BTV NEWS

អគ្គនាយកដ្ឋានពន្ធនាគារ កំពុងសិក្សារៀបចំទីតាំងឃុំឃាំងថ្មីបន្ថែម ខណៈចំនួនជនជាប់ឃុំមានការកើនឡើងខ្លាំង

សមត្ថកិច្ចខេត្តព្រះសីហនុរកឃើញអ្នកបើកបររថយន្តធុនធ្ងន់មួយចំនួនមានសារធាតុគ្រឿងញៀននៅក្នុងខ្លួន

ឆេះខុនដូ Wealth Mansion តែសមត្ថកិច្ចជួយពន្លត់ទាន់ពេលដោយមិនរាលដាលទ្រង់ទ្រាយធំ

ជនជាតិវៀតណាម និងជនជាតិចិនជាងពីររយនាក់ទៀតត្រូវបានអាជ្ញាធរបណ្តេញចេញពីកម្ពុជាក្រោយរក ឃើញជាប់ពាក់ព័ន្ធករណី Online Scams

សន្តិសុខ និង សង្គម

អ្នកបើកបររថយន្តក្រុងម្នាក់ ត្រូវបានដោះលែងឲ្យនៅក្រៅឃុំ បន្ទាប់គ្រោះថ្នាក់បណ្តាលឲ្យមនុស្ស១០នាក់ស្លាប់នៅអូស្ត្រាលី

អូស្ត្រាលី៖អ្នកបើកបររថយន្តក្រុងម្នាក់ នៅក្នុងករណីឧបទ្ទវហេតុរថយន្តក្រុងដ៏អាក្រក់បំផុតមិនធ្លាប់មាននៅប្រទេសអូស្រ្តាលី ក្នុងរយៈពេល៣ទសវត្សរ៍មកនេះ ត្រូវបានអនុញ្ញាតឲ្យនៅក្រៅឃុំនៅថ្ងៃអង្គារទី១៣ ខែមិថុនានេះ។ មនុស្ស១០នាក់បានស្លាប់ នៅពេលដែលរថយន្តក្រុងមួយគ្រឿងដែលត្រូវបានគេជួលដឹកភ្ញៀវចូលរួមអាពាហ៍ពិពាហ៍ បានក្រឡាប់នៅរង្វង់មូលមួយកន្លែងកាលពីយប់ថ្ងៃអាទិត្យ។ អ្នកបើកបររថយន្តអាយុ៥៨ឆ្នាំ ត្រូវបានចោទប្រកាន់ ពីការបើកបរធ្វេសប្រហេស និងបណ្តាលឲ្យមានគ្រោះថ្នាក់ជុំវិញឧបទ្ទវហេតុនេះ ដែលនគរបាលចោទប្រកាន់ថា បុរសនេះបានបើករថយន្តក្រុង ក្នុងស្ថានភាពមួយដែលមិនប្រកាន់ខ្ជាប់ខ្ជួននូវលក្ខខណ្ឌនានា។ មនុស្ស១៤ នាក់ កំពុងស្ថិតនៅក្នុងមន្ទីពេទ្យ ដោយ២នាក់ស្ថិតនៅក្នុងផ្នែកសង្គ្រោះបន្ទាន់។ នាយករដ្ឋមន្ត្រីអូស្ត្រាលីលោក Anthony Albanese និងពលរដ្ឋក្នុងតំបន់ បានសម្តែងការអាណិតអាសូដល់ជនរងគ្រោះក្នុងឧបទ្ទវហេតុបណ្តាលឲ្យមានមនុស្សស្លាប់រហូតដល់១០នាក់៕

