រដ្ឋមន្ត្រីការពារជាតិជប៉ុន លោក Koizumi Shinjiro និយាយថា ភាគីសហរដ្ឋអាមេរិក មិនទាន់បានធ្វើសំណើជាក់លាក់ណាមួយសម្រាប់ប្រទេសជប៉ុនដើម្បីបញ្ជូននាវាទៅកាន់ច្រកសមុទ្រ Hormuz នៅឡើយទេ រួមទាំងក្នុងអំឡុងពេលសន្ទនាតាមទូរស័ព្ទជាមួយរដ្ឋមន្ត្រីការពារជាតិអាមេរិក លោក Pete Hegseth កាលពីថ្ងៃអាទិត្យ។

លោក Koizumi បានប្រាប់អ្នកសារព័ត៌មានបន្ទាប់ពីកិច្ចប្រជុំគណៈរដ្ឋមន្ត្រីកាលពីថ្ងៃអង្គារថា ជប៉ុននឹងបន្តទំនាក់ទំនងយ៉ាងជិតស្និទ្ធជាមួយសហរដ្ឋអាមេរិក និងប្រទេសពាក់ព័ន្ធនានា។ លោក Koizumi ក៏បាននិយាយផងដែរថា រដ្ឋាភិបាលជប៉ុនកំពុងប្រមូលព័ត៌មានអំពីស្ថានភាពនៅច្រកសមុទ្រ Hormuz ដោយមានការព្រួយបារម្ភកាន់តែខ្លាំងឡើង។ លោកបាននិយាយបន្ថែមថា មិនទាន់មានការសម្រេចចិត្តណាមួយត្រូវបានធ្វើឡើងនៅឡើយទេអំពីថាតើត្រូវបញ្ជូនកងកម្លាំងស្វ័យការពារ ឬយ៉ាងណា។

ជាមួយគ្នានេះ អតីតមេបញ្ជាការកងឆ្មាំបដិវត្តន៍អ៊ីស្លាមអ៊ីរ៉ង់ បានព្រមានថា នាវាជប៉ុន «នឹងប្រឈមគ្រោះថ្នាក់» ប្រសិនបើត្រូវបានបញ្ជូនទៅធានាសុវត្ថិភាពនៅច្រកសមុទ្រ Hormuz តាមការស្នើសុំរបស់សហរដ្ឋអាមេរិក។ អតីតមេបញ្ជាការរូបនេះ បានព្រមានថា អ៊ីរ៉ង់បានដាក់មីននៅបាតសមុទ្រ ដែលអាចបំផ្ទុះបានដោយឧបករណ៍បញ្ជាពីចម្ងាយ។ លោកបាននិយាយថា ការបោសសម្អាតមីនពិតជាមិនអាចអនុវត្តបានទេ។

ប្រធានាធិបតីអាមេរិក លោក Donald Trump បានបង្ហាញក្តីសង្ឃឹមថា ជប៉ុន និងប្រទេសមួយចំនួនទៀតនឹងបញ្ជូននាវាដើម្បីធានាសុវត្ថិភាពនៃការធ្វើនាវាចរណ៍នៅផ្លូវទឹកដឹកជញ្ជូនថាមពល ដ៏សំខាន់នេះ។