ប្រទេសកាតា បានប្រកាសថា អនុព័ន្ធសន្តិសុខ និងអនុព័ន្ធយោធានៅក្នុងស្ថានទូតរបស់អ៊ីរ៉ង់ គឺជា «បុគ្គលដែលមិនត្រូវបានស្វាគមន៍» ដោយតម្រូវឱ្យពួកគេចាកចេញពីប្រទេសកាតា ក្នុងរយៈពេលយ៉ាងយូរ ២៤ម៉ោង នេះបើតាមការបញ្ជាក់របស់ក្រសួងការបរទេសកាតា កាលពីថ្ងៃពុធ (១៨ មីនា) នៅក្នុងកំណើនភាពតានតឹងផ្នែកការទូតយ៉ាងខ្លាំងរវាងប្រទេសទាំងពីរ។

ការសម្រេចចិត្តនេះ បានកើតឡើងបន្ទាប់ពីអ្វីដែលកាតាពិពណ៌នាថា ជាការកំណត់គោលដៅ និងការឈ្លានពានដដែលៗម្ដងហើយម្ដងទៀត ដែលបានរំលោភលើអធិបតេយ្យភាព និងសន្តិសុខរបស់ខ្លួន ដែលនេះសបញ្ជាក់ឱ្យឃើញពីការធ្លាក់ចុះយ៉ាងខ្លាំងនៃទំនាក់ទំនង ស្របពេលមានអស្ថិរភាពក្នុងតំបន់ដែលកំពុងបន្ត។

ក្រសួងការបរទេសកាតា ប្រគល់កំណត់ទូតផ្លូវការមួយទៅកាន់ស្ថានទូតនៃសាធារណរដ្ឋអ៊ីស្លាមអ៊ីរ៉ង់ប្រចាំកាតា ដោយបញ្ជាក់ថា កាតាចាត់ទុកទាំងអនុព័ន្ធយោធា និងអនុព័ន្ធសន្តិសុខនៅស្ថានទូតមួយនេះ រួមជាមួយបុគ្គលិកនៃការិយាល័យអនុព័ន្ធទាំងពីរ គឺជាបុគ្គលដែលមិនត្រូវបានស្វាគមន៍នោះឡើយ។

ក្រសួងនិយាយថា សកម្មភាពវាយប្រហារច្រើនលើកច្រើនសារបស់អ៊ីរ៉ង់ បានរំលោភលើអធិបតេយ្យភាព និងសន្តិសុខរបស់កាតា ហើយតំណាងឱ្យការរំលោភលើគោលការណ៍ច្បាប់អន្តរជាតិ សេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិលេខ (២៨១៧) និងគោលការណ៍នៃភាពជាអ្នកជិតខាងល្អ។ ក្រសួងកាតាព្រមានថា រាល់ជំហានបន្តបន្ទាប់ទៀតនឹងត្រូវធ្វើឡើងក្នុងស្មារតីធានាឱ្យបាននូវការការពារអធិបតេយ្យភាព សន្តិសុខ និងផលប្រយោជន៍ជាតិរបស់រដ្ឋកាតា៕