BTV NEWS

កម្ពុជាសហការជាមួយបណ្តាប្រទេសជាដៃគូរបង្ក្រាបករណីដឹកជញ្ជូនគ្រឿងញៀនឆ្លងដែនក្នុងឆ្នាំ២០២៥ ទទួលបានលទ្ធផលល្អ

នៅឆ្នាំ២០២៥ មន្ទីរប្រឆាំងបទល្មើសគ្រឿងញៀនបង្ក្រាបបទល្មើសគ្រឿងញៀនជាង ៩ពាន់ករណី ឃាត់ខ្លួនជនសង្ស័យជាង ២ម៉ឺននាក់ និងចាប់យកសារធាតុញៀនជាង ៧តោន

រដ្ឋបាលរាជធានីភ្នំពេញ បង្ក្រាបទីតាំងហ្គេមអនឡាញខុសច្បាប់ក្នុងខណ្ឌចំការមនឃាត់ខ្លួនជនជាតិឥណ្ឌូណេស៊ី ២៤នាក់

សមត្ថកិច្ចចម្រុះបង្ក្រាបករណីបង្ខាំងមនុស្ស និងឆែកឆេរទីតាំងសង្ស័យ Online Scam សង្គ្រោះជនរងគ្រោះម្នាក់ និងឃាត់ខ្លួនជនសង្ស័យជាជនជាតិបង់ក្លាដេសដូចគ្នាចំនួន២នាក់នៅខណ្ឌសែនសុខ

សន្តិសុខ និង សង្គម

ប្រមុខការទូតសហភាពអឺរ៉ុប ជំរុញឲ្យរដ្ឋសមាជិកបញ្ជូនប្រព័ន្ធការពារដែនអាកាសPatriot ទៅកាន់អ៊ុយក្រែន

ប្រធានគោលនយោបាយការបរទេសរបស់សហភាពអឺរ៉ុបលោក ចូសិប បូរ៉ែល ( Josep Borrell) កាលពីថ្ងៃចន្ទ បានជំរុញឲ្យរដ្ឋសមាជិកបញ្ជូនប្រព័ន្ធការពារដែនអាកាស Patriot ដែលបានស្នើដោយអ៊ុយក្រែន។លោកបូរ៉ែល បានថ្លែងក្នុងសន្និសីទសារព័ត៌មានក្នុងប្រទេសលុចសំបួ បន្ទាប់ពីកិច្ចប្រជុំរួមរបស់រដ្ឋមន្ត្រីការបរទេសនិងការពារជាតិរបស់សហភាពអឺរ៉ុបថា៖«ឥឡូវនេះ អ្វីៗត្រូវបាននិយាយ ហើយរឿងជាច្រើនដែលត្រូវធ្វើ»។ជាមួយនឹងជួរមុខក្រោមសម្ពាធយ៉ាងខ្លាំងពីកងកម្លាំងរុស្ស៊ី អ៊ុយក្រែន បាននិងកំពុងអង្វរសម្ព័ន្ធមិត្តឲ្យបញ្ជូនគ្រាប់រំសេវ និងសព្វាវុធបន្ថែមទៀត ជាពិសេសប្រព័ន្ធប្រឆាំងយន្តហោះដូចជា Patriot ជាដើម។លោកបូរ៉ែល បាននិយាយថា បណ្តាប្រទេសសហភាពអឺរ៉ុប យល់ពីតម្រូវការបន្ទាន់របស់អ៊ុយក្រែន ហើយថា ប្រទេសទាំងអស់ គឺស្ថិតក្នុងទីតាំងមួយ ដើម្បីធ្វើការសម្រេចចិត្ត»។ លោកបានលើកឡើងថា ក្រុម Patriots មិនស្ថិតនៅក្នុងកម្មសិទ្ធិរបស់នាយកប្រតិបត្តិសហភាពអឺរ៉ុបទេ។ «ប្រព័ន្ធ Patriots ស្ថិតនៅក្នុងរាជធានីនានា ហើយវាអាស្រ័យលើពួកគេ ធ្វើការសម្រេចចិត្ត។រដ្ឋមន្ត្រីការបរទេស និងការពារជាតិរបស់សហភាពអឺរ៉ុប បានពិភាក្សាអំពីការគាំទ្រសម្រាប់អ៊ុយក្រែន- បន្ទាប់ពីការអនុម័តរបស់សមាជិកសភាអាមេរិកអំពីកញ្ចប់ជំនួយជិត ៦១ពាន់លានដុល្លារ ក៏ដូចជាការដាក់ទណ្ឌកម្មប្រឆាំងនឹងអ៊ីរ៉ង់សម្រាប់ការវាយប្រហារលើអ៊ីស្រាអែល និងការផ្គត់ផង់អាវុធដល់ប្រទេសរុស្ស៊ី។រដ្ឋមន្ត្រីការបរទេសថ្មីរបស់ប្រទេសឡាតវីលោកស្រី បៃបា ប្រេស ( Baiba Braže) បាននិយាយថា វាជារឿងសំខាន់ដែលបណ្តាប្រទេសសហភាពអឺរ៉ុប កុំមានការអាក់អន់ស្រពន់ចិត្តនៅពេលនេះ ដែលសហរដ្ឋអាមេរិក បានអនុ ម័តកញ្ចប់ជំនួយដែលពន្យារពេលជាយូរមកហើយនោះ។