រលកកម្តៅធ្វើឲ្យប៉ះពាល់យ៉ាងខ្លាំងដល់ការផ្គត់ផ្គង់អគ្គិសនីនៅក្នុងប្រទេសវៀតណាម

វៀតណាម៖ ប្រទេសវៀតណាម កំពុងប្រឈមនឹងការកាត់ផ្តាច់ចរន្តអគ្គិសនីបណ្តាលមកពីរលកកម្តៅ បង្កឲ្យកើតមានបញ្ហារចនាសម្ព័ន្ធ និងការិយាល័យធិបតេយ្យ ដែលកំណត់សមត្ថភាពផ្គត់ផ្គង់ថាមពលមកនៅត្រឹមពាក់កណ្តាល និងបង្អាក់ដល់កិច្ចខិតខំដោះស្រាយការផ្តល់មូលនិធិអាកាសធាតុសកល ១៥.៥ពាន់លានដុល្លារ ។ មជ្ឈមណ្ឌលផលិតកម្មមានរោងចក្រធំៗគ្រប់គ្រងដោយក្រុមហ៊ុនបច្ចេកវិទ្យា Samsung និង Foxconnស្ថិតក្នុងចំណោមតំបន់ផ្សេងទៀតដែលរងផលប៉ះពាល់ ប៉ុន្តែពិបាកកាត់បន្ថយការប្រើប្រាស់អគ្គិសនី ដែលជាជំហានដ៏សំខាន់ក្នុងការបំពេញតម្រូវការ និងទាក់ទាញក្រុមហ៊ុនឲ្យផ្លាស់ទីតាំងចេញពីប្រទេសចិន និងកន្លែងផ្សេងទៀត ។ លោក Hong Sun គឺជាប្រធានសភាពាណិជ្ជកម្មកូរ៉េប្រចាំនៅប្រទេសវៀតណាម និយាយថា រោងចក្រជាច្រើន បានផ្អាកការផលិតរបស់ខ្លួន ដោយសារតែការកាត់ផ្តាច់ចរន្តអគ្គិសនីធ្ងន់ធ្ងរ ហើយការដាច់ចរន្តអគ្គិសនីញឹកញាប់ ។ លោកបន្តថា នេះគឺជាបញ្ហាធ្ងន់ធ្ងរសម្រាប់ក្រុមហ៊ុនកូរ៉េខាងត្បូងដែលធ្វើប្រតិបត្តិការនៅក្នុងប្រទេសវៀតណាម ហើយនៅក្នុងខែនេះ ក្រុមធុរកិច្ចអឺរ៉ុប បានជំរុញឲ្យរដ្ឋាភិបាលវៀតណាម ចាត់វិធានការឲ្យបានលឿន ដើម្បីដោះស្រាយវិបត្តិថាមពល ។ ដោយឡែក លោក Trang Nguyen (ត្រឹង ង្វៀន) គឺជាប្រធានក្រុមអាស៊ីអាគ្នេយ៍នៅមជ្ឈមណ្ឌលមិនរកប្រាក់ចំណេញ Climateworks របស់អូស្រ្តាលី និយាយថា ការលើកឡើងពីកង្វះខាតថាមពល ត្រូវការកិច្ចខិតខំរួមកម្លាំងគ្នាច្រើនជាងនេះ ដើម្បីធានាដល់ដំណើរការសម្រេចចិត្តដ៏មានប្រសិទ្ធភាព សម្រាប់កំណែទម្រង់ទីផ្សារអគ្គិសនី ៕

មន្ត្រីអាកាសធាតុឥណ្ឌា៖ រលកកម្ដៅនឹងកាន់តែឡើងខ្ពស់ លើសពីសប្តាហ៍នេះទៀត

ឥណ្ឌា៖ មន្ត្រីអាកាសធាតុ នៅទីក្រុងញូវដេលី (New Delhi) បាននិយាយកាល ពីថ្ងៃចន្ទ (ទី១២ ខេមិថុនា) ថាភាគខាងជើងប្រទេសឥណ្ឌា នឹងជួបប្រទះនូវស្ថានភាពដូចរលកម្ដៅដែលក្ដៅខ្លាំង សម្រាប់សប្តាហ៍ខាងមុខទៀត។អ្នកជំនាញអាកាសធាតុ បានប្រាប់ថា ទោះបីជាសីតុណ្ហភាពបានធ្លាក់ចុះដល់ ៣៩អង្សាសេ កាលពីថ្ងៃអាទិត្យ (ទី១១ ខែមិថុនា) ប៉ុន្តែសីតុណ្ហភាពនៅមិនប្រែប្រួល សម្រាប់សប្តាហ៍មុន ដោយនៅត្រឹមចំនួននោះ ឬលើសពី ៤០អង្សាសេ ហើយទំនងជានៅតែមានសីតុណ្ហភាពបែបនេះ ក្នុងរយៈពេល ៤-៥ថ្ងៃទៀត។អ្នកវិទ្យាសាស្ត្រនៅនាយកដ្ឋានឧតុនិយមឥណ្ឌា លោក Naresh Kumar បាននិយាយថា៖ «រលកកម្ដៅនេះ អាចនិយាយបានថា កើតឡើងដោយសារកម្រិតសំណើម នៅក្នុងខ្យល់ ដែលបានកើនឡើងចាប់តាំងពីសប្តាហ៍មុន»។យោងតាមអ្នកជំនាញ សីតុណ្ហភាពជាមធ្យមរបស់ប្រទេសឥណ្ឌា បានឡើងប្រហែល ០,៧ភាគរយ ចន្លោះឆ្នាំ១៩០១ និងឆ្នាំ២០១៨។ ការកើនឡើងហ្វ្រេកង់នៃរលកកម្ដៅដ៏គ្រោះថ្នាក់នេះ អាចបញ្ឈប់ ឬសូម្បីតែរំខានដល់ដំណើរការវិវឌ្ឍរបស់ប្រទេសឥណ្ឌា ក្នុងការកាត់បន្ថយភាពក្រីក្រ ការផ្ដល់អាហារ និងសន្តិសុខប្រាក់ចំណូល និងសមភាពយេនឌ័រ ដោយប៉ះពាល់ដល់គុណភាពជីវិតរបស់ប្រជាជនឥណ្ឌាជាង ១,៤ពាន់លាននាក់៕

