កាលពីថ្ងៃអង្គារ (១៧ មីនា) ប្រធានាធិបតីអាមេរិក លោក Donald Trump បានលើកឡើងថា សហរដ្ឋអាមេរិក ទទួលបានដំណឹងពីសម្ព័ន្ធមិត្តអង្គការណាតូភាគច្រើនថា ពួកគេមិនចង់ចូលពាក់ព័ន្ធនឹងប្រតិបត្តិការយោធារបស់ទីក្រុងវ៉ាស៊ីនតោន នៅក្នុងប្រទេសអ៊ីរ៉ង់ឡើយ ដែលនេះជាទង្វើមួយដែលលោកបានពិពណ៌នាថាជា «កំហុសដ៏ឆោតល្ងង់បំផុត»។

ទោះជារិះគន់ខ្លាំងៗបែបនេះក្ដី ក៏លោក Trump មិនបានផ្តល់សញ្ញាណាមួយថា លោកមានគម្រោងដាក់ទោសសម្ព័ន្ធមិត្តណាតូចំពោះជំហររបស់ពួកគេនោះទេ ក្នុងពេលដែលលោកឆ្លើយសំណួររបស់អ្នកយកព័ត៌មាននៅក្នុងការិយាល័យប្រធានាធិបតីអាមេរិក Oval Office អំឡុងពេលដំណើរទស្សនកិច្ចរបស់នាយករដ្ឋមន្ត្រីអៀរឡង់ លោក Micheal Martin។

លោក Trump បាននិយាយថា បណ្ដាប្រទេសជាសមាជិកណាតូ នៅតែគាំទ្រសង្គ្រាមរួមគ្នារវាងអាមេរិក និងអ៊ីស្រាអែល ទល់នឹងអ៊ីរ៉ង់ ដែលឥឡូវនេះបានឈានចូលដល់សប្តាហ៍ទីបីហើយ បើទោះបីជាពួកគេមិនចង់ពាក់ព័ន្ធក៏ដោយ។ លោក Trump លើកឡើងថា៖ «លោកគិតថា ណាតូកំពុងបង្កើតកំហុសដ៏ឆោតល្ងង់បំផុត។ គ្រប់គ្នាឯកភាពជាមួយអាមេរិក ប៉ុន្តែពួកគេមិនចង់ជួយទេ។ ដូច្នេះហើយ អាមេរិកត្រូវតែចងចាំរឿងនេះទុក ព្រោះនោះជារឿងដ៏គួរឱ្យភ្ញាក់ផ្អើលបំផុត»។

គួរឱ្យដឹងថា លោក Trump បានអំពាវនាវឱ្យប្រទេសនានាជួយការពារច្រកសមុទ្រហ័រមូស ដែលជាកន្លែងដឹកជញ្ជូនប្រេង ២០% របស់ពិភពលោក បន្ទាប់ពីអ៊ីរ៉ង់បានប្រើដ្រូន មីស៊ីល និងមីន ដើម្បីបិទច្រកសមុទ្រដ៏សំខាន់មួយនេះ មិនឱ្យនាវាដឹកប្រេងឆ្លងកាត់បានឡើយ។ ក៏ប៉ុន្តែសម្ព័ន្ធមិត្តអាមេរិកមួយចំនួន បាននិយាយកាលពីថ្ងៃចន្ទថា ពួកគេមិនទាន់មានគម្រោងភ្លាមៗក្នុងការបញ្ជូននាវាទៅជួយបើកច្រកសមុទ្រហ័រមូសឡើងវិញនោះទេ ដែលនេះជាការបដិសេធយ៉ាងដាច់អហង្ការដោយប្រយោលចំពោះការអំពាវនាវសុំជំនួយយោធារបស់លោក Trump៕