ទិន្នន័យឧស្សាហកម្មបង្ហាញថា យុវវ័យអូស្ត្រាលីម្នាក់ក្នុងចំណោមប្រាំនាក់ (ឬអត្រា ២០%) ដែលមានអាយុក្រោម ១៦ឆ្នាំ នៅតែបន្តប្រើប្រាស់បណ្តាញសង្គម បើទោះបីជាប្រទេសនេះបានដាក់បម្រាមមិនឱ្យក្រុមហ៊ុនបណ្តាញសង្គមនានាអនុញ្ញាតឱ្យអនីតិជនប្រើប្រាស់កម្មវិធីរបស់ពួកគេ អស់រយៈពេលពីរខែមកហើយក្ដី។ បញ្ហានេះបានចោទជាសំណួរអំពីប្រសិទ្ធភាពនៃវិធីសាស្ត្រត្រួតពិនិត្យអាយុ ដែលក្រុមហ៊ុនទាំងនោះកំពុងប្រើប្រាស់។

យោងតាមរបាយការណ៍របស់ក្រុមហ៊ុនផលិតកម្មវិធីគ្រប់គ្រង Qustodio ដែលបានផ្តល់ឱ្យទីភ្នាក់ងារព័ត៌មានរ៉យទ័របានឱ្យដឹងថា ចំនួនក្មេងជំទង់អាយុពី ១៣ ដល់ ១៥ ឆ្នាំ ប្រើប្រាស់ TikTok និង Snapchat ដែលជាកម្មវិធីពេញនិយមបំផុតក្នុងចំណោមយុវវ័យអូស្ត្រាលី បានធ្លាក់ចុះចាប់តាំងពីមុនពេលបម្រាមចូលជាធរមានក្នុងខែធ្នូ រហូតដល់ខែកុម្ភៈ ប៉ុន្តែក្នុងនោះនៅតែមានក្មេងជាង ២០% អាចបន្តប្រើប្រាស់កម្មវិធីទាំងនេះបានដដែល។

នេះជាទិន្នន័យដំបូងដែលបង្ហាញពីផលប៉ះពាល់លើឥរិយាបថប្រើប្រាស់អ៊ីនធឺណិតរបស់យុវជន ចាប់តាំងពីអូស្ត្រាលី ដាក់ចេញនូវបម្រាម ដែលត្រូវបានរដ្ឋាភិបាលនៃប្រទេសផ្សេងៗជុំវិញពិភពលោក យកទៅអនុវត្តតាម។ រដ្ឋាភិបាលអូស្ត្រាលី រួមជាមួយបណ្ដាញសិក្សានៅសាកលវិទ្យាល័យផ្សេងទៀត កំពុងតាមដានប្រសិទ្ធភាពនិងផលជះនៃបម្រាមនេះ ប៉ុន្តែមិនទាន់ចេញផ្សាយទិន្នន័យនៅឡើយទេ។

ក្រុមហ៊ុន Qustodio បានបញ្ជាក់ក្នុងរបាយការណ៍ដែលផ្អែកលើទិន្នន័យប្រមូលពីប្រជាជនអូស្ត្រាលីពីចុងឆ្នាំ២០២៤ ដល់ខែកុម្ភៈ ឆ្នាំនេះថា៖ «ក្នុងចំណោមក្មេងៗដែលអាណាព្យាបាលមិនបានរារាំងការប្រើអ៊ីនធីណិត មានចំនួនច្រើនគួរសមដែលនៅតែបន្តប្រើប្រាស់បណ្តាញសង្គមដែលត្រូវបានរឹតត្បិត»។

គួរឱ្យដឹងថា ស្ថិតក្រោមបម្រាមនេះ បណ្តាញសង្គមនានារួមមាន Instagram, Facebook និង Threads របស់ក្រុមហ៊ុន Meta ក៏ដូចជា YouTube របស់ក្រុមហ៊ុន Google ព្រមទាំង TikTok និង Snapchat ត្រូវតែរារាំងអ្នកប្រើប្រាស់ដែលមានអាយុក្រោម ១៦ឆ្នាំ បើមិនដូច្នោះទេ នឹងត្រូវប្រឈមមុខនឹងការផាកពិន័យជាប្រាក់រហូតដល់ ៤៩,៥ លានដុល្លារអូស្ត្រាលី (ប្រហែល ៣៥ លានដុល្លារអាមេរិក)៕