នៅថ្ងៃចន្ទ (១៦ មីនា) នេះ ក្រសួងពាណិជ្ជកម្មចិន បានរិះគន់យ៉ាងខ្លាំងលើសហរដ្ឋអាមេរិក ចំពោះការបើកការស៊ើបអង្កេតផ្នែកពាណិជ្ជកម្មថ្មីបំផុតរបស់ខ្លួន ក្រោមមាត្រាទី៣០១ ដែលសំដៅលើសេដ្ឋកិច្ចចំនួន ៦០ប្រទេស រួមទាំងចិនផងដែរ ពាក់ព័ន្ធនឹងការចោទប្រកាន់ថា ប្រទេសទាំងនោះបរាជ័យក្នុងការហាមឃាត់ការនាំចូលផលិតផលដែលផលិតក្រោម «ពលកម្មដោយបង្ខំ» ដោយហៅទង្វើនេះថាជាសកម្មភាពគាំពារនិយមបែបអគតិ ដែលរំខានដល់សណ្តាប់ធ្នាប់សេដ្ឋកិច្ច និងពាណិជ្ជកម្មអន្តរជាតិ។

អ្នកនាំពាក្យក្រសួងបានលើកឡើងថា ចិនបានកត់សម្គាល់ឃើញថា កាលពីថ្ងៃទី១២ ខែមីនា ម៉ោងក្នុងតំបន់ អាមេរិកបានបើកការស៊ើបអង្កេតពាណិជ្ជកម្មតាមមាត្រា ៣០១ ថ្មី ប្រឆាំងនឹងសេដ្ឋកិច្ចចំនួន ៦០ប្រទេស ក្រោមហេតុផលថា «ខកខានមិនបានហាមឃាត់ការនាំចូលផលិតផលដែលផលិតចេញពីពលកម្មដោយបង្ខំ» ដែលការណ៍នេះបានកើតឡើងត្រឹមតែមួយថ្ងៃប៉ុណ្ណោះ បន្ទាប់ពីខ្លួនបានបើកការស៊ើបអង្កេតតាមមាត្រា ៣០១ មួយផ្សេងទៀតលើសេដ្ឋកិច្ចចំនួន ១៦ប្រទេស រួមទាំងចិនផងដែរ ដោយយោងលើបញ្ហា «ផលិតកម្មលើសតម្រូវការ»។

អ្នកនាំពាក្យរូបនេះបានរិះគន់លើអាមេរិក ចំពោះការប្រឌិតការអះអាងពី «ពលកម្មដោយបង្ខំ» ដើម្បីដាក់កម្រិតពាណិជ្ជកម្មជាបន្តបន្ទាប់លើផលិតផលរបស់ចិន ដោយកត់សម្គាល់ថា ចិនបានបង្ហាញជំហរប្រឆាំងយ៉ាងដាច់អហង្ការម្តងហើយម្តងទៀតចំពោះវិធានការបែបនេះ។ អ្នកនាំពាក្យរូបនេះបានបញ្ជាក់សារជាថ្មីថា ចិនតែងតែប្រឆាំងនឹងពលកម្មដោយបង្ខំ ហើយក៏ជាសមាជិកស្ថាបនិកមួយនៃអង្គការពលកម្មអន្តរជាតិ (ILO) ផងដែរ។

អ្នកនាំពាក្យរូបនោះបន្តថា ការស៊ើបអង្កេតថ្មីនេះ គឺជាទង្វើឯកតោភាគី តាមតែអំពើចិត្ត និងមានលក្ខណៈរើសអើង ដែលស្មើនឹងសកម្មភាពគាំពារនិយមយ៉ាងច្បាស់ក្រឡែត។ អ្នកនាំពាក្យរូបនោះបន្ថែមថា ចិនបានលើកបញ្ហានេះឡើងជាមួយអាមេរិក នៅក្នុងកិច្ចពិភាក្សាពាណិជ្ជកម្មដែលកំពុងប្រព្រឹត្តទៅនៅទីក្រុងប៉ារីស និងបានជំរុញឱ្យអាមេរិក កែតម្រូវកំហុសរបស់ខ្លួនជាបន្ទាន់ ហើយងាកមកសហការជាមួយចិន នៅក្នុងទិសដៅរួមមួយ៕