ប្រធានាធិបតីទួរគី លោក រ៉េសិប តាយីប អឺដូហ្កាន់ ( Recep Tayyip Erdogan) បាននិយាយនៅក្នុងទីក្រុងអង់ការ៉ា កាលពីថ្ងៃព្រហស្បតិ៍ថា ប្រទេសនេះ កំពុងចូលរួមក្នុងកិច្ចខិតខំប្រឹងប្រែងផ្នែកការទូត «យ៉ាងស្វិតស្វាញ» ដើម្បីទប់ស្កាត់ការរីករាលដាលនៃសង្គ្រាមនៅមជ្ឈិមបូព៌ា។

បន្ទាប់ពីកិច្ចប្រជុំរបស់លោកជាមួយអគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយតឺរេស (Antonio Guterres) លោក អឺដូហ្កាន់ បាននិយាយថា ការអំពាវនាវរបស់លោក ហ្គុយតឺរេស ឲ្យមានការទូត និងការសន្ទនា ពិតជាមានតម្លៃខ្ពស់ នៅក្នុងគ្រាដ៏លំបាកនេះ។

លោក អឺដូហ្កាន់ បានថ្លែងសុន្ទរកថាមួយក្នុងពិធីប្រគល់រង្វាន់សន្តិភាពអន្តរជាតិ Ataturk ដល់លោក ហ្គុយតឺរេស នៅក្នុងទីក្រុងអង់ការ៉ាថា ប្រទេសទួរគី នឹងបន្ត «ការតាំងចិត្ត និងការអត់ធ្មត់» សម្រាប់ដំណោះស្រាយដោយសន្តិវិធីចំពោះវិបត្តិបច្ចុប្បន្ន ហើយនឹងបន្តគាំទ្រគំនិតផ្តួចផ្តើម ដើម្បីធ្វើឲ្យអង្គការសហប្រជាជាតិកាន់តែមានលក្ខណៈទូលំទូលាយ។

លោកបានបន្ថែមថា ពុំអាចមានការអភិវឌ្ឍ សន្តិភាព ឬស្ថិរភាព ដោយគ្មានយុត្តិធម៌នោះទេ។

ចំណែកលោក ហ្គុយតឺរេស បាននិយាយថា៖«ការវាយប្រហារយោធាទ្រង់ទ្រាយធំ ដែលធ្វើឡើងដោយសហរដ្ឋអាមេរិក និងអ៊ីស្រាអែល និងការវាយប្រហារជាបន្តបន្ទាប់ដោយអ៊ីរ៉ង់លើប្រទេសជាច្រើន បង្កើតបានជាការគំរាមកំហែងយ៉ាងធ្ងន់ធ្ងរដល់សន្តិភាពអន្តរជាតិ»។

លោកបានបញ្ជាក់ថា៖«ការបន្ធូរបន្ថយភាពតានតឹង និងការសន្ទនា គឺជាមធ្យោបាយតែមួយគត់ឈានទៅរកដំណោះស្រាយ» ដោយអំពាវនាវដល់គ្រប់ភាគីទាំងអស់ ឲ្យបញ្ឈប់អរិភាព គោរពច្បាប់អន្តរជាតិ ការពារជនស៊ីវិល និង «វិលត្រឡប់មកតុចរចាវិញជាបន្ទាន់»៕