មន្ត្រី និងថ្នាក់ដឹកនាំឧស្សាហកម្មបានព្រមានថា តម្លៃប្រេងដែលកើនឡើងខ្ពស់កំពុងជះផលប៉ះពាល់ដល់សេដ្ឋកិច្ចរបស់ប្រទេសថៃ ដោយប៉ះទង្គិចដល់វិស័យដែលពឹងផ្អែកលើថាមពលចាប់ពីការនេសាទរហូតដល់កសិកម្ម។

តម្លៃប្រេងបានកើនឡើងចាប់តាំងពីកងកម្លាំងសហរដ្ឋអាមេរិក និងអ៊ីស្រាអែល បានបើកប្រតិបត្តិការយោធាទ្រង់ទ្រាយធំប្រឆាំងអ៊ីរ៉ង់នៅថ្ងៃទី២៨ កុម្ភៈ ដោយរំខានដល់ការដឹកជញ្ជូនតាមច្រកសមុទ្រ Hormuz ដែលជាចំណុចសំខាន់មួយសម្រាប់ប្រេងមួយភាគប្រាំរបស់ពិភពលោក។

សម្រាប់ប្រជានេសាទរបស់ថៃដែលពឹងផ្អែកភាគច្រើនលើប្រេងម៉ាស៊ូត ការកើនឡើងនេះមានន័យថាការធ្វើដំណើរតិចជាងមុន ការនេសាទតិចជាងមុន ឬគ្មានការធ្វើដំណើរទាល់តែសោះ។

លោក Pradit Lekdee អ្នកនេសាទម្នាក់នៅខេត្ត Samut Sakhon បាននិយាយថាការចំណាយឥឡូវនេះខ្ពស់ណាស់ ដែលការចេញទៅសមុទ្រប្រឈមនឹងការខាត។

លោកថាប្រសិនបើស្ថានភាពនេះនៅតែបន្ត មួយខែ ឬពីរខែទៀត១០០%នៃទូកនេសាទទាំងអស់នឹងឈប់ដោយសារតែតម្លៃប្រេងខ្ពស់ និងការផ្គត់ផ្គង់មានកំណត់។ ឥឡូវនេះ៧០ ទៅ៨០%បានឈប់ហើយ។

ក្រុមថ្នាក់ដឹកនាំធុរកិច្ចព្រមានថា វិបត្តិថាមពលកំពុងគំរាមកំហែងគ្រប់ជ្រុងជ្រោយនៃសេដ្ឋកិច្ចប្រទេសថៃ ចាប់ពីរោងចក្ររហូតដល់ទេសចរណ៍ ដោយមានការភ័យខ្លាចថា ជម្លោះអូសបន្លាយអាចជំរុញឱ្យតម្លៃប្រេងឡើងលើសពី១២០ដុល្លារអាមេរិកក្នុងមួយបារ៉ែល និងធ្វើឱ្យទីផ្សារពិភពលោកមិនមានស្ថិរភាព៕