ប្រភពចំនួនបីបានប្រាប់ទីភ្នាក់ងារសារព័ត៌មានរ៉យទ័រថា បណ្ដាប្រេសិតមកពី «ក្រុមប្រឹក្សាសន្តិភាព» របស់លោកប្រធានាធិបតីសហរដ្ឋអាមេរិក Donald Trump បានជួបពិភាក្សាជាមួយតំណាងរបស់ក្រុមសកម្មប្រយុទ្ធហាម៉ាស នៅទីក្រុងគែរ ក្រោមកិច្ចខិតខំប្រឹងប្រែងដើម្បីការពារបទឈប់បាញ់នៅតំបន់ហ្កាហ្សា ដែលកំពុងស្ថិតក្រោមសម្ពាធយ៉ាងធ្ងន់ធ្ងរ ចាប់តាំងពីសហរដ្ឋអាមេរិក និងអ៊ីស្រាអែល បានចាប់ផ្តើមទម្លាក់គ្រាប់បែកលើអ៊ីរ៉ង់។

កិច្ចប្រជុំកាលពីចុងសប្តាហ៍មុននេះ គឺជាជំនួបលើកដំបូងហើយរវាងក្រុមសកម្មប្រយុទ្ធប៉ាឡេស្ទីនមួយនេះ និងក្រុមប្រឹក្សាសន្តិភាព ដែលត្រូវបានរាយការណ៍ជាសាធារណៈ ចាប់តាំងពីការចាប់ផ្តើមនៃសង្គ្រាមអ៊ីរ៉ង់មក។ ក្រុមប្រឹក្សាសន្តិភាព គឺជាអង្គភាពអន្តរជាតិថ្មីមួយដឹកនាំដោយផ្ទាល់ដោយលោក Trump ហើយត្រូវបានចាត់តាំងឱ្យត្រួតពិនិត្យតំបន់ហ្កាហ្សាក្រោយសង្គ្រាម។

បន្ទាប់ពីកិច្ចប្រជុំនេះ អ៊ីស្រាអែលបានប្រកាសកាលពីថ្ងៃអាទិត្យកន្លងទៅថា ខ្លួននឹងបើកច្រកព្រំដែនរ៉ាហ្វាសម្រាប់អ្នកថ្មើរជើងរវាងដែនដីហ្កាហ្សា និងអេហ្ស៊ីបឡើងវិញក្នុងពេលឆាប់ៗនេះ ដែលត្រូវបានបិទចាប់តាំងពីយុទ្ធនាការទម្លាក់គ្រាប់បែកលើអ៊ីរ៉ង់បានចាប់ផ្តើម។ ប្រភពមួយបានលើកឡើងថា ខ្លួនជឿជាក់ថាការប្រកាសរបស់អ៊ីស្រាអែលនេះ គឺជាលទ្ធផលផ្ទាល់នៃកិច្ចប្រជុំរវាងក្រុមហាម៉ាស និងក្រុមប្រឹក្សាសន្តិភាព កាលពីចុងសប្ដាហ៍នោះឯង។

មុនពេលមានសង្គ្រាមនៅអ៊ីរ៉ង់ ផែនការរបស់លោក Trump សម្រាប់តំបន់ហ្កាហ្សា គឺជាគំនិតផ្តួចផ្តើមដ៏សំខាន់បំផុតរបស់លោកសម្រាប់មជ្ឈិមបូព៌ា។ ប្រភពនានាបាននិយាយថា តំណាងក្រុមហាម៉ាស បានព្រមានដល់ក្រុមប្រឹក្សានោះថា ក្រុមសកម្មប្រយុទ្ធប៉ាឡេស្ទីនមួយនេះ អាចនឹងដកខ្លួនចេញពីការសន្យាមុនៗរបស់ខ្លួនក្រោមបទឈប់បាញ់នៅហ្កាហ្សា ប្រសិនបើអ៊ីស្រាអែល នៅតែបន្តរក្សាការរឹតបន្តឹងថ្មីៗលើតំបន់ហ្កាហ្សា ដែលត្រូវបានដាក់ចេញក្នុងអំឡុងពេលសង្គ្រាមអ៊ីរ៉ង់៕