មន្ត្រីម្នាក់ពីក្រសួងឧស្សាហកម្ម បាននិយាយនៅថ្ងៃសុក្រ (ទី១៣ ខែមីនា ឆ្នាំ២០២៦) នេះថា ជប៉ុននឹងពិចារណាថា តើត្រូវទិញប្រេងឆៅរបស់រុស្ស៊ីដែរ ឬអត់ បន្ទាប់ពីសហរដ្ឋអាមេរិកបានចេញការលើកលែងទណ្ឌកម្មរយៈពេល ៣០ថ្ងៃ ក្នុងអំឡុងពេលសង្គ្រាមអ៊ីរ៉ង់ ដោយផ្ដោតលើលក្ខខណ្ឌអន្តរជាតិ និងផលប្រយោជន៍ជាតិរបស់ខ្លួន។

ការលើកលែងរបស់សហរដ្ឋអាមេរិកនេះ អនុញ្ញាតឲ្យប្រទេសនានាទិញប្រេង និងផលិតផលប្រេងកាតរបស់រុស្ស៊ី ដែលជាប់គាំងនៅក្នុងសមុទ្រ ជាអ្វីដែលរដ្ឋមន្ត្រីក្រសួងរតនាគារ លោក Scott Bessent បានបញ្ជាក់ថា ជាជំហានមួយ ដើម្បីធ្វើឲ្យទីផ្សារថាមពលសកលមានស្ថិរភាព ដែលត្រូវបានរងប៉ះពាល់ដោយសារសង្គ្រាម នៅអ៊ីរ៉ង់។

លោក Narumi Hosokawa ដែលជាអនុប្រធានទទួលបន្ទុកគ្រប់គ្រងវិបត្តិបន្ទាន់ នៅក្រសួងសេដ្ឋកិច្ច ពាណិជ្ជកម្ម និងឧស្សាហកម្ម (METI) បាននិយាយថា៖ «យើងនឹងពិចារណាលើបញ្ហានេះ ដោយគិតគូរយ៉ាងល្អិតល្អន់នូវលក្ខខណ្ឌអន្តរជាតិផ្សេងៗ និងផលប្រយោជន៍ជាតិរបស់ជប៉ុន»។

មន្ត្រី METI ម្នាក់ទៀតបាននិយាយថា ប្រេងឆៅរបស់រុស្ស៊ី មានសារៈសំខាន់ សម្រាប់ការផ្គត់ផ្គង់ថាមពលដែលមានស្ថិរភាព ប៉ុន្តែទីក្រុងតូក្យូត្រូវតែបន្តចាត់វិធានការសមស្រប ខណៈពេលដែលធ្វើឲ្យមានតុល្យភាពនៃការពិភាក្សារបស់ក្រុមប្រទេសមានឧស្សាហកម្មលូតលាស់ទាំង៧ (G7) និងការសម្របសម្រួលអន្តរជាតិកាន់តែទូលំទូលាយជាមួយនឹងផលប្រយោជន៍ជាតិរបស់ប្រទេស។

ប្រទេសជប៉ុនបាននាំចូលប្រេងឆៅចំនួន ៩៤ភាគរយពីតំបន់មជ្ឈិមបូព៌ា ក្នុងឆ្នាំ២០២៥ ដោយ ៩៣ភាគរយនៃការដឹកជញ្ជូន គឺឆ្លងកាត់ច្រកសមុទ្រ Hormuz ដែលត្រូវបានគ្រប់គ្រងដោយអ៊ីរ៉ង់។ លំហូរឆ្លងកាត់ច្រកសមុទ្រនេះត្រូវបានរារាំងស្ទើរតែទាំងស្រុង ដោយសារតែសង្គ្រាមរបស់សហរដ្ឋអាមេរិក និងអ៊ីស្រាអែលលើអ៊ីរ៉ង់៕