BTV NEWS

សមត្ថកិច្ចចម្រុះបង្ក្រាបករណីបង្ខាំងមនុស្ស និងឆែកឆេរទីតាំងសង្ស័យ Online Scam សង្គ្រោះជនរងគ្រោះម្នាក់ និងឃាត់ខ្លួនជនសង្ស័យជាជនជាតិបង់ក្លាដេសដូចគ្នាចំនួន២នាក់នៅខណ្ឌសែនសុខ

ជនជាតិចិន ៣២៣នាក់ទៀត ត្រូវបានបណ្ដេញចេញពីកម្ពុជា ពាក់ព័ន្ធករណីឆបោកតាមប្រព័ន្ធអនឡាញ (Online Scams)

តុលាការចេញដីការឃុំខ្លួនជនជាតិចិន២នាក់ ជាមេខ្លោងពាក់ព័ន្ធករណីឆបោកជាក្រុមដោយមានការចាត់តាំង (Online Scam) ដាក់ពន្ធនាគារ

បង្ក្រាបករណី Online Scam ក្នុងបុរីប៉េងហួតច្បារអំពៅ ឃាត់ខ្លួនជនសង្ស័យជាបរទេសជាង ៨០នាក់

សន្តិសុខ និង សង្គម

ភ្លៀងធ្លាក់ខ្លាំងរំខានដល់ការជួយសង្គ្រោះក្នុងទឹកជំនន់ប្រេស៊ីល ខណៈអ្នកស្លាប់ឡើងដល់ ១០០ នាក់

អាជ្ញាធរបានបង្អាក់កិច្ចខិតខំប្រឹងប្រែងជួយសង្គ្រោះនៅភាគខាងត្បូងប្រទេសប្រេស៊ីល ដែលរងគ្រោះដោយទឹកជំនន់កាលពីថ្ងៃពុធ (០៨ ឧសភា) ស្របពេលមានភ្លៀងធ្លាក់កាន់តែច្រើន និងហានិភ័យនៃរន្ទះ និងខ្យល់បក់ខ្លាំងដែលគំរាមកំហែងដល់គ្រោះមហន្តរាយកាន់តែធ្ងន់ធ្ងរ ដោយបានសម្លាប់មនុស្សយ៉ាងហោចណាស់ ១០០ នាក់រួចមកហើយ និងធ្វើឱ្យមនុស្សជាង ១៦៣.០០០ នាក់មិនមានផ្ទះសម្បែង ហើយកំពុងស្វែងរកទីជម្រក។ទឹកជំនន់ដែលបានចាប់ផ្តើមកាលពីសប្តាហ៍មុនបណ្តាលមកពីភ្លៀងធ្លាក់ខ្លាំងមិនធម្មតា បានបំផ្លាញផ្លូវហាយវេ និងស្ពាននៅក្នុងរដ្ឋ រីអូ ក្រានដេ ដូស៊ុល (Rio Grande do Sul) ដែលមានព្រំប្រទល់ជាប់ប្រទេសអ៊ុយរូហ្គាយ និងអាហ្សង់ទីន។ អាជ្ញាធរការពារស៊ីវិលរបស់រដ្ឋបាននិយាយថា យ៉ាងហោចណាស់មនុស្ស ១២៨ នាក់នៅតែបាត់ខ្លួន ដោយបានជំរុញឱ្យប្រជាជនដែលរស់នៅជិតបឹង ប៉ាទូស (Patos) ភាគខាងត្បូងនៃទីក្រុង ព័រតូ អាលេហ្ក្រេ (Porto Alegre) ចាកចេញពីលំនៅឋានរបស់ពួកគេជាបន្ទាន់។ទាហានបានប្រើរថពាសដែកដើម្បីជួយសង្គ្រោះប្រជាជនពីការជន់លិចក្នុងតំបន់ កាណូអាស (Canoas) ភាគខាងជើងនៃទីក្រុង ជាទីដែលទឹកបានឈានដល់ជម្រៅប្រហែល ៣ ម៉ែត្រ ហើយផ្លូវថ្នល់អាចធ្វើដំណើរបានដោយប្រើទូកប៉ុណ្ណោះ។មជ្ឈមណ្ឌលជាតិសម្រាប់គ្រោះមហន្តរាយធម្មជាតិរបស់ប្រទេសប្រេស៊ីល បានព្រមានថាតំបន់ភាគខាងត្បូងនៃរដ្ឋ រីអូ ក្រានដេ ដូស៊ុល ស្ថិតនៅក្រោម «ហានិភ័យខ្ពស់» នៃទឹកជំនន់បន្ថែមទៀត ដោយភ្លៀងធ្លាក់ខ្លាំងរំពឹងថានឹងចាប់ផ្តើមឡើងវិញបន្ទាប់ពីការផ្អាកមួយរយៈ៕

