ប្រធានាធិបតីអ៊ុយក្រែន លោក Volodymyr Zelenskyy បាននិយាយថា អ្នកជំនាញយោធាអ៊ុយក្រែនជាង ២០០នាក់ កំពុងស្ថិតនៅក្នុងតំបន់ឈូងសមុទ្រ និងមជ្ឈិមបូព៌ាទាំងមូល ដើម្បីជួយរដ្ឋាភិបាលទាំងនោះការពារខ្លួនប្រឆាំងនឹងការវាយប្រហារដោយយានដ្រូនរបស់អ៊ីរ៉ង់។

នៅក្នុងសុន្ទរកថាមួយទៅកាន់សមាជិកសភាចក្រភពអង់គ្លេសរាប់សិបនាក់ នៅទីក្រុងឡុងដ៍្រ កាលពីថ្ងៃអង្គារ១៧មីនាសប្ដាហ៍នេះ មេដឹកនាំអ៊ុយក្រែនរូបនេះ បាននិយាយថា អ្នកជំនាញប្រឆាំងយានដ្រូន របស់អ៊ុយក្រែនចំនួន ២០១នាក់ កំពុងស្ថិតនៅក្នុងតំបន់នេះ និង ៣៤នាក់ផ្សេងទៀតត្រៀមខ្លួនរួចជាស្រេចដើម្បីដាក់ពង្រាយ។  

លោក Zelenskyy បាននិយាយនៅក្នុងសុន្ទរកថារបស់លោកថា ពួកគេទាំងនោះគឺជាអ្នកជំនាញខាងយោធា ដែលបានដឹងពីរបៀបជួយនិងដឹងពីរបៀបការពារប្រឆាំងយានដ្រូន ហ្សាហ៊ីដ ( Shahed)ដោយសំដៅទៅលើយានដ្រូន កាមីកាហ្សេ (kamikaze) បង្កើតឡើងដោយអ៊ីរ៉ង់ ដែលរុស្ស៊ីបានប្រើប្រាស់ក្នុងសង្គ្រាមប្រឆាំងនឹងអ៊ុយក្រែនចាប់តាំងពីឆ្នាំ ២០២២ មក ។

មេដឹកនាំអ៊ុយក្រែនរូបនេះបានបញ្ជាក់ថា ក្រុមរបស់ពួកលោកកំពុងស្ថិតនៅក្នុងប្រទេសអេមីរ៉ាត អារ៉ាប់រួម កាតា អារ៉ាប៊ីសាអ៊ូឌីត និងកំពុងធ្វើដំណើរទៅកាន់ប្រទេសគុយវ៉ែត។

លោកថា ពួកលោកកំពុងធ្វើការជាមួយប្រទេសជាច្រើនទៀត ហើយកិច្ចព្រមព្រៀងមានរួចហើយដែរ។ ពួកលោកមិនចង់ឱ្យការបំភិតបំភ័យរបស់របបអ៊ីរ៉ង់ប្រឆាំងនឹងប្រទេសជិតខាងរបស់ខ្លួន ទទួលបានជោគជ័យនោះទេ៕