លោកស្រី Ursula von der Leyen ប្រធានសហភាពអឺរ៉ុបបាននិយាយកាលពីថ្ងៃអង្គារ ទី១៧ ខែមីនា ថា ប្លុកនេះនឹងជួយបើកឡើងវិញបំពង់បង្ហូរប្រេងខូចខាត ដែលបូមប្រេងរបស់រុស្ស៊ីឆ្លងកាត់ប្រទេសអ៊ុយក្រែនទៅកាន់ប្រទេសហុងគ្រី បន្ទាប់ពីទីក្រុង Budapest បានចោទប្រកាន់ទីក្រុងគីវថាបានពន្យារពេលជួសជុល ក្នុងពេលជម្លោះដែលកំពុងកើនឡើង។ ភាពតានតឹងបានកើនឡើងរវាងប្រទេសជិតខាងជុំវិញបំពង់បង្ហូរប្រេងនេះ។

នាយករដ្ឋមន្ត្រីប្រទេសហុងគ្រី លោក Viktor Orban បានលើកបញ្ហានេះឡើងដើម្បីរារាំងដល់ប្រាក់កម្ចីចំនួន៩០ពាន់លានអឺរ៉ូ (១០៤ ពាន់លានដុល្លារអាមេរិក)ដល់អ៊ុយក្រែន ព្រមទាំងទណ្ឌកម្មថ្មីដាក់ទៅលើលើរុស្ស៊ី។ ដោយសរសេរទៅកាន់ប្រធានាធិបតី លោក Volodymyr Zelenskyy លោកស្រី von der Leyen និងប្រធានក្រុមប្រឹក្សាអឺរ៉ុប លោក Antonio Costa បានសម្តែងក្តីសង្ឃឹមថា «ការជួសជុលយ៉ាងឆាប់រហ័ស»នៃបំពង់បង្ហូរប្រេងនឹងអនុញ្ញាតឱ្យប្លុកនេះបន្តឆ្ពោះទៅមុខ «ក្នុងស្ថានភាពទាន់ពេលវេលា» ជាមួយនឹងប្រាក់កម្ចី និងកញ្ចប់ទណ្ឌកម្មរបស់សហភាពអឺរ៉ុប។

លោកស្រី បាននិយាយនៅក្នុងសេចក្តីថ្លែងការណ៍ ដែលចេញផ្សាយជាមួយនឹងលិខិត និងការឆ្លើយតបរបស់លោក Zelenskyy ថា «សហភាពអឺរ៉ុប បានផ្តល់ការគាំទ្រផ្នែកបច្ចេកទេស និងមូលនិធិដល់អ៊ុយក្រែន។ លោក Orban បាននិយាយថា ជំហររបស់លោកនៅតែមិនផ្លាស់ប្តូរ ហើយលោកបាននិយាយជាមួយលោក Costa និងនាយករដ្ឋមន្ត្រីស្លូវ៉ាគី លោក Robert Fico ដែលប្រទេសរបស់លោកក៏បានទទួលការផ្គត់ផ្គង់តាមរយៈបំពង់បង្ហូរប្រេងនេះផងដែរ។ លោក Orban បាននិយាយនៅក្នុងវីដេអូតាមបណ្តាញសង្គមហ្វេសប៊ុកថា «ប្រសិនបើប្រធានាធិបតី លោក Zelenskyy ចង់ទទួលបានប្រាក់របស់លោកពីទីក្រុងព្រុចសែល នោះបំពង់បង្ហូរប្រេង Druzhba ត្រូវតែបើកឡើងវិញ»។ លោកបាននិយាយបន្ថែមថា «គ្មានប្រេង គ្មានប្រាក់ទេ»។ ប្រទេសហុងគ្រី និងស្លូវ៉ាគី បានចោទប្រកាន់អ៊ុយក្រែនថា បានពន្យារពេលដោយចេតនាក្នុងការបើកឡើងវិញបំពង់បង្ហូរប្រេង Druzhba ដែលទីក្រុងគីវនិយាយថា ត្រូវបានបំផ្លាញដោយការវាយប្រហាររបស់រុស្ស៊ី កាលពីខែមករា។