កាលពីថ្ងៃអង្គារ (១៧ មីនា) ក្រសួងការពារជាតិរបស់ទីក្រុងមូស្គូ បាននិយាយថា កងទ័ពរុស្ស៊ី បានគ្រប់គ្រងលើភូមិចំនួនពីរគឺភូមិ Sopych ក្នុងតំបន់ Sumy ភាគខាងជើងអ៊ុយក្រែន និងភូមិ Kalenyky ក្នុងតំបន់ Donetsk ដែលភាគខាងកើតអ៊ុយក្រែន។

សេចក្ដីប្រកាសរបស់រុស្ស៊ីនេះ ត្រូវបានចេញផ្សាយត្រឹមតែមួយថ្ងៃប៉ុណ្ណោះបន្ទាប់ពីទីក្រុងមូស្គូ និងទីក្រុងគីវ បានចេញការអះអាងផ្ទុយគ្នាទៅលើថា តើភាគីណាកំពុងរុលទៅមុខតាមបណ្តោយខ្សែត្រៀមជួរមុខប្រវែង ១.២៥០គីឡូម៉ែត្ររបស់ពួកគេ ក្នុងសង្គ្រាមរយៈពេលជាងបួនឆ្នាំមកនេះ។

ក្រសួងរុស្ស៊ីបាននិយាយនៅក្នុងសារមួយលើកម្មវិធីផ្ញើសារតេលេក្រាមថា៖ «កងកម្លាំងប្រដាប់អាវុធនៃសហព័ន្ធរុស្ស៊ី បានរំដោះទីតាំងទីលំនៅ Kalenyky ក្នុងតំបន់ Donetsk ក៏ដូចជាទទួលបានការគ្រប់គ្រងលើទីតាំងទីលំនៅ Sopych ក្នុងតំបន់ Sumy ផងដែរ»។ កាលពីថ្ងៃចន្ទ នៅក្នុងការវាយតម្លៃអំពីវឌ្ឍនភាពរបស់កងកម្លាំងរុស្ស៊ី ឧត្តមសេនីយ៍កំពូល លោក Valery Gerasimov បាននិយាយថា កងទ័ពរបស់លោកកំពុងបន្តបង្កើតតំបន់ទ្រនាប់នៅក្នុងតំបន់ Sumy និង Kharkiv របស់អ៊ុយក្រែន។

យ៉ាងណាក៏ដោយ ប្រធានាធិបតីអ៊ុយក្រែន លោក Volodymyr Zelenskyy កាលពីថ្ងៃចន្ទ បាននិយាយថា កងទ័ពរបស់ទីក្រុងគីវ បានរំខានដល់ការវាយលុកដែលបានគ្រោងទុករបស់រុស្ស៊ី ជាមួយនឹងការវាយបកទៅវិញយ៉ាងខ្លាំងក្លា និង «មិនមែនដូចជាអ្វីដែលរុស្ស៊ីបានគ្រោងទុក និងអ្វីដែលបញ្ជាការរបស់ខ្លួនបានសន្យាចំពោះថ្នាក់ដឹកនាំនយោបាយរបស់រុស្ស៊ីនោះទេ»៕