តំបន់ Midwest ជាប់គាំង ដោយសារព្យុះ ខណៈព្យុះគួច វាយបោកបក់លើរដ្ឋ Michigan

ព្យុះកម្លាំងខ្លាំង បានវាយបោកបក់ឆ្លងកាត់រដ្ឋនានា នៅតំបន់ Midwest កាលពីថ្ងៃអង្គារ បង្កឲ្យមានភ្លៀងធ្លាក់ ខ្យល់បក់ខ្លាំង និងសន្ទុះខ្យល់ខ្លាំង ព្រមទាំងព្យុះកួច វាយបោកបក់លើតំបន់នេះ។ប្រព័ន្ធផ្សព្វផ្សាយក្នុងស្រុក បានរាយការណ៍ថាព្យុះកួចជាច្រើន បានវាយបោកបក់នៅភាគខាងត្បូងរដ្ឋ Michigan សហរដ្ឋអាមេរិកពេញមួយថ្ងៃ បណ្តាលឱ្យខូចខាតដល់អគារជាច្រើនខ្នង ប៉ុន្តែពុំមានអ្នកស្លាប់ ឬរងរបួស ត្រូវបានរាយការណ៍នោះទេ។រលកនៃអាកាសធាតុមិនអំណោយផលខ្លាំងនេះ បានកើតឡើងភ្លាមៗបន្ទាប់ពីព្យុះកួច បានវាយបោកបក់ទៅលើរដ្ឋអូក្លាហូម៉ា កាលពីថ្ងៃមុន ដែលបណ្តាលឱ្យមនុស្សយ៉ាងហោចណាស់ម្នាក់បបានស្លាប់ និងប្រាំនាក់ផ្សេងទៀតរងរបួស។របាយការណ៍ពីប្រព័ន្ធផ្សព្វផ្សាយក្នុងស្រុក បានពិពណ៌នាអំពីការខូចខាតយ៉ាងខ្លាំងដល់លំនៅឋាន និងព្យុះរំលើងដើមឈើ នៅផ្នែកភាគឦសានរបស់រដ្ឋនេះ។

ចំនួនអ្នកស្លាប់ដោយទឹកជំនន់នៅកេនយ៉ា ឡើងដល់ ២៣៨នាក់ ខណៈភ្លៀងធ្លាក់ខ្លាំងនៅបន្ត

រដ្ឋាភិបាល បាននិយាយកាលពីថ្ងៃអង្គារថា ចំនួនមនុស្សដែលបានបាត់បង់ជីវិតក្នុងគ្រោះទឹកជំនន់ និងបំណាក់ដី ដ៏មហន្តរាយ ដែលបង្កឡើងដោយភ្លៀងធ្លាក់ខ្លាំង នៅក្នុងប្រទេសកេនយ៉ា ចាប់តាំងពីខែមីនាមក បានកើនឡើងដល់២៣៨នាក់ ហើយ៧៥នាក់ផ្សេងទៀតនៅបាត់ខ្លួននៅឡើយ។អ្នកនាំពាក្យរដ្ឋាភិបាល លោក អ៊ីសាក វ៉ាវរ៉ា(Isaac Mwaura) បាននិយាយថា មនុស្សប្រាំបីនាក់ បានបាត់បង់ជីវិតនៅក្នុងទឹកជំនន់ ក្នុងរយៈពេល២៤ ម៉ោងកន្លងទៅនេះ។លោក Mwaura បាននិយាយថា គ្រួសារចំនួន ៤៧.០០០គ្រួសារ ត្រូវបានជម្លៀសខ្លួនចេញពីលំនៅឋាន ខណៈមនុស្សសរុបចំនួន ២៨៦.០១១នាក់ បានរងផលប៉ះពាល់ដោយភ្លៀងធ្លាក់ខ្លាំង និងទឹកជំនន់នៅទូទាំងប្រទេស។ លោក និយាយថា រដ្ឋាភិបាលបានប្ដេជ្ញាការពារអាយុជីវិត អ្នកទាំងឡាយណាដែលរងផលប៉ះពាល់ ហើយកំពុងស្ថិតក្នុងដំណើរការរៀបចំទីកន្លែងស្នាក់នៅដើម្បីទទួលប្រជាជនភៀសខ្លួន។ទន្ទឹមនឹងនេះ ផ្នែកខ្លះរបស់ប្រទេសកេនយ៉ា នៅតែត្រូវបានកាត់ផ្តាច់ និងមិនអាចចូលទៅដល់បាន បន្ទាប់ពីផ្លូវ និងស្ពាន ត្រូវបានទឹកជំនន់បំផ្លាញ បណ្តាលឱ្យប្រជាជនរាប់ពាន់នាក់ ទទួលរងផលប៉ះពាល់ដល់អាជីវកម្មនៅទូទាំងប្រទេស និងកំពុងបង្ខំឱ្យមានការពន្យារពេលមិនកំណត់នៃការបើកសាលារៀនឡើងវិញ។លោក Mwaura បានណែនាំដល់ពលរដ្ឋទាំងអស់ដែលរស់នៅតាមច្រករបៀងមាត់ទន្លេ និងក្នុងរង្វង់ ៣០ ម៉ែត្រនៃទន្លេនៅទូទាំងប្រទេស ឱ្យចាកចេញជាបន្ទាន់ បើមិនដូច្នេះនឹងត្រូវឲ្យជម្លៀសដោយបង្ខំ។មន្ត្រីរូបនេះ បាននិយាយឡើងវិញថា ក្រុមទីភ្នាក់ងារចម្រុះ ត្រូវបានដាក់ពង្រាយ និងកំពុងជួយសង្គ្រោះ និងចែកចាយស្បៀងអាហារ។