អ៊ីស្រាអែល កំពុងពង្រីកតំបន់មនុស្សធម៌ហ្កាហ្សា សម្រាប់លទ្ធភាពនៃការវាយប្រហារក្រុង រ៉ាហ្វា

វិទ្យុរដ្ឋហេប្រ៊ូ (HPR) បានរាយការណ៍កាលពីថ្ងៃចន្ទ (២២ មេសា) ថាអ៊ីស្រាអែល កំពុងរៀបចំពង្រីក «តំបន់មនុស្សធម៌» នៅតំបន់ហ្កាហ្សាស្ទ្រីប ដើម្បីត្រៀមសម្រាប់ការវាយប្រហារដែលអាចកើតមានលើទីក្រុង រ៉ាហ្វា (Rafah) ជាប់ព្រំដែន។វិទ្យុនេះបាននិយាយថា តំបន់មនុស្សធម៌ថ្មីនឹងពង្រីកពីភូមិ អាល់ម៉ាវ៉ាស៊ី (Al-Mawasi) ភាគខាងត្បូងតាមបណ្តោយតំបន់ឆ្នេរនេះទៅកាន់ជាយក្រុង ឌើ អាល់បាឡា (Deir al-Balah) នៅភាគកណ្តាលតំបន់ហ្កាហ្សាស្ទ្រីប ហើយនឹងអាចដាក់ជនភៀសខ្លួនបានប្រហែលមួយលាននាក់។យោងតាមរបាយការណ៍បានឱ្យដឹងថា មន្ទីរពេទ្យចល័តចំនួនប្រាំទីតាំងត្រូវបានបង្កើតឡើងនៅក្នុងតំបន់នេះ ដោយបន្ថែមពីលើមន្ទីរពេទ្យដែលមានស្រាប់ដែលកំពុងដំណើរការ។ នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បានប្តេជ្ញាកាលពីថ្ងៃអាទិត្យ ថានឹងបង្កើនសម្ពាធផ្នែកយោធា និងនយោបាយលើក្រុមហាម៉ាស នៅប៉ុន្មានថ្ងៃខាងមុខ។លោក ណេតាន់យ៉ាហ៊ូ បានគំរាមម្តងហើយម្តងទៀតថានឹងបើកការវាយប្រហារលើក្រុង រ៉ាហ្វា ព្រោះទីនោះជា «បន្ទាយដ៏រឹងមាំ» ចុងក្រោយរបស់ក្រុមហាម៉ាស។ ក្រុង រ៉ាហ្វា បានក្លាយជាជម្រកចុងក្រោយសម្រាប់ប្រជាជនប៉ាឡេស្ទីនជាង ១,៤ លាននាក់ បន្ទាប់ពីការផ្លាស់ទីលំនៅរបស់ពួកគេពីភាគខាងជើង និងភាគកណ្តាលតំបន់ហ្កាហ្សាស្រ្ទីប ដោយសារតែជម្លោះដ៏បង្ហូរឈាមដែលកំពុងបន្តរវាងក្រុមហាម៉ាស និងអ៊ីស្រាអែល៕

