កាលពីថ្ងៃអាទិត្យ ១៥មីនា អ៊ីរ៉ង់បានព្រមានប្រទេសនានាកុំឱ្យលូកដៃចូលក្នុងសង្គ្រាមរបស់ខ្លួនជាមួយសហរដ្ឋអាមេរិក និងអ៊ីស្រាអែល បន្ទាប់ពីប្រធានាធិបតី Donald Trump បានជំរុញឱ្យមហាអំណាចពិភពលោកអមដំណើរនាវាដឹកប្រេងឆ្លងកាត់ចំណុចជាប់គាំងច្រកសមុទ្រ Hormuz ក្នុងឈូងសមុទ្រ។

ទីក្រុងតេអេរ៉ង់ក៏បានផ្ញើសារដ៏ម៉ឺងម៉ាត់ទៅកាន់ប្រទេសជិតខាងអារ៉ាប់របស់ខ្លួនផងដែរ ដោយប្រាប់ពួកគេថា សាធារណរដ្ឋអ៊ីស្លាមមានអ្វីដែលរដ្ឋមន្ត្រីការបរទេសរបស់ខ្លួនហៅថា "ភស្តុតាងដ៏ច្រើន" ដែលថាមូលដ្ឋានទ័ពអាមេរិកនៅលើទឹកដីរបស់ពួកគេកំពុងត្រូវបានប្រើប្រាស់ដើម្បីបើកការវាយប្រហារ។

រដ្ឋមន្ត្រីការបរទេសអ៊ីរ៉ង់ លោក Abbas Araghchi បានប្រាប់វេទិកាព័ត៌មានភាសាអារ៉ាប់ Al-Araby Al-Jadeed ថាសង្គ្រាមនេះនឹងបញ្ចប់នៅពេលដែលពួកលោកប្រាកដថា ការឈ្លានពាននឹងមិនកើតឡើងម្តងទៀតទេ ហើយប្រាក់សំណងនឹងត្រូវបានបង់។

លោកថា ពួកលោកបានជួបប្រទះរឿងនេះកាលពីឆ្នាំមុន នៅពេលអ៊ីស្រាអែលបានវាយប្រហារ បន្ទាប់មកសហរដ្ឋអាមេរិក ដោយរំលឹកឡើងវិញនូវសង្គ្រាមផ្លូវអាកាសរយៈពេល១៤ ថ្ងៃរបស់អ៊ីស្រាអែលក្នុងខែមិថុនា ឆ្នាំមុន ដែលបានទាក់ទាញកងកម្លាំងអាមេរិកមួយរយៈខ្លីសម្រាប់ការវាយប្រហារមួយយប់លើទីតាំងនុយក្លេអ៊ែរអ៊ីរ៉ង់។

លោក Trump បានឆ្លើយតបកាលពីថ្ងៃសៅរ៍ ដោយជំរុញឱ្យ ចិន បារាំង ជប៉ុន កូរ៉េខាងត្បូង ចក្រភពអង់គ្លេស និងប្រទេសដទៃទៀត បញ្ជូននាវាទៅអមដំណើរកប៉ាល់ដឹកប្រេង ខណៈយោធាអាមេរិកនឹងបន្តវាយប្រហារទីតាំងបាញ់យានដ្រូន ទូក និងមីស៊ីល នៅក្នុងទឹកដីអ៊ីរ៉ង់ភាគខាងជើងនៃច្រកសមុទ្រ៕