តម្លៃប្រេងបានធ្លាក់ចុះបន្តិចនៅព្រឹកថ្ងៃពុធ១៨មីនានេះ បន្ទាប់ពីប្រភពដែលដកស្រង់តួលេខរបស់វិទ្យាស្ថានប្រេងអាមេរិក ហៅកាត់ថា API បានបង្ហាញពីការកើនឡើងនៃស្តុកប្រេងឆៅរបស់សហរដ្ឋអាមេរិក។

តម្លៃប្រេងឆៅ Brent បានធ្លាក់ចុះ ១,១៥ ដុល្លារ ឬ ១,១១% មកនៅត្រឹម ១០២,២៧ ដុល្លារក្នុងមួយបារ៉ែល គិតត្រឹមម៉ោង ០១:០៨នាទី ម៉ោងសកល ខណៈប្រេងឆៅ West Texas Intermediate របស់សហរដ្ឋអាមេរិក ដែរនោះ បានធ្លាក់ចុះ ១,៥៤ ដុល្លារ ឬ ១,៦% មកនៅត្រឹម ៩៤,៦៧ ដុល្លារក្នុងមួយបារ៉ែល។

ប្រភពទីផ្សារនានាបាននិយាយ ដោយដកស្រង់តួលេខរបស់ API កាលពីថ្ងៃអង្គារសប្ដាហ៍នេះថា ស្តុកប្រេងឆៅរបស់សហរដ្ឋអាមេរិកបានកើនឡើង ៦,៥៦ លានបារ៉ែលក្នុងសប្តាហ៍ដែលបានបញ្ចប់នៅថ្ងៃទី១៣ ខែមីនា។

ការស្ទង់មតិរបស់សារព័ត៌មាន Reuters បានបង្ហាញថា ស្តុកប្រេងឆៅរបស់សហរដ្ឋអាមេរិកត្រូវបានគេរំពឹងថានឹងកើនឡើងប្រហែល ៣៨០.០០០ បារ៉ែលរហូតដល់ថ្ងៃទី១៣ ខែមីនាថ្មីៗនេះ។   

ទាក់ទងនឹងការផ្គត់ផ្គង់ រដ្ឋមន្ត្រីប្រេងរបស់ប្រទេសអ៊ីរ៉ាក់បាននិយាយកាលពីថ្ងៃអង្គារថា រដ្ឋាភិបាលអ៊ីរ៉ាក់ និងរដ្ឋាភិបាលតំបន់ឃឺដ បានឈានដល់កិច្ចព្រមព្រៀងមួយដើម្បីបន្តការនាំចេញប្រេងទៅកាន់មជ្ឈមណ្ឌលថាមពល Ceyhan របស់ប្រទេសទួរគីចាប់ពីថ្ងៃពុធនេះតទៅ។

កាលពីថ្ងៃអង្គារតម្លៃប្រេងបានងើបឡើងវិញ ហើយតម្លៃឧស្ម័នរបស់សហរដ្ឋអាមេរិកបានកើនឡើង ខណៈអ៊ីរ៉ង់បានបង្កើនការវាយប្រហាររបស់ខ្លួនលើហេដ្ឋារចនាសម្ព័ន្ធថាមពលនៅទូទាំងមជ្ឈិមបូព៌ា ហើយមន្ត្រីជាន់ខ្ពស់មួយរូបរបស់របបនេះបានលើកឡើងថា ច្រកសមុទ្រ Hormuz ដ៏សំខាន់នេះនឹងមិនមានសុវត្ថិភាពសម្រាប់នាវាក្នុងពេលឆាប់ៗនេះទេ៕