ប្រធានាធិបតីសហរដ្ឋអាមេរិក លោក Donald Trump បានព្រមានសម្ព័ន្ធយោធា NATO អំពីអនាគតដ៏អាក្រក់ ប្រសិនបើសម្ព័ន្ធមិត្តនេះមិនជួយបើកច្រកសមុទ្រ Hormuz និងបាននិយាយថា លោកក៏អាចពន្យារពេលជំនួបកំពូលដែលបានគ្រោងទុកជាមួយប្រធានាធិបតីចិន លោក Xi Jinping នៅក្នុងការថ្លែងលើកឡើងដែលបានចេញផ្សាយដោយកាសែត Financial Times កាលពីថ្ងៃអាទិត្យ ទី ១៥ ខែមីនា។

លោក Trump បានប្រាប់កាសែតនេះថា «ខ្ញុំគិតថាប្រទេសចិនគួរតែជួយ ព្រោះប្រទេសចិនទទួលបានប្រេង៩០ភាគរយពីច្រកសមុទ្រនេះ ហើយលោកចង់ដឹងពីជំហររបស់ទីក្រុងប៉េកាំងមុនពេលដំណើរទស្សនកិច្ចដែលបានគ្រោងទុក។ លោកបាននិយាយអំពីដំណើរទស្សនកិច្ចនេះថា «យើងអាចពន្យារពេល»។

លោក Scott Bessent រដ្ឋមន្ត្រីក្រសួងរតនាគារសហរដ្ឋអាមេរិក និងឧបនាយករដ្ឋមន្ត្រីចិន លោក He Lifeng បានបញ្ចប់កិច្ចពិភាក្សាដំបូងរយៈពេលពីរថ្ងៃនៅទីក្រុងប៉ារីសកាលពីថ្ងៃអាទិត្យ ដើម្បីដោះស្រាយភាពតានតឹងក្នុងការផ្អាកសង្គ្រាមពាណិជ្ជកម្មរបស់ប្រទេសទាំងពីរ និងត្រួសត្រាយផ្លូវសម្រាប់ដំណើរទស្សនកិច្ចរបស់លោក Trump ទៅកាន់ទីក្រុងប៉េកាំង ដើម្បីជួបជាមួយលោក Xi នៅចុងខែមីនា។

ប្រធានាធិបតីសហរដ្ឋអាមេរិកបាននិយាយថា ប្រទេសនានាដែលទទួលបានប្រយោជន៍ពីផ្លូវដឹកជញ្ជូន គួរតែជួយធានាដល់ផ្លូវទឹកមួយនេះ។

លោក Trump បានអំពាវនាវដល់ប្រទេសនានាឱ្យបញ្ជូននាវាចម្បាំងដើម្បីរក្សាផ្លូវទឹកតូចចង្អៀតនេះឱ្យនៅបើកចំហសម្រាប់ការដឹកជញ្ជូនទំនិញ ខណៈកងកម្លាំងអ៊ីរ៉ង់ បន្តវាយប្រហារបន្ទាប់ពីការវាយប្រហាររបស់សហរដ្ឋអាមេរិក និងអ៊ីស្រាអែល លើអ៊ីរ៉ង់ ដោយនិយាយថា លោកសង្ឃឹមថាប្រទេសនានារួមមាន ចិន បារាំង ជប៉ុន កូរ៉េខាងត្បូង និងអង់គ្លេស នឹងបញ្ជូននាវាទៅកាន់តំបន់នោះ។