យោងតាមការចុះផ្សាយរបស់គេហទំព័រព័ត៌មានអាមេរិក Axios កាលពីថ្ងៃអាទិត្យ (១៥ មីនា) បានឱ្យដឹងថា ក្រុមមន្រ្តីរបស់លោកប្រធានាធិបតីអាមេរិក Donald Trump កំពុងធ្វើការដើម្បីបង្កើតក្រុមចម្រុះមួយដែលរួមមានប្រទេសជាច្រើន ដើម្បីបើកច្រកសមុទ្រហ័រមូសឡើងវិញ ហើយសង្ឃឹមថា នឹងប្រកាសក្រុមចម្រុះមួយនេះ នៅចុងសប្តាហ៍នេះ។

របាយការណ៍ដែលសម្អាងដល់ក្រុមមន្ត្រីអាមេរិកនោះ បន្តថា លោក Trump ក៏កំពុងថ្លឹងថ្លែងលើការរឹបអូសយកឃ្លាំងប្រេងដ៏សំខាន់របស់អ៊ីរ៉ង់ លើកោះ Kharg ផងដែរ នៅក្នុងជំហានមួយដែលតម្រូវឱ្យមានវត្តមានទ័ពជើងគោករបស់អាមេរិក ប្រសិនបើនាវាដឹកប្រេងនៅតែជាប់គាំងក្នុងឈូងសមុទ្រពែក្ស។

លោក Trump ផ្ទាល់ក៏បានលើកឡើងកាលពីថ្ងៃអាទិត្យថា រដ្ឋបាលរបស់លោកកំពុងពិភាក្សាជាមួយប្រទេសចំនួន៧ អំពីការជួយធានាសុវត្ថិភាពច្រកសមុទ្រហ័រមូស ក្នុងអំឡុងសង្គ្រាមអាមេរិក-អ៊ីស្រាអែលលើអ៊ីរ៉ង់ ដោយអំពាវនាវឱ្យប្រទេសទាំងនោះជួយការពារនាវានៅក្នុងផ្លូវទឹកដ៏សំខាន់ ដែលទីក្រុងតេអេរ៉ង់ បានរារាំងចរាចរណ៍ភាគច្រើនរបស់នាវាដឹកប្រេង។

ជម្លោះនេះបង្កើតភាពចលាចលទូទាំងមជ្ឈិមបូព៌ា និងធ្វើឱ្យទីផ្សារថាមពលពិភពលោករង្គោះរង្គើនៅក្នុងសប្តាហ៍ទីបីរបស់ខ្លួន ហើយលោក Trump បានទទូចថា ប្រជាជាតិនានាដែលពឹងផ្អែកយ៉ាងខ្លាំងលើប្រេងពីឈូងសមុទ្រ មានកាតព្វកិច្ចការពារច្រកសមុទ្រមួយនេះ។

លោក Trump បានបដិសេធមិនបញ្ចេញឈ្មោះប្រទេសទាំងប្រាំពីរដែលរដ្ឋបាលរបស់លោកបានទាក់ទងនោះទេ ប៉ុន្តែលោកបាននិយាយកាលពីចុងសប្តាហ៍កន្លងទៅថា លោករំពឹងថា ប្រទេសជាច្រើននឹងបញ្ជូននាវាចម្បាំងរបស់ពួកគេដើម្បីអនុញ្ញាតឱ្យការដឹកជញ្ជូនអាចឆ្លងកាត់ច្រកសមុទ្រហ័រមូស ដែលជាផ្លូវសម្រាប់ប្រេង ២០% របស់ពិភពលោក៕