មេសា ជាខែក្តៅបំផុតក្នុងកំណត់ត្រា ខណៈបម្រែបម្រួលអាកាសធាតុរុញឱ្យមានរលកកម្ដៅខ្លាំងរយៈពេល១១ខែ

សេវាតាមដានបម្រែបម្រួលអាកាសធាតុរបស់សហភាពអឺរ៉ុប ខូភើនីកាស (Copernicus)(C3S) បាននិយាយនៅក្នុងព្រឹត្តិបត្រប្រចាំខែមួយថា ពិភពលោកទើបតែជួបប្រទះខែមេសាដែលជាខែមានសីតុណ្ហភាពក្តៅបំផុតក្នុងកំណត់ត្រា ដោយបន្តរយៈពេល១១ខែ ដែលខែនិមួយៗ ត្រូវបានកត់ត្រាជាខែក្តៅបំផុតក្នុងកំណត់ត្រា។ក្រុមអ្នកវិទ្យាសាស្ត្រ បានបញ្ជាក់រួចមកហើយថា បម្រែបម្រួលអាកាសធាតុ បានបណ្តាលឱ្យមានអាកាសធាតុក្ដៅជាក់លាក់មួយនៅក្នុងខែមេសា រួមទាំងរលកកម្ដៅនៅតំបន់ហ្សាហេល (Sahel) របស់អាហ្វ្រិក ដែលពាក់ព័ន្ធទៅនឹងការស្លាប់មនុស្សរាប់ពាន់នាក់។រលកកម្ដៅទាំងនោះ ក៏បានជះឥទ្ធិពលដល់បណ្ដាប្រទេសនៅអាស៊ីផងដែរ ដោយរដ្ឋាភិបាលសម្រេចបិទសាលារៀននៅក្នុងប្រទេសហ្វីលីពីន និងកម្ពុជា ដើម្បីការពារសុខភាពសិស្ស ខណៈកម្ដៅក៏បានហក់ឡើងដល់កម្រិតដ៏គ្រោះថ្នាក់នៅទូទាំងប្រទេសឥណ្ឌា និងបង់ក្លាដែសក៏ដូចជាប្រទេសច្រើននៅអាស៊ី។ក្នុងរយៈពេល១២ ខែដែលកំណត់ថាខែមេសាជាខែក្ដៅបំផុត សីតុណ្ហភាពជាមធ្យមរបស់ពិភពលោកគឺខ្ពស់បំផុតក្នុងកំណត់ត្រាសម្រាប់រយៈពេល ១២ ខែ គឺ១,៦១ អង្សាសេលើសពីកម្រិតមធ្យមភាគក្នុងសម័យមុនឧស្សាហកម្មឆ្នាំ ១៨៥០ ដល់ ១៩០០ ។ ការបំភាយឧស្ម័នផ្ទះកញ្ចក់ពីការដុតឥន្ធនៈហ្វូស៊ីលគឺជាមូលហេតុចម្បងនៃបម្រែបម្រួលអាកាសធាតុ។ ក្នុងរយៈពេលប៉ុន្មានខែថ្មីៗនេះ បាតុភូតអាកាសធាតុ អេល នីញ៉ូ (El Nino) ដែលធ្វើឲ្យផ្ទៃទឹកក្នុងមហាសមុទ្រប៉ាស៊ីហ្វិក ភាគខាងកើតក្តៅខ្លាំង ក៏បានបង្កើនសីតុណ្ហភាពផងដែរ៕

ការប៉ះទង្គិចគ្នានិងការចាប់ខ្លួនអ្នកតវ៉ាគាំទ្រប៉ាឡេស្ទីន រីករាលដាលពាសពេញសាកលវិទ្យាល័យនៅអឺរ៉ុប

