BTV NEWS

អគ្គនាយកដ្ឋានពន្ធនាគារ កំពុងសិក្សារៀបចំទីតាំងឃុំឃាំងថ្មីបន្ថែម ខណៈចំនួនជនជាប់ឃុំមានការកើនឡើងខ្លាំង

សមត្ថកិច្ចខេត្តព្រះសីហនុរកឃើញអ្នកបើកបររថយន្តធុនធ្ងន់មួយចំនួនមានសារធាតុគ្រឿងញៀននៅក្នុងខ្លួន

ឆេះខុនដូ Wealth Mansion តែសមត្ថកិច្ចជួយពន្លត់ទាន់ពេលដោយមិនរាលដាលទ្រង់ទ្រាយធំ

ជនជាតិវៀតណាម និងជនជាតិចិនជាងពីររយនាក់ទៀតត្រូវបានអាជ្ញាធរបណ្តេញចេញពីកម្ពុជាក្រោយរក ឃើញជាប់ពាក់ព័ន្ធករណី Online Scams

សន្តិសុខ និង សង្គម

UN៖ កម្រិតនៃការភៀសខ្លួនដោយបង្ខំជាសកល កើនឡើងដល់កំណត់ត្រា ១១០លាននាក់

ប្រធានទីភ្នាក់ងារជនភៀសខ្លួនអង្គការសហប្រជាជាតិ បាននិយាយថា ចំនួនប្រជាជនដែលបានភៀសខ្លួនដោយបង្ខំ នៅជុំវិញពិភពលោក បានកើនឡើងដល់កំណត់ត្រា១១០លាននាក់ ដោយសារជម្លោះនៅអ៊ុយក្រែន និងនៅស៊ូដង់ កំពុងជំរុញឲ្យមនុស្សរាប់លាននាក់ភៀសខ្លួនចេញពីលំនៅឋានរបស់ពួកគេ។ អង្គការ UNHCR បាននិយាយនៅក្នុងរបាយការណ៍នៅថ្ងៃពុធទី១៤ ខែមិថុនានេះថា ការកើនឡើងប្រមាណ១៩លាននាក់ ដល់១០៨,៤ លាននាក់ នៅត្រឹមចុងឆ្នំាកន្លងទៅនេះ គឺជាការហក់ឡើងប្រចាំឆ្នាំច្រើនបំផុតលើកំណត់ត្រា។ ឧត្តមស្នងការទទួលបន្ទុកជនភៀសខ្លួនអង្គការសហប្រជាជាតិ លោក Filippo Grandi បានប្រាប់អ្នកសារព័ត៌មាន អំឡុងសន្និសីទកាលពីថ្ងៃចន្ទថា ចាប់តាំងពីពេលនោះមក ចំនួននេះ បានកើនឡើងបន្ថែមរហូតដល់១១០លាននាក់ ដែលភាគច្រើនដោយសារតែជម្លោះរយៈពេល៨សប្តាហ៍នៅប្រទេសស៊ូដង់។របាយការណ៍ពីការភៀសខ្លួនដោយបង្ខំបានបង្ហាញថា រយៈពេល២ទសវត្សរ៍មុនពេលជម្លោះនៅប្រទេសស៊ីរី ក្នុងឆ្នាំ២០១១ កម្រិតសកលគឺជនភៀសខ្លួននៅថេរមានប្រមាណ៤០លាននាក់រួមទំាងពលរដ្ឋភៀសខ្លួននៅក្នុងប្រទេស។ ប៉ុន្តែចំនួនបានកើនឡើងរៀងរាល់ឆ្នាំ ចាប់តាំងពីពេលនោះមក ហើយពេលនេះមានចំនួនច្រើនជាងទ្វេដង។ មនុស្សម្នាក់ក្នុងចំណោម៧៤នាក់ នាពេលបច្ចុប្បន្នេះ បានភៀសខ្លួនចេញ។ លោក Grandi បានដាក់កំហុសលើមូលហេតុជាទៀងទាត់ ដែលលោកបាននិយាយថា គឺជាជម្លោះ ការធ្វើទុក្ខបុកម្នេញ ការរើសអើង អំពើហិង្សា និងបម្រែបម្រួលអាកាសធាតុ។ ក្នុងចំណោមជនភៀសខ្លួនទាំងអស់ និងអ្នកទាំឡាយដែលត្រូវការ ការការពារ ប្រមាណពាក់កណ្តាលនៃជនភៀសខ្លួនបានមកពីប្រទេសចំនួន៣ មាន ស៊ីរី អ៊ុយក្រែន និងប្រទេសអាហ្វហ្គានីស្ថាន។ លោក Grandi បានលើកឡើងពីការព្រួយបារម្ភអំពីវិធានការកាន់តែតឹងរ៉ឹងលើការទទួលយកជនភៀសខ្លួន និងរុញត្រឡប់ទៅវិញ ដោយពុំបាននិយាយពីឈ្មោះប្រទេសណាខ្លះនោះទេ៕

