យោធាសហរដ្ឋអាមេរិក បាននិយាយកាលពីថ្ងៃចន្ទ (១៦ មីនា) ថា ចំនួនទាហានអាមេរិក ដែលបានរងរបួសនៅក្នុងសង្គ្រាមប្រឆាំងនឹងអ៊ីរ៉ង់ បានកើនឡើងដល់ប្រហែល ២០០នាក់ហើយ ខណៈដែលជម្លោះដ៏តានតឹងនេះបានចូលដល់សប្តាហ៍ទីបីរបស់ខ្លួន។ ទីបញ្ជាការកណ្តាលរបស់យោធាសហរដ្ឋអាមេរិក បាននិយាយថា ភាគច្រើននៃតួលេខទាំងនោះគឺបានរងរបួសស្រាល ហើយទាហានចំនួន ១៨០ នាក់បានវិលត្រឡប់ទៅបំពេញកាតព្វកិច្ចវិញហើយ ចំណែកមនុស្ស ១០នាក់ គឺរបួសធ្ងន់ធ្ងរ។

បញ្ជាការកណ្តាលបានបន្ថែមថា កងទ័ពបានរងរបួសនៅក្នុងប្រទេសកូវ៉ែត អារ៉ាប៊ីសាអ៊ូឌីត អារ៉ាប់រួម អេមីរ៉ាតអារ៉ាប់រួម ហ្ស៊កដានី បារ៉ែន អ៊ីរ៉ាក់ និងអ៊ីស្រាអែល។ ចំណែកតួលេខអ្នកស្លាប់វិញ យោធាអាមេរិក បាននិយាយថា កងទ័ពអាមេរិកចំនួន ១៣នាក់ ត្រូវបានសម្លាប់ ចាប់តាំងពីអ៊ីរ៉ង់ បានបើកការវាយប្រហារប្រឆាំងនឹងមូលដ្ឋានយោធាអាមេរិក បន្ទាប់ពីការចាប់ផ្តើមនៃជម្លោះនៅថ្ងៃទី២៨ ខែកុម្ភៈមក។

ការវាយប្រហាររបស់អ៊ីរ៉ង់ ក៏បានត្រូវចំបេសកកម្មការទូត សណ្ឋាគារ និងអាកាសយានដ្ឋាន ព្រមទាំងបំផ្លាញហេដ្ឋារចនាសម្ព័ន្ធថាមពលនៅក្នុងបណ្ដារដ្ឋឈូងសមុទ្រអារ៉ាប់ផងដែរ។ ទន្ទឹមនឹងនេះ សហរដ្ឋអាមេរិកបានធ្វើការវាយប្រហារប្រឆាំងនឹងគោលដៅជាង ៧.០០០កន្លែង នៅក្នុងប្រទេសអ៊ីរ៉ង់។

ប្រភពពីមន្ត្រីអាមេរិកមួយរូបបាននិយាយកាលពីថ្ងៃចន្ទថា យានដ្រូនប្រភេទ MQ-9 ប្រហែលជាង ១០គ្រឿង ត្រូវបានបំផ្លាញនៅក្នុងសង្គ្រាមនេះ។ យានដ្រូន MQ-9 នេះអាចហោះក្រវែលក្នុងរយៈកម្ពស់ប្រមាណជាង ១៥គីឡូម៉ែត្រ បានលើសពី ២៧ម៉ោង ដើម្បីប្រមូលព័ត៌មានសម្ងាត់ដោយប្រើប្រាស់កាមេរ៉ា សេនស័រ និងរ៉ាដាដ៏ទំនើបៗ៕