នគរបាល ក្នុងតំបន់ បានប៉ះទង្គិចគ្នាជាមួយក្រុមបាតុករគាំទ្រប៉ាឡេស្ទីន នៅក្នុងរដ្ឋធានីអាំស្ទែដាំ (Amsterdam) កាលពីថ្ងៃទី៧ខែឧសភា បន្ទាប់ពីនគរបាលបង្រ្កាបកុបកម្ម បានបំបែកហ្វូងមនុស្សដោយហិង្សា លើជំរំមួយនៅក្នុងសាកលវិទ្យាល័យមួយកន្លែង ។ នគរបាលបានប្រើដំបងទប់ទល់នឹងការកញ្ជ្រោលរបស់ក្រុមអ្នកតវ៉ា កំពុងបិទផ្លូវជុំវិញបរិវេណរបស់សាកលវិទ្យាល័យនោះ ដែលព្យាយាមរុលទៅជិតវិមានរបបប្រល័យពូជសាសន៍ហូឡូកូស(Holocaust Monumen) របស់អឺរ៉ុប ។កាលពីព្រឹកថ្ងៃអង្គារ ហ្វូងមនុស្សប់រយនាក់ បានប្រមូលផ្ដុំគ្នា ស្រែកពាក្យស្លោក ប្រឆាំងនឹងសង្គ្រាម នៅក្នុងដែនដីហ្កាហ្សា និងថ្កោលទោសប្រតិបត្តិការយោធារបស់អ៊ីស្រាអែល ដែលនៅតែបន្ត។ នគរបាល បានប្រើគ្រឿងចក្រឈូសឆាយរនាំងនៅសាកាលវិទ្យាល័យអាំស្ទែដាំ កាលពីព្រឹកថ្ងៃអង្គារ និងបានចាប់ឃុំខ្លួនមនុស្សចំនួន១៤០នាក់ដែលពេលខ្លះមានការប៉ះទង្គិចគ្នាដោយហឹង្សា ទៀតផង ។ នៅក្នុងប្រទេសបារាំងវិញ បាតុករជានិសិ្សតជាច្រើន ចេញតវ៉ានៅមុខសាកលវិទ្យា Sciences Po University ក្នុងទីក្រុងប៉ារីស កាលពីថ្ងៃអង្គារទី៧ខែឧសភា រិះគន់ការវាយប្រហារនាពេលថ្មីៗរបស់អ៊ីស្រាអែល និងការកាត់ផ្ដាច់ផ្លូវនាំជំនួយមនុស្សធម៌ដ៏សំខាន់ចូលទៅក្នុងទីក្រុងរ៉ាហ្វា។ ចំណែកនៅចក្រភពអង់គ្លេសវិញ ក្រុមនិស្សិតនៅសាកលវិទ្យាល័យ Oxford បានបោះជំរំនៅក្នុងបរិវេណសាកលវិទ្យាល័យនេះជាការបង្ហាញការគាំទ្រចំពោះពលរដ្ឋប៉ាឡេស្ទីនពីការវាយប្រហារសម្លាប់មនុស្សរាប់ម៉ឺននាក់នៅហ្កាហ្សាក្រោមស្នាដៃរបស់អ៊ីស្រាអែល។ ការតវ៉ារបស់និស្សិតប្រឆាំងសង្រ្គាមរបស់អ៊ីស្រាអែល និងការទាមទារឲ្យសាកលវិទ្យានានា កាត់ផ្ដាច់ទំនាក់ទំនងជាមួយអ៊ីស្រាអែល បានចាប់ផ្ដើម រីកសាយទូទាំងអឺរ៉ុប ហើយបច្ចុប្បន្នចលនានិស្សិតតវ៉ា នៅតែបន្តទូទាំងសហរដ្ឋអាមេរិក៕