ឥណ្ឌាផ្អាកសកម្មភាពដឹកទំនិញ និងជម្លៀសពលរដ្ឋរាប់ពាន់នាក់ពីរដ្ឋ Gujarat មុនពេលព្យុះស៊ីក្លូនមកដល់

ឥណ្ឌា៖ រដ្ឋមន្ត្រីក្រសួងសុខាភិបាលរបស់ប្រទេសនេះ បាននិយាយកាលពីថ្ងៃអង្គារថា ប្រទេសឥណ្ឌាបានផ្អាកការដឹកជញ្ជូនទំនិញ នៅកំពង់ផែ Kandla របស់រដ្ឋ Gujarat ភាគខាងលិច និងបានជម្លៀសពលរដ្ឋយ៉ាងហោចណាស់៣ពាន់នាក់ ក្នុងការត្រៀមទុកជាមុនសម្រាប់ការខិតចូលេជិតមកដល់នៃព្យុះស៊ីក្លូន Biparjoy ។ ពលរដ្ឋរួមមានទាំងកុមារ ពេលនេះកំពុងស្នាក់នៅក្នុងទីជម្រកក្នុងសាលមហោស្រពនៅក្នុងទីក្រុង Gandhidham ។ រដ្ឋមន្ត្រីក្រសួងសុខាភិបាល លោក Mansukh Mandaviya បានចុះពិនិត្យ និងបាននិយាយទៅកាន់ពលរដ្ឋមួយចំនួន។ ក្រសួងឧត្តុនិយមឥណ្ឌានិយាយថា ព្យុះស៊ីក្លូន Biparjoy ជាព្យុះស៊ីក្លូនដ៏ខ្លាំង ត្រូវបានគេរំពឹងថា នឹងបណ្តាលឲ្យមានបំណាក់ដីនៅអំឡុងល្ងាចថ្ងៃព្រហស្បតិ៍ទី១៥ ខែមិថុនា រវាងទីក្រុង Mandvi ក្នុងរដ្ឋ Gujarat របស់ប្រទេសឥណ្ឌា និងទីក្រុង Karachi ក្នុងប្រទេសប៉ាគីស្ថាន ដោយមានល្បឿនខ្យល់អតិបរមា១២៥ ទៅ១៣៥គីឡូម៉ែត្រក្នុងមួយម៉ោង ដែលមានសន្ទុះខ្យល់កន្ត្រាក់រហូតដល់១៥០គីឡូម៉ែត្រក្នុងមួយម៉ោង។ រដ្ឋាភិបាលរដ្ឋ បាននិយាយថា ស្រុកចំនួន៨ ក្នុងរដ្ឋ Gujarat តំបន់ឆ្នេរ ត្រូវបានគេរំពឹងថា នឹងរងផលប៉ះពាល់។ ប្រតិបត្តិការនេសាទនៅក្នុងតំបន់ ត្រូវបានផ្អាករហូតដល់ថ្ងៃសុក្រទី១៦ ខែមិថុនា ខណៈសាលារៀនជាច្រើនកន្លែង បានប្រកាសពីការឈប់សម្រាក៕

[UPDATE]៖ មនុស្ស ១០នាក់រងការបាញ់ប្រហារឲ្យរបួសនៅទីក្រុង Denver ក្រោយក្រុមបាល់បោះ Denver Nuggets ឈ្នះជើងឯក NBA