អ៊ីរ៉ង់ ប្តេជ្ញាឆ្លើយតបកាន់តែខ្លាំងក្លា ប្រសិនបើអ៊ីស្រាអែល បង្កើតកំហុសណាមួយទៀត

អ្នកនាំពាក្យក្រសួងការបរទេសអ៊ីរ៉ង់ លោក ណាសើ ខាណានី (Nasser Kanaani) កាលពីថ្ងៃចន្ទ (២២ មេសា) បានព្រមានថា ប្រទេសអ៊ីរ៉ង់ នឹងធ្វើការឆ្លើយតប «កាន់តែតឹងរ៉ឹង និងខ្លាំងក្លា» ប្រសិនបើអ៊ីស្រាអែល ធ្វើឱ្យមានកំហុសឆ្គងណាមួយផ្សេងទៀត។ លោកបានធ្វើការលើកឡើងនេះនៅក្នុងសន្និសីទសារព័ត៌មានប្រចាំសប្តាហ៍ក្នុងរដ្ឋធានីតេអេរ៉ង់ ខណៈអត្ថាធិប្បាយអំពីប្រតិបត្តិការយោធាសងសឹកដ៏ធំរបស់អ៊ីរ៉ង់ នាពេលថ្មីៗនេះប្រឆាំងនឹងអ៊ីស្រាអែល ដែលត្រូវបានអនុវត្តជាការឆ្លើយតបទៅនឹងការវាយប្រហាររបស់អ៊ីស្រាអែលកាលពីថ្ងៃទី០១ ខែមេសា ប្រឆាំងនឹងស្ថានកុងស៊ុលអ៊ីរ៉ង់ នៅក្នុងប្រទេសស៊ីរី។លោក ខាណានី និយាយថា ការវាយប្រហាររបស់អ៊ីស្រាអែល ទៅលើទីតាំងស្ថានទូតរបស់អ៊ីរ៉ង់ គឺជាការរំលោភបំពានយ៉ាងធ្ងន់ធ្ងរលើច្បាប់ និងបទប្បញ្ញត្តិអន្តរជាតិ។ លោកសង្កត់ធ្ងន់ថា ទីក្រុងតេអេរ៉ង់ បានចាត់ទុកថាប្រតិបត្តិការសងសឹករបស់ខ្លួនបានបញ្ចប់ ហើយគោលបំណងរបស់ខ្លួនបានសម្រេចហើយ ប៉ុន្តែ «ប្រសិនបើអ៊ីស្រាអែលបង្កើតឱ្យមានមួយផ្សេងទៀត ការឆ្លើយតបរបស់អ៊ីរ៉ង់ នឹងកាន់តែតឹងរ៉ឹង និងកាន់តែធ្ងន់ធ្ងរ»។ងាកទៅការផ្ទុះដែលគេបានឮកាលពីព្រឹកថ្ងៃសុក្រសប្ដាហ៍មុននៅជិតទីក្រុង អ៊ីស្វាហាន (Isfahan) របស់អ៊ីរ៉ង់ ដែលទំនងជាការវាយប្រហាររបស់អ៊ីស្រាអែល លោក ខាណានី បានថ្កោលទោសការវាយប្រហារនេះថាជា «ការខឹងសម្បារ និងការព្យាបាទ» ដោយបន្ថែមថា មិនទាន់មានភាគីណាមួយអះអាងទទួលខុសត្រូវនៅឡើយទេ។ លោកបន្ថែមថា ប្រព័ន្ធការពារដែនអាកាសរបស់អ៊ីរ៉ង់បានបំពេញកាតព្វកិច្ចរបស់ខ្លួន ហើយបានរារាំងការវាយប្រហារដែលធ្វើឡើងដោយ «វត្ថុហោះតូចមួយ និងយានហោះលើអាកាសខ្នាតតូច» ដោយសង្កត់ធ្ងន់ថាជនល្មើសមិនបានសម្រេចអ្វីទាំងអស់៕

ការរញ្ជួយដីជាង៨០លើក អង្រួនកោះតៃវ៉ាន់ជាថ្មី ក្រោយការរញ្ជួយកម្រិត៧,២រ៉ិចទ័រសម្លាប់មនុស្ស១៧នាក់

រដ្ឋបាលអាកាសធាតុកោះតៃវ៉ាន់ និយាយថា ការរញ្ជួយដីជាង៨០លើក ដែលជាការរញ្ជួយដីខ្លាំងក្លារកម្រិត៦,៣រ៉ិចទ័រ បានអង្រួនឆ្នេរភាគខាងកើតរបស់កោះនេះ កាលពីយប់ថ្ងៃចន្ទទី២២មេសា និងនៅព្រឹកថ្ងៃអង្គារនេះ។ ការរញ្ជួយនេះ បានធ្វើឲ្យរញ្ជួយអគារជាច្រើននៅក្នុងទីក្រុងតៃប៉ិ ។ ការរញ្ជួយទាំងនេះ បានអង្រួននៅលើតំបន់ហ័រលៀន(Hualien)ភាគខាងកើតរបស់កោះនេះ ជាទីដែលធ្លាប់មានគ្រោះរញ្ជួយដីកម្រិត៧,២រ៉ិចទ័រ សម្លាប់មនុស្សយ៉ាងហោចណាស់១៧នាក់ កាលពីថ្ងៃទី៣ខែមេសា ។ ប្ដីប្រពន្ធជនជាតិសិង្ហបុរីមួយគូ គឺលោក ស៊ីម វី កុក (Sim Hwee Kok)និងអ្នកស្រី ណែវ ស៊ីវ ចូ (Neo Siew Choo) នៅតែបាត់ខ្លួននៅឡើយរហូតមកដល់ពេលនេះ ។គេជឿថាពួកគេបានបាត់ខ្លួននៅតាមតំបន់ជ្រលងភ្នំ សាកាតាំង ត្រេល (Shakadang Trail)។ គួររម្លឹកថាមានរលករញ្ជួយរាប់រយលើកបានអង្រួនកោះតៃវ៉ាន់ ចាប់តាំងពីមានការរញ្ជួយដីកាលពីខែដើមខែមេសាមក។ យានយកដ្ឋានពន្លត់អគ្គិភ័យ ក្នុងស្រុកហ័រលៀន បាននិយាយនៅព្រឹកថ្ងៃអង្គារនេះថា សណ្ឋាគារមួយ ដែលបានរងខូចខាតស្រាប់ក្នុងការរញ្ជួយដីកាលពីថ្ងៃទី៣មេសា នោះ ពុំអាចដំណើរការបានទៀតទេរហូតមកដល់ពេលនេះដោយសារផ្អៀងស្ទើរមួយចំហៀង។ សូមបញ្ជាក់ថាការរញ្ជួយដីចុងក្រោយកាលពីថ្ងៃចន្ទសប្ដាហ៍នេះ ពុំបានបណ្ដាលឲ្យមនុស្សស្លាប់ឬរបួសទេ។ យោងតាមរដ្ឋបាលអាកាសធាតុកណ្ដាល ការរញ្ជួយលើកដំបូង មានកម្រិត៥,៥រ៉ិចទ័រ បានវាយប្រហារកាលពីថ្ងៃចន្ទ នៅម៉ោងប្រហែល៥និង៨នាទីល្ងាច។ ហើយការរញ្ជួយដីបន្តបន្ទាប់ទៀត បានកើតឡើងនៅម៉ោងប្រហែល២កន្លះព្រឹកថ្ងៃអង្គារនេះ។ គួររម្លឹកថា មនុស្សជាង១០០នាក់ បានស្លាប់ក្នុងគ្រោះរញ្ជួយដីមួយនៅភាគខាងត្បូងកោះតៃវ៉ាន់ កាលពីឆ្នាំ២០១៦ ខណៈការរញ្ជួយដីកម្រិត៧,៣រ៉ិចទ័រ មួយផ្សេងទៀត កាលពីឆ្នាំ១៩៩៩ បានឆក់យកជីវិតមនុស្ស ជាង២.០០០នាក់៕

