មនុស្សពីរនាក់ បានស្លាប់ និង ១៧នាក់ ផ្សេងទៀត ក្នុងនោះមានស្ត្រី ៧នាក់ បានរងរបួស ក្នុងការវាយប្រហាររបស់អ៊ីស្រាអែល ដែលបានកំណត់គោលដៅលើតំបន់ជាច្រើន នៅភាគខាងត្បូងប្រទេសលីបង់ កាលពីថ្ងៃចន្ទ។ នេះបើយោងតាមរបាយការណ៍ផ្លូវការ និងប្រព័ន្ធផ្សព្វផ្សាយលីបង់។

ទីភ្នាក់ងារសារព័ត៌មានជាតិ (NNA) របស់រដ្ឋលីបង់ បានរាយការណ៍ថា ការវាយប្រហារតាមអាកាសរបស់អ៊ីស្រាអែល បានកំណត់គោលដៅលើអាផាតមិនមួយកន្លែង នៅក្នុងស្រុក Tyre បានសម្លាប់មនុស្សម្នាក់ និង ១៦នាក់ ផ្សេងទៀត រងរបួស។

យោងតាមសារព័ត៌មាន NNA ការវាយប្រហារដោយយានដ្រូនរបស់អ៊ីស្រាអែល បានសម្លាប់គ្រូពេទ្យ      សង្គ្រោះបឋមម្នាក់ និងម្នាក់ទៀត រងរបួស នៅក្នុងភូមិ Yater ។

ទន្ទឹមនឹងនេះ ក្រុមប្រដាប់អាវុធហេសបូឡានៅលីបង់ បាននិយាយថា ខ្លួនបានបាញ់ទម្លាក់យានដ្រូនអ៊ីស្រាអែលមួយគ្រឿង បានកំណត់គោលដៅលើទាហានអ៊ីស្រាអែល នៅទីតាំងជាច្រើនដោយរ៉ូកែត និងកាំភ្លើងធំ ព្រមទាំងបានបាញ់រ៉ូកែត និងវាយប្រហារដោយដ្រូនទៅលើទីក្រុង Nahariyya របស់អ៊ីស្រាអែល។

ចំណែកកាលពីថ្ងៃចន្ទ  NNA បានរាយការណ៍ថា កងកម្លាំងអ៊ីស្រាអែល បានព្យាយាមរុលចូលទៅក្នុងប្រទេសលីបង់ នៅចំណុចជាច្រើនតាមបណ្តោយព្រំដែនភាគខាងត្បូង។

ក្រុមហេសបូឡា បានប្រកាសពីការបាញ់រ៉ូកែតពីប្រទេសលីបង់ឆ្ពោះទៅកាន់ប្រទេសអ៊ីស្រាអែល នៅថ្ងៃទី ០២ ខែមីនា ដែលជាលើកដំបូង ចាប់តាំងពីបទឈប់បាញ់ត្រូវបានប្រកាស នៅថ្ងៃទី ២៧ ខែវិច្ឆិកា ឆ្នាំ ២០២៤។ ក្រោយមក អ៊ីស្រាអែលបានចាប់ផ្តើមយុទ្ធនាការយោធាប្រឆាំងនឹងក្រុមនេះ ដែលពាក់ព័ន្ធនឹងការវាយប្រហារតាមអាកាសទ្រង់ទ្រាយធំទៅលើតំបន់ជាច្រើន នៅភាគខាងត្បូង និងខាងកើតប្រទេសលីបង់ បន្ថែមពីលើតំបន់ជាយក្រុងភាគខាងត្បូងនៃទីក្រុងបេរូត៕