រដ្ឋមន្ត្រីការបរទេសអ៊ីស្រាអែល លោក Gideon Saar បាននិយាយនៅក្នុងការសន្ទនាតាមទូរស័ព្ទជាមួយសមភាគីបារាំងរបស់ខ្លួន គឺលោក Jean-Noel Barrot ថា អ៊ីស្រាអែលចាប់អារម្មណ៍ក្នុងការកសាងទំនាក់ទំនងសន្តិភាពជាមួយលីបង់ ហើយចាត់ទុកអង្គការស៊ីអ៊ីតហេសបូឡា ជាឧបសគ្គចម្បងចំពោះសន្តិភាព។ 

លោក Saar បានសរសេរនៅលើបណ្តាញសង្គម X ថា៖«អ៊ីស្រាអែលមានចំណាប់អារម្មណ៍ក្នុងការឲ្យលីបង់ចូលរួមក្នុងដំណើរការនៃការធ្វើឲ្យមានប្រក្រតីភាពទំនាក់ទំនងនិងនិងសន្តិភាពនៅក្នុងតំបន់។ ឧបសគ្គចំពោះរឿងនេះ គឺក្រុមហេសបូឡា។ រដ្ឋាភិបាលលីបង់ ត្រូវតែចាត់វិធានការដ៏មានអត្ថន័យប្រឆាំងនឹងក្រុមហេសបូឡាលើគ្រប់វិស័យ៖ អាវុធ ប្រភពមូលនិធិ និងហេដ្ឋារចនាសម្ព័ន្ធហិរញ្ញវត្ថុ វិធានការផ្លូវច្បាប់ប្រឆាំងនឹងថ្នាក់ដឹកនាំរបស់ខ្លួន ហេដ្ឋារចនាសម្ព័ន្ធសង្គម និងអប់រំរបស់ខ្លួន អត្ថប្រយោជន៍សេដ្ឋកិច្ច និងអ្វីៗជាច្រើនទៀត»។

លោករដ្ឋមន្ត្រីបានបន្ថែមថា ប្រទេសរបស់លោក ប្តេជ្ញា «ការពារខ្លួន» ពីការវាយប្រហារដោយគ្រាប់ផ្លោងដែលមកពីទឹកដីលីបង់ និងធ្វើឡើងដោយក្រុមហេសបូឡា។ តាមគំនិតរបស់លោក ចលនានេះ «បានគ្រប់គ្រងលីបង់» ហើយកំពុងធ្វើសកម្មភាពស្របតាមផលប្រយោជន៍របស់អ៊ីរ៉ង់។

នាពេលថ្មីៗនេះ ប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron) បាននិយាយថា អាជ្ញាធរលីបង់បានត្រៀមខ្លួនរួចជាស្រេចសម្រាប់ការចរចាដោយផ្ទាល់ជាមួយអ៊ីស្រាអែល ដែលកំពុងធ្វើប្រតិបត្តិការយោធា នៅតំបន់ភាគខាងត្បូងនៃប្រទេសនេះ ហើយបានស្នើធ្វើជាម្ចាស់ផ្ទះនៃកិច្ចចរចានេះ៕