បណ្ដាមេដឹកនាំសហភាពអឺរ៉ុប (EU) កាលពីថ្ងៃព្រហស្បតិ៍ (ទី១៩ ខែមីនា ឆ្នាំ២០២៦) បានអំពាវនាវឲ្យបញ្ឈប់ការវាយប្រហារយោធា លើរោងចក្រថាមពល និងទឹក នៅតំបន់មជ្ឈិមបូព៌ា ស្របពេលមានក្ដីបារម្ភកាន់តែខ្លាំងឡើងៗ អំពីផលប៉ះពាល់ដោយសារសង្គ្រាមអ៊ីរ៉ង់ លើសេដ្ឋកិច្ចពិភពលោក។

នៅក្នុងសេចក្តីសន្និដ្ឋានជាលាយលក្ខណ៍អក្សរនៃកិច្ចប្រជុំកំពូលមួយ នៅទីក្រុងប្រ៊ុចសែល ប្រទេសបែលហ្ស៊ិក មេដឹកនាំនៃប្រទេសចំនួន ២៧ របស់ EU បានលើកឡើងថា៖ «ក្រុមប្រឹក្សាអឺរ៉ុបអំពាវនាវឲ្យមានការបន្ធូរបន្ថយភាពតានតឹង និងការអត់ធ្មត់អតិបរមា ការការពារជនស៊ីវិល និងហេដ្ឋារចនាសម្ព័ន្ធស៊ីវិល និងការគោរពច្បាប់អន្តរជាតិយ៉ាងពេញលេញ ពីគ្រប់ភាគីទាំងអស់។ ក្នុងន័យនេះ សូមអំពាវនាវឲ្យបញ្ឈប់ការវាយប្រហារលើរោងចក្រថាមពល និងទឹក»។

ជាមួយគ្នានេះ បណ្ដាមេដឹកនាំទាំងនោះ បានអំពាវនាវឲ្យពង្រឹងបេសកកម្មកងទ័ពជើងទឹកសមុទ្រក្រហមដែលមានស្រាប់របស់ប្លុក គឺបេសកកម្មកងទ័ពជើងទឹក Aspides និងបេសកកម្មកងទ័ពជើងទឹកប្រឆាំងចោរសមុទ្រ Atalanta នៅញកតំបន់អាហ្វ្រិក «ជាមួយនឹងធនធានបន្ថែមទៀត ស្របតាមអាណត្តិរៀងៗខ្លួន»។

លើសពីនោះទៀត នៅក្នុងសេចក្តីថ្លែងការណ៍នោះ មេដឹកនាំអឺរ៉ុបបានស្វាគមន៍ «កិច្ចប្រឹងប្រែងកាន់តែខ្លាំងឡើងដែលបានប្រកាសដោយរដ្ឋជាសមាជិក ក្នុងនោះរួមទាំងតាមរយៈការសម្របសម្រួលពង្រឹងជាមួយដៃគូនៅក្នុងតំបន់ ដើម្បីធានាសេរីភាពនៃការធ្វើនាវាចរណ៍ នៅច្រកសមុទ្រ Hormuz នៅពេលដែលលក្ខខណ្ឌនានាត្រូវបានបំពេញ»៕