អាមេរិក៖ ក្រុមនគរបាល និយាយថា មនុស្ស ១០នាក់ បានរងរបួសក្នុងហេតុការណ៍បាញ់បោះសេរី នៅទីក្រុង Denver រដ្ឋ Colorado សហរដ្ឋអាមេរិក កាលពីព្រឹកថ្ងៃអង្គារ ក្រោយក្រុមអ្នកគាំទ្របាល់បោះ ជួបជុំគ្នានៅតាមដងផ្លូវដើម្បីអបអរសាទរ ជ័យជំនះ ពេលដែលក្រុម Denver Nuggets ក្លាយជាជើងឯកបាល់បោះ NBA លើកដំបូងរបស់ពួកគេ ។ ស្នងការដ្ឋាននគរបាលក្រុង Denver បាននិយាយនៅលើបណ្តាញព័ត៌មានសង្គម Twitterថា ជនសង្ស័យម្នាក់ ដែលស្ថិតនៅក្នុងចំណោមអ្នករងរបួស ត្រូវបានឃាត់ខ្លួន និងយកទៅឃុំឃាំង ក្រោយការបាញ់ប្រហារនៅផ្លូវ Market Street ។ នគរបាលនិយាយថា ជនរងគ្រោះផ្សេងទៀត រួមទាំងជនសង្ស័យ ត្រូវបានគេជឿថា មានរបួសមិនគំរាមកំហែងដល់អាយុជីវិតនោះឡើយ ។ ពួកគេបន្តថា ការបាញ់ប្រហារនេះ បង្កឡើងពីជម្លោះពាក់ព័ន្ធនឹងមនុស្សជាច្រើននាក់ ហើយវាគឺជាការស៊ើបដ៏ស្មុគស្មាញមួយនៅដំណាក់ដំបូង ។ ហេតុការណ៍បាញ់ប្រហារនេះដែរ បានកើតនៅចម្ងាយប្រហែល ១,៦គ.ម ភាគឦសានកីឡដ្ឋានជាទីដែលក្រុម Nuggets បានយកឈ្នះក្រុម Miami Heat ដើម្បីលើកពាន NBA ជាលើកដំបូងក្នុងប្រវត្តិសាស្រ្តរយៈពេល៤៧ឆ្នាំ របស់ពួកគេ ៕

មនុស្ស ១០នាក់រងការបាញ់ប្រហារឲ្យរបួសនៅទីក្រុង Denver ក្រោយក្រុមបាល់បោះ Denver Nuggets ឈ្នះជើងឯក NBA

នគរបាលអង់គ្លេស ចាប់ខ្លួនជនសង្ស័យពីបទឃាតកម្ម បន្ទាប់ពីសាកសព៣នាក់ត្រូវបានរកឃើញនៅលើផ្លូវ Nottingham

អង់គ្លេស៖ នគរបាលអង់គ្លេសបាននិយាយថា បុរសម្នាក់ត្រូវបានចាប់ខ្លួន ពីបទសង្ស័យឃាតកម្មបន្ទាប់ពីមនុស្ស៣នាក់ត្រូវបានរកឃើញស្លាប់នៅលើផ្លូវ ក្នុងទីក្រុង Nottingham នៅអង់គ្លេសភាគកណ្តាល កាលពីថ្ងៃអង្គារ ហើយមនុស្ស៣នាក់ទៀត បានរងរបួសបន្ទាប់ការប៉ុនប៉ងមួយដើម្បីកៀរផ្តួលពួកគេដោយរថយន្ត។មន្ត្រីនគរបាលនិយាយថា ពួកគេបានទទួលយកគំនិតខុសៗគ្នាអំពីមូលហេតុនាំឲ្យកើតមានឧបទ្ទវហេតុដែលជាប់ពាក់ព័ន្ធ ហើយដែលបានកើតឡើងក្រោយម៉ោង៤ព្រឹកម៉ោងក្នុងតំបន់ និងបាននិយាយថា មន្ត្រីប្រឆាំងភេរវកម្ម កំពុងធ្វើការលើការស៊ើបអង្កេត ទោះបីជាពួកគេនិយាយថា នេះជារឿងធម្មតាក៏ដោយ។ ២នាក់ក្នុងចំណោមអ្នកដែលត្រូវបានសម្លាប់ គឺជានិស្សិតមកពីសាកលវិទ្យាល័យមួយនៅក្នុងទីក្រុង។ បុរសវ័យ៣១ឆ្នាំម្នាក់ ត្រូវបានចាប់ខ្លួនលើបទសង្ស័យឃាតកម្ម ហើយមន្ត្រីស៊ើបការណ៍សម្ងាត់ បាននិយាយថា ពួកគេមិនស្វែងរកមនុស្សណាម្នាក់ផ្សេងទៀតនោះទេ។ប្រតិបត្តិការដ៏ធំ ដែលនាំទៅរកការបិទផ្លូវជាច្រើនកន្លែងនៅទូទាំងទីក្រុង Nottingham បានចាប់ផ្តើម បន្ទាប់ពី នគរបាល ត្រូវបានទូរស័ព្ទហៅតាមការរាយការណ៍ថាមនុស្ស២នាក់ត្រូវបានសម្លាប់នៅលើផ្លូវនៅកណ្តាលទីក្រុង។ ក្រោយមកមន្ត្រីបានប្រកាសឧបទ្ទវហេតុមួយផ្សេងទៀតនៅមិនឆ្ងាយពីគ្នា ជាកន្លែងដែលមនុស្សម្នាក់បានបើកបររថយន្តមួយគ្រឿងព្យាយាមកៀរផ្តួលមនុស្ស៣នាក់ បណ្តាលឲ្យបុរសម្នាក់ស្ថិតក្នុងស្ថានភាពធ្ងន់ធ្ងរនៅក្នុងមន្ទីពេទ្យ ខណៈ២នាក់ផ្សេងទៀតរងរបួស្រាល។ ក្រោយមក បុរសម្នាក់ផ្សេងទៀតត្រូវបានរកឃើញស្លាប់ភ្លាមៗនៅលើផ្លូវមួយចម្ងាយប្រហែម២ម៉ាយពីកន្លែងកើតមានឧបទ្ទវហេតុដំបូង៕