មនុស្ស៦នាក់ស្លាប់ និង៣៥នាក់ បាត់ខ្លួន បន្ទាប់ពីទឹកជំនន់ ក្រោយការបំផ្លាញទំនប់ទឹកនៅអ៊ុយក្រែន

អ៊ុយក្រែន៖ មនុស្ស៦នាក់បានស្លាប់ និង៣៥នាក់កំពុងបាត់ខ្លួនរួមទាំងកុមារ៧នាក់ នៅក្នុងប្រទេសអ៊ុយក្រែនភាគខាងត្បូង ក្រោយទឹកជំនន់ដ៏មហន្តរាយ ដែលក្រុមរដ្ឋអាជ្ញាបានហៅថាជាគ្រោះមហន្តរាយបរិស្ថានធ្ងន់ធ្ងរបំផុត ចាប់តាំងពីការផ្ទុះរោងចក្រនុយក្លេអ៊ែរនៅទីក្រុងឈើណូប៊ីល(Chernobyl)ឆ្នាំ១៩៨៦មក។ ទំនប់ទឹកវារីអគ្គិសនី Kakhovka គ្រប់គ្រងដោយរុស្ស៊ី ស្ថិតនៅសមរភូមិជួរមុខក្នុងតំបន់ Kherson ត្រូវបានបំផ្លាញកាលពីថ្ងៃទី៦ខែមិថុនា ដែលបង្ខំឲ្យមនុស្សរាប់ពាន់នាក់ភៀសខ្លួននិងបង្កក្ដីបារម្ភកាន់តែខ្លាំងពីវិបត្តិមនុស្សធម៌ ព្រមទាំងគ្រោះមហន្តរាយបរិស្ថាន។ អ៊ុយក្រែនបានចោទរុស្ស៊ីពីបទបំផ្ទុះទំនប់ទឹកនៅលើទន្លេឌីនីប្រូ(Dnipro)ខណៈដែលទីក្រុងមូស្គូ ( Moscow) និយាយថា ទីក្រុងគីវ (Kyiv) បានបាញ់កម្ទេចសំណង់នេះ។ រដ្ឋមន្ត្រីក្រសួងមហាផ្ទៃអ៊ុយក្រែន លោក អ៊ីហ្គ័រ គ្លីមិនកូ (Igor Klymenko ) និយាយថា ទីប្រជុំជននិងភូមិឋានចំនួន៧៧ ត្រូវបានទឹកជន់លិចក្នុងតំបន់ឃើស៊ុន(Kherson) និងមីកូឡេអ៊ីវ( Mykolaiv)។ លោកថាដោយសារតែទឹកជំនន់ មនុស្ស៥នាក់បានស្លាប់នៅក្នុងតំបន់ Kherson និងម្នាក់ទៀតបានស្លាប់នៅក្នុងតំបន់ Mykolaiv។ ចំណែកអភិបាលតំបន់ Kherson ភាគខាងត្បូងរបស់អ៊ុយក្រែន លើកបន្តុបដោយរុស្ស៊ី លោក វ្លាឌីមៀ សាលដូ ( Vladimir Saldo បាននិយាយនៅសប្ដាហ៍នេះថា មនុស្ស៨នាក់ បានស្លាប់ក្នុងដែនដីគ្រប់គ្រងដោយទីក្រុងមូស្គូ ។ មន្ត្រីរូបនេះបាននិយាយនៅក្នុងសេចក្ដីថ្លែងការណ៍មួយថា មនុស្សសរុបចំនួន៣.៧០០នាក់ ត្រូវបានជម្លៀសចេញពីលំនៅឋាននៅក្នុងតំបន់ទាំងពីរនោះ៕

