អ៊ីរ៉ង់បានបើកការវាយប្រហារថ្មីៗលើអេមីរ៉ាតអារ៉ាប់រួម នៅថ្ងៃអង្គារ (៧ មីនា) នេះ នៅក្នុងការវាយប្រហារសងសឹកលើសម្ព័ន្ធមិត្តឈូងសមុទ្ររបស់សហរដ្ឋអាមេរិក ដែលលោកប្រធានាធិបតី Donald Trump បានលើកឡើងថា ជារឿងមិនបានរំពឹងទុក ប៉ុន្តែប្រភពនានាបាននិយាយថា លោកត្រូវបានក្រុមមន្រ្តីជូនដំណឹងរួចជាស្រេចហើយ តាំងពីមុនពេលមានជម្លោះមកម្ល៉េះ។

សង្រ្គាមរវាងអាមេរិក-អ៊ីស្រាអែល ប្រឆាំងនឹងអ៊ីរ៉ង់ បានឈានចូលដល់សប្តាហ៍ទីបីហើយ ដោយមានមនុស្សយ៉ាងតិច ២.០០០ នាក់បានបាត់បង់ជីវិត ហើយនៅមិនទាន់ឃើញមានសញ្ញានៃការបញ្ចប់នៅឡើយទេ។ ច្រកសមុទ្រហ័រមូសដ៏មានសារៈសំខាន់ នៅតែបន្តបិទជិតស្ទើរតែទាំងស្រុង ដែលបង្កឱ្យតម្លៃថាមពលហក់ឡើងខ្ពស់ និងមានក្ដីបារម្ភអំពីអតិផរណា។

មិនមានការថមថយក្នុងការវាយប្រហារពីភាគីទាំងសងខាងទេនៅព្រឹកព្រលឹមថ្ងៃអង្គារនេះ ដោយអ៊ីរ៉ង់បានបាញ់មីស៊ីលដាក់លើអ៊ីស្រាអែល ពេញមួយយប់ ដែលនេះបង្ហាញថា ទីក្រុងតេអេរ៉ង់នៅតែរក្សាសមត្ថភាពក្នុងការធ្វើការវាយប្រហាររយៈចម្ងាយឆ្ងាយ ទោះបីជារងការវាយប្រហារយ៉ាងដំណំក៏ដោយ។ អ៊ីរ៉ង់ក៏បានកំណត់គោលដៅលើអេមីរ៉ាតអារ៉ាប់រួម ដែលការវាយប្រហារនោះបានបង្ខំឱ្យមានការបិទដែនអាកាសជាបណ្តោះអាសន្ន។

យោធាអ៊ីស្រាអែល និយាយថា ខ្លួនកំណត់គោលដៅលើ «ហេដ្ឋារចនាសម្ព័ន្ធរបបអ៊ីរ៉ង់» ជាមួយនឹងរលកនៃការវាយប្រហារថ្មីទូទាំងទីក្រុងតេអេរ៉ង់ ក៏ដូចជាទីតាំងរបស់ក្រុមហេសបូឡា នៅទីក្រុងបេរូត រយៈពេលមួយថ្ងៃប៉ុណ្ណោះបន្ទាប់ពីប្រកាសថា ខ្លួនបានរៀបចំផែនការលម្អិតសម្រាប់សង្រ្គាមជាមួយអ៊ីរ៉ង់ យ៉ាងតិចបីសប្តាហ៍បន្ថែមទៀត។ ប្រភពសន្តិសុខអ៊ីរ៉ាក់ និយាយថា គ្រាប់រ៉ូកែត និងដ្រូនយ៉ាងតិច ៥គ្រឿង បានកំណត់គោលដៅលើស្ថានទូតអាមេរិកក្នុងទីក្រុងបាកដាដ កាលពីព្រឹកព្រលឹមថ្ងៃអង្គារ ដោយបានពណ៌នាថា នេះគឺជាការវាយប្រហារដ៏ខ្លាំងក្លាបំផុតចាប់តាំងពីសង្រ្គាមបានចាប់ផ្តើមមក៕