នគរបាលបូលីវី បាញ់ឧស្ម័នបង្ហៀរទឹកភ្នែកបំបែកក្បួនតវ៉ារបស់ក្រុមគ្រូបង្រៀន និងវេជ្ជបណ្ឌិត

នគរបាលបូលីវីបានបាញ់ឧស្ម័នបង្ហៀរទឹកភ្នែកកាលពីថ្ងៃចន្ទទី២២មេសា ដើម្បីបំបែកក្បួនតវ៉ា នៅក្នុងទីក្រុងឡាប៉ាស់(La Paz ) ដោយក្រុមគ្រូបង្រៀន មកពីទូទាំងប្រទេស ដែលកំពុងទាមទារដំឡើងកញ្ចប់ថវិកាក្នុងវិស័យអប់រំសាធារណៈ និងច្រានចោលសំណើច្បាប់ប្រាក់សោធននិវត្តន៍ដ៏ ចម្រូងចម្រាសមួយ ដែលក្រុមគ្រូប្រៀនទាំងនោះ និយាយថា សំណើច្បាប់នោះ នឹងបង្ខំឲ្យពួកគេចូលនិវត្តន៍នៅអាយុ៦៥ឆ្នាំ។ គ្រូបង្រៀនរាប់រយនាក់មកពីទូទាំងប្រទេសកំពុងដើរក្បួនតវ៉ាទៅកាន់អគារក្រសួងអប់រំ នៅក្នុងទីក្រុងឡាប៉ាស់ នៅពេលកងកម្លាំងនគរបាលបង្ក្រាបកុបកម្មកំពុងបង្កើនការការពារនៅតាមដងផ្លូវនានា។ក្រុមគ្រូបង្រៀន និងវេជ្ជបណ្ឌិត កំពុងចេញតវ៉ារយៈពេលជាច្រើនសប្ដាហ៍ប្រឆាំងទៅនឹងអ្វីដែលពួកគេហៅថាជាសេចក្ដីពង្រាងច្បាប់ចូលនិវត្តន៍ដោយបង្ខំ ដែលរដ្ឋាភិបាលកំពុងព្យាយាមរុញទៅអនុម័តនៅសភា។ នៅក្នុងប្រទេសបូលីវី អាយុចូលនិវត្តន៍ដោយស្ម័គ្រចិត្ត ត្រូវបានកំណត់ត្រឹម៥៨ ឆ្នាំ សម្រាប់បុរស និង៥៥ឆ្នាំសម្រាប់ស្ត្រី ។ក្រុមអ្នកតវ៉ា និយាយថា សំណើច្បាប់នេះ នឹងបង្ខំឲ្យពួកគេចូលនិវត្តន៍នៅអាយុ៦៥ឆ្នាំ។ រដ្ឋាភិបាល និយាយថា សំណើច្បាប់នេះ ត្រូវបានបង្កើតឡើងដើម្បីការពារសុវត្ថិភាពនិងសុខភាពរបស់មន្ត្រីជំនាញ ខណៈពួកគេអាចធ្វើតេស្តសុខភាព ថាតើពួកគេស័ក្កិសមនឹងបន្តការងារលើសពីអាយុដែលបានកំណត់ដែរឬអត់៕

