ប្រធានាធិបតីអាមេរិក លោក Donald Trump បាននិយាយកាលពីថ្ងៃអាទិត្យ ១៥ មីនា ថា សហរដ្ឋអាមេរិកកំពុងពិភាក្សាជាមួយអ៊ីរ៉ង់ ខណៈសង្គ្រាមបានចូលដល់សប្តាហ៍ទីបី ប៉ុន្តែទីក្រុងតេអេរ៉ង់មិនទាន់ត្រៀមខ្លួនសម្រាប់កិច្ចព្រមព្រៀងបញ្ចប់សង្គ្រាមនៅឡើយទេ។

លោក Trump បានប្រាប់ក្រុមអ្នកសារព័ត៌មាននៅលើយន្តហោះ Air Force One ថា មែនហើយពួកលោកកំពុងនិយាយជាមួយពួកគេ ដោយពុំបានបញ្ជាក់លម្អិតអំពីលក្ខណៈនៃការចរចាបែបណានោះទេ នៅពេលសួរថាតើមានផ្លូវការទូតណាមួយកំពុងដំណើរការដើម្បីបញ្ចប់ជម្លោះដែលបានរីករាលដាលពាសពេញមជ្ឈិមបូព៌ា និងទីផ្សារពិភពលោកដែលកំពុងរង្គោះរង្គើឬអត់។

លោក Trump បាននិយាយថា ប៉ុន្តែរូបលោកគិតថាពួកគេមិនទាន់ត្រៀមខ្លួនរួចរាល់ទេ។

រដ្ឋមន្ត្រីការបរទេសអ៊ីរ៉ង់បានបដិសេធថ្មីៗនេះដែលថាការចរចាណាមួយជាមួយសហរដ្ឋអាមេរិកកំពុងកើតឡើង។

លោក Trump បាននិយាយថា លោកមិនប្រាកដថាលោកចង់ធ្វើកិច្ចព្រមព្រៀងដើម្បីបញ្ចប់សង្គ្រាមនោះទេ ព្រោះជាដំបូងគ្មាននរណាម្នាក់ដឹងថាអ្នកណាត្រូវដោះស្រាយជាមួយអ្នកណាទេ ព្រោះថ្នាក់ដឹកនាំភាគច្រើនរបស់ពួកគេត្រូវបានសម្លាប់។

មេដឹកនាំកំពូលអ៊ីរ៉ង់ លោក Ali Khamenei និងមន្ត្រីអ៊ីរ៉ង់រាប់សិបនាក់ផ្សេងទៀតបានស្លាប់នៅថ្ងៃដំបូងនៃការវាយប្រហាររួមគ្នារវាងសហរដ្ឋអាមេរិក និងអ៊ីស្រាអែល នៅថ្ងៃទី២៨ ខែកុម្ភៈ។

ទោះជាយ៉ាងណាក៏ដោយ លោក Trump បានទទូចថា ពួកគេចង់ធ្វើកិច្ចព្រមព្រៀងខ្លាំងណាស់។

រដ្ឋមន្ត្រីការបរទេសអ៊ីរ៉ង់ លោក Abbas Araghchi បានវាយបកទៅលោក Trump វិញ ដោយបាននិយាយថា អ៊ីរ៉ង់មិនចាប់អារម្មណ៍នឹងការចរចាជាមួយសហរដ្ឋអាមេរិកទេ៕