ឧបទ្ទវហេតុលិចទូក នៅនីហ្ស៊េរីយ៉ា បណ្ដាលឲ្យមនុស្សស្លាប់៥០នាក់ និងជាច្រើននាក់បាត់ខ្លួន

នីហ្ស៊េរីយ៉ា៖ អ្នកស្រុក និងមន្ត្រីរដ្ឋ បានឲ្យដឹងកាលពីថ្ងៃអង្គារថា យ៉ាងហោចណាស់មនុស្ស ៥០នាក់ បានលង់ទឹកស្លាប់ និងជាច្រើននាក់ផ្សេងទៀត បានបាត់ខ្លួន បន្ទាប់ពីទូកដឹកលើសទម្ងន់មួយគ្រឿង បានក្រឡាប់លិច នៅតំបន់កណ្តាលភាគបែកខាងជើងនៃប្រទេសនីហ្ស៊េរីយ៉ា។អ្នកស្រុកបានប្រាប់ថា ទូកឈើនោះ បាននិងកំពុងដឹកមនុស្សឆ្លងទន្លេទៅកាន់រដ្ឋ Kwara បន្ទាប់ពីចប់ពិធីមង្គលការមួយ ក្នុងរដ្ឋជិតខាង Niger(នីហ្ស៊េ) ហើយទូកនោះ បានលិច កាលពីយប់ថ្ងៃចន្ទ។ ភ្លាមៗនោះ គេមិនទាន់ដឹងច្បាស់ទេថា មានមនុស្សប៉ុន្មាននាក់នៅក្នុងទូកនោះទេ ប៉ុន្តែរដ្ឋាភិបាលរដ្ឋ Kwara នៅក្នុងសេចក្តីថ្លែងការណ៍មួយ បានឲ្យដឹងថា ប្រជាជនគឺមកពីភូមិចំនួនប្រាំផ្សេងគ្នា ហើយថា កិច្ចប្រឹងប្រែងជួយសង្គ្រោះ ដើម្បីរកអ្នកដែលអាចនៅមានជីវិត បាននិងកំពុងដំណើរការនៅឡើយ។សេចក្តីថ្លែងការណ៍នោះ បានបន្តថា អភិបាលរដ្ឋ Kwara បានសម្តែងអារម្មណ៍អាណិតអាសូរចំពោះប្រជាជន ពេលដឹងនូវព័ត៌មានដ៏គួរឲ្យតក់ស្លុតនៃឧបទ្ទវហេតុលិចទូក ដែលធ្វើឲ្យមានការភ័យខ្លាចថា មនុស្សរាប់សិបនាក់ត្រូវស្លាប់ និងជាច្រើននាក់ទៀតនៅតែបាត់ខ្លួន។ អ្នកនាំពាក្យនគរបាលរដ្ឋ Kwara មិនអាចទាក់ទងសុំការអធិប្បាយបានទេ នៅពេលនេះ៕