នគរបាលខេត្តបន្ទាយមានជ័យ បញ្ជូនជនសង្ស័យប្រុស-ស្រី ០២នាក់ទៅសាលាដំបូងខេត្ត ពាក់ព័ន្ធករណីដឹកជញ្ជូន និងជួញដូរខុសច្បាប់នូវសារធាតុញៀនខុសច្បាប់ ជិត៧គីឡូក្រាម

បន្ទាយមានជ័យ ៖ កម្លាំងនគរបាលជំនាញការិយាល័យប្រឆាំងគ្រឿងញៀន ស្នងការនគរបាលខេត្តបន្ទាយមានជ័យ ឃាត់ខ្លួនជនសង្ស័យប្រុស-ស្រី ០២នាក់ រួមទាំងវត្ថុតាងគ្រឿងញៀន ជិត ៧គីឡូក្រាម រៀបចំសំណុំរឿងបញ្ជូនទៅសាលាដំបូងខេត្តបន្ទាយមានជ័យនៅរសៀលថ្ងៃទី២២ ខែមេសា ឆ្នាំ ២០២៤ ដើម្បីចាត់វិធានការតាមនិតិវិធីច្បាប់ ។ លោកឧត្តមសេនីយ៍ត្រី ធិន ស៊ិនដេត ស្នងការរង ទទួលផែនការងារប្រឆាំងបទល្មើសគ្រឿងញៀន បានឱ្យដឹងថា អនុវត្តតាមបទបញ្ជារបស់លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្ត តែងដាក់ចេញនូវបទបញ្ជាដល់ការិយាល័យជំនាញប្រឆាំងគ្រឿងញៀន ក៏ដូចជានគរបាលជំនាញប្រឆាំងគ្រឿងញៀនអធិការដ្ឋាននគរបាល ក្រុង-ស្រុក ត្រូវស៊ើបអង្កេតស្រាវជ្រាវតាមវិធានការជំនាញឱ្យដូចជាភ្លៀងរលឹម ជាពិសេសបទល្មើសគ្រឿងញៀន។ ជាលទ្ធផលនៅវេលាម៉ោង១២យប់រំលងអាធ្រាតថ្ងៃទី២០ ខែមេសា ឆ្នាំ២០២៤ លោក បានដឹកនាំកម្លាំងការិយាល័យប្រឆាំងគ្រឿងញៀន សហការជាមួយកម្លាំងអធិការដ្ឋាននគរបាលក្រុងប៉ោយប៉ែត ចុះបង្រ្កាបករណីដឹកជញ្ជូន និងជួញដូរខុសច្បាប់នូវសារធាតុញៀន និងបានធ្វើការឃាត់ខ្លួនជនសង្ស័យចំនួន០២នាក់ ស្រី០១នាក់ ស្ថិតនៅភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ពេលធ្វើតេស្តស្វែងរកសារធាតុញៀនជាប់០១នាក់ (ប្រុស) ។ លោកឧត្តមសេនីយ៍ត្រី ស្នងការរងបានបញ្ជាក់ថា ជនសង្ស័យទាំង០២នាក់ ១ ឈ្មោះ ហេង សុគុណ ហៅប៉ាវ ភេទប្រុស អាយុ ៤៥ឆ្នាំ ជាអ្នកជួញដូរគ្រឿងញៀន រស់នៅភូមិ មិត្តភាព សង្គាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។ ២ ឈ្មោះ ចឹម ស្រីដា ហៅជូ ភេទស្រី អាយុ២៤ រស់នៅភូមិ អូរឬស្សីលើ សង្កាត់ អូរឬស្សី ក្រុងប៉ោយប៉ែត ខេត្តបន្ទាយមានជ័យ។ លោកឧត្តមសេនីយ៍ត្រី ធិន ស៊ិនដេត បានបញ្ជាក់ទៀតថា ក្នុងកិច្ចប្រតិបត្តិការនេះ សមត្ថកិច្ចដកហូតវត្ថុតាងបានរួមមាន ១/- ម្សៅម៉ត់សថ្លា(MDMA)ចំនួន ០១ថង់ ស្មើទម្ងន់២,១១ក្រាមសាច់ថ្នាំសុទ្ធ, ២/- ថ្នាំកញ្ចប់រូបទំពាំងបាយជូមានអក្សGrapa frait tea(MDMA)ចំនួន៥០០កញ្ចប់ ស្មើទម្ងន់៤,៤៧០ក្រាម សាច់ថ្នាំសុទ្ធ, ៣/- ថ្នាំកញ្ចប់ពណ៍ក្រហមរូបសេះ(MDMA)ចំនួន៥០០កញ្ចប់ស្មើទម្ងន់២,៣០៥ក្រាមសាច់ថ្នាំសុទ្ធ, ៤/- រថយន្តចំនួន០១គ្រឿង ម៉ាកព្រូសពណ៍ស ។៥/- ទូរស័ព្ទដៃចំនួន០២គ្រឿង។ ទម្ងន់សរុបចំនួន ៦.៧៧៧,១១ក្រាមសាច់ថ្នាំសុទ្ធ ៕ អត្ថបទ រឿង ចន្ទ្រា