បុរសបីនាក់ ដែលត្រូវចោទពីបទឃាតកម្មមេដឹកនាំសាសនាស៊ីក បង្ហាញខ្លួននៅតុលាការកាណាដា

បុរសបីនាក់ ដែលត្រូវបានចោទប្រកាន់ពីបទធ្វើឃាតមេដឹកនាំសាសនាស៊ីក សញ្ជាតិកាណាដា លោក ហាឌីប ស៊ីញនីចា (Hardeep Singh Nijjar) កាលពីឆ្នាំមុន នៅក្នុងហេតុការណ៍ដែលបង្កឱ្យមានវិបត្តិការទូតរវាងកាណាដា និងឥណ្ឌា បានបង្ហាញខ្លួននៅក្នុងបន្ទប់សវនាការនៅខេត្តប្រ៊ីដធីស កូឡំប៊ី (British Columbia) កាលពីថ្ងៃអង្គារ (០៧ ឧសភា)។ជនជាប់ចោទទីមួយឈ្មោះ ខារ៉ានព្រីត ស៊ីញ (Karanpreet Singh) វ័យ ២៨ ឆ្នាំ ជនល្មើសទីពីរឈ្មោះ ខាម៉ាលព្រីត ស៊ីញ (Kamalpreet Singh) វ័យ ២២ ឆ្នាំ និងទីបីឈ្មោះ ខារ៉ាន ប្រា (Karan Brar) វ័យ ២២ ឆ្នាំ ដែលជាជនជាតិឥណ្ឌាទាំងអស់ ប្រឈមនឹងការចោទប្រកាន់ពីបទមនុស្សឃាតកម្រិតទី១ និងការសមគំនិតក្នុងអំពើឃាតកម្ម។ អ្នកទាំងបីបានបង្ហាញខ្លួនតាមវីដេអូពាក់ឯកសណ្ឋានពន្ធនាគារពណ៌ទឹកលឿងទុំ។អតីតមេដឹកនាំសាសនាស៊ីក លោក នីចា វ័យ ៤៥ ឆ្នាំត្រូវបានបាញ់សម្លាប់កាលពីខែមិថុនា នៅខាងក្រៅវិហារស៊ីក ក្នុងតំបន់ សើរ៉េយ (Surrey) ជាយក្រុង វេនខូវើ (Vancouver) ដែលមានប្រជាជនកាន់សាសនាស៊ីកជាច្រើន។ ប៉ុន្មានខែក្រោយមក នាយករដ្ឋមន្ត្រីកាណាដា លោក ចាស្ទីន ទ្រូដូ (Justin Trudeau) បានធ្វើឱ្យមានវិបត្តិការទូតជាមួយទីក្រុង ញូវដេលី នៅពេលដែលលោកបានលើកឡើងពីភស្តុតាងនៃការជាប់ពាក់ព័ន្ធរបស់រដ្ឋាភិបាលឥណ្ឌា ក្នុងការស្លាប់របស់លោក នីចា។នគរបាលកាណាដា បាននិយាយថា ពួកគេកំពុងស៊ើបអង្កេតថាតើជនជាប់ចោទទាំងបីនាក់នោះមានទំនាក់ទំនងនឹងរដ្ឋាភិបាលឥណ្ឌា ដែរឬយ៉ាងណា ខណៈឥណ្ឌា បានបដិសេធថាមិនមានការជាប់ពាក់ព័ន្ធនឹងការស្លាប់នោះទេ។ រដ្ឋមន្ត្រីការបរទេសឥណ្ឌា លោក ស៊ូប្រាម៉ានយ៉ាម ចៃសានខា (Subrahmanyam Jaishankar) បាននិយាយថា ឥណ្ឌានឹងរង់ចាំនគរបាលកាណាដា ចែករំលែកព័ត៌មានអំពីជនជាប់ចោទទាំងបីនាក់នោះ៕

ការប៉ះទង្គិចបានផ្ទុះឡើងក្នុងការប្រមូលផ្ដុំតវ៉ាគាំទ្រប៉ាឡេស្ទីន នៅប្រទេសក្រិក

ការប៉ះទង្គិចគ្នាបានផ្ទុះឡើងរវាងនគរបាល និងក្រុមបាតុករអំឡុងពេលបាតុកម្មគាំទ្រប៉ាឡេស្ទីន នៅកណ្តាលក្រុងអាថែន កាលពីថ្ងៃអង្គារ (០៧ ឧសភា) មួយថ្ងៃបន្ទាប់ពីយោធាអ៊ីស្រាអែល បានបើកប្រតិបត្តិការជើងគោក និងផ្លូវអាកាសនៅក្នុងផ្នែកភាគខាងកើតក្រុង រ៉ាហ្វា ក្នុងតំបន់ហ្កាហ្សាស្ទ្រីប។មនុស្សជាង ៣០០ នាក់ ដែលកាន់ទង់ជាតិប៉ាឡេស្ទីន និងបដាដែលសរសេរថា «កុំប៉ះពាល់ក្រុងរ៉ាហ្វា!» បានប្រមូលផ្តុំគ្នានៅខាងក្រៅអគារសភាក្នុងរដ្ឋធានីក្រិក។ នគរបាលបានបាញ់ឧស្ម័នបង្ហូរទឹកភ្នែកដើម្បីបំបែកក្រុមបាតុករមួយក្រុមតូចដែលបានឡើងតាមទ្វារស្ថានទូតអេហ្ស៊ីប ទល់មុខសភា ហើយការប៉ះទង្គិចគ្នានេះមានរយៈពេលខ្លីប៉ុណ្ណោះ។អ្នកតវ៉ាម្នាក់បាននិយាយថា «ពួកយើងនៅទីនេះក្នុងសាមគ្គីភាពជាមួយអ្នកស្រុកហ្កាហ្សា ហើយយើងនឹងឆ្លើយតបគ្រប់ពេលដែលប៉ាឡេស្ទីនអំពាវនាវសម្រាប់សាមគ្គីភាព»។ ក្រសួងសុខាភិបាលរបស់ហ្កាហ្សា បាននិយាយកាលពីថ្ងៃអង្គារ ថាយ៉ាងហោចណាស់មានជនជាតិប៉ាឡេស្ទីន ៣៤.៧៨៩ នាក់ត្រូវបានសម្លាប់ និងមនុស្ស ៧៨.២០៤ នាក់បានរងរបួសនៅក្នុងសង្គ្រាមរយៈពេលប្រាំពីរខែ។សង្គ្រាមដ៏បង្ហូរឈាមនេះបានចាប់ផ្តើមនៅពេលដែលពួកសកម្មប្រយុទ្ធហាម៉ាស បានវាយប្រហារអ៊ីស្រាអែលកាលពីថ្ងៃទី០៧ ខែតុលា ដោយបានសម្លាប់មនុស្សប្រហែល ១.២០០ នាក់ និងចាប់មនុស្សប្រហែល ២៥០ នាក់ទៀត ដែលក្នុងនោះមនុស្ស ១៣៣ នាក់ត្រូវបានគេជឿថានៅតែជាប់ជាចំណាប់ថ្នូររបស់ក្រុមហាម៉ាស៕