យុទ្ធជនរុស្ស៊ីម្នាក់បានស្លាប់ និងមួយចំនួនរងរបួសក្នុងការវាយប្រហារដោយទួរគីនៅក្នុងប្រទេសស៊ីរីភាគខាងជើង

ស៊ីរី៖ អង្គការឃ្លាំមើលសង្រ្គាម និងប្រភពសន្តិសុខឃើដ បាននិយាយថា អ្នកប្រយុទ្ធជនជាតិរុស្ស៊ីម្នាក់ បានស្លាប់ និងមួយចំនួនបានរងរបួសនៅក្នុងខេត្តអាឡេប៉ូ (Aleppo) ភាគខាងជើងរបស់ប្រទេសស៊ីរី កាលពីថ្ងៃចន្ទ ទី១២មិថុនា ។អង្គការឃ្លាំមើលសិទ្ធិមនុស្សស៊ីរីដែលតាមដានជម្លោះក្នុងប្រទេសស៊ីរី និយាយថាការស្លាប់និងរបួសលើជនជាតិរុស្ស៊ី បានកើតឡើងនៅពេលក្បួនរបស់ពួកគេត្រូវបានរងការវាយប្រហារដោយគ្រាប់កាំភ្លើងធំរបស់ទួរគី។វីដេអូចេញផ្សាយដោយទូរទស្សន៍ Ronahi TV ជាស្ថានីយមួយមានសម្ព័ន្ធភាពជាមួយរដ្ឋបាលស្វ័យតដឹកនាំដោយក្រុមជនជាតិភាគតិចឃើដ ក្នុងប្រទេសស៊ីរីភាគខាងជើង បង្ហាញពីបុរសមួយក្រុមកំពុងសែងបុរស២នាក់លើហ្វ្រង់កាចូលក្នុងឧទ្ធម្ភាគចក្រមួយគ្រឿងរបស់រុស្ស៊ី ។ សារព័ត៌មាន Reuters មិនអាចផ្ទៀងផ្ទាត់ដោយឯករាជ្យពីកាលបរិច្ឆេទ ឬ ទីតាំងនៃវីដេអូនោះបានទេ។ ក្រសួងការពារជាតិរុស្ស៊ី ពុំបានឆ្លើយតបភ្លាមៗ ចំពោះសំណើសុំការអត្ថាធិប្បាយរបស់សារព័ត៌មាន Reutersបានទេ។ គួររម្លឹកថា រុស្ស៊ី បានចូលធ្វើអន្តរាគមន៍ក្នុងជម្លោះស៊ីរីក្នុងឆ្នាំ២០១៥ ដោយប្រើការវាយប្រហារតាមអាកាស និងការបញ្ជូនក្រុមទីប្រឹក្សា ព្រមទាំងនគរបាលយោធា ដើម្បីជួយដល់លោកប្រធានាធិបតីស៊ីរី បាសា -អាល់អាសាត (Bashar al-Assad) ដណ្ដើមទឹកដីមកវិញពីក្រុមឧទ្ទាម ដែលមួយចំនួនត្រូវបានគាំទ្រដោយប្រទេសទួរគី។ ចំណែកមន្ត្រីមួយរូបនៃក្រសួងការពារជាតិទួរគី បាននិយាយកាលពីថ្ងៃចន្ទថា របាយការណ៍ដែលថា កងកម្លាំងទួរគីបានបាញ់ផ្លោងកាំភ្លើងធំលើមូលដ្ឋាននានានៅក្នុងតំបន់ដាច់ស្រយាលភាគខាងជើងទីក្រុង Aleppo និងបានធ្លាក់ចំរថពាសដែករបស់រុស្ស៊ី ជារឿងមិនពិត៕