រុស្ស៊ីអះអាងពីការរុលចូលទៅមុខ នៅជិតទីក្រុង Chasiv Yar ខណៈដែលអ៊ុយក្រែន ត្រៀមទទួលជំនួយថ្មី

រុស្ស៊ីបាននិយាយកាលពីថ្ងៃអាទិត្យថា កងកម្លាំងរបស់ខ្លួន ដណ្តើមបានទឹកដីនៅជិតទីក្រុង Chasiv Yar ដែលជាសមរភូមិដ៏សំខាន់ នៅអ៊ុយក្រែនភាគខាងកើត ដោយបង្ហាញពីសម្ពាធដែលប្រឈមមុខនឹងទីក្រុងគីវ ខណៈដែលខ្លួនត្រៀមទទួលជំនួយថ្មីចំនួន ៦១ពាន់លានដុល្លាររបស់សហរដ្ឋអាមេរិក។បន្ទាប់ពីការពន្យារពេលជិតមួយឆ្នាំកន្លះ ទីបំផុតស ភាតំណាងរាស្រ្តសហរដ្ឋអាមេរិក បានអនុម័តកញ្ចប់ជំនួយ នៅក្នុងការបោះឆ្នោតកាលពីថ្ងៃសៅរ៍ ដោយផ្តល់ការលើកទឹកចិត្តដល់កងកម្លាំងអ៊ុយក្រែនលើការការពារនេះ។ក្រសួងការពារជាតិរុស្ស៊ី បានបញ្ជាក់កាលពីថ្ងៃអាទិត្យថា ខ្លួនបានកាន់កាប់ភូមិ Bogdanivka ដែលជាភូមិជួរមុខដ៏តូចមួយ មានចម្ងាយតិចជាងបីគីឡូម៉ែត្រ(ពីរម៉ាយ) នៅភាគឦសាននៃទីក្រុងChasiv Yar។ក្រសួងបាននិយាយថា៖«អង្គភាពនៃក្រុមកងទ័ពនៅភាគខាងត្បូង បានរំដោះទាំងស្រុងនូវការតាំងទីលំនៅBogdanivka»។ទីក្រុង Chasiv Yar ដែលមានប្រជាជនប្រហែល ១៣.000នាក់ មុនពេលមានជម្លោះ ត្រូវបានបំផ្លាញស្ទើរតែទាំងស្រុងដោយការប្រយុទ្ធគ្នា ហើយអ្នកស្រុកភាគច្រើន បានភៀសខ្លួន។វិមានក្រឹមឡាំង បានព្យាយាមនិយាយសម្រាលអំពីផលប៉ះពាល់នៃកញ្ចប់ជំនួយថ្មីរបស់សហរដ្ឋអាមេរិក ដែលក្រសួងការបរទេសរុស្ស៊ី បានបញ្ជាក់ថា នឹងធ្វើឲ្យក្រុងវ៉ាស៊ីនតោនពាក់ព័ន្ធយ៉ាងជ្រៅ ក្នុងសង្គ្រាមនេះ។

ចំនួនអ្នកស្លាប់ប៉ាឡេស្ទីន ដោយសារសង្រ្គាមតំបន់ហ្កាហ្សា កើនឡើងជិត ៣៤.១០០ នាក់

ក្រសួងសុខាភិបាលដែលគ្រប់គ្រងដោយក្រុមហាម៉ាស បាននិយាយនៅក្នុងសេចក្តីថ្លែងការណ៍មួយកាលពីថ្ងៃអាទិត្យ (២១ មេសា) ថាចំនួនអ្នកស្លាប់របស់ប៉ាឡេស្ទីន ពីការវាយប្រហាររបស់អ៊ីស្រាអែល ដែលកំពុងបន្តលើតំបន់ហ្កាហ្សាស្ទ្រីប បានកើនឡើងជិតដល់ ៣៤.១០០ នាក់។ កងទ័ពអ៊ីស្រាអែលបានសម្លាប់ជនជាតិប៉ាឡេស្ទីន ៤៨ នាក់ និងបង្ករបួស ៧៩ នាក់ទៀតក្នុងរយៈពេល ២៤ ម៉ោងចុងក្រោយនេះ ដែលនាំឱ្យចំនួនអ្នកស្លាប់សរុបកើនឡើងដល់ ៣៤.០៩៧ នាក់ និងអ្នករបួសដល់ ៧៦.៩៨០ នាក់ ចាប់តាំងពីការផ្ទុះឡើងនៃជម្លោះអ៊ីស្រាអែល-ហាម៉ាស កាលពីថ្ងៃទី០៧ ខែតុលា ឆ្នាំ២០២៣ មក។ទូរទស្សន៍ប៉ាឡេស្ទីនបានរាយការណ៍កាលពីថ្ងៃអាទិត្យថា កងទ័ពអ៊ីស្រាអែលបានវាយឆ្មក់តាមអាកាសជាច្រើនកន្លែងលើទីក្រុង រ៉ាហ្វា (Rafah) នៅភាគខាងត្បូងហ្កាហ្សាស្រ្ទីប ដោយបានសម្លាប់មនុស្សយ៉ាងហោចណាស់ ១៩ នាក់ និងការវាយប្រហារនៅក្នុងតំបន់ផ្សេងទៀតបានសម្លាប់មនុស្សជាច្រើនទៀត។អ្នកស្លាប់ភាគច្រើនត្រូវបានគេរាយការណ៍ថាជាស្ត្រី និងកុមារ រួមទាំងស្ត្រីមានផ្ទៃពោះផងម្នាក់ដែរ។ យោងតាមទីភ្នាក់ងារសារព័ត៌មានរ៉យទ័របានឱ្យដឹងថា គ្រូពេទ្យបានធ្វើការវះកាត់សង្គ្រោះបន្ទាន់លើស្ត្រីមានផ្ទៃពោះដែលបានស្លាប់នោះដើម្បីជួយសម្រាលទារកស្រីម្នាក់ ដែលពេលនេះស្ថិតក្នុងស្ថានភាពនឹងនរ៕

