ទីភ្នាក់ងារសារព័ត៌មានរដ្ឋរុស្ស៊ី បានស្រង់សម្តីរបស់ប្រមុខទ័ពរុស្ស៊ី លោក Valery Gerasimov កាលពីថ្ងៃចន្ទ (១៦ មីនា) ដែលបាននិយាយថា ទីក្រុងមូស្គូបានគ្រប់គ្រងលើទីតាំងឈរជើងចំនួន ១២កន្លែង នៅអ៊ុយក្រែន ក្នុងរយៈពេលពីរសប្តាហ៍ដំបូងនៃខែមីនានេះ ដែលជាផ្នែកមួយនៃការវាយលុកតាមបណ្តោយខ្សែត្រៀមជួរមុខនៅភាគខាងកើត និងភាគខាងត្បូងអ៊ុយក្រែន។

នៅទីក្រុងគីវ ប្រធានាធិបតីអ៊ុយក្រែន លោក Volodymyr Zelenskyy បាននិយាយថា កងកម្លាំងប្រដាប់អាវុធរបស់អ៊ុយក្រែន បានបង្អាក់ផែនការវាយលុករបស់រុស្ស៊ី ដោយសារទីក្រុងមូស្គូ បានបរាជ័យក្នុងការបញ្ជូនទ័ពជំនួយ។ លោក Zelenskyy បានចង្អុលបង្ហាញពីជោគជ័យក្នុងរយៈពេលប៉ុន្មានសប្តាហ៍ថ្មីៗនេះ នៅក្នុងតំបន់ Zaporizhzhia ដោយនិយាយថា អ៊ុយក្រែនដណ្តើមបានទឹកដីមកវិញប្រហែល ៤០០គីឡូម៉ែត្រក្រឡា និងដណ្តើមបានទីតាំងឈរជើង ៨កន្លែងមកវិញ។

យ៉ាងណាក៏ដោយ លោក Gerasimov នាយសេនាធិការនៃកងទ័ពរុស្ស៊ី បានថ្លែងក្នុងអំឡុងទស្សនកិច្ចទៅកាន់ក្រុមយោធាភាគខាងត្បូង ដោយបានលើកឡើងពីការរុលទៅមុខនៅជុំវិញទីក្រុងធំៗរបស់អ៊ុយក្រែន នៅក្នុងជម្លោះជាង ៤ឆ្នាំមកហើយ ក្នុងអ្វីដែលរុស្ស៊ីហៅថា «ប្រតិបត្តិការយោធាពិសេស»។

ក្រសួងការពារជាតិរុស្ស៊ី បានស្រង់សម្តីលោក ដែលបង្ហោះលើបណ្ដាញតេលេក្រាមថា៖ «ការវាយលុកកំពុងធ្វើឡើងគ្រប់ទិសសមរភូមិ។ ក្នុងពេលពីរសប្តាហ៍ក្នុងខែមីនានេះ ទីតាំងទីលំនៅចំនួន ១២កន្លែង ត្រូវបានរំដោះ»។ លោក Gerasimov បន្ថែមថា កងកម្លាំងរុស្ស៊ីកំពុង «វាយលុកយ៉ាងសកម្មឆ្ពោះទៅកាន់ទីក្រុង Sloviansk» ដែលជាទីក្រុងការពារយ៉ាងរឹងមាំក្នុងតំបន់ Donetsk ភាគខាងកើតអ៊ុយក្រែន ហើយក៏ជាតំបន់ដែលទីក្រុងមូស្គូ បានកំណត់ជាគោលដៅសំខាន់ជាយូរមកហើយ៕