ចំនួនអ្នកស្លាប់ពីការបង្អត់អាហារខ្លួនឯងតាមជំនឿសាសនានៅកេនយ៉ាបានកើនឡើងដល់ជាង៣០០នាក់

កេនយ៉ា៖ ចំនួនអ្នកស្លាប់ពីការបង្អត់អាហារខ្លួនឯងតាមជំនឿសាសនារបស់ប្រជាជនកេនយ៉ា បានកើនឡើងដល់ជាង៣០០នាក់ កាលពីថ្ងៃអង្គារ បន្ទាប់ពីក្រុមអាជ្ញាធរ គាស់បានសាកសពបន្ថែមទៀតនៅក្នុងព្រៃមួយ ជាសោកនាដកម្មមួយក្នុងចំណោមសោកនាដកម្មដ៏អាក្រក់បំផុតពាក់ព័ន្ធសាសនា ក្នុងប្រវត្តិសាស្ត្រសម័យទំនើប។ ក្រុមអាជ្ញាធរ និយាយថា ចំនួនអ្នកស្លាប់ភាគច្រើនមកពីវិហារអន្តរជាតិដំណឹងល្អ Good News International Church ដឹកនាំដោយលោក Paul Mackenzie ដែលត្រូវបានចោទប្រកាន់ពីបទបញ្ជាឲ្យក្រុមសាវ័ករបស់ខ្លួនបង្អត់អាហារខ្លួនឯងនិងកូនៗរបស់ពួកគេ រហូតដល់ស្លាប់ ដើម្បីអាចឡើងទៅឋានសួគ៌ មុនពេលអវសាននៃពិភពលោកនេះ។ មន្ត្រីមូលដ្ឋាន លោក រ៉ូដា អូនីអានចា (Rhoda Onyancha ) បាននិយាយថា មនុស្សសរុបចំនួន៣០៣នាក់បានស្លាប់ បន្ទាប់ពីសាកសព១៩នាក់ទៀត ត្រូវបានគាស់ចេញពីផ្នូររួមមួយក្នុងព្រៃសាកាហូឡា (Shakahola) ក្នុងភាគអាគ្នេយ៍ របស់ប្រទេសនេះ ។ មនុស្សជាង៦០០នាក់ នៅតែត្រូវបានរាយការណ៍ថាកំពុងបាត់ខ្លួននៅឡើយ ។ ការស៊ើបអង្កេតកាលពីសប្ដាហ៍មុន បានបន្ថែមការងារស្រាវជ្រាវរបស់ខ្លួនដើម្បីគ្របដណ្ដប់លើតំបន់កាន់តែធំក្នុងតំបននេះ ក្នុងការស្វែងរកជនរងគ្រោះបន្ថែមទៀត ។ប្រព័ន្ធផ្សព្វផ្សាយក្នុងស្រុកបានរាយការណ៍ថា អ្នកដើរតាមគ្រូគង្វាលដែលបានជួយសង្គ្រោះប្រហែល ៦៥ នាក់ត្រូវបានចោទប្រកាន់ពីបទប៉ុនប៉ងធ្វើអត្តឃាតកាលពីថ្ងៃចន្ទ បន្ទាប់ពីពួកគេបានបដិសេធមិនព្រមទទួលទានអាហាររវាងថ្ងៃទី ៦ ខែមិថុនាដល់ថ្ងៃទី ១០ ខែមិថុនា អំឡុងពេលស្នាក់នៅក្នុងមជ្ឈមណ្ឌលសង្គ្រោះ៕

