ក្រុមអ៊ីរ៉ង់ បញ្ជាក់ថា គ្មាននរណាម្នាក់អាចមានសិទ្ធិមិនឲ្យខ្លួនចូលរួមព្រឹត្តិការណ៍ប្រកួតបាល់ទាត់ដណ្ដើមពានរង្វាន់ពិភពលោក (World Cup) នៅចុងឆ្នាំនេះបានឡើយ ដោយនេះជាការឆ្លើយតបទៅនឹងការព្រមានរបស់ប្រធានាធិបតី លោក Donald Trump ដែលថា «ជីវិត និងសុវត្ថិភាព» របស់ពួកគេ នឹងប្រឈមហានិភ័យ នៅក្នុងសហរដ្ឋអាមេរិក។

នៅក្នុងការបង្ហោះលើបណ្ដាញសង្គមកាលពីថ្ងៃព្រហស្បតិ៍ ក្រុមអ៊ីរ៉ង់ក៏បានលើកឡើងផងដែរថា សហរដ្ឋអាមេរិកមិនគួរត្រូវបានអនុញ្ញាតឲ្យធ្វើជាសហម្ចាស់ផ្ទះនៃការប្រកួតនេះឡើយ ប្រសិនបើខ្លួនមិនអាចធានាសុវត្ថិភាពរបស់ក្រុមដែលចូលរួម។

ការអត្ថាធិប្បាយរបស់លោក Trump បានកើតឡើងត្រឹមតែ ២ថ្ងៃប៉ុណ្ណោះបន្ទាប់ពីលោកបានប្រាប់ប្រធាន FIFA (សហព័ន្ធបាល់ទាត់អន្តរជាតិ) លោក Gianni Infantino ថា កីឡាករអ៊ីរ៉ង់ នឹងត្រូវបានស្វាគមន៍ទោះបីជាមានសង្គ្រាមមជ្ឈិមបូព៌ាក៏ដោយ។ នៅលើវេទិកាបណ្ដាញសង្គម Truth Social របស់លោកកាលពីថ្ងៃព្រហស្បតិ៍ លោក Trump បានរៀបរាប់ថា៖ «ក្រុមបាល់ទាត់ជម្រើសជាតិអ៊ីរ៉ង់ ត្រូវបានស្វាគមន៍មកកាន់ព្រឹត្តិការណ៍ World Cup ប៉ុន្តែខ្ញុំពិតជាមិនមានការជឿជាក់ថា វាគឺជាពេលសមស្របដែរ ឬទេ ដែលពួកគេមានវត្តមាន ពាក់ព័ន្ធនឹងជីវិត និងសុវត្ថិភាពរបស់ពួកគេ»។

ក្រុមអ៊ីរ៉ង់បានឆ្លើយតបថា៖ «World Cup គឺជាព្រឹត្តិការណ៍ប្រវត្តិសាស្ត្រ និងអន្តរជាតិ ហើយស្ថាប័នគ្រប់គ្រងការប្រកួតដ៏ធំ គឺ FIFA មិនមែនជាបុគ្គលណាម្នាក់ ឬប្រទេសណាមួយឡើយ។ ក្រុមជម្រើសជាតិអ៊ីរ៉ង់ដែលមានកម្លាំង និងជ័យជម្នះជាបន្តបន្ទាប់ដែលសម្រេចបានដោយសមត្ថភាពនៃកូនប្រុសៗដ៏ក្លាហានរបស់អ៊ីរ៉ង់ គឺស្ថិតនៅក្នុងចំណោមក្រុមដំបូងគេដែលប្រកួតជម្រុះ ហើយទទួលបានសិទ្ធិទៅចូលរួមការប្រកួតដ៏សំខាន់នេះ»។

ការឆ្លើយតបនោះបានសង្កត់ធ្ងន់ថា៖ «ជាការពិតណាស់ គ្មាននរណាម្នាក់អាចមានសិទ្ធិមកកំណត់មិនឲ្យក្រុមជម្រើសជាតិអ៊ីរ៉ង់ចូលរួមព្រឹត្តិការណ៍ World Cup នេះឡើយ។ ប្រទេសតែមួយគត់ដែលអាចត្រូវបានដកចេញ គឺប្រទេសដែលគ្រាន់តែមានឈ្មោះជាម្ចាស់ផ្ទះ ប៉ុន្តែខ្វះសមត្ថភាព ក្នុងការផ្តល់សន្តិសុខសម្រាប់ក្រុមដែលចូលរួមក្នុងព្រឹត្តិការណ៍ពិភពលោកនេះ»៕