ប្រធានាធិបតីសហរដ្ឋអាមេរិក លោក Donald Trump និងនាយករដ្ឋមន្ត្រីអ៊ីស្រាអែល លោក Benjamin Netanyahu សុទ្ធតែសរសើរទំនាក់ទំនងរបស់ពួកលោកថា មានភាពល្អឥតខ្ចោះ ប៉ុន្តែបន្ទាប់ពីមានការវាយប្រហារ លើអ៊ីរ៉ង់ រយៈពេល ៣សប្តាហ៍ យុទ្ធសាស្ត្ររបស់មេដឹកនាំទាំង២ កាន់តែចាប់ផ្ដើមបង្ហាញភាពផ្ទុយគ្នារឿយៗ ដែលអ្នកជំនាញខ្លះ លើកឡើងថា ជាលទ្ធផលនៃគោលដៅមិនច្បាស់លាស់របស់មេដឹកនាំអាមេរិក។

កាលពីថ្ងៃព្រហស្បតិ៍ (ទី១៩ ខែមីនា ឆ្នាំ២០២៦) លោក Trump បាននិយាយថា លោកបានប្រាប់លោក Netanyahu កុំឲ្យវាយប្រហារទីតាំងឧស្ម័នរបស់អ៊ីរ៉ង់ទៀត បន្ទាប់ពីការវាយប្រហាររបស់អ៊ីស្រាអែលបានជំរុញឲ្យទីក្រុងតេអេរ៉ង់សងសឹកប្រឆាំងនឹងមជ្ឈមណ្ឌលថាមពលដ៏សំខាន់មួយ នៅក្នុងប្រទេសកាតា ដែលធ្វើឲ្យតម្លៃពិភពលោកកើនឡើងបន្ថែមទៀត។

ដើមខែនេះ សហរដ្ឋអាមេរិកបានបង្ហាញការមិនស្រណុកចិត្ត បន្ទាប់ពីអ៊ីស្រាអែលបានទម្លាក់គ្រាប់បែកលើឃ្លាំងប្រេងឥន្ធនៈ នៅជុំវិញទីក្រុងតេអេរ៉ង់ ដោយបានធ្វើឲ្យទីក្រុងដែលមានប្រជាជន ១០លាននាក់ មានពេញដោយផ្សែងខ្មៅពុល។ លោក Trump ដែលពេញដោយទំនុកចិត្តដោយសារប្រតិបត្តិការខែមករារបស់លោក នៅប្រទេសវ៉េណេស៊ុយអេឡា បានបង្ហាញក្តីសង្ឃឹម ក្នុងការធ្វើការជាមួយឥស្សរជនម្នាក់ នៅក្នុងចំណោមសាធារណរដ្ឋឥស្លាម ពោលគឺខណៈដែលអ៊ីស្រាអែលបានប្រកាសបើកចំហថា ខ្លួននឹងសម្លាប់មន្ត្រីជាន់ខ្ពស់អ៊ីរ៉ង់។

យ៉ាងណាក្ដី គោលដៅរបស់ប្រទេសទាំង២ ក្នុងប្រតិបត្តិការនេះ ហាក់ចាប់ផ្ដើមបញ្ច្រាសគ្នា ដោយនាយិកាផ្នែកស៊ើបការណ៍សម្ងាត់ជាតិរបស់លោក Trump គឺលោកស្រី Tulsi Gabbard បានទទួលស្គាល់នៅក្នុងសវនាការសភា នាសប្តាហ៍នេះថា៖ «គោលបំណងដែលត្រូវបានដាក់ចេញដោយប្រធានាធិបតី គឺខុសពីគោលបំណងដែលត្រូវបានដាក់ចេញដោយអ៊ីស្រាអែល»។

ហើយលោក Brian Katulis ដែលជាសមាជិកជាន់ខ្ពស់នៅវិទ្យាស្ថានមជ្ឈិមបូព៌ា ក្នុងទីក្រុងវ៉ាស៊ីនតោន បាននិយាយថា៖ «អ៊ីស្រាអែលចង់បានការផ្លាស់ប្តូររបបមួយចំនួន ខណៈពេលដែលសហរដ្ឋអាមេរិកមានភាពស្រពិចស្រពិល និងមិនច្បាស់លាស់ អំពីអ្វីដែលជាគោលដៅចុងក្រោយរបស់ខ្លួន»៕