ក្រុមហាម៉ាស ព្រមានមិនធ្វើកិច្ចព្រមព្រៀងឈប់បាញ់ បើអ៊ីស្រាអែល បន្តវាយប្រហារលើហ្កាហ្សា

មន្ត្រីក្រុមហាម៉ាស លោក អូសាម៉ា ហាមដាន (Osama Hamdan) បានព្រមានកាលពីថ្ងៃអង្គារ (០៧ ឧសភា) ថាប្រសិនបើការឈ្លានពានយោធារបស់អ៊ីស្រាអែល នៅតែបន្តនៅក្នុងទីក្រុង រ៉ាហ្វា (Rafah) នោះនឹងមិនមានកិច្ចព្រមព្រៀងឈប់បាញ់ទេ។ការអត្ថាធិប្បាយរបស់លោក ហាមដាន ត្រូវបានធ្វើឡើងក្នុងអំឡុងសន្និសីទសារព័ត៌មានក្នុងទីក្រុងបេរ៉ូត ខណៈគណៈប្រតិភូមកពីក្រុមហាម៉ាស ដែលជាក្រុមគ្រប់គ្រងតំបន់ហ្កាហ្សាស្ទ្រីប បានទៅដល់ទីក្រុងគែរ ពីទីក្រុងដូហា ដើម្បីបន្តការចរចាបទឈប់បាញ់ នេះបើតាមសេចក្តីថ្លែងការណ៍មួយរបស់ក្រុមហាម៉ាស។លោក ហាមដាន បាននិយាយថា «យើងបញ្ជាក់ថា ប្រសិនបើអ៊ីស្រាអែល អនុវត្តប្រតិបត្តិការយោធានៅក្រុងរ៉ាហ្វា នោះនឹងជារឿងអាក្រក់សម្រាប់កងទ័ពអ៊ីស្រាអែល»។ លោកបានបន្ថែមថា «គ្រប់យ៉ាងគឺស្ថិតនៅក្នុងកណ្ដាប់ដៃរបស់លោក ណេតាន់យ៉ាហ៊ូ ហើយសំណើបទឈប់បាញ់ចុងក្រោយដែលក្រុមហាម៉ាសបានយល់ព្រម តំណាងឱ្យភាពអប្បបរមាដែលឆ្លើយតបទៅនឹងការទាមទាររបស់ប្រជាជនប៉ាឡេស្ទីន និងក្រុមហាម៉ាស»។កងកម្លាំងអ៊ីស្រាអែល បានឡោមព័ទ្ធកាន់កាប់ច្រកឆ្លងកាត់ព្រំដែនដ៏សំខាន់រវាងអេហ្ស៊ីប និងភាគខាងត្បូងតំបន់ហ្កាហ្សា កាលពីថ្ងៃអង្គារ ដោយបានបិទផ្លូវជំនួយដ៏សំខាន់មួយចូលទៅក្នុងតំបន់ហ៊ុមព័ទ្ធប៉ាឡេស្ទីន ដែលប្រជាជនជាង ១ លាននាក់កំពុងស្ថិតក្នុងភាពអត់ឃ្លានរួចទៅហើយនោះ៕