UN៖ ភ្លៀងធ្លាក់ខ្លាំងនឹងប៉ះពាល់ដល់មនុស្សប្រហែល ៧៧ ម៉ឺននាក់ក្នុងប្រទេសសូម៉ាលី

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បាននិយាយកាលពីថ្ងៃអាទិត្យ (២១ មេសា) ថា ភ្លៀងធ្លាក់ខ្លាំង និងទឹកជំនន់ធ្ងន់ធ្ងរនៅក្នុងស្រុកចំនួន ២២ នៃប្រទេសសូម៉ាលី ត្រូវបានគេរំពឹងថានឹងប៉ះពាល់ដល់មនុស្សប្រហែល ៧៧០.០០០ នាក់។ការិយាល័យ OCHA បាននិយាយថា ភ្លៀងប្រចាំរដូវដែលចាប់ពីខែមេសា ដល់ខែមិថុនា បានចាប់ផ្តើមនៅក្នុងតំបន់ភាគច្រើននៃប្រទេស ជាមួយនឹងភ្លៀងធ្លាក់ខ្លាំងនៅតំបន់ខ្លះ ប៉ុន្តែមិនទាន់មានសេចក្តីរាយការណ៍ពីទឹកជំនន់ដ៏គំហុក ឬទឹកជំនន់តាមទន្លេនៅឡើយទេ។យោងតាមទីភ្នាក់ងារអង្គការសហប្រជាជាតិបានឱ្យដឹងថា ក្រុមមន្រ្តីបានត្រៀមទូកប្រហែល ៥១ គ្រឿងដើម្បីជម្លៀសប្រជាជន និងផ្តល់ជំនួយនៅក្នុងទីតាំងអាទិភាពនៅតាមដងទន្លេ ស្ហាប៊ែល (Shabelle) និងទន្លេ ជូបា (Juba) និងដើម្បីផ្តល់ជំនួយដល់តំបន់ដែលអាចត្រូវបានកាត់ផ្តាច់ ឬជម្លៀសប្រជាជនដែលអាចត្រូវការជំនួយ។ទោះជាយ៉ាងណា ទីភ្នាក់ងារ UN នេះបន្ថែមថា ភ្លៀងបាននាំមកនូវភាពធូរស្រាលដល់ប្រជាជន និងអ្នកដាំដំណាំនៅទូទាំងប្រទេស ដោយបង្កើតវាលស្មៅឡើងវិញ និងបំពេញចំណុចទឹកដែលបានរីងស្ងួត។ នៅចុងឆ្នាំ២០២៣ ភ្លៀងធ្លាក់ខ្លាំងពីខែតុលា ដល់ខែធ្នូ និងទឹកជំនន់បានធ្វើឱ្យមនុស្ស ១,៦ លាននាក់ផ្លាស់ទីលំនៅចេញពីផ្ទះសម្បែងរបស់ពួកគេ នេះបើយោងតាមអង្គការសហប្រជាជាតិ៕

