ្រឿងរងការវាយប្រហារនៅច្រកសមុទ្រ Hormuz ខណៈមនុស្សរាប់លាននាក់កាន់ទុក្ខលោក Khamenei

រយៈពេល ១ពាន់ថ្ងៃនៃអំពើប្រល័យពូជសាសន៍អ៊ីស្រាអែលនៅតំបន់ហ្កាហ្សា

ការតម្រង់ជួរយ៉ាងវែងនៅតាមស្ថានីយប្រេងក្នុងទីក្រុង Omsk ក្រោយអ៊ុយក្រែនវាយប្រហាររោងចក្រចម្រាញ់ប្រេងធំបំផុតរបស់រុស្ស៊ី

អាមេរិក និងអង្គការណាតូ ប្រកាសកិច្ចព្រមព្រៀងការពារជាតិក្នុងកិច្ចប្រជុំកំពូលនៅទីក្រុង Ankara

ពលរដ្ឋអ៊ីរ៉ង់កាន់បដាគំរាមលោក Trumpនៅពិធីបុណ្យសពអតីតមេដឹកនាំ Khamenei

វិមានក្រឹមឡាំងសង្ឃឹមថា កិច្ចខិតខំសន្តិភាពរបស់អាមេរិកនៅអ៊ុយក្រែន នឹងជោគជ័យ

មនុស្សម្នាក់ស្លាប់ និង ៧នាក់បាត់ខ្លួន ក្រោយបំណាក់ដីនៅរដ្ឋ Kerala ប្រទេសឥណ្ឌា

ពលរដ្ឋហ្កាហ្សាសង្ឃឹមថា ការរំសាយស្ថាប័នក្រុមហាម៉ាស នឹងជំរុញឲ្យមានកសាងតំបន់ឡើងវិញ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877