សហរដ្ឋអាមេរិក និងជប៉ុន បានប្រកាសពង្រីកកិច្ចសហប្រតិបត្តិការនៅក្នុងកិច្ចប្រជុំកំពូលមេដឹកនាំនៃប្រទេសទាំងពីរ កាលពីថ្ងៃព្រហស្បតិ៍ (១៩ មីនា) រួមមានការវិនិយោគរបស់ជប៉ុនរហូតដល់ ៧៣ពាន់លានដុល្លារ ក្នុងគម្រោងថាមពលរបស់សហរដ្ឋអាមេរិក និងផែនការសកម្មភាពដើម្បីអភិវឌ្ឍជម្រើសផ្សេងក្រៅពីប្រទេសចិន សម្រាប់រ៉ែសំខាន់ៗ និងរ៉ែកម្រ។

រដ្ឋាភិបាលទាំងពីរប្រកាសពីផែនការសាងសង់ម៉ាស៊ីនរ៉េអាក់ទ័រនុយក្លេអ៊ែរខ្នាតតូច (SMRs) ដោយក្រុមហ៊ុន GE Vernova Hitachi ក្នុងរដ្ឋ Tennessee និងរដ្ឋ Alabama ដែលមានតម្លៃប៉ាន់ស្មានរហូតដល់ ៤០ពាន់លានដុល្លារ។ រដ្ឋាភិបាលទាំងពីរក៏ប្រកាសផងដែរនូវផែនការសាងសង់រោងចក្រផលិតថាមពលពីឧស្ម័នធម្មជាតិក្នុងរដ្ឋ Pennsylvania ក្នុងតម្លៃប៉ាន់ស្មានរហូតដល់ ១៧ពាន់លានដុល្លារ និងនៅក្នុងរដ្ឋ Texas ក្នុងតម្លៃរហូតដល់ ១៦ពាន់លានដុល្លារ។

គម្រោងទាំងនេះ គឺជាគម្រោងទីពីរដែលត្រូវបានប្រកាស បន្ទាប់ពីជប៉ុន បានប្តេជ្ញាចិត្តចំពោះការវិនិយោគ ៥៥០ពាន់លានដុល្លារ នៅអាមេរិក ដើម្បីទទួលបានការអនុគ្រោះពីពន្ធគយ ដែលលោកប្រធានាធិបតីអាមេរិក Donald Trump បានដាក់កាលពីឆ្នាំមុន។ ជាមួយគ្នានេះ សម្ព័ន្ធមិត្តទាំងពីរបានចេញផ្សាយផែនការសកម្មភាពដើម្បីអភិវឌ្ឍជម្រើសផ្សេងក្រៅពីចិន សម្រាប់ខ្សែច្រវាក់ផ្គត់ផ្គង់រ៉ែសំខាន់ៗ និងរ៉ែកម្រ ដោយផ្តោតដំបូងលើការកំណត់តម្លៃទាបបំផុតសម្រាប់ក្រុមធាតុរ៉ែមួយចំនួន។

គួររម្លឹកថា នាយករដ្ឋមន្រ្តីជប៉ុន លោកស្រី Sanae Takaichi និងលោក Trump បានចុះហត្ថលេខាលើកិច្ចព្រមព្រៀងក្របខណ្ឌស្តីពីរ៉ែកម្របែបនេះ កាលពីខែតុលា ឆ្នាំ២០២៥ នៅទីក្រុងតូក្យូ ខណៈប្រទេសទាំងពីរជួបការលំបាកជាមួយនឹងការត្រួតពិនិត្យការនាំចេញរបស់ចិន។ ប្រទេសទាំងពីរក៏បានចែករំលែកខ្លឹមសារអនុស្សរណៈនៃការយោគយល់គ្នា ស្តីពីផែនការបង្កើតក្រុមការងារចម្រុះជប៉ុន-អាមេរិក ដើម្បីពន្លឿនការអភិវឌ្ឍធនធានរ៉ែនៅបាតសមុទ្រជ្រៅផងដែរ៕