យោងតាមឯកសាររដ្ឋាភិបាលដែលបង្ហាញនៅថ្ងៃសុក្រ (២០ មីនា) នេះបានឱ្យដឹងថា វៀតណាម នឹងប្តូរទៅប្រើប្រាស់សាំងលាយសារធាតុអេតាណុលទាំងស្រុង លឿនជាងការគ្រោងទុក ដែលជាផ្នែកនៃកិច្ចខិតខំប្រឹងប្រែងរបស់ខ្លួនក្នុងការកាត់បន្ថយការប្រើប្រាស់ឥន្ធនៈហ្វូស៊ីល ខណៈសង្រ្គាមអ៊ីរ៉ង់ នៅតែបន្តរំខានដល់ការផ្គត់ផ្គង់ថាមពលសកល។

វៀតណាមនឹងចាប់ផ្តើមប្រើប្រាស់សាំងប្រភេទ E10 ដែលជាល្បាយមានផ្ទុកបាយអូអេតាណុល (Bioethanol) កម្រិត ១០% ចាប់ពីខែក្រោយនេះតទៅ។ នេះបើយោងតាមសេចក្តីណែនាំរបស់រដ្ឋាភិបាល ដែលបានចុះហត្ថលេខាដោយលោកនាយករដ្ឋមន្ត្រី Pham Minh Chinh កាលពីថ្ងៃព្រហស្បតិ៍ ដែលការអនុវត្តនេះគឺធ្វើឡើងមុនគោលដៅមុនដែលកំណត់ទុកពីមុន នៅថ្ងៃទី១ ខែមិថុនា។

តម្លៃប្រេងឥន្ធនៈនៅវៀតណាម បានហក់ឡើងខ្ពស់ ចាប់តាំងពីសង្រ្គាមរវាងអាមេរិក-អ៊ីស្រាអែល ទល់នឹងអ៊ីរ៉ង់ បានចាប់ផ្តើមកាលពី៣សប្តាហ៍មុន ដោយតម្លៃសាំងបានកើនឡើង ៥០% និងតម្លៃប្រេងម៉ាស៊ូតបានកើនឡើង ៧០% នេះបើយោងតាមទិន្នន័យពីក្រុមហ៊ុន Petrolimex។ ឯកសារដដែលបញ្ជាក់ថា ការរំខាននេះបាន «បង្កភាពប្រែប្រួលយ៉ាងខ្លាំងនៃតម្លៃថាមពល បង្កើតជាបញ្ហាប្រឈមជាច្រើនសម្រាប់ប្រទេសនានាដែលពឹងផ្អែកលើការនាំចូលថាមពល និងបង្កើនហានិភ័យដល់សន្តិសុខថាមពលនៃប្រទេសជាច្រើន រួមទាំងវៀតណាមផងដែរ»។

សេចក្តីណែនាំនេះជំរុញឱ្យអាជ្ញាធរដាក់ចេញនូវការលើកទឹកចិត្តសម្រាប់ការផលិត និងការប្រើប្រាស់យានយន្តអគ្គិសនី ហើយអំពាវនាវឱ្យពង្រីកការអភិវឌ្ឍ និងការប្រើប្រាស់ថាមពលកកើតឡើងវិញ។ សេចក្តីណែនាំក៏បញ្ជាក់ផងដែរថា វៀតណាមនឹងលុបបំបាត់ទាំងស្រុងនូវការប្រើប្រាស់អំពូលភ្លើងកម្លាំងចាប់ពី ២០វ៉ាត់ ដល់ ៦០វ៉ាត់ ចាប់ពីត្រីមាសទីបីនៃឆ្នាំ២០២៦ នេះតទៅ៕