មន្ត្រីសន្តិសុខជាន់ខ្ពស់មួយរូបក្នុងរដ្ឋបាលរបស់ប្រធានាធិបតីអាមេរិក Donald Trump បានលាលែងពីតំណែងរបស់ខ្លួន ជុំវិញបញ្ហាសង្រ្គាមនៅអ៊ីរ៉ង់ កាលពីថ្ងៃអង្គារ (១៧ មីនា) ដោយនិយាយថា ទីក្រុងតេអេរ៉ង់មិនបានបង្កការគំរាមកំហែងណាមួយដែលហៀបនឹងកើតឡើងចំពោះសហរដ្ឋអាមេរិកនោះទេ។ 

លោក Joe Kent ដែលជាប្រធានមជ្ឈមណ្ឌលប្រឆាំងភេរវកម្មជាតិ គឺជាមន្ត្រីសន្តិសុខជាន់ខ្ពស់ដំបូងគេនៅក្នុងរដ្ឋបាលរបស់លោក Trump ដែលបានលាលែងពីតំណែងដោយសារជម្លោះនេះ ដែលឥឡូវនេះ បានឈានចូលដល់សប្តាហ៍ទីបីទៅហើយ។

លោក Kent បានសរសេរក្នុងលិខិតមួយដែលបង្ហោះលើបណ្តាញសង្គមថា៖ «ក្នុងនាមជាអ្នកមានសតិសម្បជញ្ញៈ លោកមិនអាចគាំទ្រសង្រ្គាមដែលកំពុងបន្តនៅអ៊ីរ៉ង់បានទេ។ អ៊ីរ៉ង់មិនបានបង្កការគំរាមកំហែងភ្លាមៗដែលជិតមកដល់លើអាមេរិកនោះឡើយ ហើយច្បាស់ណាស់ថា អាមេរិកបានចាប់ផ្តើមសង្រ្គាមនេះដោយសារសម្ពាធពីអ៊ីស្រាអែល និងក្រុមអ្នកបញ្ចុះបញ្ចូលដ៏មានថ្វីមាត់របស់អ៊ីស្រាអែល»។

លោក Kent ត្រូវបានគេស្គាល់ជាយូរមកហើយថាគាំទ្រគោលនយោបាយ «យកអាមេរិកជាធំ» របស់លោក Trump ប៉ុន្តែលោក Kent ក៏ធ្លាប់និយាយថា លោកប្រឆាំងនឹងអន្តរាគមន៍យោធារបស់អាមេរិក នៅបរទេស។ ទោះជាយ៉ាងនេះក្ដី មន្ត្រីអាមេរិកមួយរូបបាននិយាយថា ការប្រកាសចុះពីតំណែងនេះជារឿងភ្ញាក់ផ្អើលយ៉ាងខ្លាំង។ អ្នកជំនាញមួយចំនួនលើកឡើងថា ការគំរាមកំហែងដែលហៀបនឹងកើតឡើង គឺជាលក្ខខណ្ឌចាំបាច់ដើម្បីឱ្យអាមេរិកអាចបើកសង្រ្គាមបាន ក្រោមច្បាប់សង្រ្គាមអន្តរជាតិ។

អ្នកនាំពាក្យសេតវិមាន លោកស្រី Karoline Leavitt បាននិយាយនៅក្នុងសេចក្តីថ្លែងការណ៍មួយថា លិខិតរបស់លោក Kent ផ្ញើជូនលោក Trump រួមមាន «ការអះអាងមិនពិត»។ លោកស្រី Leavitt បានបន្តថា៖ «ដូចដែលលោកប្រធានាធិបតី Trump បានថ្លែងយ៉ាងច្បាស់លាស់ និងជាក់លាក់រួចមកហើយ គឺលោកមានភស្តុតាងរឹងមាំ និងគួរឱ្យជឿជាក់ថា អ៊ីរ៉ង់មានបំណងវាយប្រហារសហរដ្ឋអាមេរិកមុន។ ហើយភស្តុតាងទាំងនេះត្រូវបានចងក្រងចេញពីប្រភព និងកត្តាជាច្រើន»៕