ជំងឺគ្រុនឈាម គំរាមដល់កុមារ នៅក្នុងប្រទេសប៉េរូ

ប៉េរូ៖ ប្រទេសប៉េរូ កំពុងប្រយុទ្ធប្រឆាំងការផ្ទុះឡើងជំងឺគ្រុនឈាមដ៏អាក្រក់បំផុតលើកំណត់ត្រា ហើយវាអាចកើនឡើងខ្លាំងបន្ថែមទៀត ខណៈបាតុភូតអកាសធាតុ El Niño (អែល នីញ៉ូ) នាំមកនូវភ្លៀងធ្លាក់ខ្លាំង និងកើតសត្វមូសកាន់តែច្រើន។ ចំនួនអ្នកស្លាប់នៅឆ្នាំនេះ បានកើនលើស២០០នាក់ ដោយមានករណីឆ្លងត្រូវបានកត់ត្រាមានចំនួន១៣០.០០០ករណី ជាចំនួនទ្វេដងនៃការផ្ទុះឡើងក្នុងឆ្នាំ២០១៧។ មន្ទីរពេទ្យជាច្រើន កំពុងផ្ទុកចំនួនលើស ហើយជាពិសេសកុមារទទួលផលប៉ះពាល់ នៅក្នុងតំបន់ Piura ភាគខាងជើង។ ជារៀងរាល់ឆ្នាំ នៅក្នុងទីក្រុង Piura ប្រទេសប៉េរូភាគខាងជើងមានកម្តៅក្តៅ វីរុសចម្លងដោយសត្វមូស បានបណ្តាលមនុស្សធ្លាក់ខ្លួនឈឺ ដោយបណ្តាលឲ្យឈឺខ្លួនប្រាណ នឹងគ្រុន ប៉ុន្តែនៅឆ្នាំនេះជាឆ្នាំធ្ងន់ធ្ងរបំផុត ដោយមានករណីឆ្លងជិត ៤០.០០០ករណី និងមានអ្នកស្លាប់ជាង៦០នាក់ នៅក្នុងទីក្រុង Piura តែមួយដែលកំពុងបង្កើតជាចំណុចកណ្តាលនៃការផ្ទុះឡើងជំងឺគ្រុនឈាមនៅពេលនេះ។ នៅក្នុងភូមិ San Pablo នៅប្រទេសប៉េរូភាគខាងជើង កង្វះខាតទឹកស្អាត ជាផ្នែកមួយនៃបញ្ហាបរិស្ថានដែលកំពុងគំរាមកំហែង ជាពិសេសនៅក្នុងតំបន់ក្រីក្រមានលំនៅឋានមិនរៀបរយ ជាកន្លែងដែលវីរុសកើនឡើង ហើយប្រជាជនពុំមានទឹកម៉ាស៊ីន ហើយត្រូវស្តុកទុកទឹកនៅក្នុងអាងស្តុក ដែលបង្កើតជាជម្រកបង្កាត់ពូជសម្រាប់សត្វមូស៕

ផ្លូវហាយវេនៅទីក្រុង Philadelphia សហរដ្ឋអាមេរិក បានបាក់ បន្ទាប់ពីមានរថយន្តឆេះ

អាមេរិក៖ មន្ត្រីទីក្រុង Philadelphia របស់សហរដ្ឋអាមេរិក បាននិយាយកាលពីថ្ងៃអាទិត្យថា មួយផ្នែកធំនៃផ្លូវហាយវេនៃទីក្រុងនេះ បានរលំបាក់ បន្ទាប់ពីមានរថយន្តបានឆេះនៅពីក្រោមផ្លូវនោះ។ គ្មានរបាយការណ៍ពាក់ព័ន្ធនឹងការមានរបួសនោះឡើយ។ផ្សែងហុយយ៉ាងខ្មួលខ្មាញ់ចេញពីគំនរបាក់បែកនៃចំណែកផ្លូវដែលរលំបាក់នៃគន្លងផ្លូវដែលសំដៅទៅទិសឧត្តរ I-95 ដែលជារដ្ឋភាគខាងជើងដ៏សំខាន់ នៅឆ្នេរខាងកើត។ រូបភាពវីដេអូបង្ហាញឲ្យឃើញពីរថយន្តសង្គ្រោះបន្ទាន់ និងកម្មករ ជួបជុំគ្នានៅទីកន្លែងនេះ។ចរាចរណ៍ទាំងសងខាងនៃផ្លូវហាយវេទាំងប្រាំបីគន្លង ត្រូវបានផ្អាកដោយសារតែមានការបារម្ភអំពីស្ថិរភាពរចនាសម្ព័ន្ធនៃគន្លងផ្លូវដែលឆ្ពោះទៅទិសខាងត្បូងផ្សេងទៀត។លោក Derek Bowmer ប្រធានកងវរសេនាតូចពន្លត់អគ្គិភ័យ នៅទីក្រុង Philadelphia បានប្រាប់អ្នកយកព័ត៌មានថា ក្រុមអ្នកពន្លត់អគ្គិភ័យ បានប្រឹងប្រែងពន្លត់ភ្លើងមួយផ្នែកធំ ដែលឆេះរថយន្តមួយគ្រឿង។លោក Bowmer បាននិយាយថា៖ «ពួកយើងបានព្យាយាមពន្លត់ភ្លើង។ យើងបានបង្កើនសមត្ថភាពឧបករណ៍ដើម្បីទប់ស្កាត់សារធាតុគ្រោះថ្នាក់ ដោយសារតែយើងទទួលបានការរាយការណ៍ថា វាអាចជារយន្តដឹកប្រេង ឬអ្វីមួយដែលលក្ខណៈស្រដៀងគ្នា។លោក Bowmer បានបន្ថែមថា ក្រុមការងារនឹងធ្វើការ «មួយរយៈ» ដោយព្យាយាមកំណត់ថា តើប្រេងឥន្ធនៈ ឬឧស្ម័ន អាចត្រូវបានធ្វើឲ្យខូចខាតដោយឧបទ្ទវហេតុនេះ។ ចំណែកលោក Dominick Mireles នាយកការិយាល័យគ្រប់គ្រងគ្រាអាសន្នរបស់ទីក្រុង បានថ្លែងថា ក្រុមមន្ត្រីមានការព្រួយបារម្ភអំពីផលប៉ះពាល់ ដែលអាចកើតមានពីឧបទ្ទវហេតុនេះទៅលើបរិស្ថាន ដោយសារតែហេតុការណ៍នេះកើតឡើងនៅជិតទន្លេ Delaware៕