ឧបទ្ទវហេតុបាក់រលំអគារនៅអាហ្រ្វិកខាងត្បូង អ្នកស្លាប់ឡើងដល់៦នាក់

ក្រុមអ្នកជួយសង្គ្រោះបានប្រើប្រាស់ដងស្ទូច ការជីកខួង និងដៃទទេរបស់ពួកគេ ដើម្បីព្យាយាមទៅដល់មនុស្សរាប់សិបនាក់ដែលនៅជាប់ខ្លួន នៅពេលអគារកម្ពស់ច្រើនជាន់ ដែលកំពុងស្ថិតក្រោមការសាងសង់នៅទីក្រុង ចច(George) ប្រទេសអាហ្វ្រិកខាងត្បូង បានបាក់រលំ បណ្តាលឲ្យមនុស្សយ៉ាងហោចណាស់៦នាក់ស្លាប់។ក្នុងចំណោមកម្មករ៧៥នាក់ដែលកំពុងធ្វើការនៅការដ្ឋានសំណង់ មនុស្ស៤៨នាក់នៅមិនទាន់រកឃើញនៅឡើយកាលពីថ្ងៃអង្គារ។ អាជ្ញាធរពុំបានធ្វើការអត្ថាធិប្បាយអំពីមូលហេតុអ្វី ដែលបណ្តាលឱ្យមានការបាក់រលំនេះនៅឡើយទេកាលពីថ្ងៃចន្ទ។ ខណៈក្រុមជួយសង្គ្រោះ អាចទំនាក់ទំនងបានជាមួយមនុស្ស១១ នាក់ ដែលកប់នៅក្នុងបំណែកបាក់បែក ក្រុមគ្រួសារដែលបានមកប្រមូលផ្តុំគ្នារង់ចាំដំណឹងពីមនុស្សជាទីស្រលាញ់របស់ពួកគេ បានយំដោយភ័យខ្លាចពីដំណឹងអាក្រក់បំផុត។មានឱកាសនៃក្តីសង្ឃឹម ដោយមនុស្សជាច្រើន បានទះដៃសាទរ ខណៈក្រុមអ្នកជួយសង្គ្រោះបានទាញមនុស្សម្នាក់ចេញមកមានជីវិតរស់នៅពីថ្មបាក់បែក។ រហូតមកដល់ពេលនេះ មនុស្ស២៧នាក់ ត្រូវបានគេទាញយកចេញពីកន្លែងកើតហេតុ នៅក្នុងទីក្រុងឆ្នេរ Cape Town ភាគខាងកើត រួមទាំងមនុស្សយ៉ាងហោចណាស់៦នាក់ដែលបានស្លាប់។ ប្រធានាធិបតី លោក Cyril Ramaphosa បានអំពាវនាវឱ្យមានការស៊ើបអង្កេតក្នុងការបាក់រលំអគារបណ្តាលឲ្យមានមនុស្សស្លាប់ និងស្វែងរកអ្នកដែលនៅបាត់ខ្លួន។

ទីក្រុង Kyiv លើកឡើងថា ផែនការរបស់រុស្ស៊ីក្នុងការលួចធ្វើឃាត លោក Zelensky ត្រូវបានបំផ្លាញចោល

សេវាសន្តិសុខអ៊ុយក្រែន (SBU) និយាយថា ខ្លួនបានរារាំងផែនការរបស់រុស្ស៊ី ក្នុងការធ្វើឃាតលោក ប្រធានាធិបតី Volodymyr Zelensky និងមន្ត្រីជាន់ខ្ពស់អ៊ុយក្រែនផ្សេងទៀត។ទូរទស្សន៍BBC បានរាយការណ៍ថា សេវាសន្តិសុខអ៊ុយក្រែន(SBU) បានឱ្យដឹងថា ផែនការរបស់រុស្ស៊ី ក្នុងការលួចធ្វើឃាតប្រធានាធិបតីអ៊ុយក្រែន និងមន្ត្រីជាន់ខ្ពស់ជាច្រើននាក់ទៀត ដែលជាអំណាយសម្រាប់ការឡើងកាន់តំណែងអាណត្តិទី៥របស់លោក Vladimir Putinនោះ ត្រូវបានបំផ្លាញចោល ដែលក្នុងនោះ វរសេនីយ៍ឯកពីរនាក់នៃអង្គភាពការពារមន្ត្រីរដ្ឋាភិបាលអ៊ុយក្រែន ត្រូវបានចាប់ខ្លួន។សេវាសន្តិសុខអ៊ុយក្រែន បាននិយាយថាពួកគេជាផ្នែកមួយនៃបណ្តាញភ្នាក់ងារដែលជាកម្មសិទ្ធិរបស់សេវាកម្មសន្តិសុខរដ្ឋរុស្ស៊ី (FSB) ។ ពួកគេត្រូវបានគេរាយការណ៍ថាកំពុងស្វែងរក ក្រុមប្រតិបត្តិករ ដែលមានឆន្ទៈក្នុងចំណោមអង្គរក្សរបស់លោក Zelensky ដើម្បីចាប់ជំរិត និងសម្លាប់លោក។ ចាប់តាំងពីទាហានឆ័ត្រយោងរុស្ស៊ីប៉ុនប៉ងចុះនៅទីក្រុង Kyiv និងធ្វើឃាត លោក ប្រធានាធិបតី Zelensky ប៉ុន្មានម៉ោងនិងប៉ុន្មានថ្ងៃនៃការចាប់ផ្ដើមលុកលុយពេញបន្ទុកកាលពីខែកុម្ភៈឆ្នាំ ២០២២ ផែនការធ្វើឃាតលើរូបលោក គឺជារឿងធម្មតា។មេដឹកនាំអ៊ុយក្រែន បាននិយាយនៅពេលចាប់ផ្តើមការវាយប្រហារចូលក្នុងប្រទេសរបស់លោកថា រូបលោកគឺជាគោលដៅទីមួយរបស់រុស្ស៊ី។ ប៉ុន្តែផែនការចោទប្រកាន់នេះមានលក្ខណៈខុសប្លែកពីអ្វីផ្សេងទៀត។ ផែនការនេះ ពាក់ព័ន្ធនឹងក្រុម វរសេនីយឯក ដែលការងាររបស់ខ្លួន គឺដើម្បីរក្សាសុវត្ថិភាពមន្ត្រី និងស្ថាប័ន ដែលត្រូវបានចោទប្រកាន់ថាត្រូវបានជួលជាក្រុមរនុកក្នុង។ ទីភ្នាក់ងារបន្ថែមថា គោលដៅផ្សេងទៀតរួមមាន ប្រមុខចារកម្មយោធាអ៊ុយក្រែន លោក គីរីឡូ ប៊ូដានូវ (Kyrylo Budanov) និងប្រធានសេវាសន្តិសុខអ៊ុយក្រែន លោក វ៉ាស្លីល ម៉ាល់យុគ (Vasyl Malyuk) ។ក្រុមនេះត្រូវបានគេរាយការណ៍ថា សត្រូវគ្រោងនឹងសម្លាប់លោក ប៊ូដានូវ មុនពិធីបុណ្យគ្រិស្តអូតូដុកអ៊ីស្ទ័រ (Orthodox Easter) ដែលឆ្នាំនេះបានប្រព្រឹត្តទៅ នៅថ្ងៃទី ៥ ខែឧសភាថ្មីៗនេះ ។យោងតាមសេវាសន្តិសុខអ៊ុយក្រែន ក្រុមអ្នករៀបចំផែនការមានគោលបំណងប្រើក្រុមរនុកក្នុង ដើម្បីទទួលបានព័ត៌មានអំពីទីតាំងរបស់មេដឹកនាំអ៊ុយក្រែន ហើយបន្ទាប់មកពួកគេនឹងវាយប្រហារដោយរ៉ូកែត យានដ្រូន និងគ្រាប់បែកប្រឆាំងរថក្រោះ៕

