ប្រទេសអាហ្វហ្គានីស្ថាន បានចោទយោធាប្រទេសប៉ាគីស្ថានថាបានបើកការវាយប្រហារតាមអាកាសលើមន្ទីរពេទ្យមួយកន្លែងដែលព្យាបាលអ្នកប្រើប្រាស់គ្រឿងញៀននៅក្នុងរដ្ឋធានីកាប៊ុល ដោយបានសម្លាប់មនុស្សយ៉ាងហោចណាស់៤០០នាក់។ ប៉ាគីស្ថានបានច្រានចោលការអះអាងនេះថា «មិនពិត និងមានបំណងបំភាន់សាធារណជន» ដោយនិយាយថាខ្លួនបានកំណត់គោលដៅតែលើទីតាំងយោធា នៅក្នុងទីក្រុងកាប៊ុល និងខេត្ត Nangahar កាលពីថ្ងៃចន្ទ។

លោក Hamdullah Fitrat អ្នកនាំពាក្យរងរបស់រដ្ឋាភិបាលតាលីបង់អាហ្វហ្គានីស្ថានបាននិយាយថា ការវាយប្រហារលើមន្ទីរពេទ្យព្យាបាលអ្នកញៀនគ្រឿងញៀន Omar ក្នុងទីក្រុងកាប៊ុល បានកើតឡើងនៅម៉ោងប្រហែល ៩ យប់ ម៉ោងក្នុងស្រុក ។

លោកបានសរសេរនៅលើបណ្តាញ Xថា មន្ទីរពេទ្យនេះមានគ្រែចំនួន ២.០០០គ្រែ ហើយការវាយឆ្មក់បានបំផ្លាញផ្នែកធំៗនៃអគារ ។ គួឲ្យសោកស្តាយ ចំនួនអ្នកស្លាប់បានកើនឡើងដល់យ៉ាងហោចណាស់ ៤០០ នាក់ ខណៈ ប្រហែល ២៥០ នាក់ផ្សេងទៀតត្រូវបានរាយការណ៍ថារងរបួស។ ក្រុមជួយសង្គ្រោះស្ថិតនៅកន្លែងកើតហេតុ ដោយធ្វើការដើម្បីគ្រប់គ្រងអគ្គិភ័យ និងស្វែងរកសាកសពជនរងគ្រោះដែលនៅសល់។ ស្ថានីយ៍ទូរទស្សន៍ក្នុងស្រុក បានបង្ហោះវីដេអូដែលបង្ហាញពីក្រុមអ្នកពន្លត់អគ្គិភ័យកំពុងពន្លត់អណ្តាតភ្លើងក្នុងចំណោមអគារបាក់បែក។ លោក Omid Stanikzai ជាអ្នកយាមសន្តិសុខនៅមន្ទីរពេទ្យ បានប្រាប់ទីភ្នាក់ងារសារព័ត៌មាន ថា លោកបានឮសំឡេងយន្តហោះល្បាតនៅលើអាកាសមុនពេលការវាយប្រហារ។ លោកបាននិយាយថា «មានអង្គភាពយោធានៅជុំវិញយើង នៅពេលនោះអង្គភាពយោធាទាំងនេះបាញ់ទៅលើយន្តហោះ យន្តហោះបានទម្លាក់គ្រាប់បែក ហើយអគ្គិភ័យបានឆាបឆេះឡើង»។ លោកបាននិយាយបន្ថែមថា អ្នកស្លាប់ និងរបួសទាំងអស់ គឺជាជនស៊ីវិល។