ទឹកជំនន់ពីការបាក់ទំនប់ទឹក បានស្រកចុះ ប៉ុន្តែមានការព្រួយបារម្ភពីជំងឺខណៈគ្រោះមហន្តរាយនៅអ៊ុយក្រែនកាន់តែធ្ងន់ធ្ងរ

ទំហំនៃតំបន់ជន់លិច នៅក្នុងតំបន់ Kherson គឺដោយសារតែការបាក់ទំនប់ទឹក Kakhovka ដែលស្ទើរតែពាក់កណ្តាល ប៉ុន្តែមានការព្រួយបារម្ភច្រើន ជុំវិញការកើតមានជំងឺពីទឹកបំពុល ដែលបង្ហាញពីដំណាក់កាលបន្ទាប់នៃវិបត្តិ។ អ្នកជំនាញព្រួយបារម្ភពីជំងឺឆ្លង អាចរាលដាលនៅក្នុងទឹកដែលមានជាតិបំពុល។ ប្រធានរដ្ឋបាលតំបន់ លោក Alexander Prokudin និយាយថា កម្រិតទឹកបានស្រកចុះ២៧សង់ទីម៉ែត្រ។ ប៉ុន្តែមនុស្សរាប់ម៉ឺននាក់ ពុំមានទឹកស្អាតប្រើប្រាស់នោះទេ។ ទំនប់ទឹកបានបាក់ធ្លាយកាលពីថ្ងៃព្រហស្បតិ៍ និងបានជន់លិចតំបន់ធំៗជាច្រើន នៅផ្នែកទាំងសងខាងនៃទន្លេ Dnipro ។ប្រទេសអ៊ុយក្រែន បានដាក់កំហុសលើរុស្ស៊ី ចំពោះការទម្លាយទំនប់ទឹក ដែលមានទីតាំងនៅក្នុងតំបន់របស់អ៊ុយក្រែនគ្រប់គ្រងដោយដោយរុស្ស៊ី។ ប៉ុន្តែរុស្ស៊ី បានបដិសេធការដាក់កំហុសនេះនិងបានចោទប្រកាន់អ៊ុយក្រែនក្នុងការទទួលខុសសម្រាប់ការបំផ្លាញរបស់ខ្លួន។ អាងស្តុកទឹក Kakhovka ដ៏ធំ ជាប្រភពទឹកដ៏សំខាន់សម្រាប់តំបន់នេះ បានហូរទឹកចេញ។ អ្នកតំណាងអ៊ុយក្រែននៅអង្គការសុខភាពពិភពលោក លោកវេជ្ជបណ្ឌិត Jarno Habicht បានប្រាប់ប្រព័ន្ធផ្សព្វផ្សាយ BBC ថាស្ថានភាពកំពុងមានមហន្តរាយ ហើយការផ្តល់សុវត្ថិភាព និងទឹកស្អាតគឺជាអាទិភាព។ លោកនិយាយថា ការធ្វើតេស្តគំរូដែលប្រុងប្រយ័ត្នជាមុន កំពុងធ្វើឡើង។ ទន្ទឹមនឹងនេះ ក្រសួងការពារជាតិអង់គ្លេស និយាយថា ពលរដ្ឋជាច្រើន កំពុងប្រឈមនឹងវិបត្តិអនាម័យ ដោយសារការប្រើប្រាស់ទឹកមានសុវត្ថិភាពមានដែនកំណត់ និងហានីភ័យដែលកើនឡើងចំពោះជំងឺដែលកើតឡើងដោយសារទឹក៕

