លីបង់បានឲ្យដឹងថា ដោយគ្មានការព្រមានជាមុន អ៊ីស្រាអែលបានវាយប្រហារភាគកណ្តាលទីក្រុងបេរូត នាព្រឹកថ្ងៃពុធ (ទី១៨ ខែមីនា ឆ្នាំ២០២៦) នេះ ដោយបានសម្លាប់មនុស្សយ៉ាងហោចណាស់ ៦នាក់ ខណៈដែលយោធាអ៊ីស្រាអែលបានប្រកាសថា ខ្លួនកំពុងកំណត់គោលដៅភាគខាងត្បូងរបស់ប្រទេសនេះ។

លីបង់ត្រូវបានទាញចូលក្នុងសង្គ្រាមមជ្ឈិមបូព៌ា កាលពីថ្ងៃទី២ ខែមីនា នៅពេលដែលក្រុមសកម្មប្រយុទ្ធហេសបូឡាគាំទ្រដោយអ៊ីរ៉ង់ បានបាញ់រ៉ូកែតឆ្ពោះទៅអ៊ីស្រាអែល ដើម្បីជាការតបតទៅនឹងការវាយប្រហាររបស់សហរដ្ឋអាមេរិក-អ៊ីស្រាអែល ដែលបានសម្លាប់មេដឹកនាំកំពូលអ៊ីរ៉ង់ លោក Ayatollah Ali Khamenei។ អ៊ីស្រាអែលបានឆ្លើយតបដោយការវាយប្រហារយ៉ាងខ្លាំងក្លា លើតំបន់ជាច្រើនរបស់លីបង់ និងប្រតិបត្តិការផ្លូវគោក នៅភាគខាងត្បូង ហើយបានវាយប្រហារភាគកណ្តាលទីក្រុងបេរូតច្រើនដង ទាំងមាន និងគ្មានការព្រមានជាមុន។

ទីភ្នាក់ងារសារព័ត៌មានជាតិផ្លូវការរបស់លីបង់ (NNA) បានរាយការណ៍ថា ការវាយប្រហារមួយ នាព្រឹកព្រលឹមថ្ងៃពុធនេះ បានត្រូវចំផ្ទះល្វែងមួយខ្នង នៅក្នុងកណ្ដាលសង្កាត់ Zuqaq al-Blat ជាតំបន់ដែលមានប្រជាជនរស់នៅច្រើនកកកុញ នៅជិតទីស្នាក់ការកណ្តាលរបស់រដ្ឋាភិបាល និងស្ថានទូតជាច្រើន។

សារព័ត៌មាននេះបានឲ្យដឹងថា ការវាយប្រហារនេះ បានកើតឡើងនៅជិតកន្លែងដែលយោធាអ៊ីស្រាអែលកាលពីសប្តាហ៍មុន បានវាយប្រហារសាខាមួយរបស់ក្រុមហ៊ុនហិរញ្ញវត្ថុ Al-Qard al-Hassan នៅទីក្រុងបេរូត ដែលមានទំនាក់ទំនងជាមួយក្រុមហេសបូឡា។

នៅក្នុងការវាយប្រហារកាលពីសប្តាហ៍មុន យោធាអ៊ីស្រាអែលបានចេញការព្រមានជម្លៀសជាមុន ប៉ុន្តែមិនមានការព្រមានបែបនេះ ត្រូវបានផ្តល់ឲ្យ នៅមុនពេលការវាយឆ្មក់ចុងក្រោយនេះនោះទេ៕