ការប្រទាញប្រទង់គ្នាដ៏ស្មុគស្មាញ នៅក្នុងសេតវិមាន កំពុងជំរុញឲ្យសេចក្តីថ្លែងការណ៍សាធារណៈរបស់ប្រធានាធិបតីអាមេរិក លោក Donald Trump ផ្លាស់ប្តូរលើទិសដៅនៃសង្គ្រាមអ៊ីរ៉ង់ ខណៈដែលបណ្ដាជំនួយការកំពុងជជែកដេញដោល អំពីពេលវេលា និងរបៀប ប្រកាសជ័យជម្នះ ទោះបីជាជម្លោះរីករាលដាលពាសពេញតំបន់មជ្ឈិមបូព៌ាក៏ដោយ។

មន្ត្រី និងទីប្រឹក្សាមួយចំនួន កំពុងព្រមានលោក Trump ថា ការហក់ឡើងតម្លៃប្រេងសាំង អាចបណ្តាលឲ្យមានការខាតបង់ផ្នែកនយោបាយ ដោយសារការវាយប្រហាររបស់សហរដ្ឋអាមេរិក-អ៊ីស្រាអែល លើអ៊ីរ៉ង់ ខណៈពេលដែលក្រុមជំទាស់មួយចំនួន កំពុងជំរុញឲ្យប្រធានាធិបតីបន្តការវាយលុក ប្រឆាំងនឹងសាធារណរដ្ឋឥស្លាម។ នេះបើយោងតាមបទសម្ភាសន៍ជាមួយទីប្រឹក្សារបស់លោក Trump និងអ្នកផ្សេងទៀតដែលនៅស្និទ្ធនឹងការពិភាក្សានានា។

ការកត់សម្គាល់របស់មន្ត្រីទាំងនោះទៅកាន់សារព័ត៌មាន Reuters ផ្តល់នូវការមើលឃើញមិនធ្លាប់មានពីមុន ពាក់ព័ន្ធនឹងការសម្រេចរបស់សេតវិមាន ខណៈពេលដែលវិធីសាស្រ្តរបស់ខ្លួន ត្រូវបានកែសម្រួល ចំពោះប្រតិបត្តិការយោធាដ៏ធំបំផុតជាលើកដំបូងរបស់សហរដ្ឋអាមេរិក គិតចាប់តាំងពីសង្គ្រាមអ៊ីរ៉ាក់ឆ្នាំ២០០៣។ ការប្រជែងគ្នាបញ្ចេញមតិយោបល់ទៅកាន់លោក Trump គឺជាលក្ខណៈធម្មតានៃតំណែងប្រធានាធិបតីរបស់លោក ប៉ុន្តែលើកនេះផលវិបាក គឺជាបញ្ហានៃសង្គ្រាម និងសន្តិភាព នៅតំបន់មួយ ក្នុងចំណោមតំបន់ដែលមានភាពប្រែប្រួលខ្លាំងបំផុត និងមានសារៈសំខាន់ផ្នែកសេដ្ឋកិច្ចរបស់ពិភពលោក។

ដោយផ្លាស់ប្តូរពីគោលដៅដ៏ទូលំទូលាយដែលលោកបានគ្រោងឡើង សម្រាប់ការចាប់ផ្តើមសង្គ្រាមកាលពីថ្ងៃទី២៨ ខែកុម្ភៈ លោក Trump ក្នុងរយៈពេលប៉ុន្មានថ្ងៃថ្មីៗនេះ បានសង្កត់ធ្ងន់ថា លោកចាត់ទុកជម្លោះនេះថា ជាយុទ្ធនាការមានកំណត់ដែលគោលបំណងភាគច្រើនសម្រេចបានហើយ។

ប៉ុន្តែសារនេះនៅតែមានភាពមិនច្បាស់លាស់ ចំពោះមនុស្សជាច្រើន ក្នុងនោះរួមទាំងទីផ្សារថាមពលផងដែរ ដែលបានរង្គោះរង្គើម្ដងឡើងម្ដងចុះ ពេលមានសេចក្តីថ្លែងការណ៍របស់លោក Trump។ មេដឹកនាំអាមេរិករូបនេះ បានប្រាប់ការជួបជុំបែបយុទ្ធនាការឃោសនាបោះឆ្នោត នៅរដ្ឋ Kentucky កាលពីថ្ងៃពុធថា «យើងបានឈ្នះ» សង្គ្រាម បន្ទាប់មកបានកែភ្លាមៗថា «យើងមិនចង់ចាកចេញលឿនទេ មែនទេ? យើងត្រូវតែបញ្ចប់ភារកិច្ច»៕