រុស្ស៊ី បានបង្កើនវិធានការសន្តិសុខ ១ខែបន្ទាប់ពីការវាយប្រហារនៅសាលប្រគុំតន្ត្រី

នៅថ្ងៃច័ន្ទនេះ គឺជាថ្ងៃមួយខែចាប់តាំងពីការវាយប្រហារភេរវកម្មដ៏ឃោឃៅនៅសាលប្រគុំតន្ត្រីមួយកន្លែងនៅជិតទីក្រុងមូស្គូ។ រដ្ឋាភិបាលរុស្ស៊ី តាមសេចក្តីរាយការណ៍ថា បាននឹងកំពុងបង្កើនវិធានការសន្តិសុខ ហើយជាក់ស្តែងរួមមានទាំងការបង្រ្កាបលើជនអន្តោប្រវេសន៍ខុសច្បាប់។ មនុស្សជាង ១៤០ នាក់ បានស្លាប់ដោយសារឧបទ្ទវហេតុកាលពីថ្ងៃទី ២២ ខែមីនា។ វាជាការវាយប្រហារភេរវកម្មដ៏ឃោឃៅបំផុតនៅក្នុងប្រទេសរុស្ស៊ី ក្នុងរយៈពេលពីរទសវត្សរ៍កន្លងទៅនេះ។ក្រុមរដ្ឋឥស្លាម ត្រូវបានគេជឿថាជាអ្នកទទួលខុសត្រូវចំពោះការវាយប្រហារ។ ជនជាតិតាហ្សីគីស្ថាន បួននាក់ត្រូវបានចោទប្រកាន់ពីបទធ្វើការវាយប្រហារនេះ។ ការស្ទង់មតិដែលបានធ្វើឡើងនៅក្នុងប្រទេសរុស្ស៊ី បង្ហាញថាចំនួនមនុស្សកាន់តែច្រើនឡើង មានអារម្មណ៍ថាត្រូវបានគំរាមកំហែងដោយសកម្មភាពភេរវកម្ម។មនុស្សជាច្រើន បានប្រាប់សមាជិកប្រព័ន្ធផ្សព្វផ្សាយ NHK នៅទីក្រុងមូស្គូភាគកណ្តាលថា អាជ្ញាធរគួរតែពង្រឹងវិធានការលើជនអន្តោប្រវេសន៍មកពីអាស៊ីកណ្តាល។ ក្រសួងមហាផ្ទៃ បាននិយាយកាលពីដើមខែនេះថា ក្រសួងបានអនុវត្តការបង្រ្កាបលើជនអន្តោប្រវេសន៍ខុសច្បាប់ជាង ១០.០០០ ទីតាំង រួមទាំងនៅការដ្ឋានសំណង់ក្នុងទីក្រុងមូស្គូផងដែរ។លោក វ្ល៉ាឌីមៀ ពូទីន បានទទួលជ័យជម្នះក្នុងការបោះឆ្នោតយ៉ាងលើសលប់ ក្នុងការបោះឆ្នោតប្រធានាធិបតីកាលពីខែមីនា ហើយលោកនឹងចាប់ផ្តើមអាណត្តិទីប្រាំរបស់លោកជាប្រធានាធិបតី នៅថ្ងៃទី ៧ ខែឧសភា។ ជាក់ស្តែង លោកកំពុងពង្រឹងវិធានការសន្តិសុខ ដោយសារតែការវាយប្រហារភេរវកម្ម អាចធ្វើឱ្យរដ្ឋបាលរបស់លោកមានអស្ថិរភាព។

បណ្ដាញសង្គម

ព័ត៌មានថ្មីៗ

ហ្គាសឡើងថ្លៃ ពេលក្រុមហ៊ុន QatarEnergy ផ្អាកការផលិតឧស្ម័នធម្មជាតិ LNG ក្រោយការវាយប្រហាររបស់អ៊ីរ៉ង់

WHO៖ មន្ទីរពេទ្យ នៅទីក្រុងតេអេរ៉ង់ ត្រូវបានជម្លៀសចេញ បន្ទាប់ពីមានការផ្ទុះក្បែរនោះ

សមាជិកយោធាអាមេរិកទី៤ ត្រូវបានសម្លាប់ អំឡុងប្រតិបត្តិការកំពុងបន្តមាននៅអ៊ីរ៉ង់

យន្តហោះអាមេរិកចាកចេញ ក្រោយអេស្ប៉ាញ បញ្ជាក់ថា មូលដ្ឋានមិនអាចត្រូវបានប្រើ ដើម្បីវាយប្រហារអ៊ីរ៉ង់ទេ

«អង្គការហេឡែន ខេលល័រ អន្តរជាតិ បេ្តជ្ញាបន្តសហការជាមួយកម្ពុជា ដើម្បីចូលរួមចំណែកក្នុងការលើកកម្ពស់អាហារូបត្ថម្ភ និងសន្តិសុខស្បៀង»

ឆ្មាំអ៊ីរ៉ង់៖ ការិយាល័យរបស់លោក Netanyahu និងទីស្នាក់ការកណ្តាលមេបញ្ជាការកងទ័ពអាកាស ត្រូវបានកំណត់គោលដៅ

CENTCOM៖ យន្តហោះចម្បាំងអាមេរិក ៣គ្រឿង ត្រូវបានប្រព័ន្ធការពារដែនអាកាសគុយវ៉ែតច្រលំបាញ់ទម្លាក់

កងទ័ពអ៊ីស្រាអែល៖ «ការវាយប្រហារទ្រងទ្រាយធំ» ថ្មី នៅ «ចំណុចកណ្ដាលទីក្រុងតេអេរ៉ង់» បានចាប់ផ្ដើម

ហាងបិទទ្វារ ដងផ្លូវមានសភាពស្ងប់ស្ងាត់នៅទីក្រុងតេអេរ៉ង់ បន្ទាប់ពីការស្លាប់របស់លោក Khamenei

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877