យោងតាមទីភ្នាក់ងារតាមដានទីផ្សារប្រេងឥន្ធនៈ GasBuddy បានឱ្យដឹងថា តម្លៃលក់រាយជាមធ្យមនៃប្រេងម៉ាស៊ូត នៅសហរដ្ឋអាមេរិក បានហក់ឡើងហួស ៥ដុល្លារ ក្នុងមួយហ្គាឡុង កាលពីថ្ងៃចន្ទ (១៦ មីនា) ដែលជាការកើតឡើងជាលើកទីពីរមិនធ្លាប់មានក្នុងប្រវត្តិសាស្ត្ររបស់ប្រទេសនេះ ខណៈសង្រ្គាមនៅមជ្ឈិមបូព៌ា បានធ្វើឱ្យប៉ះពាល់ដល់ការផ្គត់ផ្គង់ឧស្សាហកម្មឥន្ធនៈ។

ក្រុមសេដ្ឋវិទូព្រមានថា ការកើនឡើងតម្លៃប្រេងម៉ាស៊ូត អាចធ្វើឱ្យសកម្មភាពសេដ្ឋកិច្ចពិភពលោកយឺតយ៉ាវ ដោយសារឥន្ធនៈនេះត្រូវបានប្រើប្រាស់ក្នុងវិស័យផលិតកម្ម និងការដឹកជញ្ជូនទំនិញ ហើយការកើនឡើងថ្លៃដើមក្នុងការផលិត និងការដឹកជញ្ជូន នឹងត្រូវធ្លាក់លើបន្ទុករបស់អ្នកប្រើប្រាស់។ អតិផរណាតម្លៃប្រេងឥន្ធនៈនៅសហរដ្ឋអាមេរិក ក៏អាចបង្កជាហានិភ័យចម្បងដល់លោកប្រធានាធិបតី Donald Trump ផងដែរ ខណៈគណបក្សសាធារណរដ្ឋរបស់លោក កំពុងរៀបចំសម្រាប់ការបោះឆ្នោតពាក់កណ្តាលអាណត្តិនៅខែវិច្ឆិកា ខាងមុខនេះ។

ទិន្នន័យពី GasBuddy បង្ហាញថា តម្លៃមធ្យមជាតិរបស់សហរដ្ឋអាមេរិកសម្រាប់ប្រេងម៉ាស៊ូត បានលើសពី ៥ដុល្លារ ក្នុងមួយហ្គាឡុងកាលពីថ្ងៃចន្ទ។ លើកទីមួយដែលប្រេងម៉ាស៊ូតមានតម្លៃខ្ពស់ជាងកម្រិតនេះ គឺកាលពីខែធ្នូ ឆ្នាំ២០២២ នៅពេលដែលទីផ្សារប្រេងពិភពលោកកំពុងរង្គោះរង្គើដោយសារប្រតិបត្តិការយោធារបស់រុស្ស៊ីលើអ៊ុយក្រែន នៅដើមឆ្នាំដដែលនោះ។

សង្រ្គាមរវាងសហរដ្ឋអាមេរិក-អ៊ីស្រាអែល ប្រឆាំងនឹងអ៊ីរ៉ង់ ដែលឥឡូវនេះឈានចូលដល់សប្តាហ៍ទីបីរបស់ខ្លួនទៅហើយ បានបង្កការរំខានយ៉ាងធ្ងន់ធ្ងរដល់ខ្សែច្រវ៉ាក់ផ្គត់ផ្គង់ប្រេងម៉ាស៊ូតពិភពលោក ដោយសារតំបន់មជ្ឈិមបូព៌ាគឺជាអ្នកផ្គត់ផ្គង់ដ៏សំខាន់ទាំងឥន្ធនៈ និងប្រភេទប្រេងឆៅ ដែលស័ក្តិសមបំផុតសម្រាប់ការផលិតប្រេងម៉ាស៊ូតដ៏មានសារៈសំខាន់នេះ៕