អឺរ៉ុប៖ ប្រធានគោលនយោបាយកិច្ចការបរទេសសហភាពអឺរ៉ុបលោក Josep Borrell បានប្រាប់ក្រុមអ្នកចូលរួមនៅវេទិកាសន្និសីទអន្តរជាតិក្រុង Doha ប្រទេសកាតាកាលពីចុងសប្ដាហ៍ថា ប្រទេសអ៊ីរ៉ង់ និងបណ្ដាដៃគូបានខិតចូលកាន់តែជិតការព្រមព្រៀងលើការស្រោចស្រង់កិច្ចព្រមព្រៀងនុយក្លេអ៊ែរ នៃផែនការរួមគ្រប់ជ្រុងជ្រោយឆ្នាំ២០១៥។
លោកថា យើងបានខិតចូលកាន់តែជិតកិច្ចព្រមព្រៀងមួយ ហើយលោកសង្ឃឹមថា វានឹងអាចទៅរួច ដោយប្រាប់ក្រុមអ្នកសារព័ត៌មានថា វាអាចប្រើពេលប៉ុន្មានថ្ងៃទៀត មុនពេលភាគីនានាព្រមព្រៀងធ្វើឲ្យកិច្ចព្រមព្រៀងនោះរស់ឡើងវិញ។ បន្ទាប់ពីអតីតប្រធានាធិបតីអាមេរិកលោក Donald Trump បានបោះបង់ចោលកិច្ចព្រមព្រៀងក្នុងឆ្នាំ២០១៨ មក បានជំរុញឲ្យទីក្រុងតេអេរ៉ង់ចាប់ផ្ដើមបំពាន កម្រិតសារធាតុផលិតនុយក្លេអ៊ែររបស់ខ្លួននៅក្នុងឆ្នាំដដែលនោះ និងរយៈពេល ១១ខែនៃការចរចាមិនជាប់លាប់ក្នុងការស្រោចស្រង់កិច្ចព្រមព្រៀង ដែលខ្លួនបានផ្អាកក្នុងទីក្រុងវីយែនកាលពីដើមខែនេះ បន្ទាប់ពីរុស្ស៊ីបានបង្ហាញឧបសគ្គថ្មី។ រដ្ឋមន្ត្រីការបរទេសអ៊ីរ៉ង់លោក Hossein Amir-Abdollahian បាននិយាយនៅសប្ដាហ៍នេះថា កិច្ចព្រមព្រៀងនុយក្លេអ៊ែរអាចសម្រេចបានក្នុងពេលដ៏ខ្លី បើសហរដ្ឋអាមេរិកមានឆន្ទៈចង់ឲ្យវាកើតឡើង៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