បណ្ដាញសង្គម

ព័ត៌មានថ្មីៗ

អនុប្រធានទី១ គ.ជ.គ.ម បន្តចុះសម្របសម្រួលរៀបចំឱ្យប្រជាពលរដ្ឋភៀសសឹកចូលទៅស្នាក់នៅមណ្ឌលសុវត្ថិភាពថ្មី

រដ្ឋមន្រ្តីក្រសួងបរិស្ថានបានណែនាំឱ្យមន្ទីរបរិស្ថានខេត្តមណ្ឌលគិរីបន្តសហការជាមួយអ្នកពាក់ព័ន្ធនិងដៃគូពង្រឹងការគ្រប់គ្រងធនធានធម្មជាតិ ការកាពារភ្លើងឆេះព្រៃ ការពង្រឹងការអនុវត្តច្បាប់ និងការលើកកម្ពស់ជីវភាព របស់ប្រជាពលរដ្ឋនៅតាមសហគមន៍មូលដ្ឋាន

ឯកឧត្តម ហ៊ុន ម៉ានី អញ្ជើញជាអធិបតីក្នុងពិធីបញ្ចុះខណ្ឌសីមាព្រះវិហារថ្មី នៅវត្តព្រៃជុំ ខេត្តកំពង់ស្ពឺ

ចាប់ពីថ្ងៃទី២៥ដល់២៨ ខែកុម្ភៈកម្ពុជាបណ្ដេញចេញជនបរទេសចំនួន ១,៥០១នាក់ចេញពាក់ព័ន្ធករណី Online Scams និងលួចឆ្លងដែន ស្នាក់ធ្វើការងារខុសច្បាប់

តើអ្នកណាអាចឡើងដឹកនាំអ៊ីរ៉ង់ បន្ទាប់ពីការស្លាប់របស់មេដឹកនាំកំពូល Ayatollah Ali Khamenei?

អាមេរិក ប្រើសព្វាវុធទំនើបៗ រួមទាំងដ្រូនអត្តឃាត និងមីស៊ីល Tomahawk ក្នុងការវាយប្រហារលើអ៊ីរ៉ង់

ទូរទស្សន៍រដ្ឋ ៖ប្រធានាធិបតីអ៊ីរ៉ង់ និងមន្ត្រី ២ រូប នឹងដឹកនាំការផ្ទេរអំណាចបន្ទាប់ពីការស្លាប់របស់លោក Khamenei

ទូតកម្ពុជាប្រចាំប្រទេសកូរ៉េ នាំយកមូលនិធិមនុស្សធម៌ របស់សហគមន៍ខ្មែរនៅកូរ៉េ ចែកជូនជនភៀសសឹក និងគ្រួសារវីរកងទ័ព

ហេតុអ្វីបានជាសហរដ្ឋអាមេរិក វាយប្រហារអ៊ីរ៉ង់?

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877