សាកសពមួយត្រូវបានគេប្រទះឃើញនៅក្នុងគំនរបាក់បែកនៃផ្លូវហាយវ៉េ I-95

អាមេរិក៖ សាកសពមនុស្សម្នាក់ត្រូវបានគេរកឃើញកាលពីថ្ងៃចន្ទពីបំណែកបាក់បែកនៃទីដែលផ្លូវហាយវ៉េ I-95 បានបាក់នៅទីក្រុងហ្វីឡាឌែលហ្វៀ (Philadelphia) សហរដ្ឋអាមេរិក នេះបើយោងតាមនគរបាលរដ្ឋ។ សាកសពត្រូវបានរកឃើញ នៅពេលដែលក្រុមជីកកកាយ ធ្វើការសម្អាតកម្ទេចកម្ទីចេញពីទីតាំង ហើយត្រូវបានបញ្ជូនទៅកាន់គ្រូពេទ្យកោសល្យវិច្ច័យ ដើម្បីកំណត់អត្តសញ្ញាណ។គេមិនដឹងថាសាកសពនោះជានរណាទេ។ ទូរទស្សន៍ WPVI ក្នុងស្រុកបានរាយការណ៍ថា អ្នកបើកបររថយន្តដឹកទំនិញឈ្មោះ Nathan Moody មិនត្រូវបានរកឃើញទេ បន្ទាប់ពីគ្រោះថ្នាក់កើតឡើងភ្លាមៗ។ការបាក់រលំមួយផ្នែកនៃផ្លូវហាយវេដ៏សំខាន់មួយនៅតាមបណ្តោយឆ្នេរភាគខាងកើតរបស់សហរដ្ឋអាមេរិកបានបណ្តាលឱ្យមានការលំបាកសម្រាប់អ្នកធ្វើដំណើរកាលពីថ្ងៃច័ន្ទនៅទីក្រុងឡាឌែលហ្វៀ ដោយមានការកកស្ទះចរាចរណ៍យ៉ាងកកកុញត្រូវបានគេប្រទះឃើញ។ក្រុមមន្ត្រីបាននិយាយថា វានឹងចំណាយពេលជាច្រើនខែដើម្បីសាងសង់ផ្នែកមួយនៃផ្លូវ I-95 ឡើងវិញ ប៉ុន្តែពួកគេកំពុងធ្វើការដើម្បីពន្លឿនដំណើរការនេះ។ សេចក្តីប្រកាសគ្រោះមហន្តរាយត្រូវបានចេញកាលពីថ្ងៃចន្ទ ដោយបានអនុញ្ញាតឲ្យប្រើប្រាស់មូលនិធិសហព័ន្ធសម្រាប់ការជួសជុលនេះ៕

ព្យុះទឹកកកបោកបក់លើទីក្រុង Boulder រដ្ឋ Colorado សហរដ្ឋអាមេរិក

អាមេរិក៖ រូបភាពវីដេអូឃ្លីបរបស់សាក្សី ថតបានព្យុះទឹកកកដ៏ខ្លាំងក្លាកាលពីថ្ងៃចន្ទ នៅទីក្រុង Boulder រដ្ឋ Colorado សហរដ្ឋអាមេរិក ។ ដុំទឹកកក បានគរនៅតាមផ្លូវប្រៀបបាននឹងកម្រាលពណ៌ស. ដូចជាព្រិល ។ ដោយឡែក ព្យុះភ្លៀង បានកើតមានផងដែរកាលពីថ្ងៃចន្ទនៅតំបន់ Pikes Peakបង្កឲ្យមានភ្លៀងធ្លាក់ខ្លាំង និងបង្កជាទឹកជំនន់។ សេវាកម្មឧតុនិយមជាតិ បានចេញសេចក្តីណែនាំពីទឹកហូរខ្លាំងនៅថ្ងៃនេះ ដែលរួមទាំងការព្រមានពីព្យុះកួច នៅស្រុកភាគខាងត្បូង El Paso ។ ការព្រមានពីទឹកជំនន់បច្ចុប្បន្នបានចូលជាធរមានផងដែរនៅស្រុក El Paso ។ ទឹកជន់ បានបិទផ្លូវជាច្រើនខ្សែនៅទូទាំងទីក្រុង Boulder ហើយនាយកដ្ឋាននគរបាលរដ្ឋ Colorado ស្ថិតក្នុងការប្រុងជើងកាចំពោះឧបទ្ទេវហេតុ ។ សេវាកម្មឧតុនិយម បានរាយការណ៍ថា ភ្លៀងធ្លាក់ខ្លាំងទ្រង់ទ្រាយធំ បានធ្វើឲ្យប៉ះពាល់ដល់ស្ទឹង និងព្រែក ទាំងនៅស្រុក Teller និងស្រុក El Paso ហើយភ្លៀងនឹងបន្តធ្លាក់រយៈពេល ២៤ម៉ោងទៀត ធ្វើឲ្យកម្ពស់ទឹកហក់ឡើងខ្ពស់ ហើយនិងបង្កជាទឹកជំនន់ផងដែរ ៕