ការប្រយុទ្ធនៅបន្ត ក្នុងរដ្ឋធានីប្រទេសស៊ូដង់ បន្ទាប់ពីបទឈប់បាញ់រយៈពេល២៤ម៉ោងផុតកំណត់

ស៊ូដង់៖ ការប៉ះទង្គិចគ្នា និងការបាញ់កាំភ្លើងនៅតែបន្ត ត្រូវបានរាយការណ៍នៅក្នុងផ្នែកជាច្រើន នៃរដ្ឋធានី Khartoum ប្រទេសស៊ូដង់កាលពីព្រឹកថ្ងៃអាទិត្យភ្លាមៗបន្ទាប់ពីបទឈប់បាញ់រយៈពេល២៤ម៉ោង ដែលបាននាំមកភាពស្ងាប់ស្ងាត់រយៈពេលខ្លី ចំពោះរយៈពេល៨សប្តាហ៍នៃការប្រយុទ្ធគ្នា រវាងក្រុមយោធាជាគូប្រជែង។ សាក្សី បាននិយាយថាការប្រយុទ្ធគ្នាបានបន្ត បន្ទាប់ពីបទឈប់បាញ់បានផុតពេលកំណត់នៅម៉ោង៦ព្រឹក ម៉ោងក្នុងតំបន់ នៅខាងជើងទីក្រុង Omdurman ជាទីក្រុងមួយក្នុងចំណោមទីក្រុងជាប់គ្នាចំនួន៣ រួមជាមួយរដ្ឋធានី Khartoum និង ទីក្រុង Bahri ដែលបង្កើតរដ្ឋធានីនៅជុំវិញទីប្រសព្វនៃទន្លេនីល។ ពលរដ្ឋនិយាយថា មានការបាញ់កាំភ្លើងធំ ចូលទៅតំបន់ Sharq el-Nil ជាយរដ្ឋធានីភាគខាងកើត នៅ ជុំវិញស្ពានមួយកន្លែងតភ្ជាប់ទីក្រុង Omdurman និងទីក្រុង Bahri ហើយការប៉ះទង្គិចគ្នា ត្រូវបានរាយការណ៍នៅក្នុងរដ្ឋធានី Khartoum។ ជម្លោះរវាង កងទ័ពជាតិស៊ូដង់ និងកងកម្លាំងគាំទ្ររហ័សយោធាប៉ារ៉ា បានផ្ទុះឡើងកាលពីថ្ងៃទី១៥ ខែមេសា ជុំវិញភាពតានតឹងពាក់ព័ន្ធទៅនឹងផែនការគាំទ្រជាអន្តរជាតិសម្រាប់អន្តរកាលឆ្ពោះទៅរកការគ្រប់គ្រងបែបស៊ីវិល។ ជម្លោះនេះ បានធ្វើឲ្យពលរដ្ឋជាង១,៩លាននាក់ភៀសខ្លួនចេញ ដែលកំពុងបង្កឲ្យមានវិបត្តិមនុស្សធម៌ដ៏ធំ ដែលគំរាមដល់ការរាលដាល់នៅទូទាំងតំបន់គ្រោះថ្នាក់។ ការប្រយុទ្ធគ្នាបានផ្តោតនៅក្នុងរដ្ឋធានី ដែលភាគច្រើនបានក្លាយជាតំបន់សង្គ្រាមមួយដែលញាំញីដោយការចូលលួច និងការប៉ះទង្គិចគ្នា៕

