អ្នករាយការណ៍ពិសេសរបស់អង្គការសហប្រជាជាតិ (UN) កាលពីថ្ងៃព្រហស្បតិ៍ (ទី១២ ខែមីនា ឆ្នាំ២០២៦) បានលើកឡើងថា ពិភពលោកបានចូលដល់ «យុគសម័យខ្មៅងងឹតថ្មីនៃការរំលោភបំពាន» ដោយសហរដ្ឋអាមេរិក «បង្កឲ្យមានការបាត់បង់អាយុជីវិតយ៉ាងច្រើន» នៅប្រទេសអ៊ីរ៉ង់ និងវ៉េណេស៊ុយអេឡា។

លោក Ben Saul អ្នករាយការណ៍ពិសេសរបស់ UN ស្តីពីការលើកកម្ពស់ និងការការពារសិទ្ធិមនុស្ស និងសេរីភាពជាមូលដ្ឋាន បាននិយាយថា សង្គ្រាម នៅតំបន់មជ្ឈិមបូព៌ា នឹងមិនធ្វើឲ្យសន្តិសុខពិភពលោកប្រសើរឡើងឡើយ ខណៈពេលដែលកំពុងប្រយុទ្ធប្រឆាំងនឹងភេរវកម្ម។

លោក Saul បានប្រាប់សន្និសីទសារព័ត៌មានមួយនៅទីក្រុងហ្សឺណែវ ប្រទេសស្វីសថា៖ «យើងបានឈានចូលដល់យុគសម័យខ្មៅងងឹតថ្មីនៃការរំលោភបំពាន ដោយយកការប្រយុទ្ធប្រឆាំងនឹងភេរវកម្មជាតំណាង។ ថ្មីៗនេះ មានការឈ្លានពានយ៉ាងច្បាស់ណាស់ និងការបន្តវិធានាករចក្រពត្តិនិយម ប្រឆាំងនឹងអ៊ីរ៉ង់ និងវ៉េណេស៊ុយអេឡា ដោយបង្កឲ្យមានការបាត់បង់អាយុជីវិតយ៉ាងច្រើន និងរំលោភលើសិទ្ធិរស់រានមានជីវិត ហើយធ្វើឲ្យពិភពលោកាន់តែលែងមានសុវត្ថិភាព»។

ជាមួយគ្នានេះ លោក Saul បានរិះគន់ក្រុមប្រឹក្សាសន្តិសុខ UN ចំពោះការមិនអនុម័តសេចក្តីសម្រេចមួយ កាលពីថ្ងៃទី១១ ខែមីនា «ដែលជាការបរាជ័យក្នុងការថ្កោលទោសការឈ្លានពានរបស់អ៊ីស្រាអែល និងសហរដ្ឋអាមេរិក ខុសច្បាប់អន្តរជាតិ ហើយផ្ទុយទៅវិញ បានត្រឹមតែថ្កោលទោសការឆ្លើយតបហួសហេតុ និងខុសច្បាប់របស់អ៊ីរ៉ង់ប៉ុណ្ណោះ»។

គួរបញ្ជាក់ថា កាលពីថ្ងៃទី២៨ ខែកុម្ភៈ សហរដ្ឋអាមេរិក និងអ៊ីស្រាអែល បានចាប់ផ្តើមការវាយប្រហារបន្តបន្ទាប់លើកដំបូង នៅក្នុងសង្គ្រាមមួយដែលបានឃើញអ៊ីរ៉ង់វាយប្រហារគោលដៅនៅក្នុងប្រទេសជាច្រើនជុំវិញឈូងសមុទ្រ។ ក្នុងចំណោមហេតុផលផ្សេងៗ ប្រធានាធិបតីអាមេរិក លោក Donald Trump បាននិយាយថា សង្គ្រាមមជ្ឈិមបូព៌ា គឺពាក់ព័ន្ធនឹងការធានាឲ្យបានថា «អ្នកឧបត្ថម្ភភេរវកម្មលំដាប់លេខ១ របស់ពិភពលោក» មិនអាចមានអាវុធនុយក្លេអ៊ែរជាដាច់ខាត»៕