បុរសជនជាតិគុយបា ត្រូវបានជួយសង្រ្គោះក្រោយកប់ក្នុងអណ្តូងជម្រៅ១២ម៉ែត្រអស់រយៈពេលជាង ២៤ម៉ោង

គុយបា៖ បុរសវ័យ ៦៣ឆ្នាំម្នាក់ដែលបានធ្លាក់ចូលអណ្តូងជម្រៅ១២ម៉ែត្រដោយឧបទ្ទេវហេតុ ត្រូវបានគេជួយសង្រ្គោះកាលពីថ្ងៃចន្ទ នៅខេត្ត Holguin ភាគខាងកើតប្រទេសគុយបា ។ យោងតាមទូរទស្សន៍រដ្ឋ បានឲ្យដឹងថា ភ្លៀងធ្លាក់ខ្លាំងកាលពីពេលថ្មីនេះនៅតំបន់នោះ បណ្តាលឲ្យដីទន់ ហើយដីក៏បាក់នៅក្រោមជើងកម្មករកសិដ្ឋានម្នាក់នោះ ដែលកំពុងស្តារអណ្តូង ។ នៅពេលនោះ លោក Fernando Herrera Ramirez ក៏ត្រូវកប់ក្រោមគំនរដី និងថ្ម ។ ទូរទស្សន៍រដ្ឋគុយបា រាយការណ៍ថា ប្រតិបត្តិការជួយសង្រ្គោះ បានចំណាយពេលជាង ២៤ម៉ោង ។ កម្មករម្នាក់នេះ ត្រូវបានបញ្ជូនទៅកាន់មន្ទីរពេទ្យក្នុងស្រុក ដើម្បីពិនិត្យសុខភាព ជាទីដែលគាត់ជាសះស្បើយ ៕

បណ្ដាញសង្គម

ព័ត៌មានថ្មីៗ

ឯកឧត្តម កែប ជុតិមា បង្ហាញពីផលប៉ះពាល់នៃជម្លោះព្រំដែនកម្ពុជា-ថៃ លើវិស័យអប់រំនិងវប្បធម៌ និងវឌ្ឍនភាពភាសាបារាំង ក្នុងមហាសន្និបាត APF នៅកាមេរូន

កងកម្លាំងអ៊ុយក្រែនប្រាប់ថា បានវាយប្រហារនាវាដឹកប្រេងរុស្ស៊ី ២១គ្រឿង នៅសមុទ្រ Azov

ការឆ្លងជំងឺ Ebola កើនឡើងដល់ជាង ១.៨០០ករណី នៅកុងហ្គោ ខណៈវីរុសរាលដាលដល់ខេត្តទី៤

អ៊ីរ៉ង់បានតបធ្ងន់ៗទៅលោក Trump វិញ បន្ទាប់ពីលោកទទូចថា បទឈប់បាញ់គឺចប់ហើយ

ឱកាសការងារជាង ៣ពាន់កន្លែងអត្ថប្រយោជន៍ ប.ស.ស. និងកម្មវិធី TVET ត្រូវបានផ្សព្វផ្សាយដល់មូលដ្ឋានក្នុងខេត្តសៀមរាប

ក្រសួងការងារ៖ ខេត្ត៤ជាប់សមុទ្រមានឱកាសការងារជិត ៣ពាន់កន្លែងកំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ក្រសួងការងារ៖ រាជធានីភ្នំពេញមានឱកាសការងារជាង ២ម៉ឺនកន្លែង កំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ក្រសួងការងារ៖ ខេត្តស្វាយរៀងមានឱកាសការងារជាង ២ពាន់កន្លែងកំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ជប៉ុនបាញ់បង្ហោះ និងចុះចតរ៉ូកែតដែលអាចប្រើប្រាស់ឡើងវិញបានដោយជោគជ័យ

មនុស្សយ៉ាងហោចណាស់ ១០នាក់រងរបួស ខណៈរុស្ស៊ីវាយប្រហារទីក្រុងគីវ ដោយមីស៊ីល

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877