មនុស្ស ១៤នាក់ ស្លាប់ ក្នុងហេតុការណ៍ចំហេះព្រៃ នៅកាហ្សាក់ស្ថាន

កាហ្សាក់ស្ថាន៖ ក្រសួងគ្រប់គ្រងស្ថានការណ៍គ្រាអាសន្ន បានឲ្យដឹង កាលពីថ្ងៃទី១០ មិថុនាថា មនុស្ស ១៤នាក់ បានស្លាប់នៅក្នុងហេតុការណ៍ភ្លើងឆេះព្រៃធំៗ ក្នុងតំបន់ Abai របស់ប្រទេសកាហ្សាក់ស្ថាន ។ក្រសួងបានប្រកាសនៅក្នុងសេចក្តីថ្លែងការណ៍មួយថា៖ «ជារួម សាកសពចំនួន ១៤នាក់ ត្រូវបានរកឃើញ» ដោយបានឲ្យដឹងប្រកាសកាលពីមុននោះថា ការស្វែងរកក្រុមអ្នកអនុរក្សព្រៃឈើ ដែលកំពុងជាប់ខ្លួននៅក្នុងព្រៃនោះ កំពុងដំណើរការ ខណៈដែលភ្លើងបានឆេះរាលដាលខ្លាំងលើផ្ទៃដីចំនួន ៦០.០០០ហិកតា។មនុស្សជាង ១.០០០នាក់ បានចូលរួមការពន្លត់ភ្លើងដ៏សន្ធោរសន្ធៅនេះ ការងារស្វែងរក និងជួយសង្គ្រោះ ហើយអ្នកស្រុកប្រហែល ៧០០នាក់ ត្រូវបានជម្លៀសចេញ ហើយនាំទៅកាន់ទីជម្រកថ្មី។លោក Nurbolat Derbisov ប្រធានគណៈកម្មាធិការសេវាពន្លត់អគ្គិភ័យ នៅក្រសួងគ្រប់គ្រងស្ថានការណ៍គ្រាអាសន្នរបស់ប្រទេសកាហ្សាក់ស្ថាន បាននិយាយថា ទោះបីជាសីតុណ្ហភាពក្ដៅខ្លាំង តំបន់ឆេះរាលដាលកាន់តែធំ និងមានខ្យល់បក់ខ្លាំងក៏ដោយ ក៏ក្រុមការងារ គ្រប់គ្រងស្ថានការណ៍នេះ បានដែរ។ មានការរាយការណ៍ថា ចំហេះនេះបណ្តាលមកពីមានរន្ទះបាញ់ចំនួន២ដង៕

បណ្ដាញសង្គម

ព័ត៌មានថ្មីៗ

ឯកឧត្តម កែប ជុតិមា បង្ហាញពីផលប៉ះពាល់នៃជម្លោះព្រំដែនកម្ពុជា-ថៃ លើវិស័យអប់រំនិងវប្បធម៌ និងវឌ្ឍនភាពភាសាបារាំង ក្នុងមហាសន្និបាត APF នៅកាមេរូន

កងកម្លាំងអ៊ុយក្រែនប្រាប់ថា បានវាយប្រហារនាវាដឹកប្រេងរុស្ស៊ី ២១គ្រឿង នៅសមុទ្រ Azov

ការឆ្លងជំងឺ Ebola កើនឡើងដល់ជាង ១.៨០០ករណី នៅកុងហ្គោ ខណៈវីរុសរាលដាលដល់ខេត្តទី៤

អ៊ីរ៉ង់បានតបធ្ងន់ៗទៅលោក Trump វិញ បន្ទាប់ពីលោកទទូចថា បទឈប់បាញ់គឺចប់ហើយ

ឱកាសការងារជាង ៣ពាន់កន្លែងអត្ថប្រយោជន៍ ប.ស.ស. និងកម្មវិធី TVET ត្រូវបានផ្សព្វផ្សាយដល់មូលដ្ឋានក្នុងខេត្តសៀមរាប

ក្រសួងការងារ៖ ខេត្ត៤ជាប់សមុទ្រមានឱកាសការងារជិត ៣ពាន់កន្លែងកំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ក្រសួងការងារ៖ រាជធានីភ្នំពេញមានឱកាសការងារជាង ២ម៉ឺនកន្លែង កំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ក្រសួងការងារ៖ ខេត្តស្វាយរៀងមានឱកាសការងារជាង ២ពាន់កន្លែងកំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ជប៉ុនបាញ់បង្ហោះ និងចុះចតរ៉ូកែតដែលអាចប្រើប្រាស់ឡើងវិញបានដោយជោគជ័យ

មនុស្សយ៉ាងហោចណាស់ ១០នាក់រងរបួស ខណៈរុស្ស៊ីវាយប្រហារទីក្រុងគីវ ដោយមីស៊ីល

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877