ខ្សែភាពយន្តមានចំណងជើងថា «One Battle After Another» (ឬហៅថា សមរភូមិមិនចេះចប់) របស់លោក Paul Thomas Anderson បានគ្រងតំណែងជាភាពយន្តឆ្នើមបំផុត នៅក្នុងកម្មវិធីប្រគល់ពានរង្វាន់អូស្ការលើកទី៩៨ កាលពីថ្ងៃអាទិត្យ (១៥ មីនា) នៅសហរដ្ឋអាមេរិក ដោយបាននាំមកនូវកិត្តិយសដ៏ខ្ពង់ខ្ពស់បំផុតរបស់វិស័យហូលីវូដ ជូនដល់ខ្សែភាពយន្តបែបកំប្លែងដែលរៀបរាប់អំពីវីរកថារបស់ជនជាតិអាមេរិកជាច្រើនជំនាន់នៃរឿងរ៉ាវតស៊ូផ្នែកនយោបាយ។

ខ្សែភាពយន្តចំនួន៣ ដែលនិយាយពីសង្គ្រាមនៅតំបន់ហ្កាហ្សា និងវិបត្តិចំណាប់ខ្មាំង សុទ្ធតែបានបរាជ័យក្នុងការដណ្តើមពានរង្វាន់ក្នុងផ្នែករៀងៗខ្លួន រួមទាំងភាពយន្តអ៊ីស្រាអែលចំនួន ២រឿង ផងដែរ។ គួរឱ្យដឹងថា រឿង One Battle After Another នេះគឺជាខ្សែភាពយន្តអាមេរិកឆ្នាំ២០២៥ បែបកំប្លែងលាយឡំសោនាដកម្ម វាយប្រហារ និងរន្ធត់ ដែលផលិត សរសេរ និងដឹកនាំដោយលោក Anderson។

នៅមុនឆ្នាំ២០២៦នេះ លោក Anderson ធ្លាប់ទទួលបានការស្នើឈ្មោះឱ្យចូលរួមទទួលពានអូស្ការចំនួន ១១ដង ប៉ុន្តែមិនដែលឈ្នះបានពានរង្វាន់ឡើយ។ ប៉ុន្តែសម្រាប់រឿង «One Battle After Another» ដែលជាភាពយន្តលេចធ្លោជាងគេតាំងពីចេញផ្សាយដំបូងមក បានឈ្នះពានរង្វាន់អូស្ការដល់ទៅ ៦ពាន រួមទាំង អ្នកដឹកនាំរឿងល្អបំផុត និងការសរសេរអត្ថបទភាពយន្តកែសម្រួលល្អបំផុត សម្រាប់លោក Anderson ផ្ទាល់ ក៏ដូចជាពានរង្វាន់អូស្ការដំបូងបង្អស់សម្រាប់ផ្នែកជ្រើសរើសតួសម្តែងល្អបំផុត និងពានរង្វាន់តួសម្តែងរងប្រុសល្អបំផុតសម្រាប់លោក Sean Penn ដែលបានអវត្តមានក្នុងកម្មវិធី។

លោក Anderson បានថ្លែងខណៈពេលទទួលពានរង្វាន់ថា៖ «លោកបានសរសេររឿងនេះឡើងសម្រាប់កូនៗរបស់លោក ដើម្បីអភ័យទោសចំពោះភាពរញ៉េរញ៉ៃដែលគ្រប់គ្នាបានបន្សល់ទុកនៅក្នុងពិភពលោកនេះ ដែលគ្រប់គ្នាកំពុងប្រគល់បន្តទៅឱ្យពួកគេចាត់ចែង»៕